Ayub 28 - Eipomek

“Kel weik bikina deiyok ning ara, ninye arye kum ebuka kel biktinge,” nyabuk yupu

¹ Ayub birye, ayupu tamubuka nyabuk. Nun nirya akunum bikupu. Dengna weik ning, el si perak ara, aning tuku pum tam uplyeba, ‘Dopropnuyabʼ tenen, palinak aulule. Tonda, dengna weik ning, el si emas ara, tuku pum arye akunum palibikirye, ‘Emas ap, malye tuku ap, tabakuka ulye ning ara, ‘Malye ning kum kipdeipnamapʼ tenen, emas dobuka, uku dongonak ati, ninye arye kintinilinyake.

² Kat ning el si ara besi, aning babye, ninye arye tuku noutam palibuka donyake. Tonda, yuk yala kat ning, el si ara tembaga babye, tuku pum bukni, kat keil pum tam arye palibikirye donyak bukni, adeiyok ning doprobikirye, ‘Pia teleb kipdeipnamapʼ tenen, uku dabikceba, keil pereng-pereng nyaplya deice arye, talye keil ara, diplyeba, pia teleb ninguk, el si ara tembaga tuba auplyopura, aning ton kintinibuka dolonyake.

³ Wininyaka ati, ‘Dengna weik ning emas do, perak do, tonda kat ning ara, dan sukum ulul do?’ tenen, sik tuku palina kel weik nang arye, weik tuku pum wekikcak arye, pia kunukuk noutam ara, wekukabikirye, otam, atam nirya, weisa upmaca arye elinyake. Winibikirye, tuku amu noutam wekukabikirye, aubuk ning nirya elinyake. Asukum ara, kunukulye tam arye, ninye wekukabikirye, dengna weik keil ati, enyake.

⁴ Anang arye, pia pera, ninye babye ton una kumak, tonda ninye arye yanibuka, bana pia kumak ara, sik tuku palina deiyok nang arye, asukum sik pil donyake. Amutuku-amutuku talye banyak nang ara, sik tuku pum noutam pil donyak nang kum elinyaka ati, pia kum teninyake. Diba, sik tuku palin pil dona deiyok nang ara, lelim nyan ning pia kumak, dimbulung ubuka wekikirye, ‘Sakuka opsilyakʼ tenen, tapu arye, sik nong kirikdongobikirye, sikda apil donyake.

⁵ Tukwak mutuku, im sirya, mutuku sirya nirya ara, tuku deice arye din palule. Ninye arye, aning libuka dinyake. Bukni, sik tukwak mutuku ubuk ning ara, tuku ap, keil ap nirya palibuka, talye-talye kibuka batakanyake. Winibikceba, tuku amu ubuk ning nirya ara, palibuka batakikceba, talyeuk daulule.

⁶ Tuku amu tam ubuk keil, el nong ara, dengna pia weik keil, el si ara Lazurit, eibikirye, dolonyake. Tonda, yuk keil ara, akunum tekikirye, tuku sice buklobikirye, dengna weik ning, el si ara emas, pia teleb ning ton eibikirye, dolonyake.

⁷ Sik tuku pum tam palina deiyok nang arye, pil donyakak ara, tuku amu tam ulula ati, im tam lakuka balamle maka, el si ara, Bib maka ara, amutuku ton pia kum elilula ati, kum biktue. Tonda, maka Bip babye, amutuku deice tamuk balula ati, tuku amu tam ara, el asing arye eibuka, kum bikilule

⁸ Aning atonun, bai tam kam ulamle ning, yu weik kus, el si Singa kus ap, tonda yuk tukwak kam ulye ning, yu weik ning yuk-yuk ning babye, amutuku noutam balamik bisik ara, nibuka ati, aning nirya ara, ton yanibuka kum banyake.

⁹ Bukni, sik tuku palina deiyok nang arye, kat weik keil bukamukbuk, palinyake. Tonda, weik mutuku kon babye, ‘Dengna weik keil, el amu tam ulul do?’ tenen, amutuku deiyok nirya ara, tuku palibikirye, kamultonyake.

¹⁰ Ninye arye amutuku amu tam palibuka, weik keil bukamuka noutam ton, ninye bisik bana ati, palibuka deibikirye yabikcopura, akeil nong noutamak ara, dengna weik kat ning, yala-yala nirya ara, sik asing arye eibikirye, palibuka dolonyake.

¹¹ Tonda tuku amu tam ara, mek kutuka yangalyak babye, ‘Yata ning aupmal do?’ tenen, wekikcak arye enyake. Winibikirye, tuku pum tam pia domamlye ning, dengna weik ning yala-yala nirya ara, lak kiplyeba, weikcak arye, sik asing eibuka bikinyake. Aning babye doprobikirye, dirinak delinyake.

¹² Bukni, weik kel bikina deiyok ning ara, dan mutuku arye eibuka kel biktibye do? Tonda, yata mutuku noutam eiptibirye, ‘Teleb un ning ara, deiyok aniʼ tenen, bikin ning nong ara, yuk nang arye peterepsitingba, kel biktibye do?

¹³ Weik kel bikina deiyok ning, nong ululak ara, tukwak nang arye, ‘Amutuku bitibyopura, adeiyok ning eibuka biknamabe,’ kum tenipmanto unyake. Dipkoprob na kanye ara, ‘Ninye unyap mutuku, im sirya, mutuku sirya nirya noutamak ara, adeiyok ning kum ulule,’ tenepne.

¹⁴ Tukwak mutuku tuku amu tam mek banmalirye, mekwen deibukak ap, tukwak mutuku bukni, weik laut mekwen deibukak nirya ap ara, nyasinyake. “Weik kel bikina deiyok ning ara, nun dam kum ubuk,” nyasinyake.

¹⁵ Tonda, na kanye ara, aning atonun, weik kel bikina deiyok ning ara, emas teleb ning deice arye, ninye ara kum dekdatinge. Tonda yo bok deice arye kum dektinge. Tonda, dengna weik ning, el si emas ap, perak ap, weik tonun bulubuka deibibyakarye, ‘El ikin ara, yata barye do?’ tenen, timbangan deice deibipyopura, aning kel biktibirye, areptibya babye, aning nirya deice arye, weik kel bikina deiyok ning kum dektibye.

¹⁶ Aning atonun, mutuku si Ofir mutuku, dengna weik ning, el si emas, pia teleb ning ulyak binuka, sik emas doproptibye babye, aning arye weik kel bikna deiyok ning ara, kum dektibye. Tonda, dengna weik mirin keil, el si ara permata krisopras ap, urasin teleb keil, im kalum atonun ning, el si ara permata lazurit ap, auptu ura, dobuka areptibya babye, aning deice arye, weik kel bikna deiyok ning ara, kum dektibye.

¹⁷ Emas ap, urasin pia lek ning, pereng-pereng alamle ning ap deice arye, areptinga babye, weik kel bikna deiyok ning ara, kum dektinge. Tonda, dengna weik keil ap, emas ap areptibya babye, aning arye, weik kel bikna deiyok ning ara, kum dektibye. Aning ara, dipkoprob kum winipmanto.

¹⁸ Tonda, aning atonun, dengna weik ning, yuk yala ning ara, sik si merjan ap, kristal ap, aning arye ninye ati dekenyak bukni, aning ara, si kum nyapnuyabe. Tonda dengna weik ning, laut mekwen pum tam arye dolonyak ning, el si ara mutiara babye, dengna weik ulul bukni, aning-aning nirya arye, weik kel bikna deiyok ning ara, kum dektibye. Aning dekenyaka atonun, kum ulule.

¹⁹ Tonda, mutuku si Etiopia mutuku noutam arye, urasin pia teleb poron keil, el si ara topas, tonda Krisolit ara, dengna weik ulul bukni, aning ap, tonda pia teleb emas ap arye, weik kel bikina deiyok ning kum dektibye. Ninye kanye teninyap ning ara, topas keil ap, emas teleb ning ap, dekenyak ning ara, mitikto uka bukni, weik kel bikina deiyok ning ara, el dengna ara, kum nukmanto ati, aning ara atonun kume. Weik kel bikina deiyok ning ara, pia kum dektibye.

²⁰ Ati ara, weik kel bikna deiyok ning ara, dan mutuku arye yangalul do? Tonda, ‘Teleb winin ning ara, deiyok aniʼ tenen, weik bikin ning, nong ara, dan sukum arye yangalul do? Nun nirya ara, walwale tenepne.

²¹ Na kanye ara, tukwak mutuku kam unyak nang arye, weik kel bikna deiyok ning ara, kum eibuka kel biktibye. Tonda, im deice lakuka balamle maka arye, yala-yala nirya babye, sik dam ton, aning uptua babye, sik ton kum elinyake.

²² Akunum diamik nang banyakak, amutuku si ara, Abadon mutuku ap, tonda Maut mutuku ap, amutuku noutam unyak ning ap arye, “Nun babye weik kel bikna deiyok ning ululak ara, nun walwale,” nyanyake. Tonda, yuk mutuku nang arye, ayupu talye peterelamikba, mitik tonun ton kekelamupu bukni, ‘Aning ap, amutuku ap ara, aning-aningʼ tenen, nun babye walwaluk unyaba ati, kum kel bikinyabe. Ayupu nyanyak mutuku nang babye, talye nong kum upnamle ninguk kekebikirye, talye nyanyake.

²³ Bukni, na kele. Weik kel bikna deiyok nang ulyak ara, Allah eluk bikuk. Tonda, Allah elcuk, ‘Weik kel bikin ning ubukak ban bisik ara, asukum, anyeʼ tenen, bikilule. Yuk ning ara, pia ton kum teninyake.

²⁴ Aning ara, Allah elda mutuku sirya, im sirya nirya moubuka dilule. Im deice tam ap, tuku amu tam ap, anoutam ulul ning nirya ara, Allah elcuk moubuka elilirye, bikilule.

²⁵ Allah arye, dua noutam balamle mok ara, ‘El ikin ara, winibuka-winibuka upnamle,’ tenyamuk touk, akunum kintinip deibuk touk ulule. Tonda Allah aryuk, ‘Dua noutam unamle mok ara, winibuka-winibuka wininmalya ani, winibuka cepnamleʼ tenen, ‘Kintinip deipyeba, aunamle,’ tenyamuk ning babye, elcuk bikamuka ati, elce tenyamuk touk, akunum kwepdeibukba dacelule.

²⁶ Allah arye, ‘Winibuka mok ceplirye, tukwak mutuku deice sakanamle mutuku ara, ani,’ tenyamuk touk kwepdeibuk. Tonda, Allah arye, ‘Bebeya ap, liman nyana ap, asukum aunamle,’ tenyamuk touk, sik bisik ati kintinip deibuk touk, tuba aulule.

²⁷ Aning-aning nirya ara, akunum kwepdeibukce, aning nirya dipdeyukba, “Asukumuk unamle. Winibuka, winibuka unamle,” nyapdeibuk touk, tuba aulule. Diba, Allah arye, “Aning nirya ara, winibuka unamle, asukum unamle,” nyapdeibuk touk, tuba aulule. Aning atonun ton, Allah aryuk, ‘Weik kel bikna deiyok ning ara, winipnamle,’ tenyamuk touk, tuba aulule. Aning-aning nirya ara, yuk-yuk bokuka kum upnamle.

²⁸ Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.