Ayub 27 - Eipomek

Ayub birye, dukdongobuka nyabuk yupu

^1-2 Ayub birye tonap, dukdongobuka nyabuk yupu ara ani. “Kam una deiyoknye Allah bira, dipkoprob pia kam tuba ulule. Aning atonun, nara dipkoprob tilila yupu pia kum nyanamne. Bukni, Allah el si deice arye nyapne. Allah ara, weik erebuka, aning-aning nirya talilirye, pia mikip weik deiyoknye ulul bukni, na kanye ara, Allah elce na deice ara, dipkoprob teleb un ning ton, kum arenulula ati, na kanye talima noutam ara, uk dinilyeba, ikin weik unulule.

^3-4 Na dipkoprob nyapne. Allah el Pia Teleb, Lek Dip Kanye arye, na isin arepnuka deice arye, kam tuba unune. Na nong kam tuba unamne talak nirya ara, na si bambol deice arye tilila yupu ton kum nyanamne. Tonda, na si tang deice arye, talye yupu ton kum nyanamne.

⁵ Ati ara, anggun winilye nang arye, nati nyapmanulum yupu ara, “Anggunda, dipkoprob yupu nyapmanulume,” kum nyapsitinye. Nara, aulamnya ani, aminyan talak dipnamne talak babye, “Nara malye kum winipse,” tuba nyanamne. Atonun, deiyok kum upmalibuk, “Nara malye winipse,” pia kum nyanamne. Dipkoprob ninguk tenipnirye, nyanamne.

⁶ Na kam tuba unamne talak nirya ara, “Allah arye, ‘Aning ara wininamlume, aning ara, pia kum wininamlume,’ nyapdeiamsuk yupu ara, moubuka taleamsirye, malye winin ning ara, kum winilamse,” nyabuka, tuba laka nyanauk unamne. Aning ara, kum bataknamne. Tonda, na kanye talima noutam babye, ‘Anda malye ulamlume,’ nyabuka, kum wenenulule. Na kanye ara, nara pia telebuk unune.

⁷ ‘Teleb ning ara ani,’ tenepne. Ara, Allah elce nati, yu tenenululnye bira, “Anda malye ulyame,’’ nyabuka wenepnamlarya. Tonda, Allah arye nati, malye kinululnye biti, “Anda diksukum kum winilyame,” nyabuka wenepnamlarya. Ato ning ara, Allah arye, ‘Aning ara, wininamlume, aning ara, pia kum wininamlume,’ nyapdeipsuk yupu ara, pia kum talinyaka ati, malyeuk unyaka ati, Allah arye anang wenepnamle!

⁸ Tonda, sik malye winin ninguk talibuka wininyak nang ara, Allah arye anang ati, weneplirye, malye kibuka oblyopura, akunuma. Ati, sikce “Se, ‘Aning ton winiptibyeʼ tenen, patapsile,” nyabuka tuba teninibikirye, kum nyanamake. Adiparyuk dipnamaka ati, sikce aning pia kum winiptinge.

⁹ Sik anang dam ikin ning weik areplyeba dorobikirye, kanye imun uplyopura, engenmakce talak ara, Allah arye kekepnamle do? Kume, ara pia kum winipmanto nyapsine.

¹⁰ Dipkoprob sikda, ‘Allah nun like. Elce nyasulul yupu pia kum kekenamabe,’ tenenyak nang ara, sikda Allah ati, dipkoprob kanye kum delinyake. Tonda, sik anang arye, ‘Allah ati, kanye deibipyakarye, tuba moronamap do? Kum do?’ tenenyake.

¹¹ Narye anggunti, Allah el mikip weik ulul ning ap, malye unyak nang ati, weik wenelul ning ap, narye lak nyabuka peterepnusine. Allah ara, weik erebuka ulirye, aning-aning nirya talibuka, mikip weik deiyoknye birye, ‘Winipnamne,’ tenelul ning ara, narye anggunti, lak nyapnusine.

¹² Bukni, dipkoprob ning ara, anggun winilye nang arye, Allah ulye ning akunum eliluluma ati, anggun babye akunum biklume. Ati, yata deiyok ati, anggunce talye-talye yupu nyalulum do? Anggunce nong kum upnamle yupu deice aryuk nyabuka, nati wenenululum do?

Allah arye, sik pia malye-malye unyak nang wenepnamle ning ati, Ayub birye, lak nyabuk yupu

¹³ Ura, Ayub birye, ayupu ton dukdongobuka nyabuk. Allah ara, weik erebuka, deice tam ulirye, aning-aning nirya talibuka, mikip weik ulya deiyoknye birye, sik mania kanye bobuka, malye weik unyak nang ati, wenenamli ning ara atia. Tonda, sik mikip nang arye, sik amu tam talye bona utotoa talina kum nang deice, ikin weik delinyak nang ara, Allah arye sik anang ati, weneplirye, dengna arenamle ning ara, nyapnusine.

¹⁴ Malye unyak nang arye, sik mapu diamice bukni, yupa weik uptinga babye, sik ni yapu ara, mal olanak arye, obikceba dibinamake. Tonda, sik mapu yupa weik tonun deiptinga babye, anang sik din ara, tuba-tuba sukunamla ati, din pia panauk unamle. Sik din nirya ara, kum danamle.

¹⁵ Amalye unyak nang arye deiamice mapu, ton nang ara, yu nang arye kum obikceba, tuba kam unamak mapu ara, aminyan talak kanye imun weik uk dilya deice arye, anang babye dipnamake. Aning deice arye, akunum dibikcopura, sikce domikca ani, bataklamaka youwak kilapu arye, sik mapu, winiryuk dipmakce nang ati, ‘Se, bicoeʼ tenen, malye kanye bobuka, kum engenamake.

¹⁶ Tonda, sik malye weik unyak nang arye, pia dengna weik ning, el si ara perak, tuku buta kum nukmanto, pia weik tonun kilamle touk, sikce perak ton dekicak arye, ‘Naʼ tenen delina ati, delilamiceba, weik tonun ton welepnamle. Tonda, ninye arye, kira tuku palibuka, weik tonun tabakuka delamak touk, sik teleb baju babye, weik tonun dekuka, tabakikirye delilamikceba, weik tonun ton welepnamle.

¹⁷ Bukni, sikce dengna weik ning perak ap, baju ap, pia weik tonun, ‘Naʼ tenen deiamica ara, sikcuk kum dolonamake. Dipkoprob ning ara, ani. Sikce delilamak teleb baju ara, diksukum kibuka, telebuk unyak nang arye, abaju dobuka ongonamake. Tonda, amalye unyak nang arye, perak weik tonun delilamak ning ara, yuknye biryuk dolonamle. Elda malye winina pia kum aryuk, pia talima amu kibuka neplirye, diksukum ululnye, elce dobukaplirye, el ninguk kipnamle.

¹⁸ Malyeuk wininyak nang ara, sik dobuka unyak aik ara, dudukai aik domlya ani, pun deiplirye, lyubuka saklamle touk, upnamle. Tonda, sikce donyak aik nirya ara, minopce lyuplyopura, kum danalule! Winipmanto ara, ninye arye, sik wa win dam aik, tia doltakne aik domikcebuk, min arye lyuplyopura, kum danalamle touk, sik aik babye, atonun upnamle.

¹⁹ Ati ara, sik malye winin ning talibuka, malye weik wininyak bona talin nang ara, wi taliplyeba, kanye bona kumce, talye manauk unamake. Bukni, sik anang ara, mapmaca ani, bukikce talak ara, sik talibuka unyak bona talin nang nirya ara, akunum kum danamle. Winiplyeba, ton ap tamubuka aning nirya kum talibuka unamake. Mapmaca ani, bereklyopura, beren tam talak bukikirye, dilamikcak, aning nirya akunum tunim apnamala atia.

²⁰ Ikin weik talye karin arye sik dam yalyeba, ilil pia weik unamake. Winipmanto ara, mek opnin yangalamle touk, ubuka yalirye, anang nirya ara, dobuka bobinamle. Lukunyan noutam ara, weik kumanya, talye karin arye dobuka yalirye, koulyamlye yo tobuka talye bobalamle touk, sik malye weik wininyak bona talin nang ara, adiparyuk atonun bobinamle.

²¹ Aning atonun, nun mutuku noutam ulamle touk, keting panalyangan tam arye, mikip weik kumanya yalirye, sik aik noutam unmacebuk, anang adiparyuk tomobuka, pera bobinamle. Winiplyeba, sikda kum danamake.

²² Allah arye sik anang ati, tuba bico kum tenelula ati, elce mikip weik kumanya areplyopura, akumanya mikip weik arye doplirye, anang ara, tomobuka donoknamle. Sik anang arye, ‘Se, mikip weik kumanya arye opsilyakʼ tenen, sik anang ara, ‘Adibaryuk yukak bikbik abuka bindopnuyapʼ tenen, ilil weik upliba, yuk ning ton tenina kumce, sik lyelana ati, bikbik abuka, yuk pera sukum bindopnamake.

²³ Anang sakuka poulbikcopura, winipmanto ara, weik buknak arye, el kanye deibuka, el taruk tatang boklirye, anang ati, nalibuka akutulule. Abona talin nang babye, dan tam banmacak nirya ara, amikip kumanya arye dopnamle deice arye, “Anggunda, pia malye ulamlum nanguk ululume,” nyabuka, yep-yep nyanamle.