Ayub 26 - Eipomek

Ayub birye tamubuka, Bildad biti, nyabuk yupu

^1-2 Ayub birye tamubuka Bildad biti nyabuk, “Ance na kanye pia mitang upnuk ning ap, na nong mikip kum upnuknye biti, ance na talima kwadibuka akunum melipnulum do? Kume, ance nyanilyam yupu ara, kanye delin yupu pia kume. Na taruk ara, pia mikip kum upnuk bukni, ance nati, kum melipnulume.

³ Tonda, tenipdenulyame. Ance nati, yupu weik tonun akunum nyapmanuluma deice arye, kel weik bikina deiyok yupu arye melinilyam do, kum do? Ance nati, ‘Elda pia walwalnye ulule,’ tenenilyam bukni, kel yupu deice arye min kum melipmanilame. Ance nati, ‘E, teleb winin ning ara, ani. Winibuka winipminyopura, teleb kinamkilarya nyabuka, peterena teleb yupu weik tonun min kum nyapnutume.

⁴ Ati ara asipdeikine. Yata kelnye birye, anti, ‘Nyapnulyame, nyapnulyame,’ nyabuka, nyapdekukba, adeice arye ance nati, akunum nyapmanilam do? Tonda, yatanye birye, el kanye tenen ning arye, ‘Anda ayupu nyapmince, anye bira peterepnulyame,’ nyapkuka ati, el yupu dobuka nyapmanilam do? Ayub birye, Bildad biti nyabuk.

Bildad birye, Allah el mikip weik ulye ning ati, laka nyabuk yupu

⁵ Ayub birye el yupu nyabukura, Bildad birye tamubuka Ayub biti, ayupu nyabuk. Akunum diamik nang wekelbanyak mutuku unyak ninye kanya nirya arye, Allah ati tenebikirye, ilil ulirye, yok sirim talilirye, berber anyake. Tonda, tukwak mutuku amu tam, weik mekwen deiamuka ap, amekwen pum tam unyak ning nirya ara, Allah ati tenibuka, lukdakirye, ilil weik ulule.

⁶ Akunum diamik nang wekelbanyak mutuku, el si ara Sheol mutuku, noutam unyak nang ap, amutuku noutam ulul ning nirya ara, Allah arye tuba elilule. Tonda, akunum diamik nang, sik kanya unyakak, el si ara Abadon mutuku, aunyak sukum ara, Allah elce aning nirya laka kibuka elilule. Yata mutuku do nirya ara, Allah el dam ara, kum lelipmanto ulula ati, elce elinauk ulule.

⁷ Aning-aning min kum uamuk talak ara, deice tam lo weik ubukce, lo ubukba, Allah elcuk, itam ara, im kwepdeibukce, itamuk bibikdeibukba, tuba aulule. Aning atonun, minop talak weik lo ubukak ara, tonok ning babye, kum uamuk bukni, anoutam ara, Allah arye tukwak mutuku, im sirya, mutuku sirya nirya kwepdeibukce, asukum ara, tuba aulule.

⁸ Allah arye im noutam bukni, mirin dua noutam ara, mok weik tonun kintinip deibuk bukni, amok ikin arye adua ara, kum barabuka sakmanto ulule. Allah arye teneplye talakuk, mok celule.

⁹ Allah ara, aning-aning nirya talina deiyoknye ulula ati, el dirina weiknye bulul ning, el si ara tahkta, aning ara, ‘Ninye do, malaikat do, eipnamniakʼ tenen, el bulye tahkta ara, dua weik tonun deibukba, adua balye tam ara, el tahkta deice bulule. Akitibuka deiamuk dua arye, el bulyak lelilongolule.

¹⁰ Tonda, weik laut mekwen deibuka deice ara, Allah elce wilin ning akunum kintinip deibuk. Ara, kunukukak arye, dirina doprobukce, bokuka kuna yuk, dirina yuk, kibuka bokeibuk. Bikina ati, aning bitinye ara, wililonak ati, bokeibuk.

¹¹ Allah el mikip weik arye, im tam lo kintinibuka deibuk ning tunim ana ati, baripdeibuk ayukumna kintinip deibuk ning ara, Allah dam yalirye, wenen yupu nyaptopura, ayukumna yo nirya ara, ilil weik ati, lulukulule.

¹² Minop talak arye, weik laut mekwen nirya ara, mikip weik ulamuka ati, welepmana, koulukmana, kilamuk bukni, Allah el mikip weik arye, weik laut mekwen nirya deibukak ara, ‘Tunim abuka asukumuk deiptuʼ tenebuk. Tonda, Allah el kel weik bikilula deice arye, amikip weik ning, laut mekwen noutam ulul yu kwatima, el si ara Rahab babye, obuka kum kipdeibuk.

¹³ Atonun, im noutam uamuk dua nirya ara, im noutam uamuk ning nirya leleipdongamuk bukni, Allah el isin arye pubuka deice arye, adua nirya kipdobukce, im yoka diamuk ulule. Tonda, Allah el mikip weik taruk arye, weik laut mekwen pum tam ulamuk yu kwatima, el si ara Naga babye, talibuka obukce, kum kipdeibuk.

¹⁴ Bukni, aning-aning nirya laka nyapmakin ning ara, mikip weik aulul bukni, ‘Allah el mikip arye pil dolul ning ara, akunum,’ tenena kume. Aning nirya ara, mitik tonunuk nyapmane. Nun ninye arye, Allah el winilye ning ara, mitik tonunuk kel bikinyabe. Winipmanto ara, Allah arye winilul ning ara, ninye arye, nun amul pum tam ara, mur-muran yupu uk nyasinyak ning atonun ulule. Nunce elinyap ning ara, Allah el mikip weik ulye ning kel bikina ati, laka kililule. Weik ning ara, kum laka nyapmanto. Allah elda, pia mikip weik arye winilul ning ara, nunce kum kel biktibye.