Ayub 24 - Eipomek

Ayub birye, dukdongobuka nyabuk yupu

¹ Allah elce malye unyak nang ati, yupu bokeiplirye, pia malye unyak nang ati, pia wenebuka opnamle talak ara, yata deiyok ati, elce, “Asum ara ani, atalak ara ani,” nyabuka, kum laka nyasulul do? Aning atonun, Allah arye, nyasulul yupu, moubuka talinyakce, diksukumuk teleb unyak nang mutuku-mutuku nirya babye, Allah arye, pia malye nang ati, yupu bokeiplirye, anang ati wenebuka opnamle talak ara, ‘Asum anyeʼ tenen, kum biktinge. Sikce atalak kum dinyaka ara, yata ati do?

² Malye unyak nang arye, yuk nang wa wina ati, tuku wililongonak ara, lak bikina ati deiamikce ning, kisikuka yukak deibikirye, atuku tonap, alabuka ubula doprobikcopura, sik tuku ara, lo weik kilonyake. Tonda anang aryuk, sikce yuk nang domba basam wein sukum nirya binuka, alabuka ubula dorobikirye, atuku ara, sik anang talenyak domba basam dobuka deibikirye, weinyake.

³ Sik ni yapu akunum dibikirye, batakiceba kwaknamnanye, el bidamnye weilul keledai basam ati, sik malye unyak nang arye, alubuka doprobikirye, libuka bobanyake. Tonda, amalye nang aryuk, youwak kil ati, “Anda nunti, “Yo bok arepnutume,” nyabuka, moropsulumba, arebupu ning ara, tamubuka min kum arepmasila ati, amoropmasulum ning enamsilam talak ara, nunce arepkupu ning pununa ati, nunce an sapi basam dobuka, nun aik dam deipnamabe,” nyabuka, alubuka doprobikirye, delilbanyake. Aning wininyaka ara, pia malye wininyake.

⁴ Sik amalye wininyak nang aryuk, sik talye bona utotoa talina kum nang ati, “Nun banamap bisik ara, anggun ton abisik ara kum bitume. Anggunda kisikdoplulume!” nyabuka, yupu sekelongonyake. Ato ning weik tonun tuba winiyaka ati, sik bona utotoa talina kum unyak nang ara, ‘Sik yu nang arye, ikin weik ning, nun nong deice deipsicakʼ tenen, sik mutuku noutam ara batakuka, yukak bikirye, dungnubuka unyake.

⁵ Ati, sik talye bona utotoa kum nang ara, winipmanto, bai tam ulye keledai basam, el din ati, ‘Na dipnaman ning ara, dan sukum ulul do?’ tenen, pataplyopura, mutuku noutam elbalamle touk unyake. Aning atonun, sik talye bona utotoa kum nang arye, ‘Se, nun mapu, sik din ning elbinamapʼ tenen, pataplyopura, mek pia kum, pala weik mutuku bikirye, dana-dana tam dipdekirye, talye palamle ning eibikcopura, aning boyanuka arebikiba, sik mapu arye dinyake.

⁶ Abona talina kum nang ara, sik imun kanye bobuka unyak nang ati, sik anang wa tuku ara, kum talinyaka ati, yuk nang sik wa win sukumuk binuka, awa tuku deiyoknye birye, linmalya bataklye ning ara, sik anang arye, aninguk lilolbanyake. Tonda, sik talye bona utotoa kum nang arye, sik malye-malye unyak nang, sikce talenyak anggur wa, wiamikcak bikcopura, anggur deiyoknye birye dakdoplirye, bataklamle ning ara, dakukabikirye, bulubuka delinyake. Sik wa tuku ap, din ap ara, pia kum ati, wininyake.

⁷ Sik talye bona utotoa kum nang ara, lukunyan talak, buppu kibuka manyak ning, el si ara selimut, pia kum ati, lukunyan noutam nirya, buppu kibuka kum maptinge. Arukna unmalibuk manyake. Tonda, teleb buppu baju ton kum talinyaka ati, nong bananguk unyake.

⁸ Atalye bona utotoa kum nang ara, mutuku dam unmakiba, weik mok ceplirye, sik nong deice mok oplyeba, moul weik ulule. Winiplyeba, anang sik aik pia kum ati, moul weik uplyopura, ‘Mitik tonun ton, buppu kipsutueʼ tenen, pataplyopura, bai tam keil deia uk manyake. Tonda, kanye imun upliba, keil deiya pum tamuk wekelbanyake.

⁹ Tonda, pia malye winin nang arye, sik ni ap, sik nin ap, pia kum ulamdiceba, kwaknamne mapu ara, alubuka dolonyake. Ara, yuk kilapu arye, kwaknamne mapu ati, moum yung tuba arebice talak ara, mikip arye amapu dolonyake. Tonda, aning-aning kum talenyak nang, talye bona utotoa kum nang arye, yo bok pataplyopura, malye nang dam binuka, “Tia ati arepsutume,” nyabuka morobikiba, arebikcopura, dolonyake. Bukni, aminyan talak, sik bona utotoa kum nang, ayo bok tamubuka arepmanto kum ubikcopura, sik malye winin nang arye, sik mitik mapu ara, alubuka dolonyake. Ara, sik ning doprobicopura, abona utotoa talina kum nang arye deibikce mi ara, aning pununa ati, alubuka dolonyake.

¹⁰ Bona talina kumce, talye bona utotoa kum talinyak nang ara, sik baju kum ati, talye nong bananguk banyake. Tonda, sikda din patanmalibuk, din dina kumce, sik adiparyuk, yuk nang arye talenyak gandum wa windam bikirye, gandum duk binuka dakicak arye, gandum duk teikuka bobanyak bukni, aduk babye, sikda kum diptinge.

¹¹ Aning atonun, bona utotoa talina kum nang arye, zaitun yo duk dakuka tekikirye, azaitun yo duk arye minyak zaitun memenyake. Tonda, anggur duk dakuka boyakirye, anggur mek memenyak bukni, sik apil donyak nang ara, bona utotoa talina kum nang ara, mek patanmalya babye, amek ara, sikda kum diptinge.

¹² Weik asik dobuka unyak mutuku noutam babye, sik talye bona utotoa talina kum nang ara, ikin pia weik unyake. Ninye arye obikiba, dila weik ulamle nang ap, ninye dipmanto unmakce nang ap arye, “Se, nun ni Allah, kwetep deipsutumce, melibuka lyepsutume!” nyabikirye, malye nyabuka ngalukikirye, engebuka moronyake. Amutuku unyak nang nirya arye, alelim kekenyake. Bukni, na kanye ara, sik anang arye engebuka, moronmakibuk, Allah arye sik moronyak ning ara, moubuka, kum kekelule. Tonda, elce sikti, tuba tamubuka, teleb kum kililule.

¹³ Tonda, sik pia malye ninguk talibuka wininyak nang nirya ara, ‘Dirina ara, nun lik,’ tenebikirye, lukunyan noutamuk kanye deibuka, talye lubakibukabakirye, pia malye-malye winin ninguk wininyake. Anang ara, keting noutam talak ara, yuk nang banyak bisik ara, kum banyake. Ton ning ara, sikce, ‘Dirina upmal talak ara, nun lik,’ tenenyaka ati, dirina wamlye bisik ara, yuk nang arye bikinyak bukni, amalye nang ara abisik kum bikinyaka ati, abisik ara kum banyake.

¹⁴ Wininyaka ati, winipmanto ning ara, ninye onanye bira, mapmalya ani, min kum berekmalye talak arye, minopce bulule. Buklyopura, adiparyuk, sik talye bona utotoa talina kum nang ap, aning-aning kum ati, pia patalye nang ap, talye luparabuka olbalule. Tonda, min kum berekmalye talak arye, minopce bukmalirye, ubula don nang ulamaka atonun, yuk nang ning ubula dolonyake.

¹⁵ Aning atonun ton, yuk nang akunum domik kilapu bukni, ubula yolulnye bira, ‘Se, minopce iniptuba, lukunyan noutam arye, yuk nang, ninye akunum dobik kilapu ara, ubula yoptinyeʼ tenen, moubuka dilule. Tonda, anye bira elda, ‘Yuk nang arye, na urasin eipnikirye biknicakʼ tenen, el urasin deice ara, kalun ning arye, lelipdongobuka, balule.

¹⁶ Sik pia malye winin ning talibuka wininyak nang ap, ubula don nang ap ara, lukunyan noutam aryuk, yuk nang aik bublan kukuka wekikcak arye, ‘Sik teleb bona dansukum dungnubuka deibik do?’ tenen, moubuka dilenyake. Keting noutam ara, ‘Dirin ati, eibuka biksicakʼ tenen, duknunyake.

¹⁷ Wininyaka deiyok ara, ani. Aning ara, pia lukunyan noutam ara, pia malye winin ninguk uptinga ati, atalak ara, kanye deibuka unyakce, ‘Lukunyan ara, beren tam talak atonun usulule. Lukunyan ara, kunukulula ati, aning ara nun kanye pia losulule,’ tenenyake. Yuk ninye ara, ‘Se, lukunyan noutam ara, yata ikin ning, nun dam yanamsil do?’ tenen, ilil asa arye unyak bukni, amalye wininyak ninye ara, lukunyan noutam ulamle kanye imun ning nirya ara, sik akunum bikamika ati, sikce aning ara, kanye deibuka wininyake.

¹⁸ Malye winin ninguk, talibuka wininyak nang ara, mek weik tonun obuka yangalirye, caknam ning minopce, mek arye bobalamle touk, anang ap, sik ning ap bobalule. Tonda, sik anang arye talinyak tuku ara, Allah arye sik wenena ati, atuku malye nyabuka sulule. Winilula ati, anggur tapu wa windam pil don ninye ara, anang arye talinyak anggur wa win dam, pia kum banyaka ati, kum dalirye, porobuka koluplirye, mun-mun dakalule.

¹⁹ Winipmanto ara, piriripna dolamle mok, el si ara salju, deiamlyeba mok cebuka winilamlya ani, dou maplirye keting deiplyeba, keting buppu weik uplyopura, adiparyuk asalju ap, amutuku mek ap nirya ara, kum danalamle touk, sik malye winin ninguk talibuka, wininyak ninye ara, akunum dibikiba, tuku pum bisik dongobicopura, adiparyuk tunim anyake. Akunum diamik nang wekenyak mutuku, el si ara Sheol mutuku wekikcak arye, tunim anyake.

²⁰ Anang diamik kilapu babye, anang ati, tonap pia kum teninamake. Adiparyuk luba kimanake. Anang dibikcopura, sik nong ara, kuluma aryuk dipnamake. Yuk ninye ara, amalye nang, sik si tonap, si sibikiba, pia kum kekenamake. Winipmanto ara, yo tikamlya ani, ikin ati yo koproba kwinipnaba, tukwak poulbikirye malamak touk, sik anang babye, atonun upnamake.

²¹ Aning nirya winipnamaka deiyok ara, anang arye youwak kilapu, sik deice ikin ning delilamaka atia. Tonda, sik mapu delina kum kilapu babye, sik deice ikin ning deibuka, malye kililamica ati, aminyan talak sik babye, pia bico tenena kum ati, kum danamake.

²² Sik mikip weik nang ara, ‘Nun kam unmap talak ara, lo weik tuba aupnamsileʼ tenenyak bukni, Allah el mikip weik arye, aning-aning nirya talibuka ulula ati, el tenyamuk talak akunum uplyopura, mikip weik nang nirya obuka, kum kililule. Allah arye, ‘Aning ara, akunum teneplye talak, el taruk ereplyopura, sik malye ninguk wininyak nang ara, adiparyuk dipnamake

²³ Anang sikce, ‘Nun tuba teleb kibuka unamapʼ tenena deiyok ning ara, Allah arye tia ati arelul bukni, elce, ‘Amalye wininyak nang ara, yata wininamak do? Teleb ninguk wininamak do, malye ninguk wininamak do?’ tenen, anang nirya ati, tuba-tuba kalikuka dinauk ulule.

²⁴ Anang sikda, tia ati teleb kibuka unyak bukni, dotalak ara, tonap tuba kam kum unamake. Akunum dibikcopura, pia tunim apnamake. Winipmanto ara, dolkua tia ati, pabuka tikmalya ani, mun-mun daklamle touk, sik anang babye, atonun upnamake. Tonda winipmanto, gandum duk moulul bukni, el yateng sekicopura, el yok ap, nong ap, duk ap nirya ara, koluplirye, sisal selule. Aning atonun, sik anang babye, Allah arye akunum tenyamuk touk, dotalak ara, sik nirya minopce kum danamake.

²⁵ Narye arup talak, ‘Awinilul ning nirya ara, winibuka winipnamle,’ nyapmasin yupu nirya ara, anggunce, ‘Aning ara, dipkoprob kum winipnamtue. Anye birye nyapmasil ning ara, talye yupu uk nyanmasile,’ tenepmunyopura, yatanye birye, ‘Aning nirya ara, kum winipmanto ning nyabuka, nong koprop nirya ara, elce laka nyapsutuba, el tenelul ning ara, diba teneptibye do? Na kanye ara, aning ara kum nyapmanto. Arup arye nyapmasin ning nirya ara, dipkoprob nong upnamlarya, nyapsine. Ayupu nirya ara, Ayub ap, Zofar ap arye nyaprike.