Ayub 22 - Eipomek

Elifas birye tamubuka, tonap Ayub biti, nyabuk yupu

^1-2 Ura, Teman mutukunye, el si ara Elifas birye, tonap dukdongobuka Ayub biti nyabuk. Anda moubuka tenipdelyame! Nun tukwak mutuku unyap nang nirya ara, Allah ati meliptibye do? Nun mikip aryuk pil doptibye deice arye, Allah ati dipkoprob meliptibye do? Tonda, nun tukwak nang kan-kan arye, weik deiyok ning, weik tonun akunum kel bikamuknye babye, elda dipkoprob Allah ati meliptu do? Na kanye ara, kume. Yata ning do nirya, Allah elda, tonok ning babye, pia kum patalula atia.

³ Yata wiribuka, an diksukum ubuka, pia teleb ulamtuma babye, Allah pia erebuka, aning-aning nirya talibuka, mikip weiknye ulula ati, ance elti, teleb kipdeiptum do? Tonda, elce anti, kanye deipkutu do? Tonda an uminye ning yala-yala nirya, diksukumuk ulamtumba, yuk nang nirya arye, anti, “Dipkoprob elda, pia diksukumnye ulule,” nyabuka, si erebuka kipketinga babye, aning deice arye, Allah ara kanye deipnamkil do? Na kanye ara pia kume.

⁴ Kume, ance moubuka teneipdenulyame. Allah arye, “Aning wininamlume, aning ara, pia kum wininamlume,” nyapdeipsuk yupu, pia moubuka talipmince, diksukumuk winilamtuma babye, aning deice, Allah arye aning eibuka, anti kanye deipnamnil do? Tonda, ance diksukumuk winiminya ati, Allah arye, an dam ikin ning dobuka deipkilirye, wenekulul do? Na kanye ara, aning babye kume.

⁵ Dipkoprob ning ara, ani. Anda malye winin ning weik akunum winilyame. Ance malye-malye winiminye ning ap, malye pil dolyam ning ap, kum nukmanto ulula ati, aning ara, Allah arye anti, wenekulule. Na kanye ara, aning nirya ara, wini talak ikin weik ulyame.

⁶ Ara, minop talak dodarapce dipdongobuka, winipnin yangalamika ani, wini talak babye, ance an kayapu koproba ap, an yala nang koproba ap, yuk nang ap ati, nyalamlume. “Anda patapmakila ati, na yo bok ara, tia talak ati arepsine. Bukni, ‘Anggunce na yo bok tamubuka, kum arepnamnulumʼ tenen, anggun talilulum teleb ning, baju do, yuk dengna weik ning do, aning dobuka, arepnumunyeba, narye aning nirya talinmanya ani, aminyan talak, anggunce namin ning yo bok tamubuka arepnumunyopura, anggunce arenamnulum dengna weik ning ara, tamubuka arepnasinarya!” nyalamlume. Nyalamluma deice arye, an tam nang, sik nong deice ara, ikin weik ning delilamlume. Tonda, anang arye, winilamikba, an yo bok kum tamubuka arepman kumto upkikopura, ance sik anang baju ap, yuk bona ap, adiparyuk ubula alubuka dololamlume. Winilamluma deice arye, pia malye ulamlume.

⁷ Mek patalamuk nang ara, ance mek kum arelamlumba, kum dilamik. Tonda, din patalamuk nang, ance sik din ati asibuka, din kum arelamlume.

⁸ Anda mikip weik arye talibuka, pil dolamlum talak ara, yuk talye daulamik nang, sik wa win tuku nirya ati, ance, “Atuku ara, na arepnululume,” nyabuka, pi dobuka, sikce arelamkike. An ap, an atonun nang ap ara, talima erepdanuka maknya kintinibuka amutuku tuku weik arye, alubuka dololamlumce, teleb ulamlume. Atalak ara, yuk nang nirya arye anti, si erebuka kilamkike.

⁹ Tonda, youwak kilapu arye, an dam yanuka, “Se, melipsilyame,” nyabuka morolamkik bukni, sik nirya ati, sik patan ning ara, ance kum melibuka arelamlume. Tonda, sik ni yapu akunum deibuka, batakamik kwaknamne mapu ara, ance sik nong deice, ikin ning delilamlume.

¹⁰ Amalye winin ning, weik tonun winilamluma ati ara, wini talak an winiminya dana-dana nirya ara, ‘Anye optinyeʼ tenen, yuk nang arye, ninye ona ati, el si ara youna, weik kintinibuka, an baminye bisik nirya ara, ‘Wena arye youpnamleʼ tenen, weik tonun kintinibuka, kalikikinyake. Adeice arye an dam ara, kanye imun weik ning, talye karin arye yakiliba, an kanye talima nirya ara, ilil weik ukulule.

¹¹ An dam ara, kuna weik akunum yanmala ati, akunum dam upkilyeba, tuba tonap dirina ara, teleb ubuka kum eipnalame. Tonda, mek weik obuka, an dam akunum yalirye, mek wekmanto upnalame.

¹² Aning ton moubuka tenipnalyame! Allah elda im deice tam ulule. Tonda, im noutam bukni, mitik tonun amu tam tikinyak kurya nirya ati, Allah elda, im deice tam bukuka ulirye, kum dilul do? Kume, elda, im deice tam pia erebuka tikilule.

^13-14 Ati ara, yata ati, ance talye ninguk tenilyam do? Ara, ‘Allah el ululak ara, pia alip tamuk ulula ati, dua arye lelipdongopliba, nun tukwak mutuku unyap ninye arye, wininyap ning ap, nun dam usulul ning ap nirya ara, Allah elda kum elisulule,’ tenelyame. Tonda, Allah elda dua outam kibuka, pia alip tam uplyeba, dua arye lelipliba, kunukulula ati, aning nirya amu tam ara, nun tukwak mutuku nang unyap ning ara, kum elilule. Ati ara, ‘Allah arye nunti, yupu bokeiplirye, kum wenepnamsile,’ tenelyame. Tonda, ‘Allah elda im deice tam ap, tukwak mutuku ap, im sirya, mutuku sirya wililon sukumuk balule,’ tenelyame.

¹⁵ Yata ati, anda, minop talak ulamik nang, dadeipdanin banyak nang arye, malye ulamik touk, sikce balamik bisikuk, an babye, ‘Abisikuk tamubuka, anyuk tuba banamne,’ tenemince, minop bisikuk balyam do?

¹⁶ Sik anang ara, sik dibin talak min kum upmalyebuk, Allah arye anang ara mikip arye libuka, doprobukba, kum dayuk. Winipmanto ara, ninye arye aik domikce bukni, talye karin arye weik mok ceplirye, mek obuka yangalirye, aik ap, anyaik ayukumna yo ap nirya ara, bobolamle touk, Allah arye anang nirya ara, minopce akunum kum kipdeibuke.

¹⁷ Sik anang arye, “Kume, Allah ara, weik tonun erebuka, aning-aning nirya talibuka, mikip weiknye ulul bukni, elce yata wiripsutu do? Allah elce nun dam ara, yata ikin ning ton dobuka deipnamsila kume,’ tenelamik. Tonda, “Allah anda nun dam batakuka, yukak kisikuka binamlyame,” nyabuka, Allah ati mania kanye bolamikce, yanilamik.

¹⁸ Sik anang nirya ara, winibuka tenelamik bukni, Allah elcuk, aning luba kinauk ulamukce, bona yala-yala nirya areamukba, bona talin nang ulamik. Bukni, na kanye ara, sik malye ninguk talibuka unyak nang arye tenenyak kanye nirya ara, na Elifas birye dipkoprob moubuka minop biknirye, pia kum wininamne. Sik tenenyak ning nirya ara, ‘Na pia lik,’ tenenune.

¹⁹ Allah arye, sik malye unyak nang ati wenelul talak ara, sik diksukum telebuk unyak nang arye eibikirye, kanye deibuka, si weik arye libuka unyakce, kanye pin-pin arye unyake. Tonda, Allah arye, sik malye unyak nang ati weneplyeopura, sik malye winin ning talibuka kum unyak nang eibikirye, kanye deibuka, nalikirye, sik malye wininyak nang ati akutunyake.

²⁰ Akutunyak ning ara, sik telebuk wininyak nang arye, nyanyake. “Kume, sik malye wininyak nang ara, mania kanye bobikce, nunti, “Malye kibuka, amu tamuk deipnamabe,” nyabuka, yaniltalamsik bukni, wini talak ara, sikce talibuka ulamik ning nirya ara, Allah arye akunum obuka batakuk. Bukni, ton tam nang ara, batakuk. Ton tam nang ara, batakukce, ton tam nang ara, sirya kum dakukce, tuba batakuk nang nirya ara, Allah arye uku dopkwetebukba, uku arye sik ning nirya dibukce, tuba sirya batakuk ning nirya babye, uku arye dibuka, sirya dakuk.

²¹ Aning nirya ara, na Elias birye, an Ayub biti nyapkine. Wini talak anda, Allah tenibuka nyasulul yupu nirya ara, ‘Aning ara, pia dipkoprobuk ululeʼ tenen, diba tenepmince, el damuk tamubuka yanamlame. Winipminya deice arye, anda teleb aryuk kanye deibuka, talye tunim abuka unamlame. Dipkoprob ance aning winipminyopura, Allah arye arepkiliba, anda teleb winin ninguk, weik tonun dolonamlame.

²² Tonda, Allah arye, “Aning wininamlume, aning ara, pia kum wininamlume,” nyalilul yupu nirya ara, moubuka kekepmince, aning nirya ara, an talima noutam bopmince, oubuka biknalyame.

²³ Dipkoprob anda talima lamapdongobuka upmince, Allah el damuk, tuba tamubuka yanamlame. Tonda, an ap, an mapu silip ap, an tam nang nirya ap ara, malye un ning ap, malye tenen ning ap, yala-yala nirya ara, adiparyuk bataknamlume. Winipmunyopura, Allah arye weik tonun erebuka, aning-aning nirya talibuka, mikip weiknye birye, anggunti tuba tamubuka, telebuk kilinamsile. Minop talak teleb ulamlum touk, wini talak babye, tuba tonap, Allah arye teleb kilinamsile.

^24-25 Tonda, minop talak ara, bona weik talinanye ulamlum bukni, wini talak ara, an kanye talima noutam nirya ara, ‘Se, aning ara, pia telebe,’ tenemince, an talilyam ning ara, dengna weik ning, el si ara emas ap, perak ap ara, dokola delina kum bukni, aning nirya ara, ‘Kume, aning nirya ara, talye tuku sung-sunga atonunuka. Tonda, adengna weik ning nirya ara, talye mekin ulamle keil wininga atonun ulule,’ tenenamlume. Aning ati, kanye delina pia kume. Aning nirya ara, akunum batakmince, Allah el dam tamubuka yaminyopura, Allah el tibuk kanye deipmince, el siuk erenamlame. Allah ara, weik tonun erebuka, aning-aning nirya talibuka, Mikip Weik Deiyoknye ulula ati, an kanye talima nirya ara, el deiceuk delinamlame. Winipmanto ara, ance, ‘Kume wini talak ara, na emas ap, perak ap, atonun unulul ning ara, Allah elda, na emas atonun,’ tenenamlume. Allah el siuk erenamlume. Tonda an perak, pia teleb ning wibuka delilamluma atonun, Allah ati tenebuka umince, el siuk erenamlame.

²⁶ Tonda, winipminyopura, ance Allah elti, weik tonun kanye deipmince, tuba-tuba pin-pin asa arye unamlame. Tonda, an kanye talima noutam nirya ara, telebuk unmalama ati, Allah el dam yaminyopura, ilil tenena ap, alye dakalana ap, pia kumce, an urasin erebuka, Allah ati moronalyame.

²⁷ Tonda atalak ara, ance Allah ati, “Naio melibuka lyepnilyame,” nyabuka, moropminyopura, Allah elcuk kekebuka, melipnamkile. Tonda ance Allah el dam ara, “Naio, ance melipniminyeba, narye anti, winibuka, winibuka wininamne. Anti aren ning ara, winibuka arenamkine,” nyabuka, nyalin yupu deice akunum nyapdeiamlum yupu nirya ara, anyaplum touk, dipkoprob wininalyame.

²⁸ Ance, ‘Winipnamne, winipnamneʼ tenen, moubuka tenipmince, akunum tukwak arye nyapminyopura, aning nirya dipkoprob tuba-tuba nong upnamle. Ati, ance pil donalam ning nirya ara, tuba nonguk unamkile. Tonda, an binalamak ap, daunalamak ap nirya ara, Allah arye arekilyeba, an dam tuba kam ulikilirye melinamkila ati, tenina kum unalyame.

²⁹ Ninye nirya ara, talima erebuka unyakce, maknya kintinibuka erenyak nang nirya ara, Allah arye anang dobuka amu tam kipdeipnamle. Ance aning eipminyopura, ‘E, Sikda talima erebuka, maknya kintinibuka kwalinyaka ati, Allah arye anang akunum wenebuke,’ tenepmince, nyanalyame. Bukni, dipkoprob ning ara, kanye lamapdongobuka unyak nang ara, wininyak deice arye, Allah elce anang melibuka lyelule.

³⁰ Anda tonap malye kum umince, Allah el teniplirye, nyasilye touk winiminyopura, malye winin ning ara, an dam tonap pia kum yanganamle ati, Allah arye anti, melibuka lyepropnamkile. Deiyok ara, malye winin ning talibuka, pia kum wininyak nang ara, Allah arye lyelula ati, nyapkine. Ati wini talak arye, deiyok koubuka, teleb ninguk pia diksukum ninguk, pia wininalame, nyapkine. Ayupu ara, Elias birye Ayub biti, nyabuk.