Ayub 21 - Eipomek

Ayub birye tamubuka Zofar biti, nyabuk yupu

^1-2 Ayub birye Zofar biti nyabuk. Na nyapnukin yupu moubuka kekepnunilyame. Ara, na kanye teleb kina ati, aninguk moropsine.

³ Narye anggunti moropsin ning ara, anggunce nati nyanululum yupu ara, narye anggunti tamubuka nyapnusine. Ayupu nyapsiniba, moubuka kekepnululume. Nyapsinyebuk, anggunce na nyapnye yupu akunum kekepmunyopura, ila tamubuka anggunce nati, “Yo, malye yupu tuba nyanmasile,” nyabuka nalinumunce, akutuna babye telebe uka!

⁴ Nara, ninye ara na dam unyak nang ati, malye nyabuka, yupu kum nyanune. Dipkoprob ning ara, Allah arye na dam ikin ning arenilye ning ati, ayupu nyanune. Ati, narye, ‘Se, yata ati, na ikin unulul ning ara, adiparyuk minopce kum danalinulul do?’ tenen, malye kanye bobuka engenuna ara, moubuka nyanune. Ati wini talak arye, na nyasunun yupu ara, tunim abuka kekenauk unamlume.

⁵ Anggunce na winipnuka urasin eipnumunce, yupu nyana kumce, ‘Se, bicoe, anye bira, dipkoprob pia ikin weik ululeʼ tenepmunce, ‘Talye yupu nyabibyakʼ tenen, anggun taruk arye anggun si lelipdamunce, ngalukunauk unamnulume!

⁶ Na nong noutam ap, na ikin weik akunum unilye ning nirya ati, tenipdenyopura, na babye ilil upnilyeba, ‘Se, kanye imun ning na dam akunum yanmanil ning nirya ara, yata deiyok ati do?’ tenepnirye, na nong nirya birbir abuka lukdanirye, ilil unulule.

⁷ Tonda, aning tenenune. ‘Se, Allah arye yata deiyok ati, sik pia malye-malyeuk unyak nang ara, kam una ati lo tonap tabakuka tuba arelulba, wisi delinyak do? Tonda yata deiyok ati, sik malye un nang, mikip weik nang kipnin bakirye, sik bona ara weik arelulba, bona weik talin nang unyak do?

⁸ Sik malye winin ninguk unyak nang ara, pia kam tuba ulamica ani, sik mapu arye deibikce mapu nirya ara, sik dam nebikiba, sik asing arye elinyake. Adeibik mapu arye, sikce delilamak mapu babye, sik dam ukiba elinyake.

⁹ Malye wininyak nang ara, sik babye asik dobuka unyak noutam nirya ara, teleb aryuk talye tunim abuka unyakce, kanye delinyake. Tonda, Allah arye sik wenena ati, sik dam ara, ikin weik ning, sik deice ton dopdeiplyeba, kum dolonyake. Tuba telebuk unyake.

¹⁰ Tonda, sikce talibuka weinyak kam ning nirya ara, winipmanto sik yim sapi basam arye teleb aryuk mi deipdanin bakirye, mapu weik kipnin balule. Tonda, sik weinyak kil sapi basam arye, sik mi delin talak babye, ikin kum ulule. Sikce weinyak kil sapi basam nirya arye, teleb kibuka mapu weik delinyake. Dibin sapi basam mi delina pia kume.

¹¹ Sik malye unyak nang arye delinyak mapu nirya ara, kanye deibikirye, arikal donauk unyake. Winipmanto ara, domba basam el mi kanye teleb uplyopura, dipdanuka, weik pala lu noutam, im kuruklamle atonun, sik malye unyak nang, sik mapu babye, kanye deibikirye, talye luparabuka, aik dam arye arikal donyake.

¹² Amapu nirya arye kanye deibikirye, mot nyana nang ati bung-bung ana, sik si ara rebana ap, kecapi ap, tonda seruling ap nirya ara, sikce dobuka kanye lon mot nyabikirye, karye obuka kwalina uk unyake. Sikda kanye deibuka arikal donyake.

¹³ Sik malye-malyeuk wininyak nang ara, asum-asum nirya ara, sikce kanye deibuka unyakce, bona yala-yala nirya talinyakce, bona pia weik talin nang ubikirye, aninguk wininyaka deice arye, sik unak talak babye, sirya dakdopnin balule. Winipnin balamica ani, Sikda kanye deibuka, teleb aryuk dipnin banyake. Sik kam tuba unyak talak nirya ara, ilil kum ulule.

¹⁴ Tonda, sik winin diparyuk, sikce Allah ati, “Nun dam arye batakuka, yukak binulyame! Nun kam unamap talak nirya ara, Allah ance nunti, ‘Aning wininamlume, aning ara pia kum winanamlume,’ nyapdeipsise yupu moubikmunce, telebuk, unamlume,’ nyapsulum yupu ara, talibuka kum unamabe. Nunda anti pia lik, tenenyabe,” nyabikirye, Allah ati yaninauk unyake.

¹⁵ Tonda, sik malye winin ninguk talibuka unyak nang arye, Allah ati nyanyake. Sikce, “Ton nang arye anti, ‘Allah elda, aning-aning talilirye, pia deice tam erebuka, Pia Mikip Weiknye ulule,’ nyabuka, an siuk erenyake. Bukni, nunce, aning tenenyabe. ‘Allah ance nyapdeipsulum yupu, yuk nang arye aninguk talibuka unyaka ara, deiyok ton kume,’ tenenyabe. Tonda, anda Allah ati, ‘Se na nio melipsilyame,’ nyabuka moronyap buk, aning nirya nong pia kum upnamla ati, deiyok ton pia kum ulule,’ tenenyabe.” Sik malye un nang arye winibuka, Allah ati nyanyake.

¹⁶ Sik malyeuk wininyak nang arye, winibuka tenelanyake. ‘Kume, nun kanye mikip deice aryuk, ‘Winipnamaca,’ tenenyap ning nirya ara, atenenyap touk winibipyeba, nong bikisulule. Nun mikip deice aryuk, teleb ubuka unyabe,’ tenelanyake. Sik malye wininyak nang arye, aninguk tenelanyak bukni, na Ayub bira, sik atenenyak ning nirya ara, tonok babye, pia kum tenenune. Dipkoprob ara, narye, ‘Sik pia malye-malyeuk wininyak nang ara, sik kanye talima noutam tenenyak ning ap, ‘Winipnamabe,’ tenenyak ning ap ara, aning nirya ara, pia na like,’ tenenune. Nara tenepnirye, binuka unune.

¹⁷ Tonda na Ayub birye aning ton asipdesine. Anggunda moubuka tenipdelulume! Sik malye winin ninguk talibuka unyak nang ara, sik adiparyuk minopce dibinyak do? Kum do? Kume, na kanye ara, sik anang kan-kan weik tonun ara, keting tamun weik tonun tuba ulamica ani, wisi akunum dacopura, dibinyake. Tonda, anang kan-kan weik tonun ara, ikin ning ton, sik deice yaliba, dolonyak do, kum do? Na kanye ara, ikin ning weik tonun kum dolonyake. Tonok-tonok uka. Tonda, Allah arye sikti, ton, yu upliba, sikti, wabukaplirye, kanye imun ning, sik deice weik tonun deilule do? Tonok-tonok talak sikti, walul do? Na kanye ara, weik tonun sikti, kum walule.

¹⁸ Kume, kel-kel ana atonun, tonda butbuta atonun kiplyeba, weik kumanya ap, mikip kumanya ap yalirye, pu abuka, akanam ning bobuka balula atonun unyak do, kum do? Na kanye ara, Allah arye sik anang ati, weik tonun, weneplirye, kum danalilule.

¹⁹ Anggunce nyalulume. “Allah arye anggun ni malye uplyeba, wenen ning dokola delilamikca ani, aminyan talak ara, el mapu deice ikin deibuka wenelule,” nyanululume. Bukni, narye tamubuka anggunti nyapsine. Na kanye ara, Allah arye sik malye wininyak nang ati, Allah arye sikcuk wininyake malye un ning ati, wenelule. Ara, sik malye unyak nang ara, sik bidamang arye, ‘Nunda malye winipmaba ati, Allah arye wenesulule,’ tenebikirye, ‘Biknamakʼ tenen, Allah arye sik deice, ikin ning deipliba dolonyake.

²⁰ Dipkoprob teleb ning ara, sik malye wininyak nang ara, amalye ning dekna ara, sik anang deiceuk, wenen ning areplyeba dolonyake. Aning yalyopura, sik asing arye eibikirye, aning deice arye dipkoprob, ‘Nunda malye unmaba ati, Allah arye wenesululeʼ tenen, biknamake. Tonda, Allah ara pia deice tam erebuka, aning-aning nirya talibuka, mikip weik ululnye bira, el weik yu dobuka, sik deice deiplyeba, doprobica deice arye biknamake.

²¹ Aning ara, talye ati kum nyapsine. Deiyok ara, ani. Sik pia malye unyak nang, sik akunum dipmakce talak ara, sik mapu silip nirya batakikca ati, tonap pia kum teninyake. ‘Nun mapsilip ara, sik telebuk wininyak do, malye wininyak do?’ tenen, pia kum kalikinyake.

²² Anggun ton moubuka teniplulume! Allah arye, im deice tam kam unyak malaikat nirya ati, sikce wininyak ning nirya dipdelirye, “Anggunda malye upmalum ning ara, ani-ani,” nyabuka, weneplirye, yupu bokolilula deiyoknye ulule. Ati, nun ninye koprop, talye tukwak mutuku nang arye, Allah ati, “Winipnamlume. Teleb un ning ara, ani. Malye un ning ara, ani,” nyabuka, elti, petereptibye do? Kume, aning ara, pia kum winipmanto ning nyapsine.

²³ Tonda tukwak mutuku noutam elilamsirye, kel bikamse ning ton nyapnusine. Ara, ninye ton, sik kam unyak talak ara, uk dina kum, nong teleb aryuk unyakce, aning-aning nirya talibuka, pia teleb aryuk, kanye deibuka ulamikca ani, telye dibinyake. Anang ara, ilil una pia kumce, talye kanye deibuka, telebuk ulamikca ani, kanye teleb aryuk dibinyake.

²⁴ Tonda, anang ara, din weik tonun dinyakba, nong pou weik nang unyake. Sikda, sik nong ap, nong noutam yok ap ara, telebuk ulamica ani, wel nang ulamak touk, sikda mikip tuba bomikce diparyuk dibinyake.

²⁵ Ton tam nang ara wininyak bukni, ton tam nang ara, ikin ning weik, sik dam yaliba dorobikirye kanye imun deice uk ulamikca ani, malye kanye bomikca ani dibinyake. Atonun unyak nang ara, sik kam ulamik noutam nirya ara, teleb ning ton kum elilamika ati, sik talima pum tam ara, teleb ning ton bobuka pia kum ulamikca ani dibinyake.

²⁶ Tukwak nang ara, pia yuk-yuk unyak bukni, teleb kanye bobuka, bona talibuka unyak nang babye, ikin ning dorobikirye, malye kanye bobuka unyak nang babye, sik nirya ara atonun, akunum dibikcopura, neika ninye weilban sukum bobikirye weilbanyake. Binuka weibikcopura, ku ap, tonda kuluma ap aryuk, sik nong deice moubuka dinyake. Aning ara, anggun ton moubuka tenipdelulume!

²⁷ Anango, anggunce na dam yanuka, yupu weik tonun nyanululum nang ara, anggunce nati, ‘Nyaptibye, tonda aning winiptibyeʼ tenen, dungnubuka tenelulum ning ara, na akunum bikisunune. Tonda, anggunce nati, ‘Winibuka winiptibiba, Ayub biti malye kipdeiptibye,’ tenenululum ning nirya babye, na akunum biksise.

²⁸ Tonda, anggunce nati asilenululume. Ara, “Malye winin ninguk talilyamukce, ninye talibuka winilamuka deiyoknye bira, bona utotoa talibuka ulamukba, elce minop talak domuk teleb aik ara, wini talak dan sukum ulul do? Tonda, pia malye winilulnye, elce minop talak domuk aik ara, wini talak dan sukum ulul do?” nyabuka asipnulume. Anggun kanye ara, ‘Kume, sik malyeuk wininyak nang nirya ara, malye winipmakce ning dekna ati, Allah arye sik ap, sik aik ap, sik talinyak ning nirya ap nirya ara, kum kipdeipnamlarya,’ tenelulume.

²⁹ Winibuka tenelulum bukni, narye anggunti, tamubuka asipdesine. Ton nang ara, omutuku binuka, amutuku yanuka kinyakce, aning-aning nirya elilamak nang ton, min kum asipdelum do? Akumopura, asipdelum bukni, sikce laka nyapsik yupu ara, diba kum teneplum do?

³⁰ Ati, anggun ap, na ap akunum kel bikamupu ning ara, anggunti laka nyapnusine. Ara, dan mutuku do nirya, sik malye ninguk talibuka unyak nang ara, sik mutuku noutam kanye imun weik ning yalye babye, sik anang deice yaliba kum dolonyake. Tonda, Allah arye amutuku nang ati, yu weik uplyeba, amutuku nang deice deibuka wenelul talak ara, sik malye wininyak nang nirya ara, sik deice weik wenen ning mek sik dam obuka yangalule. Sikda talye kanye bobuka, telebuk unyake.

³¹ Aninguk kum bukni, amalye wininyak nang arye, malye weik winibikcopura, sik mutuku noutam arye, yata tonye birye, mania kanye bobuka, sik urasin dam bilirye, “Anggunda dipkoprob pia malyeuk winilulume! Aning ara, bataklulume!” nyabuka, anang ati wenelul do? Kume, aning kum nyanyake. Tonda, malye un ninguk winilamting nang, sik malye winin ning ati, sik dengna ara, wenena ning ton tamubuka kum nyalinyake. Anang ati, wenen yupu nyana kumce, talye tunim abuka unyake.

^32-33 Aminyan sirya talak ara, malye weik winilamlanye dipliba, el nong dobuka, weilbinukce talak ara, el kwit capu weik tonun ton menekuka banyake. Tonda aminyan tam babye, ninye weik tonun, ‘El weipmace sukum malye uplyakʼ tenen, otam binuka dungnubuka kalikinyake. Pia nemalyap aryuk anye dobuka, tuku lukmace pum tam dongobicopura, moubuka dipdekirye, el nong deice tuku arye singnilongonyaka babye, ikin kume. Nimalyap aryuk tuku palibuka dongonyake.

³⁴ Aning nirya ara, tonap akunum laka nyapmasina ati, yata deiyok ati, anggunce talye-talye nyalulum yupu arye tuba wenebuka nyanululum do? Awenen yupu deice arye, anggunce nati, ‘El kanye teleb kipdeiptibyeʼ tenen, nyanululum do? kume, ato yupu nirya ara, talye yupu uk nyanululume. Dipkoprob nyapsine, anggunce nyanululum yupu nirya ara, tilila yupu uk nyanululume.” Ayub birye, el kwit capu winilye nang ati, ayupu nirya nyabuk.