Ayub 20 - Eipomek

Zofar birye Ayub biti, nyabuk yupu

^1-2 Ura, Naama mutukunye, el si Zofar, elce Ayub biti nyabuk. Se, Ayub ance nyasilyam yupu ati, ‘Narye malye kanye bopman ati, narye anti tamubuka asipdetinye,’ tenekunune. Ati ara, minopce tamubuka nyapnukina ati, moubuka kekepnilyame!

³ Ara, dipkoprob ance nyasilyam yupu yuma deice arye, na kanye ara, na dam malye yupu nyabuka nyanilyama arye, yaninilyama ati, ‘Se yata ati do?’ tenen, malye kanye bopnarye, uapkine. Bukni, narye anyapminye yupu, tamubuka, an dam nyana ati ara, na kanye tenen ning arye, ‘Deiyok ara ani,’ tenen akunum bikmana ati, narye anti tamubuka nyapkitinye.

⁴ Bukni, minop talak ara, Allah arye ninye tukwak nang kwepdeiamuk amutuku noutam deiamuk talak arye dipdongobuka, anoutam talak nirya ara, kel nang nirya arye akunum bikamik ning ara, an Ayub ton min kum biklum do?

⁵ Na kanye ara, ance min kum bikamluma ati, aning laka nyapnukine. Ara ani. Talye daunyak nang arye, sik pia malye unyak nang ati eibikirye, ‘Se Sikda telebeʼ tenen, sikti, pinpin kanye bobuka unyak ning ara, dipkoprob tia talak atibuk ulule. Tonda, ninye arye Allah ati, ‘Allah ara nun like, elce nyasulul yupu ara, yaninauk unamabe,’ tenenyakce, malye-malyeuk wininyak ninye ara, sik kanye deibuka unyak talak ara, lo mitik tonun, like tonok talak ulule. Winipmanto ara, ninye arye asing kuplam-kuplam alamak atonun ulule. Anang ara, kum winipnamaka ati nyapkine.

⁶ Anang ara, ‘Nunda, mambul weik nang unyabeʼ tenen, sik kanye ara, talima erena pia weik ati, sik kanye ara, im tam bol pipmanto ulule. Maknya kintinilanyaka ati, yuk nang arye, ‘Ninye deiyok nang upnamakʼ tenen, anang erebikirye, si erebuka weik tonun kinyake. Wininyaka deice arye, sik anang ara, sik deiyok kibuka unyak ara, mutuku dup erebuka bulamle touk ulule.

⁷ Wininyak bukni, dipkoprob anang ara, Allah arye pia kum kipdeipnamle. Ara, sikcuk, ‘Aning ara, pia malye ning ati, bai tam donokiceba lyuplirye, minopce kum danalamle touk, akwalinyak nang babye, minopce kum danamake. Tukwak mutuku noutam unyakce, pia malye wininyaka ati, mutuku-mutuku nirya noutamak ara, anang pia kum danalamyake. Winibikceba, sikda akunum bikamikce nang arye, nyabuka asipdenamake. “Se, sik mambul weik nang ara, dan mutuku biyik do?” nyabuka asipdenamake.

⁸ Winipmanto ara, sik amalye weik wininyak nang ara, lengdar mabibirye, aning-aning elinyap bukni, bukipyopura, lengdar deice eipmapye ning, adiparyuk kum daliba, luba kilamap touk, sik anang babye, atonun upnamake. Lengdar mapmabibuk, lukunyan noutam ara, laka upmalya eipmapya ani, adiparyuk kum danalamle touk upnamake.

⁹ Yuk nang arye, amalye unyak nang elilamik bukni, kum winibikcopura, yuk nang nirya arye, sik asing arye tonap pia kum elinamake. Sik anang ulamika ara, pia tonap kum unamaka ati, anang arye, ton kum elinamake.

¹⁰ Min talak ara, sik malye ninguk winilamik nang ara, sikce aning-aning babye, talibuka una kum nang, talye bona utotoa talina kum nang arye talibuka ulamik ning nirya ara, amalye nang arye ubula dopromik. Sikce dopromik ning nirya ara, talilamikbuk, aminyan talak ara, sikce delilamik mapu arye aning nirya punubikirye, talye bona utotoa talina kum nang ati, tamubuka arenamake.

¹¹ Anang ara, sik wel tuba ulamik talak ara, nong teleb ubuka nebuka, mikip weik nang ulamik. Tonda, urasin teleb nang ulamik. Bukni, tuba kamuk kum unamaka ati, akunum dibikcopura, sik nong nirya ara, tuba tamubuka, sung-sunga atonun unamake

^12-13 Ati ara, sikda pia bicoe. Min talak ara, sikce, ‘E malye un ninguk winipnuyabeʼ tenen, talye luparabuka malyeuk winilamik ning ati, kanye deibuka ulamik. Winipmanto, sik anang ara, to nyalamle ning, sik si pum tam dongopnarye, kanye deibuka dilamikce, sik si mek dilkwetelamike. Tonda, ‘Yuk nang arye, aning dinmaka ara, eipsicakʼ tenen, sik sitang amu tam kibuka, tuba awamukba, ‘Pia aninguk dilamtibye toura, pia telebe,’ tenelamik. Sikda, ‘Kume, ato nyalamle ning ara, kum bataktibye. Dina dem unamabe,’ tenelamik touk, malye ulamik ning babye, pia kum bataklamik.

¹⁴ Winibuka ulamik bukni, adin akunum dipkwetebikiba, mun pum akunum weklyopura, el urasin ara pia yuk kilule. Ara yu ninguk ulirye, sik nyalula ati, din ninguk kilule. Winipmanto ara, yu kwatima arye si topsiliba, adiparyuk diplamap touk, sik malye ulamika deice arye, sik babye ati, olalamike.

¹⁵ Winipmanto ara, ninye arye, akunum lyulamuk din mangkau arye dibikcopura, aminyan talak adiparyuk, aninguk dukultakanyak touk, sik amalye winin nanguk ulamik nang arye, yuk nang ati talilamik bona ubula dobuka, dokola arye delilamik ning ara, aminyan talak ara tamubuka deiplopnamake. Ara, Allah arye anang deice, ikin ning akunum deiplyopura, anang arye ubula dololomik ning ara, tuba tamubuka deiplopnamake.

¹⁶ Pia malye un ning talibuka wininyak nang ara, yuk bona utotoa talina kum nang arye talilamik ning, ubula doprobik talak ara, ‘Aning pia teleb ati, kanye delisulule,’ tenenyak bukni, dipkoprob ning ara, aminyan talak, sik malye weik ulamika deice arye, ikin ning yalyeba dolonyake. Aning arye, sik anang ara, yu kwatima arye ninye si toplirye, el ula mek lipdongoplyeba, dibilamak touk upnamake. Sik malye-malyeuk ulamika deice arye, dipnamakca!

¹⁷ Aminyan talak ara, Allah arye amutuku nang ati pia teleb kilinamle. Winiplyeba, aning-aning yala-yala nirya doprobikirye, pia telebuk unamake. Winipmanto ara, dengna weik ning, zaitun yo duk teikikceba, el minyak mekwen ap, sapi basam moum yung ap, mong mek el si madu ap, weik tonun yamubuka arepliba, weik mek balamle touk winiptu babye, amalye ulamak nang arye, adengna weik ning nirya ara, pia kum eipnamake. Allah arye, amalye wininyak nang kum kipdeipnamla atia.

¹⁸ Ati ara, sik anang arye talilamak ning yala-yala nirya ap, ‘Bona weik talin nang unamapʼ tenen, pil dolamikce dokola delilamik ning yala-yala nirya ap ara, adiparyuk tamubuka arepnamake. Sikce ubula dopromik ning nirya ara, kanye deibuka kum talipnamak bukni, Allah arye sikti, weneliba, sikda aning nirya tamubuka arenamake.

¹⁹ Sikda, pia ikin weik unamaka deiyok ara ani. Ara, sik malye ulamik nang arye, talye bona utotoa talina kum nang nirya ati, obuka batakikce, sice bultakalamik. Abona talina kum nang arye domik asik nirya ara, sik malye ulamik nang arye, anyasik nirya alubula dopromik. Sikda anyasik kum domik bukni, ‘Nuncuk anyasik nirya taliptibyeʼ tenen, yuk nang arye domik aik nirya ubula dopromik.

²⁰ Tonda, sik amalye un ninguk ulamik nang ara, sik kanye pum tam arye, ‘Aning-aning yala-yala nirya ara, akunum weik tonun dopropmaba ati, akunuma,’ pia kum tenelamik. Aning-aning pia weik dololamik bukni, sikda, ‘Kume pia weik tonun doproptibirye, bona talibuka weik nang utibyeʼ tenen, sik patana ara, tunim apmanto kum ubuka ati, pia alubuka dolana uk ulamik. Tonok yala ning babye, ‘Dauplyeʼ tenen, kum bataklamik. Aning nirya dololamik.

²¹ Winipmanto ara, anang arye, ‘Din ning dipnuyabe,’ tenebikirye, dinyak talak ara, aning nirya dibuka sirya dakanyake. Aning atonun, malye unyak nang arye, yuk nang ning nirya alubuka doprobikcopura, tonok ning babye, tuba kum uamuk. Aning nirya dolona uk ulamik. Ati ara, tia talak ara, bona weik talin nang unyak bukni, sirya talak ara, Allah arye sikti, wenepnamle deice arye, sikce talilamik ning yala-yala nirya ara, kum kipdeipnamlarya! Teleb uk kum unamake.

²² Sik tuba kam unyak talak ara, tiya talak ati, bona utotoa talibuka weik ubikceba babye, sik anang arye aning-aning yala-yala nirya ara, teleb deice aryuk kanye deibuka upra balamica ani, sirya talak ara, Allah arye arepliplyeba, ikin ning pia weik yaliba doprobikirye, ‘Seʼ tenen, imun kanye bobuka unamake.

²³ Ura, sik anang ara, mangkau kanye bobuka unyakce, kanye deibuka adeiamice ning yala-yala nirya weik tonun tuba dilamice talak ara, Allah el yu ara pia weik uplyeba, el anang sik wenena ati sik nong deice ikin weik ning delinamle. Winipmanto ara, weik mok celamle touk, ikin ning pia weik tonun, sik nong deice yanamle.

²⁴ Atalak, sik anang ara, ‘Se, kat ning el si besi arye memenyak mal arye opsilyakʼ tenen, minopce bikbik abuka banyaka babye, yuknye birye kat ning el si tembaga arye kintinibuka delilul mal arye, anang maraplyopura, dila saklirye, dipnamake.

²⁵ Anang sik nong deice mal marabicopura, dila weik upnamle. Pia tace lubuka deiamikce mal arye marabicopura, sik nong noutam wekelul bukni, tuba sik nong bol deice kulupnamle. Winipyopura, sik talima noutam ara, ilil weik unamak. Tonda, dila pia weik unamle.

²⁶ Sik malye un nang arye, bona yala-yala nirya moubuka delilamik ning ara, Allah arye sice buklopnamle. Allah arye aning-aning nirya ara, pia kum kipdeipnamlarya! Sik mining nang ap, sik mapu silip nirya ara, ninye arye sekna kum uku arye diplirye sirya daknamle.

²⁷ Malye winin nang arye, malye-malye wininyak ning ara, im deice ulul nang nirya arye, “Sikda pia malye,” nyabikirye, laka ubuka llaknyanamake. Aning atonun ton, tukwak mutuku noutam ulamle ning nirya ara, sik anang ati, “Anggunda pia malye ati, obuka bataknamlume,” nyabuka, laka arye nyanamake.

²⁸ Allah el yu weik uplyopura, el tenyamuk talak akunum yalyopura, sik anang arye, talibuka unyak bona yala-yala nirya ara, adiparyuk mikip arye doproplirye, aning nirya kum kipdeipnamle!

²⁹ Allah elce, ‘Sik malye wininyak nang nirya ara, sik deice wenena weik ning arepniba, dolonamakʼ tenen, sikti, akunum kintinip deibuk ning nirya ara, ani.” Allah arye, ‘Aning ara, dipkoprob nong upnamle,’ akunum tenebuka ati, dipkoprob winipnamle. Ayupu nirya ara, Zofar birye nyabuk.