Ayub 2 - Eipomek

Isa Mutuku Dongonye arye Ayub biti, like bitinye ning, asipdeyuk yupu

¹ Allah el pil don nang malaikat dilamikce, ‘Nun ni koprop Allah dam unamap’ tenen, biyik talak ara, isa mer nirya sik deiyoknye, Isa Mutuku Dongonye babye, sik neika biyik.

² Sik neika akunum biyikura, Allah Yahweh arye Isa Mutuku Dongonye ati, “Anda, dan mutuku arye tekilyalam do?” nyabuka asibuk. Nyabuka asibukba, Isa Mutuku Dongonye arye, Yahweh ati tamubuka nyabuk. “Nara tukwak mutuku-mutuku nirya banirye, ninye mutuku-mutuku nirya wininyak ning ati, dipra banune,” nyabuk.

³ Nyabukopura, Allah el si Yahweh arye tamubuka, Isa Mutuku Dongonye ati nyabuk. “Anda na pil donanye Ayub bira, elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, na pil donanye Ayub pung telebuk ulul atonun, ton kum unyake. Elda na siuk erenilirye, malye un ning tonok ning babye kum winilule,” nyabuk. Aning ati ara, ance elti, ‘El deiyok ton una kum diparyuk, malye kipdeiptinye’ tenen, yanuka nyapnulumba, ‘Aning ara dawiniplyame,’ nyapkisiba, winiplum bukni, kanye imun weik ubuk babye, elce nati malye yupu kum nyapnuke. Diksukumuk tuba ulirye, na siuk tuba-tuba erenulule.

⁴ Nyabuk ati, Isa Mutuku Dongonye arye tamubuka nyabuk. “Na kanye ara, ninye nirya arye, sik talibuka bonyak ning nirya ara, mitik mambule tenekirye, anirya kum uptu babye, ‘Aning ara weik mambule,’ kum tenenyake. Bukni, sik ninye nong kam una ara, ‘Aning ara weik mambule,’ tenenyake. Ninye arye, ‘Kam tuba utibye toura, nun bona ning nirya kum upsilye babye, mambul kume,’ tenenyake. Ance, ‘Ayub tuba teleb ulule,’ nyapmalam bukni, Ayub el talilul ning ap, el dolul ning ap nirya, kum kipdeipse ning ara, Ayub birye, ‘Ila tonap tamubuka arepnamnilca,’ tenepkutu bukni, Ayub el nong deice ikin ning deiptinyeura, dipkoprob an si kum erepkutue.

⁵ Ati winipmanto ara, Ayub el nong deice malye winipdeipminyeura, dipkoprob an si kum erepkutue. ‘Allah arye malye kipdeipnila ati, elda malinye,’ nyabuka, an damak malye yupu nyapkuturye, adiparyuk batakutue,” Isa Mutuku Dongonye arye, Allah ati nyabuk.

⁶ Nyabukba, Allah arye tonap tamubuka nyabuk. “Telebe, utenepmalamopura, Ayub bobuka, an deice deipkiniba, an tenepmalam atonun, el nong bol deice malye winipnamlyame. Bukni, Ayub el nong tonok ara, kum opnamlame. El ona kume,” Allah arye nyabuk.

⁷ Nyabukopura, Isa Mutuku Dongonye, Allah damak arye batakuka biyuk. Winibuk talak ara, Ayub el nong deice,barye suse ara, yan duk mouse dipdongobuka kisok deice nirya amubuk.

⁸ Winibukba, atu lubuka el kisok deice deibukce, aik dam bulamukce, kat mek makau colopdoba, mitik ning doprobukce, el susu kala korokoldalamuk.

⁹ Winilamuk ning, el kil eibukce nyabuk. “An si erelyamnye Allah arye, an nong deice ikin ning deipkukba, ‘Melipnamnil,’ teneplumce, pia teleb tuba unamlam do? Na kanye teleb ning ara, Allah ati si ereminya ara, batakmince, elti, malye yupu nyapminyeura, adiparyuk an uk diptume,” nyabuk.

¹⁰ Nyabukba, Ayub birye tamubuka nyabuk. “Anda walwal kilapu arye nyalamak atonun nyanmanilama ara, yata ati do? Ance tenepnalama ara, ‘Allah arye teleb ninguk arenamsile,’ tenepmalamce, amalye yupu nyapmanilam do? Anda, ‘Nun dam ara, Allah arye teleb ning arepsutopura, doproptibye bukni, ikin ning ton kum arenamsile,’ tenepmalamce, ayupu nyanmalam do? Winipsiliba, ‘Allah arye ikin un ning arepsiliba kum doldonamabe,’ tenepmalamce, nyanmalam do?” Ayub birye el kil ati nyabuk. Ayub el yupu nyana deice arye ton, Allah ati malye yupu tonok ning babye, kum nyalamuk.

Ayub el kayapu nang yayikce, nyabik yupu

¹¹ Ayub bira,barye susu weik kanye imun ning talibukba, yuk nang arye, “Aik pia bukuk,” nyabikba, el kayapu winilye nang, sik si ara, Elifas Temam mutukunye ap, Bildad Sua mutukunye ap, tonda Zopar Nahama mutukunye ap, sik nirya adiparyuk, ‘Nun kwit aik pia bulyak bipyeba, el ap neika yupu talibibirye, kanye talima kwa dipnamap’ tenen, yupu talibikce, ‘Diba winipnuyabe,’ nyapdayikce, neika biyik.

¹² Banmek talak ara, pera arye binuka dibinmekba, sik kwit Ayub,barye suse weik dilamuka anya arye, el nong urasin ara, pia yuk uamuk ati, eibikce, ‘Anye bira nun kwit Ayub do, yuknye do?’ tenen, walwal ubuk. Winibikce, sik ka biti, weik arye bico ubukba, mambul kanye bopmeka ati, sik ongamik baju kwiribuka kwiliklobikce, atu butbuta dobuka, sik kisok deice deibik. Winibikce, ton dobuka, im deice donokikce, weik arye engebik.

¹³ Winilamik talak ara, keting noutam ap, lukunyan ap, like tekbarye sum ubukura, Ayub ap tuku deice uk bulamik. Aulamik talak ara, sik kwit Ayub biti, tonok yupu babye ton, kum nyalamik. Ara, ‘Nun kwit weik mambul uk talipmalba, ikin weik ubuke,’ tenelamikce, talye tunim abuka ulamik.