Ayub 19 - Eipomek

Ayub birye, el kayapu winilye nang ati, nyabuk yupu

¹ Ayub birye, el kayapu winilye nang ati, nyabuk yupu ara ani.

² Yata wiribuka talak nirya arye, anggunce kanye imun yupu tuba na damuk nyanamnulum do? Tonda, yata wiribuka talak nirya arye, na kanye talima malye kilin yupu nyanamnulum do? Anggunce nyapnuluma deice arye, ikin weik unulule.

³ Anggunda, like mikbarye (13) deice arye, ‘An ikin upkilye ning ara, deiyok antia,’ nyabuka, na damak wenena yupu akunum nyapnulume. Anggunce na dam, malye yupu nyanululum ning ara, anggun alye kum usulul do?

⁴ Nara, dipkoprob malye kum winipse bukni, winipmanto ara, na malye winipmatinyopura, na deiceuk malye kipdeipdatinye. Na malye winipnyopura, anggun ikin ning kum dololulume. Na ikin ning dolonuna ara, anggunce yata uptuma deice arye, kum kipdeipnutum do? Kume anya arye, na wenena kume.

⁵ Aning ati ara, anggunce teneldamunye ning ara, ‘Nunda teleb nang unyabe,’ teneluluma arye, ‘Elda malinye’ tenen, nyanululum do? Nyanumunya deice arye, kanye talima erelulume. Adeice, kanye imun ning, na damak yangalye ning ara, anggunda, ‘El malye winibuka deice arye, ikin ulule,’ tenenululume.

⁶ Aning atouk tenenumunya ati ara, kekepnululume. Allah arye, na dam ikin ning akunum deipnuk ning ara, el wena youlamle atouk upnuk. Winipnuka ati, Allah aryuk, nati, ‘Malye ubuke,’ tenepnukce, ikin ning na nong deice deipnuke. Deiyoknye bira, el tonoka.

⁷ Winipnuka ati, dipkoprob na pia dobuka moropsiba, Allah arye, ton yanuka kum melipnuke. Ara, nyabuka moronune. ‘Nara diksukumuk pil donanye ununa anya arye, ikin ning yanmanila ara, na malye winipsa deice arye kume. Malye kum winipse bukni, na nong deice ikin ning deipnuka ara, Allah el ja.’ Narye, “Yanuka melipnilyame,” nyabuka moropne bukni, pia ton kum kekenulule. Diksukum yupu nyabuka kum bokeipnilirye, teleb kum kilinulule.

⁸ Allah aryuk, na tam bisik nirya bublan tirikdongopnuke. Winipnukba, na wekuka binmanto bisik babye, pia lelipdongopnukba, pia ininauk ubuk anya arye, ‘Yata winipnamne do?’ tenen, moubuka kum teneptinye.

⁹ Winipnuk talak ara, na bolamse ning ap, talilamse ning nirya ara, Allah arye dopropnuke ati, yuk nang arye na si erelamse ning ara, akunum bataknike. Allah arye winipnuk deice, na si babye malye updeipnuke. Ati wini talak ara, yuk nang nirya arye nati, ‘Elda mambulnye,’ kum teneninyake.

¹⁰ Winipnuk ning ara, bisik dana-dana nirya arye, na damuk yayukba, pia ikin weik ning arepnuka deice arye, pia kanye imun unulule. Winipmanto ara, aik ulunmace talak, aik abilinga dana-dana tam nirya, ululolamak atonun, tonok talak aryuk, teleb ulamnuk nirya, akunum dopropnukba, kum danuke. Tonda, ninye arye koulamap ning talibuka, kwinipdobipyeba, kolulamle tonun, ‘Na winiptinye,’ tenelamse ning nirya ara, akunum kum daneipnuke.

¹¹ Allah Yahweh el yu ara, na damak deipnukura, uku buk dilamle atonun unulule. Ara, elce nati ara, ‘Anye bira, na tamnye kume. Elda na oldan nang atonun ulule’ tenen, malye updeipnuke.

¹² Allah arye, weik wenena ning arenulul ning ara, bisibuka malye kipmanto kum anya arye, winipmanto ara, el mapu yin nang weik dopdeiptuba, na ban bisik yanuka, piptalibuka kaliknitinge. Tonda, na aik unak babye atonun, antanap dongopnitinge. Ara, ‘El yukak kum binamle’ tenen, winipnike.

¹³ Tonda, Allah arye ikin ning na deice deipnuka deice arye, na kwit capu ap, na du yapu ap ati ara, Allah arye yuk nang atonun updeipnuke. Ara, na kwit capu ap, na du yapu ap, na kayapu nang, yuk nang nirya ara, sik nirya arye bataknikba, na yuk ninye asiknye atonun unune.

¹⁴ Tonda, na yala ninye babye, na batakuka yuk pera bindobike. Na kayapu nang babye, sikce nati bataknikce, nati ton kum teneninyakce, lopdeipnike.

¹⁵ Tonda, na aik uruna yanganyak nang arye, ‘Nun ka,’ kum teneninyak touk, na amu tam ukirye, na aik pil donyak kilapu nirya babye, sikce ‘Elda nun deiyoknye’ tenen, tuba kum teneninyake. Aning atonun, sik nirya arye, nati ati ara, ‘Elda talye tikilyangananye, yuk mutukunye atonun ulule,’ teneninyake.

¹⁶ Winipnikba, narye na amu tam na aik pil donanye biti, pia yupu nimalye arye, el yukuna ati, yupu nyabuka yukuptinya babye, kum kekepnutue. Tonda na mikip arye, ‘Kao, winiplyame,’ nyaptinya babye, kum kekepnutue.

¹⁷ Weik uk dinulula deice arye, ton nyaniliba, na kil babye, na tong kekepnilirye, dukmanto ulule. Tonda na kayapu nun tonok mun pum tam sakamupu nang babye, ‘Anye bira nun lik’ tenen, sikce na damak kum yanganyake.

¹⁸ Tonda, bisik banmace mapu arye, na bisik banmanye talak ara, tong kekepnikirye, yep-yep aninyake. Tonda, natikniba eipnikirye, akutuninyake.

¹⁹ Na kayapu koprop, narye sikti, bico tenelamse nang arye, na ikin weik wamnuk talak arye, deiyok koubuka, wini talak babye, nati ton bico kum tenenikirye, ‘Anye bira nun lik’ tenen, yuk tam kibuka banyake. Sikce natibuk, yanininyake.

²⁰ Atalak ara, na nong bol urasin ton bona kume, yokak bikamnuke. Winyamnuk talak ara, dipkoprob dipmanto wamse. Na nong tup kalimna ara, pia kum danamnuke.

²¹ Se na kayapu, Allah el yu na deice deipnukura, pia imun kanye bobuka unune. Winyamnukba, na kayapu ati nyalamse. “Amapo. Anggunce nati, bico tenepnululume,” nyabuka nyalamse.

²² Tonda, na kayapu ati nyanune. Allah arye na dam ikin ning delinulula atonun, na kayapu sik babye, ‘Elda diplyopura, kum tenenamabe. Luba kipnamabe. El ti weik arye wenenamabe’ tenen, na dam ikin ning tabakuka delinumunye ning ara, yata ati do? Allah ati nyalamse. “Ance tamubuka, na deice ikin ning deipnulum ning ara, aning akunuma, tenepse bukni, na kam uning babye, dopropnamnilam do?” nyabuka asipdese. Ati, anggunda na kayapu nang, anggun babye aning atonun, tenenululum do?

²³ Teleb ning ara, na nyanye yupu nirya, ‘Yuk nang nirya arye, tuba tenepnamak’ tenen, sekamtinge. ‘Na nyanye yupu kekebikirye, buku noutamak sekuka deiamtinge,’ tenenune.

²⁴ Aning atouk, sikce keil pala dobuka, merekdeiptingce, besi ning dobuka, akeil deice sekuka deiptingba, na nyanye yupu nirya ara, pia ati aupnamtue. Akumopura, sekna ning el si ara, pensil dobuka, pala keil urasin deiceuk sekuka deiptingba, pia aupnamtu atia.

²⁵ Anyapmakin ning ara, urdem ati kume. Im deice ara, nati bico tenenilirye, na malye un ning pununa ati, dekuka lyepnamnilnye, Allah pia aulule. Aulul ati, akunum sirya dakna talak, na melina ati, el yalyeura, tukwak mutuku noutamak yanuka tiknamle.

²⁶ Winira, na kam unya noutamak arye, nong dipniba, lyupnilya babye, na kele. Aminyan talak tamubuka kam buknirye, aunye nong atonun nong kipnyopura, Allah el dam eipnamnarya. Ara, na bol deice suse weik dinilirye, bol dikinilya babye, na tamubuka kam buknirye, kam tuba unyeura, nong dipkoprob unirye, Allah el tibuk dipkoprob dinamne.

²⁷ Allah ara, na asing aniryuk eipnamnarya. Kam buknirye, dipkoprob nong unyopura, dipkoprob na Allah eipnamnarya. ‘Aning ara, winiptinye’ tenen, weik arye pataniliba, aning ati na kanye talimauk diniliba, tuba tenenune.

²⁸ Bukni, anggun na kayapu nang arye, nati, “El malye ulamuka deice arye, tuba-tuba ikin ning, el deice yangaliba dololule,” nyabuka dobonululume. Nyanululum bukni, anggun babye pia malye-malye un ninguk tenebuka, winilulum nang anya arye, ‘Aminyan talak ara, Allah arye nun ton wenepsilyak’ tenen, ilil asa unamlumca.

²⁹ Ara, urdem ati kum nyapsine. Deiyok ara, Allah arye malye unyak nang nirya ati, wenebuka olula ati nyapsine. Nun ninye arye, malye wininyap ning nirya ara, Allah aryuk eipsilirye, yu uplyopura, nun malye winina ati wenesulule. Aning ati ara, anggun ton malye winipmunba wenepsilyopura, angguncuk aning eipmunce, biknamlum ca. Allah elcuk, ninye tukwak nang nirya ati, yupu bokolisilirye, wenesulule. Aning babye, dipkoprob kel biknamlume. Ayub birye, el kayapu winilye nang ati nyabuk.