Ayub 18 - Eipomek

Ninye si Bildad birye, Ayub biti, nyabuk yupu

^1-2 Ura, Suah mutukunye, el si Bildad birye, tamubuka Ayub biti, nyabuk. Ayubo, yata barye talak ton, ance, ‘Yata yupu ton tabakuka nyaptinye do?’ tenen, tuba nyanauk unamlam do? Dan talak an yupu nyabuka, sirya daknamlam do? Atalak ara, min anda, ‘Dipkoprob ara, dan do?’ tenen, pia moubuka tenipnulyame. Tonda, tunim abuka ulamince, nun nyapkipye yupu, ance moubuka kekepnamsilyame.

³ Ance nunti, lub nang tenesilyam do? ‘Sikda pia walwal nang unyak,’ tenesilyam do? Tonda, ance nunti, ‘Sikda talye sapi basam bai tam ara, kam ulamle ning atonun, walwal nang unyak,’ tenesilyam do?

⁴ An yu upkilyeba, wenen kanye teneminye ning ara, an deiceuk yakilyeba, ikin dolominyeba, uk talikule. Anda yatato ning tenelyama ati, winilyam do? Ance, ‘Na ti yu deice arye malye yupu nyapnyopura, tukwak mutuku nirya ara, luluknamle,’ teneplumce nyanululum do? Tonda, ance winiminye ning ati, amutuku noutam nirya, weik mutuku kon ap, mutuku kon mulamle keil ap nirya ara, amutuku lodakuka, yuk mutuku bitu do? Kume, aning ara, winipmanto kume.

⁵ Ance min, aning-aning weik tonun nyamamum bukni, dipkoprob ara, ani. Ara, malye unyak nang ara, minopce dipnamake! Winipmanto ara, ninye arye, weisa upna buk ara, dipkoprob minop tangap dongoptingura, malye ninguk wininyak nang babye, minop dipnamake. Tonda, weisa akunum tangabikceba, malye kibukyopura, uku buk ton diniptinga babye, uku tonap buk kum lanamle. Aning atonun, sik malye unyak nang akunum dibikcopura, kanye arye tonap, kam pia kum unamake.

⁶ Anggun aik pum tam arye, dirina ulamle ning ara, tangaplyeba, dirina tonap kum kipnamle. Upna ubuka, aik pum tam abilinga deice delinyak ning ara, tonap kum deibikceura, dirina kum kipnamle.

⁷ Sik malye unyak nang arye, malye kibuka, ‘Wininamabe,’ tenepnikirye, mikip arye bisik arye teleb kibuka banyake. Bukni, aminyan talak ara, sik mikip namin ubicopura, yan arye kisok duklamle touk kibuka, nemalyap banamake. Anang ara, duknubikirye, ‘Malye winipmap ning ara, ani-ani,’ tenen, yupu tanyak ning nirya ara, tamubuka sik nong deice yalyopura, sirya oplyeba, kum danamake. Pia amu tam unamake.

⁸ Winipmanto ara, tonoknye balamle deice ara, mangkau kanye bopmalyebuk, wen bisik ara, el si ara jaring, aning noutam weknamle. Winiplyeba, anye el yan ara, ajaring arye kwaribuka youpnamle. Atonun, ‘Abisik binamabe,’ tenebikirye, abisik banamanak, mangkau kanye bopmalyebuk, yu nang arye, ‘Ninye opnamap’ tenen, weik tuku pum luklamak pum tam weklamake.

⁹ Winiplyeba, anang sik dam awena noutam weklyeba youpnamle. Winiplyeba, tapu arye youpnamle. Sikda, binmanto kum upnamake. Aning nirya ara, sik malye wininyaka arye!

¹⁰ Tonda, yu nang arye, ‘Sik youna ati wen tapu, sik yanibuka binamak’ tenen, tukwak duknubuka, akunum webuk. Ati, anang sikda atapu noutam yanibuka binamak bisik ara, wena akunum webuka kintinibuk.

¹¹ Ati ara, sik malye un ninguk, talibuka unyak nang, sik dana-dana tam nirya ara, ilil un ninguk ulyeba, sik kanye noutam ilil ulule. Tonda, anang arye, ‘Nun binuyab,’ tenebikirye, banyak sukum nirya ara, ililuk ulula ati, balocak, sik balye tam, ilil arye mining dam dobolbalule.

¹² Min talak, sik anang, sik kam una ara, pia mikip arye ulamik bukni, wini talak ara, mikip namin aryuk unyake. Anang banyak sukum, dan mutuku do nirya ara, ikin ninguk yalyeba, sikti, opmanto ulule. Mikip arye kum bakirye, yan arye kisok dukdongobuka, kanye imun ning arye, anang sirya oplyopura, kum danamake.

¹³ Tonda, anang sik bol nirya ara, kanye imun uk talilya deice arye dinule. Aning atonun, anang sik nong ap, sik taruk ap, sik yan nirya ara, nebuka yabung balule.

¹⁴ Anggunce, ‘Kume, nun ap, nun mapu silip ap, nun aik noutam tunim abuka ulamtibye toura, pia teleb unamapʼ tenen, kanye deibuka ulamik. Bukni, wini talak ara, dipna deiyok ning arye, sik nirya anyasik arye, bai tamto yakaldonokolule. Winiplyopura el adiparyuk anang libukaplirye, bobuka dina deiyoknye dam bobalule. Ati ara, pia weik ilil asa unyake. Ara, anggun minop dipnamlum ati, ilil weik usululule, nyapsine.

¹⁵ Min talak, sik malye unyak nang nirya, sik teleb aryuk, talye tunim abuka, sik doltak tenda aik noutam ulamik bukni, wini talak ara, anyasik-anyasik noutam ara, sik talilamik ning nirya ap, anang ap, akunum kum dayuke. Ati, talye nang yakirye, adoltakne tenda aik dobuka ulamting. Bukni, anang sik aik pum, sik kanye imun uk talilul ning kum kilina ati ara, lyun tong nyalul ning, el si Belerang, aning bobuka, sik min dobuka ulamik tenda aik pum deibikirye, uku sekikceba, uku buk arye, wekelbuka diplyeura, auk deiyok kum upnamle. ‘Winipnamle’ tenen, apil donamake.

¹⁶ Sik malye uning talibuka unyak nang ara, sik apu yapu akunum deiamik. Sik ton dibikcopura, mapu ton pia kum deilinamake. Ati, winipmanto ara, weik yo tikamtua babye, tuku pum tam, el yating binamuka nirya ara, kouluplyeura, ayo koululamle. Tonda, ayo taruk dana-dana tam binamuk ning nirya ara, adiparyuk kouluplirye, tobuka poupnamle ati, mitik yo ton kum panamle. Atonun, sik anang nirya ara, pia kum danamake.

¹⁷ Akunum dibiceopura, tukwak mutuku nirya ara, yuk nang arye sikti, kanye tonap, pia kum teninamake. Sik ap, anggun si ap, aminyan talak upnamak nang arye kum biknamake. Amutuku nirya, weik asik noutam banyak bisik deice, ninye banamak bukni, sik min talak, malye ulamik nang ati, tuba pia kum tenepnamake. Lubakinauk unamake.

¹⁸ Sikda min talak ara, tukwak mutuku noutam dirinak ulamik bukni, Allah arye anang dirinak arye dopdeiplyeba, unyakak binuka unamake. Ara, Allah arye, amalye unyak nang ara, kam tuba unyak nang unyak mutuku nirya dam arye, donoklyeba, pia pera binuka unamake. Ara, akunum dibikcopura, pia unyakak binuka unamake.

¹⁹ Allah arye, sik deiamik nang arye, deibikceba deipdanin banamak nang nirya ara, akunum kum kipdeiplirye, sirya daknamake. Ati, sik anang aik dobuka ulamikak ara, aminyan talak nirya noutam, tonoknye babye, tuba ton bataklirye, pia kum unamake. Winiplyopura, sik ulamik mutuku noutam nirya ara, anang pia kum danamaka atia.

²⁰ Allah arye sik malye winin ning talibuka wininyak nang ati, akunum kum kipdeiplyeura, yuk-yuk mutuku nang, keting kumul balamle tam unyak nang arye, winiplyame nyabikceba kekebikirye, sik nirya ara, ilil weik upnamle. Tonda, aning atonun, keting panalyangan tam unyak nang sik nirya ara, aning eibikirye bikikceura, ‘Se’ tenen, ilil pia uplyeba, yok sirim taliplirye, lukdanuka berber apnamake.

²¹ Aning nirya ara, talye kum nyapkine. Dipkoprob, sik malye un ning talibuka wininyak nang arye, Allah ati, ‘Nun lik’ tenen, diba pia kum tenenyak nang nirya ara, sik ulamikak nirya ara, pia kum kipdeipnalamle! Aning atonun, yata nang do nirya, Allah pia kum bikinyak nang ara, asum akunum lak nyapmakin touk, sik ton pia kum kipdeipnalamne! Ayupu nirya ara, Bildad birye, Ayub biti, wenebuka nyabuk.