Ayub 17 - Eipomek

Ayub birye, el ikin ulamuk ning ati, dukdongobuka nyabuk yupu

¹ Ayub birye, el kwitcapu nang winilye nang ati nyabuk. Na kanye pum tam arye tenenun ning ara, nyapnusine. Na kanye ara, na dipnamne talak ara, akunum dam upnile. Ara, na isin arepnuk ning doproplirye, dipne talak ara, akunum dam upmanile. Wini talak mitik tonun tuba aupnil ning ara, wininamne bukni, na dipnyeura weipnamniakak ara, akunum kintinip deipnike.

² Tonda, na dana-dana tam nirya ara, sik yuk nang arye nati, malye yupu weik nyaninyake. Ara, “Elda malye ululnye ati, mereukuka ikin weik ukulule,” nyabuka, nalipnikirye, akutuninyake. Anggunce nati, ‘Winilulnye,’ nyabuka, luluninyak ning ara, ‘Yata yupu ton tabakuka nyapnamniak do?’ tenen, akunum narye moubuka, eipnirye kekenune.

³ Se na ni Allah, yatanye birye na melina ati, na yanuka teleb yupu nyapnamle do? Na kwitcapu nang kan-kan ara, nati melin yupu nyapmanto nang ara, pia ton kum unyake. Ati, na nio, ancuk nati, “Dip nyalula nyabuka ulule,’ teneptumce, nyapnutumura, na kanye deiptinye. Se, na melina ati yupu nirya ara, yatanye deice arye, teleb yupu nyapdeipnutu do? Na kanye ara, na kwitcapu noutam arye, tonok ning babye, kum ulule.

⁴ Na nio, na kanye ara, ance na kwitcapu nang, sik kanye tenen ning nirya ara, walwal atonun kipdeipminyeba, wini talak moubuka kum teneninamake. Wininyaka ati, atalak ara, sikce nati, ‘Malye ululnye,’ nyabuka, lululinamniak bukni, sirya ara, kum malye kipnamake.

⁵ Yata nang do nirya, sik kweit capu koproba bukni, yuk nang dam binuka, ‘Na kwit biti, tilila yupu nyapnirye, moul kin yo bok arepnutumba, doproptinirye, weik kipnutu’ tenen, nyabuka morolulnye bira, aminyan talak, elce deiamlye mapu ara, ikin weik unamake. Winipmanto ara, ton bikna nang arye, nyanyak ning ara, ani. “Atonye elce deiamlye mapu ara, anggun ni koproba, malye weik winilamuk ning ati, aminyan talak amapu ara, ikin weik unamake,” nyanyake.

⁶ Wini talak ara, ninye nirya arye, yuk nang kekecak binuka nati, malye yupu nyaninyake. Anggunce, “Moubuka tenipnamlulume, kumopura, Ayub pia imun kanye bobuka ulamu touk upkilyak atia,” nyabuka, nalinikirye, akutuninyake. Ayupu atonun nyaninyake. Tonda, sik anang nirya ara, na dam yakirye, na asok deice maka tululininyake.

⁷ Wininyaka ati, na kanye imun unilyeba, ikin kanye bobuka unirye, engenuna deice arye, na asing ara kupnuke. Tonda, na nong bol nirya ara, malye bol bopse ati, na nong ara, kanya atonun unulule.

⁸ Sik diksukum teleb unyak nang arye, na ikin unilye ning eipnikceura, ‘Se, elda malye kum winilamuk bukni, aning ara, yata ati do?’ tenen, ilil uplyeba, lukdanuka ngaluknauk uninyake. Tonda, sik malye winina kum, dipkoprob diksukum wininyak nang arye, nati tenepnikirye, sik malye wininyak nang, Allah ati, ‘Nun lik,’ tenenyak nang ati, malye kanye bobuka, wana dem unyake.

⁹ Malye nang arye, malye winin ning wininyaka babye, yata nang do nirya, dipkoprob kibuka, teleb unyak nang ara, teleb bisik kum batakanyake. Pia dobuka, tuba teleb unyake. Atonun, yatanye do nirya, el malye kum winilulnye bira, el mikip ap, nong ap, kanye tenenin ning ap, ton tabakuka mikip unamle!

¹⁰ Bukni, anggun nirya ara, na dam yanmalumce, wenen yupu weik nyanmanulum ning ara, anggun kan-kan ara, narye dipdesetinye bukni, na weik bikna, tonoknye babye ton, pia kum eipsitinye. Anggunda walwal nang ululuma atia.

¹¹ Na kam tuba unye talak nirya ara, akunum kum kipdopnin yanganulule. Tonda, narye, ‘Winipnamne,’ tenyamse ning nirya ara, bataknauk ununa ati, aning nirya ara, dipkoprob nong kum upnamle. Tonda, na kanye talima noutam arye, ‘Se, aning ara, winipnamne, aning ton winipnamne’ tenen, pia patapnukba, adiparyuk, tuba teninun ning nirya ara, kum kibuka wanganauk ulule.

¹² Bukni, na kwitcapu winilye nang, sik nirya arye nati nyapnike, “Lukunyan kum ulyame. Kuna noutam kum ulyame. Atalak ara, keting noutam atonun akunum ukulule. Tonda, dirina ara, akunum an dam yanmanto ulule,” nyakinyake. Nyanyak bukni, na bikinune. ‘Na dam, tuba pia kuna sukum upnamle’ tenen, na kanye pum tam arye akunum bikse.

¹³ Narye atalak tenepnye ning ara, ani. Ara, narye, ‘Kuna damuk dipnirye, min diplamik nang unyakak, el si ara Sheol mutuku, dabinuka pia unamne,’ tenepne. Tonda, ‘Akunum dipnyopura, kuna mutuku tam, binuka unamne noutam ara, asukumuk binuka, unyakak pia unamne,’ tenepne.

¹⁴ Aning atonun, na nong dipnyeura, binuka weipnamniak sum ati, si nyaptinye ning ara, “Na ni koproba atonun, amutuku unulule,” nyaptinye. Tonda, na nong weipnikceba, na nong nirya kuluma arye dipnamniak ati, si nyaptinyeura, “Na nin biti tonun, tonda na toumin kilapu atonun ululume,” nyaptinye.

¹⁵ Bukni, anyapmasin yupu nirya, dipkoprob akunum tenipdetinirye, nyaptinyopura, narye, ‘Aning ara, winipnamne,’ tenen, weik tonun patapnil ning ara, dan sukum ulul do? Ayupu akunum nyapnyopura, nara pia kanye deibuka, pin-pin asa arye, ‘Winipnamneʼ',’ tenyamsirye, patalamnuk ning ara, yatanye birye aning nirya eipnamle do? Kume, winipmanto nyapne.

¹⁶ Winipmanto, nara akunum dipnyeura, sik mince akunum diamik nang, binuka unyakak akunum wekelbinyeura, akunuma tenepne. Na kam tuba unye talak ara, ‘Narye wininamne,’ tenebuka patapnilyeba, kanye tenenun nirya ara, pia ton kum bopnamne. Akunum diamik nang bobanyakak, el si ara Sheol mutuku noutam ara, akunum binuka unyeura, akunuma. ‘Na tenyamse ning nirya ap, na ap, pia kum danamle,’ teninune. Ayub birye, ayupu nirya nyabukba, el kwitcapu winilye nang kekebik.