Ayub 16 - Eipomek

Ayub birye Elipas ap, el kwitcapu nang bitinye ati, tamubuka nyabuk yupu

^1-2 Ayub birye Elias biti, tamubuka nyabuk. “Anggunce pia talye-talye yupu, nati tuba nyanululum ning nirya ara, mince akunum kekenune. Ara, Elifas ance anyapmalam atonun yupu ara, anggun winilye nirya arye nyanululum ning ara, mince akunum kekelamse. Ati ara, anggunce nati, kanye teleb kin yupu ap, talima kwadina yupu ap ara, pia kum nyanululume. Anggunda kanye malye kilin yupu uk nyanululume.”

³ “Anggunce nati, talye minin yupu nyanululum ning ara, dan talak arye bataknamlum do? Winipmanto ara, kumanya mikip arye, pu nyalamle touk, talye yupu weika arye, tuba nyanululume. Tonda, anggunce yata wirin deiyok ati, tenipmince, na dam yanuka, batakna kumce, tuba nyanilyam do?

⁴ Dipkoprob anggunda, na ikin unye touk winilamtum toura, anggunce nati nyanululum yupu nyapsitinye. Tonda, nara anggun atonun ulamtininye toura, Anggunce, wenen yupu nyalulum atonun nyapsitinye. Tonda, narye ‘Moubuka ikin unamak’ tenen, dipkoprob na kisok kwakdu-kwakdu nyapnirye, narye wenen yupu weika arye, anggun dam nyapdeipsitinye.”

⁵ “Bukni, anggunda na ikin unye touk ulamtum toura, na yupu nyan deice arye, anggun kanye pum nirya ara, teleb kibuka mikip kipdeipsitibye. Tonda, bico tenepsitinirye, na yupu nyan deice arye, anggunti, talima kwadipsitinya deice arye, pin-pin kipdeipsitinyeba, anggun kanye imun ning ara, kum datue.

⁶ Bukni, wini talak ara, na yupu nyaptinya babye deice arye, na ikin unulul ning ara, pia min unulule. Tonda, na yupu nyana kumce, tunim abuka uptinya babye, atonun na ikin unulul ning ara, pia min kum unulule. Na yupu nyapmanya babye, yupu kum nyapmnanya babye, nong ton kum upnutue. Tuba ikinuk unulule.”

⁷ “Bukni wini talak ara, Allah elce na deice ikin weik tonun akunum deipnuba, na nong ara, pia namin upnuka ati, pia kum winipmanto unune. Aninguk kum bukni, Allah arye na mapu silip nirya ara, akunum obuka, kum kipdeipnuke.

⁸ Tonda, Allah elce nati wenebuka, weik ikin arepnuka deice arye, winipmanto ara, tapu koupdongopnukce, ikin weik, na deice akunum nyapdeipnuke. Winipnuka deice arye, atalak na nong nirya ara, bol malye bopsirye, na nong bol nirya pia malye kibuka, akunum sesal sepnuk. Na nong bol malye wamnukba, na yok nirya ara, tukwak wininulul ati, yuk nang nirya arye, aning akunum eibuka biknikopura, ‘E, dipkoprob Ayub bira, malye ulamuka ati, bol malye bobuka atia,’ teneninyake.

⁹ Winipmanto ara, bai tam ulamle yu kus arye, yuk kam ning obuka, ‘Dipnun’ tenen, si kintibuka, aning nong bol deice si tolamnak, dila saklirye balamle atonun, Allah el yu arye nati, ikin weik deilinule. Tonda, Allah arye nati, ‘Anye opnun’ tenen, nati yu arye erebuka dilenule.”

¹⁰ “Pia ikin weik ununa ati, yuk nang nirya ara, eipnikirye, ‘Se, el ikin ulul ning ara, weik mambul’ tenen, lukdanuka, nati malye kibuka, anggun si bam bol weik tonun kibuka akutunikirye, malye yupu pia weik tonun nyanikyake. Tonda, sikce nati, ‘Elda malye weik ulamuka ati, moubuka kanye ikin kanye bolamle,’ tenenikirye, ninye weik bulubikirye, na dana-dana tam antanap dongobikirye, sik taruk kitibuka opnikirye, na katum dana-dana tam nirya ara, oltakaninyake.”

¹¹ “Winibuka malye yupu nyabuka, oninyaka ati, na kanye ara, Allah elce na bobuka, sik pia malye unyak nang deiceuk, bobuka akunum nyapdeipnuke. Tonda, Allah arye na dobuka, pia malye kibuka malye unyak nang, sik dam bininuka bataknuke.

¹² Aminyan ulamse talak ara, na pia teleb deice arye, talye mangkau asa ulamsirye, pia telebuk ulamse bukni, ‘Naʼ tenen kum, mangkau kanye bobuka unmasebuk, Allah elce nati, bikna kum buk yanuka olyanuke. Winipmanto ara, Allah el taruk arye na un dam, mikip arye talipdongobuka, tuku deice pouklopnukba, na nong ap, yok ap ara, ceplopnuke. Winipmanto ton, Allah elce na dobuka lak deipnukce, sik yin talin nang ati, ‘Sik mal olana bikna ati, anye el nong deice dopdenulyame,’ nyapmanto upnuk.

¹³ Allah arye nati, bico tenena pia kum arye, el yu deice arye, pia ikin na deice nyapdeipnuke. Winipmanto ara, Allah arye lo areplyeba, pia yu nang arye, sik mal arye na deice dobuka marapnikba, na bouku, lak belepnuk ning ap, na ining ap ara, tuku deice saknuke. Winipnuka babye, Allah arye aning eibuk bukni, nati bico pia kum tenepnuke.”

¹⁴ “Tonda, winipmanto ara, Allah arye na dam tuba-tuba olyanganilyeba, suse dilauk unulule. Ara, mal olana bikna nang arye, pia tuba-tuba pia dobuka, olyangalamak atonun, Allah arye kanye tonap, na dam yanuka, pia tuba-tuba weik ikin ning, na deice deilinule.

¹⁵ Allah arye na yanuka, pia olyangana uk unilya ara, narye, ‘Se’ tenen, pia malye kanye bopnarye, ‘Yuk nang arye, na ikin unilye ning biknamak’ tenen, lakina ati, malye baju, el si karung koni baju, wibuka ongopnarye, sice buta deice uk, bai tam banune. Nara mikip namin akunum unune.

¹⁶ Nara pia engena uk unyeba, na asok ara, ining bi kinulule. Tonda, na asok bola ara, sukubuka nena uk unulule.”

¹⁷ “Aning nirya ara, ikin pia weik unulul bukni, narye pia malye kibuka, yuk nang ati, mikip arye kum onune. Tonda, malye un ning ton, pia kum wininune. Aning kum bukni, na talima lamapdongobuka unirye, malye un ning duknuna kumce, teleb yupu deice arye, Allah ati, lak arye moronune.

¹⁸ Se, na min arye dipnamne ati, atukwak mutuku noutam ara, na ining binamnil ning ara, duknuna kume. ‘Na ikin weik unulu ning ap, dipnamne ara, lak kiptuba, ninye nirya arye biktinge’ tenen, patapnile. Nara, kanye imun kanye bobuka, “Ikin weik ununa ati, Allaho yan melibuka lyepnilyame,” nyabuka, ngalukuka morokunun ning ara, ance tunim altakna ara, pia kume. ‘Aning nirya ara, moubuka kekepnutum’ tenena ati, morokunune.

¹⁹ “Na kanye ara ani. Atalak babye, na yupu nyapnyeba, kekebuka bikinul deiyoknye bira, im deice tam aulule. Ati elce nati, eibuka biknilyak arye, na melina ati ara, ‘Ayub elda, pia malye kum winilule,’ nyabuka, tukwak arye lak nyapnamle.”

²⁰ “Atalak ara, na kwitcapu nang koproba arye nati, ‘Kume el Ayub bira, dipkoprob malye weik winilamuka ati, Allah arye wenelule. ‘Aning ara, mereukuka ikin weik ulule’ tenen, yap-yap nyabuka akutubuka, nalininyake. Wininikceba, na asok erebuka, Allah ati, ‘Melipnilyame’, nyabuka, engena deice arye, na asing meka weik sakanilirye, Allah ati pia moronune.

²¹ Winipmanto ara, ninye tonoknye ton, el kwit koproba ati, kwa dipdanuka, yupu sisikuka wilalamak touk kibuka, ‘Allah arye nati, yupu melibuka sisikamnutum’ tenen, patanulule. Aning atonun, im deicenye birye, na melina ati, atalak aryuk, Allah el damuk binuka, na malye kum winilamse ning lak nyaptuba, ‘Allah aryuk nati, teleb yupu nyapdeipnuturye, kanye arye tonap teleb kipdeipnutue’ tenen, patapnile.”

²² “Aning ara, talye ati kum nyapne. Deiyok ara ani. Na kanye ara, tuba kam unamne ati, keting tamun lo nirya ara, lo pia weik tonun tonap kum upmanila ati, apia kum unamne. Keting tamun mitik tonun ton, kam unamanya ani, aminyan talak ara, adiparyuk dipnyeura, bindopnamne. Winipnyopura, kanye arye tonap tamubuka, atukwak mutuku noutam, pia kum yanane.” Ayub birye ayupu nirya ara, el kwitcapu, sik winilye nang ati, nyabuk.