Ayub 13 - Eipomek

Ayub birye el kwit capu ati, nyabuk yupu

¹ Ayub birye tonap dukdongobuka, el kwit capu ati, ayupu nyabuk. “Aning ara diba, arup nyapmasin ning nirya ara, na asing arye akunum elinune. Tonda, anggunce nyapmanulum yupu nirya babye, akunum kekenune. Tonda aning nirya ara, dipkoprob na kele.”

² Anggun akunum kel bikamlum ning yala-yala nirya ara, na babye akunum bikamse. Anggunce nati, ‘Anye bira, nun tonun kum ulule. Nunda mambul weik bukni, elda mambulnye pia kum ulule,’ tenenululum bukni, na kel weik bikse atonun, anggun ton kum ululume.

³ Bukni, na weik patanulul ning ara, ‘Allah dam nyaptinyeʼ tenen, patapnile. Allah pia deice tam erebuka, aning-aning nirya talibuka, pia mikip weiknye ulula ati, ‘El dam ara, “Na ikin unulul ning ara, yata ati na dam yanmanil do?” nyabuka, na yupu nyaptinye,’ tenenune.

⁴ Bukni, anggun na dam yanmalum nang nirya ara, anggunce yuk nang ati, tilila yupu nyalulumba, sikce dipkoprob ning ara, moubuka kum bikinyake. Winipmanto, sikda, kweten nang unyak bukni, uk din nang kum kwetelinyake. Pia wal-waluk unyake. Anggunda, aning atonun winilulume.

⁵ Anggunda, yupu ton nyana kumce, tunim abuka utum toura, anggunda, akunum kel weik nang atonun ululume.

⁶ Ati ara, wini talak narye tenenun ning ap, nyapnusin yupu ap ara, moubuka kekepnamlulume. Na patanulul ning ara, anggunce na nyapsinye yupu moubuka biknamlume.

⁷ Bukni, anggunce, ‘Nunda Allah arye tenelul ning laka nyapnukiabe,’ teneplumce, talye yupu uk nyapnulum do? Tonda, anggunce, ‘Allah el piluk donyabe,’ tenelanmalumce, kwalina deice arye, tilila yupu nyapnamnulum do?

⁸ Tonda, Allah arye nati, ‘El wenena ati, winipnamne,’ tenelul ning ara, anggun ton aninguk tenebuka nyapmalum do? Anggunce, “Allah arye anti, ikin ning dobuka, an deice delikul ning ara, moubuka, teleb ulule,” nyabuka, nati yanin yupu uk nyapmanulum do? Allah arye, ‘Winipnamne,’ tenepnuk touk, el tamuk kipdoplumce, nyapmanulum do?

⁹ Winipmunyopura, aminyan talak, Allah arye anggunti, ‘Teleb wininyak do, malye wininyak do?’ tenen, moubuka eipsilirye, dipdesilyopura, telebuk wininamlum do? Weik wenepnamsil do? Tonda, anggunce talye nang ati, tilila yupu nyalulum touk, Allah ati tilila yupu nyaptum do? Anggun malye winilulum ning ara, duknuptum do? Anggun duknuptuma babye, Allah arye el lina uk unamsile.

¹⁰ Ura, anggun moubuka tenipnamlume. Anggunce tunim abuka, duknuna arye, ‘Nun kanye deipmap nang ati, teleb yupu nyabuka bokeipnamap bukni, nun kanye kum deipmap nang ati, malye yupu uk nyabuka bokeipnamabe,’ tenepmunyopura, Allah arye kanye kum deipnamsile. Aning kum bukni, yuk nang ati talima bokuka, malye yupu nyapmunyopura, dipkoprob Allah arye anggunti, weik wenepnamsile.

¹¹ Ati ara, ‘Winipsilyakʼ tenen, Allah ati, ilil kum usulul do? Allah elda pia weiknye ulula ati, el yu upliba, anggun deice ikin ning deipsilyeba, eipnamlum talak ara, anggun ilil weik kum upnamsil do? ‘Allah arye kanye imun weik ning arepsilyakʼ tenen, elti, anggunda lukdanuka, ilil upsiliba, talima pum tam, sirim kum talipnamsil do?

¹² Anggunce nati nyanululum wenen yupu nirya ara, nong kum upnamle, talye yupu uk ulule. Winipmanto ara, kat yo bukni, ninye arye ayo dobuka, uku dongobikceba, uku arye ayo nirya akunum diplyopura, sice uk bataklamle touk, nong kum upnamle yupu nyalulume. Tonda, anggunce nati, “An ikin ukulul ning nirya ara, deiyok ani, ani,” nyabuka nyanululum yupu ara, mikip yupu pia kume. Talye-talye nyalulume. Winipmanto ara, yin talin nang arye, ‘Yuk nang arye, mal dopsikiba, bolpibuka opsilyakʼ tenen, kira tuku dobuka, sik nong lelilon ning, el si ara perisai, memepting bukni, mal tonok ning babye aning bolpilyopura, adiparyuk pouplirye saknamle. Aning ara, mikip pia kum ati, ‘Mal opsilyakʼ tenen, aning arye, sik nong kum lelipdatinge. Talyeuk uptue.

¹³ Ati ara, anggunda yupu ton ap tabakuka nyana kume. Anggunda, tunim abuka upnamlume. Naryuk yupu ton nyanamne! Yupu akunum nyapnyopura, na wenena ati, yata ning yanuka na deice wiripnamnil do? Na walwal bukni, aning ati, ‘Dauplyeʼ tenen, ilil kumce, tenina kum unamne.

¹⁴ ‘Yata ikin ning do nirya ara, na dam yanilya babye, ‘Akunuma aninguk dolonamneʼ tenen, akunum kintinipse. Na nyapnamne yupu deice arye, Allah arye wenebuka opnutua babye, telebe uka. Na kanye ara, ‘Na dibina babye, dadipnamneʼ tenen, akunum kintinipse. Na dibina ara malye.

¹⁵ Anggun ap, na ap, neika uk eipnamabe. Na teninun unun ning ara, laka nyaptiniba, Allah kekepnilyopura, Allah el yu upliba, nati adiparyuk opnamnil do, kum do? Na walwal bukni, na kanye ara, elce opnamnil kum danya. Ati ara, ‘Elce lyepnetue,’ tuba kum tenenun bukni, opnilya babye, ‘Na teninye ning ara, el dam laka nyaptinyeʼ tenen, patapnile. Allah el dam, “Nara malye kum wininune,” nyabuka, laka nyanamne.

¹⁶ Na kanye ara, ‘Allah dam tiknirye, na wininye ning nirya laka nyaptinyopura, Allah arye ikin ning, na deice deipnuk ning ara, ila tamubuka doplirye, kum kipdeipnamleʼ tenepne. Winipnya deice arye, nara lyelanamne. Tonda, sik pia malye winiyak nang ara, ‘Allah arye nyasulul yupu, pia kum kekepnamapʼ tenen, mania kanye bobuka, Allah ati yaninyaka ati, el dam dipkoprob kum yanamake.

Ayub birye Allah ati, nyabuk yupu

¹⁷ Se, na ni Allah, ance, ‘Na nyapnukin yupu ara, moubuka kekepnutumʼ tenen, moropkine. Tonda narye, an dam, “Aning-aning wininuna ati, malye kum wininune,” nyabuka, laka nyapnukin yupu ara, ‘An amul arye moubuka kekepmince, dip tenepnutumʼ tenen, moropkine.

¹⁸ Na nyapnamakin yupu nirya ara, ‘Aning nyapnun do, aning nyapnun do?’ tenen, moubuka teneipsirye akunum kintinipse. Na kanye ara, ‘Aning nirya laka nyapnyopura, Allah arye kanye deipnilirye, ila tamubuka teleb kilinamnile,’ tenenune. Malye ton kum ununa ati, Allah arye kekepnilirye, “Elda malye ulule,” nyabuka, ‘Kum wenepnamnile,’ tenenune.

¹⁹ Na ni Allah, yatanye birye, na dam yaturye, “Akunum malye winiplume,” nyabuka wenepnutu do? Dipkoprob, malye winipsopura, yupu bokolina deiyoknye birye, “An malinye ani,” nyapnutuba, akunuma. Winibuka dipkoprob nyapnutuba, na yupu nyana kum, tunim abuka unirye, dan talak dipnamne do?’ tenen, kalikuka dinauk unune.

^20-21 Bukni, narye Allah anti, ‘Abitinye arepnutumʼ tenen, anti moropkine. Winipnutum toura, nara an dam kum duknupnamane. Abitinye ning ara ani. “Ance, na nong deice ikin weik ning delinilyama ning ara, kum kipdeipnilyame,” nyabuka, moropkine. Tonda, ‘An mikip weik arye na wenepnimince, adeice arye lukdanuka, ilil unulul ning ara, kum kipdeipnilyame,” nyabuka, moropkine.

²² Ura, ance ikin weik unulul ning akunum kum kipdeipniminyopura, ance nati, “Anda malye winiminye ning ara, ani-ani,” nyabuka, minopce laka nyapniminyopura, atalak ara, narye anti, tamubuka laka nyanamkine. Akumopura, narye anti, minopce laka nyan yupu nyapnyopura, ance na dam tamubuka nyapnamnilame. Aning ara, an kanye arya.

²³ Bukni, na ni Allah, na akunum malye winipse ning ara, ance nati, “Malye winiplum ning ara, ani-ani. Malye ning ara ani!” nyabuka, laka nyapnamnilyame. Tonda, yata wiribuka malye ning winipse deice arye, ance nati yu kanye bopnulum do? Ance, ‘Aning wininamlume, aning ara, pia kum wininamlume,’ nyapdeiamsulum yupu, yanipsirye, malye winipse ning ara, yata wiribuka do? Ance na dam laka nyapniminba, kekepnune na nio.

²⁴ Se, na nio. Anda yata deiyok ati, na duknunimince, na dam yanuka, pia kum melinilyam do? Tonda, yata deiyok ati, ance nati, ‘Anye bira, lik tenenilyamce, malyeuk winilula ati, elti, weik wenebuka opnamne,’ tenenilyam do?

²⁵ Winipmanto ara, yo bok kolupmalya ati, koulupmalye ning, kum mikip doplirye, ayo bok dakuka bobiliba, anda yata deiyok ati, talye koulubuk yo bok ati, ilil weik ning arenamlam do? Aning atonun, gandum duk teikikceba, sung-sunga saklyeba, kum doplirye, asung-sunga bobalamle touk, ance talye sung-sunga ati, ‘Dopnunʼ tenen, dobolbinuka dolbinutum do? Aning atonun, na babye mambul pia kumnye bukni, yata deiyok ati, ance tuba dobolbinimince, wenenilyam do? Tonda, yata deiyok ati, ance na dam winipniminba, lukdanuka ilil upnilirye, ‘Se yukak bikbik abuka binirye duknuptinyeʼ tenen, unun do?

²⁶ Aning ara, talye ati kum nyapkine. Deiyok ara ani. Allah ance nati, “Anye birye malye ulul ning ara, ani-ani,” nyabuka, minin yupu weik tonun nyapnulumce, winipmanto ara, yupu bokolina deiyok nang, sikce eibuka kel bikina ati, sekuka arelyame. Winipniminyeba, ‘Ikin uplirye, kanye imun kanye bobuka upnamleʼ tenen ati, akunum kintinip deiamnulume. Tonda, minop talak, na wel talak malye winilamse ning ara, wini talak ance aning tuba tenipmince, na wenena ati, dengna ara, ikin ning, arenulule. Aning ara, yata ati do na nio?

²⁷ Winipmanto ara, ance na tomobuka, wenena aik pum tam akunum dongopnulumce, na yan ara, kat tapu el si rantai arye, koupdongopnuluma ati, na binmanto kum unune. Tonda, ance nati, ‘Malye winipnamal do, kum do?’ tenen, na wininun ning nirya ap, na banunak nirya ara, moubuka elinilyame. Tonda, na yan yanibuka balamsak ap, wini talak banunak ap ara, mutuku-mutuku nirya ara, ance eibuka, akunum bikamnulume.

²⁸ Nara, uk weik dinilya deice arye, pia ikin weik ununa ati, bol malye kipnuke. Winipmanto ara, din sirya dibuka, bai tam donokibiba, lyulamle touk, na babye pia mitang kipnuke. Tonda, baju deiplobikceba, sing arye diplyeba, bisik weik botolamle touk, na bol malye kipnin banulule. Ayub birye Allah ati, ayupu nirya nyabuk.