Ayub 12 - Eipomek

Ayub birye, tamubuka nyabuk yupu

^1-2 Ura, Ayub birye tamubuka, el kwit capu ati, ayupu nyabuk. “Anggun na dam yanmalum nang ara, na kanye ara, ‘Anggunda kel weik bikna deiyok nang ululuma ati, anggun dipmunyopura, kel weik bikin yupu nirya ara, kum danamle. Tonda, atalak arye dipdongobuka, doupnamle talak nirya ara, nun tukwak mutuku noutam unyap nang ara, tuba ton ap, kel weik yupu ton, pia kum kekenamabe,’ tenepne.

³ Na kanye tenipmana ara, ‘Anggunce, angun bidamnye ati, talima erepdamunce, aning teniluluma ati nyapsine. Bukni, dipkoprob ning ara, na babye, kelnye ton unune. Tonda, anggun kel bikna ap, moubuka tenipmunce, aning nirya moubuka, kel bikna ap ulamluma atonun, na babye kelnye unune. Anggunce, arup nyapmanulum ning nirya ara, nun kam unyap nang nirya arye, akunum kel bikamupa ati, nun nirya ara, aning akunum tenenyabe.

⁴ Bukni, aning babye akunum teninune. Minop talak ara narye Allah ati, “Naio, melipnilyame,” nyabuka, morolamse talak ara, Allah kekepnukce, adiparyuk yanuka meliamnuke. Nara, diksukumuk ulamse ati, yuk nang arye nati, ‘Elce malye winilamuk ning ara, nunce eibupu ning ara, ani, ani,” nyabuka, nati kum nyapnitinge. Malye ning ton, pia kum winilamsiba, Allah arye melilamnuk bukni, wini talak ara, ninye nirya eipnikirye, akutubuka, nati nalipnikirye, akutuninyake.

⁵ Yata nang do nirya, ikin ning ton, sik dam kum yaliba, kanye deibuka, telebuk unyak nang ara, talye kanye deibuka unyaka ati, yuk nang dam ikin weik ning yalyopura, sikce anang ati, ‘Yo, daupye. Aning ara, malye ulamika ati, ikin ning ara, teleb uka yala!’ tenebikirye, imun kanye bouka unyak nang ati, bico pia kum tenenyake. Bukni, dipkoprob ning ara, ani. Ikin ning yaliba dolonyak nang ara, akunum mitang unyaka ati, yuk kanye imun ning babye, caknam aryuk sik dam yalyeba, ikin weik tonap tabakuka dolonyake. Sik deiyok ati kum bukni, akunum ikin unyaka ati, tonap tabakuka, ikin ning ton yalyopura, imun kanye bobuka unyake.

⁶ Na kanye ara, ani. Sik ubula don nang ara, sik aik noutamuk bukikirye, kanye deibuka, talye tunim abuka unyake. Tonda, ton nang arye, malye weik winikiba, Allah arye, sik wininyak ning ati, yu weik ulul bukni, sikda, ‘Kume ikin ning nun deice yasilyeba, kum dolonamapʼ tenen, ilil pia kum ulule. Tonda, yuk nang arye, amalye wininyak nang ati, “Wininmaluma ara meme,” nyabuka, pia kum wenenyake. Amalye wininyak nang arye, ‘Anye biryuk melibuka lyepnamsilʼ tenen, sikcuk memebuka delinyak ning, el si ara patung, memebuka kintinibikirye, aning dobuka, sik aik noutam boyanuka deibikirye, aning eibuka, isa si erenyake. Tonda, sikce, ‘Nun mikip deice aryuk wininyaba,’ tenenyake.

⁷ Walwal arye wininyak bukni, anggunda, na dam yanmalum nang babye, talye kam ulye ning ati asipmunba, abai tam ulamle ning arye, anggunti peterepsitingura, biktume. Ara, bai tam kam ulye ning ap, maka yala-yala nirya, im tam lakuka balamak ning ap, tuku tam kam unyak ning ap nirya ati, anggunce moubuka dipdemunce, asipnamlume. Winipmunya deice arye, anggunda, “Kume, Allah el taruk arye, aning-aning pil dosulule,” nyabuka peterepsitinge. Aning ara, anggun moubuka biknamlume.

⁸ Aning atonun, tukwak mutuku noutam talye palamle ning yala-yala nirya ton, asipdetumba, sikce ton laka nyabuka peterepsitinge. Tonda, weik laut mekwen pum tam unyak mek kimbal nirya ara, anggunce asipmunyopura, aning babye, anggunti, laka nyabuka peterepsitinge. Aning ara, bita moubuka tenipnamlume. Winipmunyopura, anggunce Allah winilul ning ati, nukmunce moubuka biknamlume.

⁹ Aning-aning yala-yala nirya ara, tukwak mutuku noutam kam ulamle ning babye, talye tuku noutam arye palamle ning babye, sik akunum bikamik. Aning-aning nirya, kwepdeimuknye bira, nun ni Allah Yahweh ara, narye laka nyapmasin ning ap, nun asing arye elinyap ning nirya ara, elcuk, apil dolule. Ikin ning do, teleb ning do, aning-aning nirya, nun dam yangalya nirya ara, elcuk arepliba, nun dam yangalule!

¹⁰ Kam unyak ning yala-yala nirya ara, Allah el mikip deice pil doplirye, melipliba, kam unyake. Tonda, Allah el mikip weik deice aryuk, kam un ning aresilyeba, nun tukwak mutuku noutam unyap nang nirya babye, kam unyabe. Aning nirya ara, Allah aryuka!

¹¹ Winipmanto ara, nun nirya kele. Nun amul arye, yupu moubuka kekebibirye, ‘E, aning ara telebe, aning ara, malye,’ tenebibyak arye, kel bikinyabe. Awininyaba atonun, nun din dina babye, sitang deice arye dipdebirye, ‘E, adin ning ara, to nyalul bukni, aning ara, to kum ulula ati, malye din ulule,’ tenenyabe. Bukni, anggun na dam yanmalum nang ara, aning babye, bita kum bikmalum do?

¹² Tonda, nunce tenenyaba ara, ‘Nong akunum wisi dananyak nang ara, kel weik bikina ap, tenen ning ap ara, akunum bikinyak,’ tenenyabe. Tonda, keting tamun weik arye, akunum kam ulamik nang ara, aning-aning nirya ati, ‘E, deiyok ara, aniʼ tenen, akunum bikamik. Bukni, anggun na dam yanmalum nang ara, aning babye, min kum biknamlum do?

¹³ Bukni, kel weik bikna deiyok ning ap, nong noutam deiyok ning ap, mikip weik una ap ara, Allah el deice uk ulule. Tonda, Allah elcuk nun tukwak mutuku unyap nang ati, “Teleb winin ning ara, ani. Anggunce wininamlum ning, teleb ning ara ani, malye ning ara, ani,” nyabuka, kel weik bikamuknye bira, Allah el tonoka. Elcuk moubuka teniplirye, nyapsutue. Yuknye birye kume.

¹⁴ ‘Yata ning do nirya, Allah arye dakuka bataklye ning ara, yata tonye birye, aning tamubukaptingce, lipsisikuka dopting do? Kume tuba tamubuka kum doptinge. Tonda, Allah arye ninye tomopturye, wenen aik pum tam dongoptopura, yata nang arye anang ati, tamubuka loptingce, lyepdopting do? Kume, ninye arye, anang pia melibuka kum lyepdoptinge.

¹⁵ Aning atonun, Allah arye, ‘Wini talak ara, tukwak mutuku nirya ara, mok pia kum cenamle,’ teneplirye, kum dopkweteptopura, tuku nirya ara, sisal septurye, amutuku nirya ara, kata uk uptue. Tonda, Allah elce, ‘Mok pia weik tonun cenamle,’ teneplirye, mok weik dopkweteplyopura, mek weik tonun deiplirye, weik tonun oplyopura, tuku deice wamlye ning nirya, dalubuka bobalule.

¹⁶ Allah elda, mikip weik deiyok ning nirya ap, kel weik bikna deiyok ning ap ara, elcuk talilule. Elda pia mikip weiknye ulule. Elda, kel weik bikamuknye ulule. Yuk nang ton kume. Ati ara, Allah elcuk, malye kilule! Ninye arye, tilila yupu nyanyak nang babye, talye yupu nyakiba, sik yupu kekenyak nang babye, Allah elcuk anang deice tam ulula ati, sik nirya talilule.

¹⁷ Allah elcuk, sik ninye deiyok nang, kel weik bikikirye, yuk nang ati, “Winipnamlume, winipnamlume,” nyabuka, laka nyapneba, kel weik bikamik nang ara, sik dam arye yalirye, sik kel bikamik ning nirya dololule. Winiplyopura, talye bona talina kum nang unyaka atonun, yan lin ning, el si ara sepatu, ongona kumce, alye dakdanuka banyake. Aning ara, aminyan talak walwal nanguk kililule. Tonda, ninye yupu bokolina deiyok nang, laka ulul ninguk eibikirye, “Winipnamlume,” nyabuka, kel weik arye, yupu bokolinyak bukni, aning nirya ara, Allah arye sikda pia walwal nang kililule.

¹⁸ Ninye deiyok nang, sik Raja nang arye, ‘Talye daunyak nang nirya arye, nunti, ‘Se, sikda aning-aning nirya, talinyak nang unyake, tenenamsiakʼ tenen, peterena ati, sikce urasin pia teleb deiatinga delinyake. Bukni, Allah arye, sik lak kina ati, delinyak deiatinga ara, lobuka donokolule. Winiplyopura, Raja nang ati, talye baju arye, sik deiyok kouplirye, yuk nang pia amu tamuk deiplyopura, sikda ikin piluk, talye donyake. Winiplyopura, Allah elce sik Raja nang ati, talye pil arukun nang atonun kililule.

¹⁹ Aning atonun ton, Allah arye sik imam-imam nang, sikti, alye un ning arelule. Sikda, ‘Allah arye nun malye winin ning kum kipdeipnamsilʼ tenen, kam ning obuka, Allah arena ati deiyok nang ulamik bukni, Allah arye, sik dam yanuka, pia amu tamuk deiplyopura, talye bona talina kum nang unyaka atonun, yan ongon ning, el si ara sepatu, ongona kumce, alye dakdanuka banyake. Tonda, sikce ninye deiyok kibuka bunyak mikip weik nang ara, Allah arye sik dam yanuka doplirye, amu tam kililule. Winipyopura, Allah arye, sik mikip weik deiyok nang ati, talye nang atonun kililule.

²⁰ Tonda, ninye weik tonun, yuk kel weik nang ati, ‘Sikda ninye deiyok nang unyaka ati, sikce nyasiknyak yupu ara, diba tenebibirye, aninguk talibuka unamab,’ tenenyake. Bukni, Allah arye, akel weik nang arye nyanyak yupu kum kipdeiplyeba, tunim abuka unyake. Tonda, ninye arye, ‘Sik wisi akunum danamik nang ara, kel weik nang unyaka ati, sikce nyasinyak yupu moubuka kekenamab,’ tenenyake. Bukni, Allah elce, sik wisi nang kel bikamik ning nirya ara, dopropliba, walwal nanguk kipliba, anang ara, ‘Dipkoprob ning ara, ani. Malye ning ara, ani,’ tenen, tuba moubuka tinipmanto kum unyake.

²¹ Tonda, sik ninye deiyok nang ara, Allah arye anang babye, malye kililule. Winiplyopura, yuk nang nirya arye, anang ati, tuba si erena kum unyak bukni, anang ati, nalibuka akutunyake. Tonda, sik mikip weik unyak nang ara, sik mikip arye, yuk nang talibuka unyak bukni, Allah elcuk sik mikip ara, alubuka dololule. Winiplyopura, talye nanguk kililule.

²² Kuna kan-kan noutamak dungnubuka ulul ning ara, Allah arye dirina weik areplyopura, aduknyamuk ning nirya, laka kililule. Tonda, Allah arye, kuna noutam dungnubuka ulul ning ara, dirina kililule. Aning atonun ton, min arye kel bikmanto kum ning ara, Allah arye laka kibuka, tukwak deiplyeba, aminyan kel biktibye.

²³ Tukwak mutuku noutam, ninye yuk-yuk ukiba, ton mutuku unyak nang ara, Allah arye mikip kipdeiplyeba, ninye ap, mikip ap, weik kipnin banyake. Winilamiki bukni, aminyan talak ara, Allah arye teneplye talak aryuk, anang bukni, mikip kum kipdeiplirye, tamubuka, sik nirya obuka, kum kililule. Tonda, Allah elcuk, ton nang unamak tam nirya ara, lo kipdeipliba, ninye yupa weik ton upnin bakirye, mikip ap, teleb ap unyake. Winilamikca ani, Allah elce tenyamlye talak yalyopura, anang bukni, sikti, bataklyeba, sik mikip ap, sik yala nang nirya ara, pia mitik diamuk upnin banyake.

²⁴ Tukwak mutuku ninye deiyok kibukabikce, kel weik bikamik deiyok nang ara, Allah arye sik kanye ara, pia walwal kililule. Winipliba, sik anang ara, ‘Amutuku binuyabe,’ tenena kumce, pia kanye windung-wandung anauk ukirye, ‘Dan mutuku binuka uptibye do?’ tenen, mutuku pata ara, dana-dana tam, talye bisik bana uk unyake.

²⁵ Winiplyopura, anang ara winipmanto, sikda yu mek kanye wangalamak mek weik tonun din nang ulamak touk unyake. Sik banyak bisik noutam ara, windung-wandung aplyeba, dokdanuka banyake. Ayub birye, el dam yanmek nang ati, nyabuk.