Ayub 10 - Eipomek

Tukwak mutuku noutam ikin weik usulula ara, yata deiyok arye do?’ tenen, nyabuk yupu

¹ Ayub birye nyabuk yupu ara ani. Na kam unun talak ara, pia lik unilirye, ‘Na lik,’ tenenune. Aning wininulul ning ara, yupu nyana kumce, tunim abuka kum unamne. Ati na uk weik dinilyeba, talima noutam arye, yu weik kanye teninun ning ara, ton batakna kumce, anggun ati talye luparabuka, kum nyanamne. Ara, narye anggun ati, ‘Allah arye, aning kum daneipnutue,” nyanamsine.

² Ati, na ni Allah ati, “Se, na ni Allah, ance nati, ‘Adibaryuk wenebuka kum opnamnilamʼ tenen, moropkine. Tonda, ance nati, wenen yupu ap, ikin ning arena ap, wininamnilam ning ara, ‘Lak nyan yupu deice arye, “Anda malye uplum ning ara ani,” nyabuka, laka nyapnutumʼ tenen, moropkine. Se, yata deiyok ati, ance na yupu ati kum kekenilyame.

³ Tonda, asipdeikene. An taruk arye, na kwepdeipnuluma ati, ance na deice, ikin ning deibuka darapdongopnilyame. Tonda, an taruk deice aryuk, talibuka dominye bira, ‘El nong deice ara, pia ikin ning tuba delinamne,’ tenelyamce, kanye delilyam do? Aning kumopura, sik malye unyak nang arye, ‘Malye un ning ara, wininamabe,’ tenenyak ning ati, ance melipmimba, sikce amalye un ning ara, talye luparabuka winipnin banamak do? Na dam tuba malye kilininyake.

⁴ Na ni Allah, ance tenemince, elilyam ning ara, talye tukwak ninye ara, elinimincuk batakanilyam do? Na kanye ara, aning atonun pia kum elilyame.

⁵ Atonun, an kam tuba unamlam talak lo ara, nun tukwak mutuku noutam unyap nang ara, mitik tonun aryuk unyap touk, an babye atonun ukulul do? Kume, tukwak nang arye deiamsik nang ara, keting tamun mitik tonun aryuk kam unyap touk, an babye atonun ulyam do? Kume, na kanye ara, anda ouku weik, kam pia unamlame.

⁶ Anda, nun tukwak mutuku nang ulamap touk kum bukni, anda pia yuk, pia telebuk ulyame. Ati ara, yata deiyok ati, Allah ance, na mangkau arye malye winipmase ning ati, kaliknulumce, moubuka dipdenulum do? Tonda, yata deiyok ati, na malye upmanye ning nirya ati, eipnimince, pia lyebuka diminyak arye, balyam do?

⁷ Dipkoprob anda akunum kel bikamnulume. Nara, namin arye unirye, malye winin ning ton, pia kum wininune. Malye winina kumce, nara diksukumuk ununa ara, an kele. Bukni, Allah ance, ‘Anye talipnirye, wenebuka opnamne,’ tenepniminyopura, yata tonye birye, yupu sekturye, nati melibuka lyepnutu do? Kume, kum ulule.

⁸ Diba na ni Allah, an taruk deice aryuk kwepdeiamnulum bukni, wini talak ara, ancuk tamubuka na dam yamince, nati obuka, sirya dakanamnilyame.

⁹ Aning ton tenepnalyame. Minop talak ara, ance kira tuku dobuka, akunum kwepdeiamnulume. Bukni, yata deiyok ati, wini talak ara ance nati, ‘Tamubuka butbuta atonun uptu,’ tenepnulumce, wenebuka opnimince, kum kipdeipnamnilam do?

¹⁰ Ance na ni akunum kel bikamlumce, meliamlumba, el pil domuka deice arye, na nin mun pum tam arye na nong kintinyamnulume. Tonda, ance na nin mun pum arye, na nong wamnuk ning nirya kintinyamnulumce, mikip kipdeiamnulume.

¹¹ Atalak noutam ara, na nong kintinin talak ara, na nin mun pum tam arye, ance na yok ap, milmil ap, kintinipnulumce, na nong akunum kwepdeiamnulume. Kwepdeipnulumopura, ance na tup dongopnulumce, adeice arye ninye bol kipdeipnulume.

¹² Aninguk kum bukni, na nin akunum deipnuk talak arye dipdongobuka, na kam unye talak nirya ara, aning nirya akunum winipnulumopura, ance nara kam una deiyok ning areamnulume. Tonda, ance nati, “Bico tenepkinirye, pia ati teleb kilinamkine,” nyabuka, nyalin yupu deice arye areamnulume. Winyamnulumce, ance na kam una ara, pia kalikuka melilamnuluma ati, na nong ap, na sambala kanye ap, mikip areamnuluma deice arye, tuba kam unune.

¹³ Winilamnulum bukni, wini talak ara, na akunum tenipmane. An kanye pum tam ara, nati adiparyuk dungnubuka, ‘Ikin deipnyeba, Ayub birye dopropnamlarya,’ tenelamnulume. Minop talak ara, aning nirya duknulamlum bukni, wini talak ara, ance nati, ‘Anye biti winipnamne, winipnamne,’ tenyamlum ning ara, akunum kel bikmane.

¹⁴ Ance nati, ‘Malye uplyakʼ tenen, moubuka talipnulumce, kalikuka pia tuba dinauk unilyame. Tonda, ance na malye upnye ning ati ara, ‘Lyepnirye, namin kipnune,’ kum tenenilyame.

¹⁵ Narye akunum malye upnyopura, ikin ning na deice yaniliba, dolonamna ati, nara bicoe! Bukni, na kum malye upnya babye, mania kanye bobuka, kisok erebuka kum dipdekitinye. Aning kum bukni, ‘Seʼ tenen, kisok kanulongonuna deiyok ara, ikin weik na deice uk yaliba dolonirye, alye weik unulula atia.

¹⁶ Bukni, wini talak ara, na akunum malye upniba nong upnilyopura, ance, ‘Anye akunum malye unmal do?’ tenen, yata talak do nirya, ance pia nati ebuka dobolbalamnulume. Winipmanto ara, bai tam yu weik ulamlye pus, el si singa arye, ilil kum aryuk, ‘Yata ning ton obuka diptinyeʼ tenen, malye kanye bobuka, dobolbalula atonun unilyame. Tonda, winipniminyopura, ‘Anye biti, ikin ning el nong deice deipnamaneʼ tenen, an mikip weik deice arye, mambul ning na dam deliniminya deice arye, wenebuka onilyame.

¹⁷ Allah ance, na mania kanye bobuka, malye weik wininye ning nirya ati, ikin ning ton tabakuka arepminba, na nong deice yanuka unulule. Tonda ance nati, yu weik tonun, ton ap tabakuka tenimince, wenena weik ning, pia weik tonun ton ap, na deice uk deilinilyame. Winipmanto ara, ancuk yin talin nang ati, ‘Ton ap tabakuka yalulume,’ nyapminyopura, dopdeipminba, sikda na damuk yakirye, yanuka opnikcake.

¹⁸ Se na ni Allah, yata deiyok ati ance biknulumba, na nin birye, nara tukwak mutuku deiamnuk do? Teleb ning ara, ninye nirya min kum eipmanik talak arye, nara dadiamtinye!

¹⁹ Aning nirya ara, winilamtinyopura, na wini talak unun touk kum ulamtinye. Tonda, na nin mi bomnuka pum tam aryuk, diamtiniba, dobukapnitingce, tuku palibuka weiamnitinge. Aning winyamniting toura, telebuk tenepne.

²⁰ Ati se, na kam unamna ara, lo mitik tonun, ton ap unamne. Unmanya ani, keting tamun weik tonun kam kum unamne bukni, minopce dipnamnarya. Ati lo mitik tonun aunaman talak ara, ‘Ance na yuk bataknutumopura, winiryuk kanye bobuka, teleb aryuk uptinyeʼ tenen ati, moropkine.

²¹ Sik arye pia kum unamne. Ara, ninye dibikirye, akunum diamik nang binuka unyak mutuku dam ara, pia kuna weik ululak, na babye minop binamnarya. Amutuku noutam binyopura, akunuma. Tamubuka amutuku kum yanamne. Pia ati binamne. Asukum ara, malye mutuku kunukukak ati, pia kunukulule. Ara bicoe. Ati, ‘Amutuku min kum binamnye talak ara, ance lubakibuka, teleb teneptum toura, teleb uka,’ tenepne.

²² Atonun, amutuku noutam ara, dirina ton pia kume. Kunukuna uk ubuk mutuku noutam arye, amutuku noutam ara, mania kanye bobuka, olana ap, walana ap, malye-malye winina ap, mutuku ulule. Dan sukum do, amutuku noutam nirya ara, dirina ululak ara kum bukni, kunukdongobuk sukumak binamne. Ayupu nirya ara, Ayub birye nyabuk.