Amsal 9 - Eipomek

Weik kel bikna deiyok ning ati, nyabuk yupu

¹ Ura, winipmanto yupu ton nyapnusine. Ninye arye sik kwit capu melina ati, yukubikirye, teleb ning arelbalamak touk, ‘Kel pia weik kina deiyok ning ara, ninye nirya dopropnamaka’ tenen, akunum kintinip deipsuke. Ninye arye, ‘Pia teleb aik dopnuyap’ tenen, kintinina ati, ayukumna yo tekbarye ikikirye dobikiba, anyaik pia tunim alamle touk, ‘Kel pia weik kina deiyok ning ara, ninye nirya yanuka dopropnamaka’ tenen, akunum kintinip deipsuke.

² Winipmanto ara, ninye arye, kam ning obuka sekikirye, anggur tapu duk mek ap tabakuka deibicopura, kwalya kwalibuka deibuka, din dipnamaca ati, kintinibuka delilamak touk, pia weik kel bikna deiyok ning, akunum kintinip deipsuke.

³ Tonda, pia weik kwalya kwalina deiyok nang arye, ‘Ninye weik yakiba, neika din dipnamap’ tenen, sik amu tam pil don nang dopreibikiba, sik dana-dana tam unyak mutuku ninye nirya ati, yukulbanyake. Aning atouk, ‘Kel pia weik bikna deiyok ning ara, ninye nirya dopronamak’ tenen, akunum kintinip deipsuk. Ara, weika arye erebuka bukuk mutuku deice, welebuka tikmakirye, mutuku-mutuku outam unyak ninye kekena ati, pia weik yupu deice arye, “Anggun nirya yamunce, kwalipmace din dilyalulume,” nyabuka yukulamak touk, pia weik kel bikna deiyok ning arena deiyoknye birye, ninye nirya ati, “Anggunda yalulume,” nyalule.

⁴ Yata ninye do nirya, tuba walwal asa unyak ninye ati, nyalule. “Anggunda pia weik kel bikna deiyok ning, min kum dololuluma ati ara, na dam yamunba, narye aning arenamsine,” nyalule. Aning atouk, ‘Teleb un ning ani, malye un ning ani’ tenen, moubuka tenina kumce, teleb asa arye kum unyak ninye ati ara, ayupu nyalule.

⁵ Ninye arye pia weik kwalya kwalibuka deibikirye, sik kayapu ati, “Anggun nirya yalulume. Yamumce, pia teleb din ning, ayala-ayala nirya kintinip deipse ning ap, narye anggur mek purubuka tabakuka deipse ning ap ara, yanuka dipnamlume,” nyabuka yukulamak touk, pia weik kel bikna deiyok ning arena deiyoknye birye, sik walwal asa unyak ninye nirya ati, “Amapo, ‘Kel pia weik deiyok ning arepnamsin’ tenen, kintinip deipse ning ara, anggun dolyalulume,” nyabuka yukulule.

⁶ Ayupu ton nyalule. Na dam yamunce, pia weik kel bikna deiyok ning, akunum dopropmunyopura, aninguk moubuka talibuka upmunce, anggun walwal arye winilamlum ning nirya ara, adiparyuk bataknamlulume. Winibuka aning nirya batakmunyopura, pia weik kel bikna deiyok ninguk, talibuka umunce, teleb ubuka un ning nirya ara, kel kipra banamlulume. Aninguk talibuka umunce, pia teleb ubuka pia kam uk unamlume. Tonda pia diksukum un ninguk, kel bikmunyopura, abisikuk melibuka dobolbanamlume.

⁷ Bukni, yatanye do nirya, yuknye birye malye yupu uk nyaplirye, teleb kibuka un ning ati, “Aning ara talye ning uka,” nyabuka, yep-yep nyalulnye biti, “Anda malye unmalama anya arye, aning bataknamlyame,” nyabuka weneplyopura, amalye yupu uk nyalulnye birye tamubuka, el wenenmalinye biti, el nong deice malye yupu nyalinamle. Aning atouk, yatanye do nirya, malye ninguk talibuka unyak ninye ati, “Anggun malye ululum ning nirya bataklulume,” nyabuka wenebicopura, sik malye un ninguk talibuka unyak ninye arye, yu upliba awenen yupu nyanyak nang ati, tamubuka opmanto ukirye, sik nong deice ikin ninguk delinamake.

⁸ Ati ara, malye yupu uk nyanyakce, teleb kibuka un ning ati, “Aning ara talye ning uka,” nyabuka, yep-yep anyak ninye ati, “Anggunda malye unmaluma ati ara, aning bataklulume,” nyabuka wenena meme. Sikce, yep-yep anyak ninye ati, wenepmumnyopura, sik anang arye, anggunti yu upliba, ‘Sikda nun like,’ tenenamsiake. Ati, awininyak ninye ati, ‘Sik daunmanyak’ tenen, bataknamlulume. Bukni, ninye ton teleb un ninguk kel kibuka unyak ninye ati, sikce malye ubikiba, wenebuka lepsisikmumnyopura, anang arye kanye deibuka kekenamsiake. Aninye arye, ‘Se, sik wenepmasiaka deice arye melibuka teleb ulinmasiake’ tenen, anggunti, ‘Aninye ara, nun kanye deibabe’ tenen, bico tenepsikirye, weika arye tabakuka kanye arenamsiake.

⁹ Aning atonun, ninye ton teleb kibuka ulirye, pia weik kel bikilulnye biti, “Winibuka unamlame, teleb kibuka un ning ara ani,” nyabuka lipsisikuka peterepmunyopura, elce tonap pia weik arye tabakuka kel biknamle. Tonda, diksukum un ninguk, talibuka unyak ninye ati, teleb ning ton tabakuka peteremunyopura, aninye ara dipkoprob pia weik arye kel kibikirye, teleb un ninguk, tabakuka upre banamake.

¹⁰ Kel pia weik bikna deiyok ning deiyok kibuka, kel kipnamak ninye ara, Allah Yahweh ati, ‘Elda pia weik mambulnye ulule,’ tenebikirye, ilil upliba, el siuk pia erenyake. Allah ati ilil tenenyak ninye ara, akunum deiyok kibuka, pia weik arye kel kiprebanamake. Tonda, Allah elda malye ning tonok ning babye kum ulirye, pia Diksukumuknye ulula anya arye, el nyalul yupu ap, el ulul ning ap kel kibikirye, aninguk talibuka dobolbanyak ninye nirya ara, pia weik arye kel kiprebanyake. Kel pia weik kina ning ati, bol deice uk kum bukni, nong noutam ning nirya babye, moubuka tenenyake.

¹¹ Kel pia weik kina deiyok ning, talibuka kel kiprebanamak ninye ati, sik kam unamak talak ara, ouku tonap cang arye unamake. Tonda, sik kam unamak talak nirya ati, keting tamun tonap tabakuka arepliba, kam upre banamake.

¹² Akel bikna deiyok ning, moubuka kel bikmunyopura, anggunce, anggun bidamnye atibuk, teleb winililanamlume. Bukni, yata ninye do nirya, sikce pia weik kel bikna deiyok ning ati, ‘Na like, aning nirya ara, talye ning uka,’ tenebikcopura, sikce sik mining atibuk, malye kililanamake.

Talye yoltanyak kilapu arye, nyanyak yupu ati, nyabuk yupu

¹³ Walwal asa una deiyok ara, talye yolanyak kilapu atonun ulule. Ara, winipmanto ara, moubuka tenena kum kilapu ara, alye una pia kum diparyuk, pia weik arye, talye-talye yupu uk weik nyanyake. Sik akilapu ara, kanye bona kumce, walwal asa unyakce nyanyake. Bukni, sikda moubuka tenilena kum kilapu anya arye, ‘Nara walwal unirye, talye yupu uk nyabuka unune,’ kum tenenyake.

¹⁴ Atalye-talye yupu nyaltakanyak kilapu, sik bunyak sukum ara, kon deice bukikirye, outam ninye aik domicak eibikirye, sik aik bublan dam, delilamak teleb bun ning deice bukikirye, outam ninye aik dolamikcak dilamikirye, outam aik unyak nang ati, malye yupu weik nyanyake.

¹⁵ Ara, winibuka bunyak kilapu arye, outam asik dolamikak bisik banyak nang, sik yukulon ati kanye talima, lilon yupu weik nyanyake. Aninye kan-kan ara, teleb kibuka un ning aulul bukni, moubuka tenina kumce, ‘Nunce nun bidamanguk tenenyap ninguk, talye lukparabuka wininamabe,’ tenenyak nang ara, akilapu nyanyak yupu kekebikirye, sik talima lipdopliba, abisikuk dobolbanyake.

¹⁶ Akilapu arye, sik pia weik kel bikna deiyok ning, moubuka bita kel kum kinyakce, walwal tuba unyak nang ati, nyanyake. “Anggunda nun aik yamunyeba, nunce anggun patasilye ning arenamsiabe,” nyabuka yukulonyake. Aning atonun, ‘Teleb un ning ani, malye winin ning ani’ tenen, moubuka kum tenebikirye, teleb kibuka, kum wininyak nang ati ara, ayupu nyanyake.

¹⁷ “Amapo, ubula dobuka deiamikce, mek dibikiba, piato teleb lelamle touk ulule. Aning atonun, roti kwaning duknubuka dibikiba, piato weik nyalamle touk, ulule. Aning atonun, anggunda nun aik duknubuka yamumnyopura, kanye deibuka unamlume,” nyabuka yukulonyake.

¹⁸ Winibuka talima lilon yupu nyanyak bukni, akilapu arye nyanyak yupu kekebice nang ara, pia moubuka bita kel kum kinyake. Ayupu kekebice nang arye, kum tenenyak ning ara ani. Ara, minop talak arye, sik talye yoltanyak kilapu dam binuka, neika ulamik nang nirya ara, akunum diplamikba, dibinyak ninye kanya wekelbalamak sukumuk, unyake. Ara, sik malye winin ninguk, weik winilamica deice arye dipnin bilamika ati, malye sukumuk kintinibuka wekelbanyake. Ati ara, ‘Anggun kanye moupnamlulume’ tenen, nyapsine.