Amsal 8 - Eipomek

Kel pia weik bikna deiyok nang arye, “Ninye nirya, moubuka kel biknitinge,” nyabuka nyasulul yupu

¹ Kel pia weik bikna deiyoknye elce, “Na yupu kekeplulume,” nyabuka nyalule. Tonda pia weik kel bikna deiyoknye elce, “Na yupu kekepnumunyopura, teleb kibuka un ning nirya, moubuka kel bikinamlulume,” nyabuka, pia weik yupu deice arye yukusulule.

² El anye bira bisik bana lilunak mutuku taram deice ap, tonda bisik dandanya ap tiklirye, pia weik yupu deice arye yukusulule.

³ Tonda, pia weik kota mutuku asik dolamikce, antanabuka domik keil poka pum tam, wekelbanyak bublan dam nirya ap tiklirye, pia weik yupu deice arye nyasulule. Ati asukum arye nyasulul yupu ara ani.

⁴ Se, nara anggun ninye nirya arye, ‘Na yupu kekenamlum’ tenen, ayupu nyasunune. Aning atonun, “Anggun tukwak mutuku ululum ninye nirya arye, na nyasunun yupu ara, moubuka kekepmunce, kel bikipnululume,” nyabuka anggun nirya ati nyasunune.

⁵ Anggunda moubuka weika arye, kel bikna nang ara, min kum kel bikilulum ninye ara, na yupu moubuka kekepmunyopura, teleb un ning, moubuka kel bikinamlulume. Aning atonun, anggun tuba walwal uk ululum ninye babye, na nyasinye yupu moubuka kekepmunyopura, ‘E, teleb kibuka un ning ara ani’ tenen, nong bol deice ning kel bikna kum bukni, nong noutam ning ton, moubuka kel bikinamlume. Anggunda, yupu kekena kumce malye pia weik ninye ululuma anya arye, na nyasinye yupu moubuka tenenamluma deice arye, pia moubuka tenepmunce, teleb kibuka kel bikinamlulume.

⁶ Na nyanun yupu ara, moubuka kekenamlulume. Ara, talye ati kum nyapsine. Deiyok ara, narye nyasunun yupu ara, talye yupu kum nyaltakanun bukni, pia teleb yupu uk nyanuna ati ara, moubuka kekenamnululume. Narye nyasunun yupu nirya ara, pia diksukum kibuka winin ninguk nyanuna ati ara, anggun nirya arye, moubuka kekenamnululume.

⁷ Nara talye tilila yupu peterelana, ‘Pia na like,’ tenenunye ununa ati ara, tilila yupu pia kum nyasunune. Ati ara, narye nyasunun yupu nirya ara, pia dipkoprob un ning atibuk nyasunune.

⁸ Aning atonun, na si pum bisik arye nyasunun yupu nirya ara, diksukum kibuka un ning ati, dipkoprob yupu nyasunune. Malye yupu tonok babye ton, kum nyasunune. Kwalin yupu ap, tenepce arye malye nyaltakana yupu ap, ton pia kum peteresunune.

⁹ Talye bol deice ning kum bukni, ikin yupu nong noutam ning ati, moubuka tenelinye birye, ‘E ayupu deiyok ara ani’ tenen, kel bikilulnye bira, na nyanun yupu nirya ati, ‘Dib ayupu ara pia dipkoprob yupu uk nyapmale,’ tenenamle. Aning atonun, pia weik kel bikna deice arye, moubuka tenelulnye bira, ‘Dib ayupu noutam ara, malye ning tonok babye, pia kum winilule. Ayupu nirya ara, diksukum yupu uk ulule,’ tenenamle.

¹⁰ Ati ara, ton nang aryopura, utenenyake. ‘Se, dekna weik ning, el si ara perak ap, urasin pia teleb ning emas ap ara, pia patasulula ati ara, aninguk elbanamabe,’ tenenamake. Bukni, anggun pia weik kel nang ara, aning kum tenenamlulume. Pia teleb ning ara, narye anggunti, “Wininamlulume, aning ara pia kum wininamlulume. Pia teleb kibuka una ning ara ani,” nyabuka peteresinye yupu dopropmunce, aninguk talibuka unamlulume. Pia teleb ning ara akunuma.

¹¹ Narye pia weik kel bikna yupu nyasununa ara, mambul weik ulule. Ninye arye, ‘Se, dekna weik keil, el si ara permata ap, batu delima ap ara, pia telebe,’ tenenyake. Bukni, narye nyasunun yupu ara, dipkoprob pia weik mambul ulula ati ara, yuk dekna weik ning nirya ara, mambul kum ulule. Anggun patan ning ayala-ayala nirya ara, mitik mambul ulul bukni, narye pia weik kel bikne yupu nyasununa ara, pia weik mambul ninguk ulule. Ati, ayupu nirya ara, ‘Se ayupu moubuka kel biktibye’ tenen, patalibuk, pia teninauk unamlulume.

¹² Kel pia weik bikna deiyok ning ap, tonda, ‘Talye lukparabuka winilelamice ak, mangkau arye malye winipnuyap’ tenen, moubuka tenena deiyok ning ap, neika ururake. Narye pia weik kel bikna ati, nyasinye yupu moubuka teninauk umunyopura, pia weik kel bikna deiyok ning ap, ‘E, diksukum una ati, bana teleb bisik ara ani’ tenen, deiyok ning ap dolonamlulume. Kel pia weik bikna yupu, kel biknumunyopura, moubuka tenen ning babye, dolomunce, pia weik kel nanguk unamlume.

¹³ Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.

¹⁴ Nara, pia weik kel bikna deiyok ning arena deiyoknye ununa ati ara, “Teleb un ning ara ani, malye un ning ara ani. Diksukum un ati, banamlum bisik ara ani,” nyabuka lak lena deiyoknye unune. Tonda, ‘Ado, ado?’ tenena pia kum diparyuk, diksukum kibuka unirye, ninye ati yupu lipsisikuka bokolina deiyoknye unune. Tonda, pia weik kel yupu nong noutam ning babye, na kele. Bol deice ning kum bukni, nara pia weik kel bikna deiyok ap, pia mikip weiknye ap, unune.

¹⁵ Ninye deiyok kibuka, talinyak nang Raja-Raja nang nirya ara, narye pia weik kel bikna deiyok ning, sikti, arepnyopura, adeice arye, sik amu tam unyak ninye nirya ati, teleb kibuka talinyake. Narye pia weik kel bikna deiyok ning aresununa deice arye, yuk deiyok pil talibuka, donyak nang nirya babye, moubuka tenebikirye, sik amu tam ninye ati, “Teleb kilin ning ara ani, malye winina ning ara ani. Aning ara, wininamlulume, aning ara pia kum wininamlum,” nyabikirye, mem yupu ap, wenena yupu ap, teleb ninguk sekelinyakce, talisinyake.

¹⁶ Dan mutuku do nirya, sik pia weik deiyok kibuka talinyak nang nirya ap, pia ninye deiyok Raja kibuka, talinyak nang ap, sikce deibikiba, dadeipdanin, banamak ninye talinamak ninye deiyok nang nirya ap ara, narye pia weik kel bikna deiyok ning, arinuna deice arye, sik amu tam unyak ninye talibuka unyake.

¹⁷ Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.

¹⁸ Kel pia weik kina deiyok ning tenebuka unyak ninye ara, bon-bona ap, dekna weik ning ayala-ayala nirya ap, doprobikirye, teleb kibuka ukiba, yuk ninye nirya arye, anang sik wininyak ning eibikirye, kinamake. Kel pia weik bikna deiyok keca moubuka tenekirye, diksukumuk unyak ninye ara, dekna weik ning pia ati aupliba sikce talinamake. Sik talinamaka ara, min kum danana kum upnamle. Tonda, sikce wininamak ning nirya babye, pia telebuk unamle.

¹⁹ Talye tukwak ninye arye, ‘Se, dekna weik kat ning, el si ara emas ap, perak ap ara, pia teleb ninguk ulul,’ tenenyake. Bukni, narye dipkoprob nyapsine. Kel pia weik bikna deiyok ning tenebuka unyak ninye arye, dolonamak ning ara, pia telebuk unamle. Emas ap, perak ap ara, mitik teleb ninguk ulule. Bukni, pia weik kel bikna deiyok ning moubuka tenekirye, diksukumuk unamake deice arye, dolonamak ning nirya ara, pia mambul weik ning ulule. Yuk teleb ning nirya ara, mitik teleb ulul bukni, pia weik kel bikna ning, moubuka tenenyak ninye arye, dolonamak ning ara, pia weik mambul ning ulule.

²⁰ Na banun bisik ara, pia teleb diksukum un bisik atibuk, melibuka banune. Tonda, na yan yanibuka banun bisik ara, diksukum un bisik atibuk banuna ati ara, ninye yupu lipsisikuka bokolin ati ara, “Teleb unmalum nang ani, malye unmalum nang ani,” nyabuka, pia diksukum kibuka, ninye ati yupu lipsisikuka bokolinune.

²¹ Kel pia weik bikna deiyok ning ati tuba tenenyak ninye ara, narye sikti, pia bona weik talin ninye kipdeipniba, dekna weik ning weika arye talibuka unamake. Tonda, narye aninye ati, bon-bona delin aik weik langdipnamle.

²² Minop talak Allah arye, aning-aning nirya min kum kwepdeiamuk talak ara, Allah Yahweh arye, ‘Kel pia weik bikna deiyoknye’ tenen, wepdeiamnuke. Ara, pia min yuma talak Allah arye, el taruk koproba arye talibuka, pil donamik ning nirya ara, tonok ning babye, min kum domuk talak arye, ‘Kel weik bikna deiyoknye unamle’ tenen, wepdeiamnuke.

²³ Allah arye, mutuku-mutuku nirya min kum kwepdeiamuk talak arye, nara min yuma akunum wepdeiamnuke. Tonda aning-aning nirya min kum uamuk talak ara, Allah arye akunum kwepdeipnukce, wepdeiamnuke.

²⁴ Allah arye, pia weik pala laut mekwen nirya, min kum kwepdeibukba, laut mekwen kum deiamuk talak arye, nara min yuma kwepdeiamnuke. Tonda, mek pu ap, balamle mek ayala-ayala nirya ap, min kum kwepdeiamuk talak arye, nara min yuma kwepdeiamnuke.

²⁵ Allah arye mutuku-mutuku nirya min kum kwepdeiamukce, kum bukamuk talak arye, nara minopce kwepdeiamnuke. Tonda, mutuku dup kon nirya kum uamuk talak arye, nara akunum kwepdeiamnukba, aulamse.

²⁶ Tonda, pia weik mutuku-mutuku nirya min kum kwepdeiamuk talak arye, nara minopce kwepdeiamnuke. ‘Ninye arye wa wipnamak’ tenen, wa tuku min kum kwepdeiamukce, teleb kum kipdeiamuk talak ap, tonda tuku butbuta min kum kwepdeiamuk talak ap arye, Allah arye na akunum kwepdeiamnukba, aulamse.

²⁷ Allah arye im alip tam ap, im deice ulul ning nirya ap, kwepdeibuk tam ara, na akunum aulamsa anya arye eipse. Aning atouk, pia weik laut mekwen deiamukak arye wilibukce, pia weik laut mekwen yuk-yuk delina ap, mutuku sirya, im sirya kwepdeibuk talak babye, na aunmasirye, dinmasibuk winibuk.

²⁸ Tonda Allah arye, ‘Daud bira, im alip tam unamle’ tenen, kwepdeibuk talak ara, na aunmasirye, dinmasibuk winibuk. Aning atouk, pia weik laut mekwen karu pum tam noutamak kutukuka balamle mikip mek pu dona nirya kwepdeibuk talak babye, na aunmasirye, dinmasibuk aning nirya kwepdeibuk.

²⁹ Allah arye, ‘Weik pala laut mekwen deilinak ara, asukumuk deipnamle’ tenen, amek ati, “Anda narye kwepdeipkinak uk, asukumuk deipnalame. Yukak ton leibuka kum deipnamlame,” nyabuk talak ara, na aunmasirye, dinmasibuk winibuk. Tonda, ‘Tukwak mutuku amu tam buknamle’ tenen, pia weik mutuku yangan keil nirya, kwepdeibuk talak ara, na babye aunmasirye, dinmasibuk winibuk.

³⁰ Atalak noutamak nirya ara nara, Allah el pil melinanye atonun ulamsirye, na pia weik kel bikna deice arye dilamsibuk, aning-aning nirya kwepdeiamuk. Allah el dam asum-asum nirya tikuka dilamse talak nirya ara, kanye deibuka, telebuk ulamse. Allah ara, na dam ulamukba, nun neika ulamnuma ati ara, pin-pin asa arye, kanye deibuka ulamse.

³¹ Aning atonun, Allah arye tukwak im sirya, mutuku sirya nirya kwepdeibukba, dilamsirye, pia na kanye deibuka ulamse. Tonda, Allah arye tukwak im sirya, mutuku sirya nirya unyak ninye kwepdeibuk talak ara, na ton dilamsirye, kanye deibuka, pia pin-pin asa arye ulamse.

³² Ati ara, anggun na mapu nirya ap, anggun kam nang nirya ap ara, na nyasinye yupu moubuka kekenamnululume. Yata ninye do nirya, narye, “Wininamlulume, aning ara kum wininamlulume. Teleb kibuka un ning ara ani,” nyalisinye yupu moubuka kekebikirye, talibuka dobolbana uk, unamak nang nirya ara, Allah arye melipliba, pia telebuk unamake. Allah arye aninye nirya ati, kanye deiplirye, teleb ulinamle.

³³ Narye, anggunti, “Winibuka unamlume. Teleb kibuka un ning ara ani,” nyabuka peteresunun yupu ap, wenena yupu deice arye, nyasunun yupu nirya ap ara, moubuka talipmunce, unamlume. Ayupu ara, pia kum bataknamlum bukni, asok deice pia deipnamlulume. “Ayupu ara, talye yupu ati ara, dauplye,” nyabuka yanina meme. Na nyasinye yupu moubuka talipmunyopura, dipkoprob pia weik kel kibuka, telebuk unamlume.

³⁴ Yatanye do nirya, na nyanye yupu kekelulnye bira, ‘Se ayupu tonap kekeptinye’ tenen, pia pin-pin kanye bobuka ulirye, na aik dam yanuka kekelyanganamlanye bira, Allah arye melipliba, telebuk unamle. Winipmanto ara, na nyanye yupu kekena ati, asum-asum nirya, na aik bublan dam yanuka bukuka kekeplirye, ‘Yata teleb yupu ton yanuka nyapnamanil do?’ tenen, tuba moubuka kalikinamlanye bira, Allah arye, anye biti melipliba, telebuk unamle.

³⁵ Yatanye do nirya, ‘Kel pia weik kina deiyok ning doproptinye’ tenen, nati pia pi dobuka, enululnye bira, na ap epdanimnyopura, anye bira, kam una deiyok ning ton dolonamle. El anye bira, Allah Yahweh arye, kanye deibuka melipliba, pia telebuk unamle.

³⁶ Bukni, yatanye do nirya, ‘Kel pia weik kina deiyok ning, na walwal’ tenen, na ap kum epdanimnyopura, elce el mining nong ati, malye kililalule. Aning atonun, nara pia weik kel bikna deiyok ning ati, ‘Aning ara na like’ tenen, nati batakaninyak ninye nirya ara, dipkoprob dipna deiyok ning atibuk, kanye delinyake. Aning atibuk, kanye delinyak ninye ara, ‘Dibina deiyok ning doproptibye’ tenen, patalibuk sik bidamnye arye, kintinilinyake. Kel weik kina deiyok ning arena deiyoknye birye, ninye tukwak ninye nirya ati nyabuk.