Amsal 7 - Eipomek

Raja Salomo birye, el mapu ati, “Anggunda talye-talye yolamak kilapu dam bana meme,” nyabuk yupu

¹ Na mio, narye anti, “Wininamlyame,” nyalamkisirye, “Teleb una ara ani,” nyakunun yupu nirya ara, luba kina pia meme. An kanye talima pum tam arye, pia teninauk unamlyame.

² Anda na nyakinye yupu moubuka kekepmince, ayupu uk talibuka unamlyame. Winipmanto ara, ninye arye, ‘Nun asing tulukdapyak’ tenen, pia moubuka kalikilalamak touk, anda, ‘Na ni birye nyanilye yupu ara, luba kipnyak’ tenen, pia moubuka teninauk unamlyame.

³ ‘Ayupu ara luba kipnyak’ tenen, na nyakinye yupu nirya ara, sekuka an taruk koproba deice ketepdongobukapmince, unamlame. Ara, ‘Ayupu tuba teninauk unamne’ tenen, unamlyame. Aning atonun, ninye arye mambul yupu sekukabikirye, ‘Aning ara kum dasilyak’ tenen, telebak delilamak touk, ance na nyakunun yupu dobuka, an kisok deice ap, an talima pum tam ap deipmince, pia tenena uk unamlame.

⁴ Winipmanto ning ara ani. Sal arye, sik makal kilapu ati, ‘Se, pia na bico tenenune,’ tenelamak touk, pia weik kel bikna deiyok ning ati, ‘Aning ara, pia weik mambule,’ tenenamlyame. Aning atonun, anggunce anggun nong ninye ati, ‘Weik arye bico tenenune,’ tenelamlum touk, pia weik kel bikna deiyok ning ati, ‘Aning ara, pia mambul ati ara, ayupu ara moubuka talinamne,’ tenenamlyame.

⁵ Weik kel bikna yupu moubuka tenepmince, pia talipminyopura, ninye arye yo bok arebikirye, talye-talye yolamak kilapu, sik dam kum banamlyame. Aning atonun, yuk nang arye domikce kilapu arye, ‘Nun neika utinimnye’ tenen, teleb yupu nyabikirye, yukupkica babye, sik yupu kekena kumce, talye kanye bobuka, sik akilapu ap, neika una pia kum unamlyame. Memepdakuka unamlyame.

Aik uk lamapdongobuka, dakeiyam asa kum bulamle kil ati, nyabuk yupu

⁶ Tonok talak ton, na aik koproba bukmasirye, jendela pum bisik arye dinmase.

⁷ Dinmasiba, kam nang weik ulamika noutamak arye, walwalnye tonok unmokba eipse. Anye bira, dipkoprob pia walwalnye ulamuk. Elda, ‘Teleb winin ning ara ani, malye winin ning ara ani’ tenen, moubuka tenilena kumnye ati ara, diksukum ubuka, kum ulamuknye ulamukba, eipse.

⁸ Sintam kipmoka ani, akunum inibukce kunukukopura, akamnye bira, yo bok arepna arye talye yolamik kil, ‘Sal arye yo bok arepnopura, yolanamap’ tenen, kintinibuka tikilamak kilapu dam binmoke. Ara, ‘Atalye yoltanyak kil el aik dam, binun’ tenen, banmokba eipse.

⁹ Awal-wal kamnye unmokba, eipse talak ara, inipmokce, kunuknin banmok talak ara, akamnye bira, ‘Yuk nang arye kum eipnamniyak’ tenen, akil el aik dam banmokba eipse.

¹⁰ Akil ara, pia darabuka, aik pum uk kum bulul kil ati ara, awal-wal kamnye eibukce, ‘Anye ap neika maptinimnye’ tenen, anye yanmok bisik, binuka epdarike. Akil ara, ninye kum domice bukni, talye yoltalamak kilapu ongolamak baju ongopmokce, binmokba eipse. Akil el tenebuk ning ara, ani. Sal arye, na nong ap, na baju ap eibikirye, ‘Se akil ati yo bok arebibirye, yoptibye, tenenamniak’ tenen, el kanye talima pum tam ara malye winin ninguk tenyamukce, banmokba eipse.

¹¹ Akil ara, talima namin asa kibuka talye pia darabuka ulamuk kil kume. Akil ara, ilil ton kum ululce, ilil kanye pia bona kum kil ulule. Elda, el li yapu arye nyalamik yupu ton, pia kum kekelamukce, yaniltana uk ulamukce, pia weik yupu deice arye, “Anggunce nyanululum yupu ara na kum kekenamsine,” nyabuka malye weik ulamuk. Tonda, akil ara el aik koproba pia darapdongobuka kum ulul bukni, tuba balsusuna uk ulule.

¹² Akil ara, ‘Sal ton yukupnamne’ tenen, ton talak ara, ninye balamak bisikak uk, abinuka tikilule. Ton talak ara, anirye kisikdakuka ninye weik bulunyak sukum ap, bon-bona deklamak sukum ap, abinuka unmalya ani, ila tuba ton kisikdakuka, bisik dandanya obinuka, ayanuka unmalya ani, batakuka balsusuna uk ulul kil ulule. Atalak ara talye ati kume. Ara, ‘Sal ton yukupniba, yo bok arepnica deice arye, yolanamabe’ tenen, winilule.

¹³ Winilul kil ara, atalak dinmase bukni, ilil una kum diparyuk, akamnye binuka talibuka iribukce, urasin mutubukce, talima lilon yupu nyabuka yukubuke.

¹⁴ Asum ara, na si erenun ning si erena ati, teleb arin ning akunum arepmanue. Na si erenun ning ati, ‘Wininamne,’ nyabuka nyalin yupu nyapse ning ara, akunum winipmase.

¹⁵ Ati ara, narye an elyanmakine. ‘Nara anye ap, na ap neika utinimnye’ tenen, elyanmakin bukni, wini talak nun bitinye akunum epdanmanam ati, na kanye deipne.

¹⁶ Tonda, nun neika mapnamanam sukum ara, Mesir mutuku arye deklamak baju, urasin pia teleb, berwarna ning ara, na amsuna deice akunum deibuka kintinipmane.

¹⁷ Winipmance, nintong pia teleb nyalamle ning, el si ara mur ap, cendana ap, gaharu yo atonun kayu manis ap, akunum purubuka deipse sukumuk mapnamaname.

¹⁸ Ati ara, na aik yangalyame. Arup ara, nun tenyam touk kanye deibuka neika mabuka, yolanmanimnya ani, inipmalya bereknamale.

¹⁹ An ilil tenena meme. Na akanye bira, aik kum unmale. Elda pia pera mutuku biyuk ati, minopce tamubuka kum yanamle.

²⁰ Aning ara talye kum nyapkine. Elda yo bok pia weik bulubukabukce, el aling libuka biyuk ati ara, na kele, minopce tamubuka kum yanamle. Pia daulamlya ani, owala noutamuk tamubuka aik yanamle. Atalye-talye yoltalamak kil arye, walwal kamnye biti, nyabuka yukupdobukba, elce akil nyabuk yupu kanye deibuka kekebuk.

²¹ Atalye-talye yoltalamak kil arye, akamnye biti, talima lilona yupu ap, kekena teleb yupu ap, tenepce arye nyabuka deice arye, anye adiparyuk yukupdobukba el aik birik.

²² El akamnye bira, moubuka kum tenebukce, akil nyabuk yupu kekebukce melibukba birik. Winipmanto ara, sapi basam opnamaca ati, bobuka banmace talak ara, asapi basam arye, ‘Nara opnamaniyake atia’ tenen, bita kel kum kilul touk, winibukce, akil ap birik. Tonda, ninye arye, ‘Rusa basam tomopnamap’ tenen, mana wena webuka, kintinipmace sukum, rusa basam kanye bona kum aryuk, wena tapu wepmakcak, mangkau arye balibuk, youlamle touk, akamnye babye, moubuka kum tenebuka anya arye, akil ap birik.

²³ Akamnye bira, moubuka bita kel kum kibuka ati ara, winipmanto ara, rusa basam wena tapu wemikiba, youplirye tikamli bukni, binmanto kum ulamlopura, ninye arye mal marabikiba, nong noutamak wekliba dibilamak touk ubuk. Akamnye birye, ‘Ikin weik ning upnamne arya,’ tenena kum diparyuk, talye kanye bobuka, akil ap neika birik. Tonda ninye arye, ‘Maka mangkau arye balibuk, youpliba tomobibirye opnamap’ tenen, maka balamle bisik, maka youn ning deibikiba, mangkau arye abisik wekliba, youlamle atonun ubuk. Ara, maka arye, ‘Aning pum tam wekna arye, youpnilyopura, tomobuka opnicake,’ kum tenelamak touk, kamnye babye walwalto winibuk. Akamnye birye, ‘Ikin weik ning upnamne arya,’ tenena kum diparyuk, talye kanye bobuka, akil el aik birik.

²⁴ Ati ara, na mapu nirya ati, narye, “Winibuka upnamlume,” nyabuka nyasinye yupu moubuka kekepmunce, kel biknamlulume.

²⁵ Anggun talye yoltanyak kil arye nyanamsil yupu ara, pia kum kekenamlulume. El malye ulye deice arye, anggun talima lilosulula ati ara, akil banamle bisik nirya, pia kum binamlume. El malye bisikuk banamle sukum ara, anggun ton abisik kirikuka, kum banamlulume.

²⁶ Sik talye yoltalamak kilapu arye, malye winilamaka deice arye, ninye pia weika arye, sik talima lipdobikiba, malye winin ning talibuka unyake. Akilapu ara, ninye pia weik, kum nukmanto yukulolamakba, sik yupu kekebikirye, malye unyake. Sikce ninye weik malye kililamak deice arye, dipkoprob ninye yupa pia kum nukmanto olinyake.

²⁷ Akil el aik ban bisik ara, ninye dilban bisikuk ulule. Akil el aik dam banyanyak nang nirya ara, aminyan dibikirye, diplamak ninye unyak sukumuk binuka unamake. Ati, akilapu unyakak nirya ara, leipdopmunce, pia yuk pera sukumuk, binuka unamlulume. Raja Salomo birye, el mapu ati nyabuk.