Amsal 6 - Eipomek

Raja Salomo birye, el mapu ati, ‘Kanye moubuka tenelena kumce, malye winibicak’ tenen, nyabuk yupu

¹ Se, na mapu, yuk talak ara, anggun kwit capu nang tonoknye biti, anggunce anggun kum winipnamunye ning ati, ‘Aning ara, narye anti, winibuka na arepnamkine. Tonda, winibuka melipnamkinarya,’ nyabuka, talye kum nyaltakanamlulume.

² Tonda, anggun kan-kan tonoknye birye, ‘Winipnamkinarya,’ nyabuka, talye nyaltakana deice arye, el bidamnye arye wena tapu youlalule. Winibuka youpdanamle deiyok ara, el mining si bam bol pum bisikuk, nyaltakalya deice arye, youpdanamle. Ati ara, anggun kayapu ati, talye nyaltakana meme.

³ Bukni, anggunce anggun kayapu ati, anggun kum winipnamunye ning ati, ‘Aning ara narye anti, winibuka na arepnamkine,’ nyabuka, talye nyaplopmunyopura, teleb ulina ap, anggunce anggun bidamnye ati, lyelana ap ati, wininamlume. Anggunce talye nyaplopmunya deice arye, anggun kayapu nang arye, anggunti tapu koulamak touk, akunum koupnamsiake. Ati, anggunce ayupu nyabuka, tilila nyaplopmalum ninye dam, minopce bimunce, ‘Na talye nyamkisa anya arye, aning ton kum arepnamkine. Ati ayupu ara mangkau kinamlulume,’ nyabuka yupu sekelongol binamlulume.

⁴ Aning ara, ‘Yuk talak nyalbinamabe,’ tenena meme. Adiparyuk minopce, anggun kwit capu dam bimunce, yupu sekelongol binamlulume. Ati ara, anggun bimunce, asing kubuka mana meme. Atonun dikdik upsilirye, wi talepsiliba, binuka mabuka dikdik sena meme. Ati, anggunce, anggun kayapu ati, ‘Na talye nyaplopse yupu ara, mangkau kinamlulume,’ nyabuka yupu sekelongol binamlulume.

⁵ Winipmanto ara, bai yua basam do, maka do, tapu wemikiba, tapu youplibuk, loplobuka balamak touk, tonda, ‘Wena pum tam wekipyak’ tenen, leibuka balamak touk, anggun babye moubuka dilamunce, unamlulume.

Salomo birye, ‘Pil dona nun like,’ tenenyak nang ati, nyabuk yupu

⁶ Anggun pil dona lik ulamsil ninye ara, adiparyuk tulik arye pil donyak ning anyak dilbilulume. Winipmunce, ‘Sikda yata wiribuka pil donyak do?’ tenen kel biknamlulume. Tulik arye pia pi dobuka pil dolamak ning, kel bikmunyopura, pia weik kel nang unamlume.

⁷ Tulik ara, sik pil donyak bukni, sik deiyoknye ton kum ulule. Tonda, “Pil ara winibuka dopnuyabe,” nyananye ton kum ulule.

⁸ Bukni, sik tulik ara, dou li talak arye, din ning bulupdobikirye sik aik binuka, delilbalamica ani, akunum mok cena li uplyopura, abinuka deiamikce din uk dibuka, aik koproba uk unyake. Tulik ara, sik din ning bulubuka, delin talak uplyopura, sikda bulubuka delinyake. Ara, ‘Nun dinyap ning kum uplye talak ara, kum bulupdeipnamap’ tenen, wininyake.

⁹ Ati ara, anggun babye aning atonunuk, wininamlulume. Pil dona walwal arye maltakna uk ululnye bira, pia amaplopnalam do? Amaplopmaminya ani, dan talak buknalam do?

¹⁰ El anye bira mapmalya ani bukliba, dikdik seplye talak ara nyalule, ‘Mapmanu bukni, ila tuba wi talipmanila ati, tonap tamubuka mapnune,’ teneplirye, taruk kisok ereiplirye malule.

¹¹ Bukni el pia mana uk ululnye bira, aning-aning nirya kum upliba, talye urdemuk ululce, aning-aning nirya kum talilule. Winipmanto ara, ninye talye ubula dopra balamak nang arye, yuk nang bita kel kum kipmace, sukum ubula dopra balamak touk, apia maltakna uk ululnye bira, el talilul ning nirya kum danamle. Winipmanto ara, yin talin nang arye, ninye on ning nirya dopdobikirye, olbalamaka atonunuk, anye el talilye ning nirya ara, adiparyuk minopce kum danamle.

‘Malye ninguk wininamabe,’ tenenyak nang arye, wininyak ati, laka nyabuk yupu

¹² Tonda, sik yu uplirye mun delina ap, ubula dona ap wininyaka deice arye, minin yupu nirya bobuka balsusunmakirye, ayupu uk nyapra banyake.

¹³ Anye winilul ning ton ani. El pataplye ning ara, ‘Ubula dopropnun,’ teneplyopura, asing ikre balule. Tonda, el ap yupu sisikinyak nang ati, asing iklirye, el kwit capu ati asing ikildongolule. Ton ning ara, el ubula dopmanto ning ara, ‘Aning ubula doproptinye’ tenen, pataplye talak ara, tikuka dipra banmalirye, el yan nimalyap asa yanibanmalirye, el ‘Se,’ teneplirye, dopropmanto ning dipra balule. Banmalirye, el dopropmanto ning eiplyopura, el kwit capu ati, urasin odinmalirye, ‘Aning ara, adopropnune,’ nyaplirye asing ikuka, el taruk mitik ton duknubuka taruk pukulule.

¹⁴ El kanye pum tam ara, yu kanye bona ninguk ulula ati ara, el talima pum tam lyuna uk ululba, tilila ninguk panalule. El tenelye ning nirya ara, malye un ninguk tenelula anya arye, el balamle mutuku nirya ara, el malye ulye deice arye, yuk ninye nirya babye, kanye wilibuka bokolanyake.

¹⁵ Aning winilya ati ara, malye un ning talye karin arye, el deice uk yalirye, amalye un ning aniryuk, teikuka opliba, el nong ara kum danamle. Weik imun kanye bon ning anye, el nong deice akunum yalyopura, ila tuba tonap teleb kum kipdeipdatue.

Allah Yahweh arye, ‘Aning ara, pia na like,’ nyapdeiamuk ning ati, laka nyabuk yupu

¹⁶ Allah Yahweh arye, ‘Aning ara pia na like,’ nyapdeiamuk ning ara, deiyok nakub barye ulule. Tonda, deiyok tekbarye ning ton, ‘Aning ara pia na like,’ nyapdeiamuk ning ara, nyapnusine.

¹⁷ Tonok ning ara, kanye talima erelakirye, ‘Yuk nang ara, nunti, sikda pia weik nang tenesinyake,’ tenelakirye, anang sik asing erebukabikirye, ninye kisok dup-dup diprebakiba, Allah el lik ulule. Bitinye ning ara, sitang deice arye tilila yupu nyanyak ninye ara, Allah el lik ulule. Winilye ning ara, deiyok ning ton kum upmalibuk, ninye sik taruk deice arye, oltakanyak ninye ara, Allah el lik ulule.

¹⁸ Dumbarye ning ara, ninye sik talima pum tam arye, ‘Malye unamap ning ara, winibuka malye unamabe’ tenen, patapliba, kintinilinyak ninye ara, Allah el lik ulule. Pamubarye ning ara, ‘Malye un ning ara, winilbinuyabe’ tenebikirye, bikbik abuka balsusulamak ninye ara, Allah el lik ulule.

¹⁹ Naku barye ning ara ani. Ara, ninye yupu lipsisikuka bokolin talak ara, deiyok kum upmalibuk, minina yupu nyanyak ninye nirya ara, Allah el lik ulule. Tek barye ning ara ani. Tonok aik unyak mapu silip ara, tonoknye birye malye ulye deice arye, anyaik ninye nirya arye, kanye wilibuka bokolanyake. Amalye yupu deiyok koubuka nyalulnye bira, Allah el lik ulule.

Raja Salomo birye, el mapu ati, ‘Na nyapdeiamsise yupu moubuka talinamlulume,’ nyabuk yupu

²⁰ Se, na mapuo. Na anggun ni birye yata wirin ning do nirya ati, ‘Aning ara wininamlulume, aning ara kum wininamlulume,’ nyapdeiamsise yupu ara, luba kina pia meme. Tonda, anggun nin yapu arye, yata wirin ning do nirya ati, ‘Aning ara wininamlulume, aning ara kum wininamlulume,’ nyalilamsik yupu ara, kum yaniptapnamlulume.

²¹ Anggun ni yapu ap, anggun nin yapu ap arye, ‘Wininamlulume, aning ara kum wininamlulume,’ nyalilamsik yupu nirya ara, moubuka kekepmunce, kanye pum tam deibuka unamlulume. Aning atouk, bace duk ngang dam karaklamak atonun, karakuka unamlulume.

²² Anggun ti nyalilamsik yupu tuba tenebuka umunyopura, ayupu aniryuk anggun banamlumak nirya ara, ‘Diksukum bisik ani, malye un bisik ani,’ tenebuka, kel bikinamlulume. Anggun mapnumunye talak ara, ayupu anyuk kalikuka melinamsile. Ara, anggun banumunye talak babye, lukunyan mapnumunye talak babye, bukuka banumunye talak babye, el dem arye talibuka basilirye, nyapre banamsile.

²³ Ati ara, wisi nang arye, ‘Winibuka unamlulume,’ nyalilamsik yupu ara, weisa ubikiba dirina ulamle touk, wisi nang arye nyalilamsik yupu ati, moubuka tenemunce, ‘Teleb un bisik ani,’ tenebuka, kel bikinamlulume. Tonda, wenen deice arye peteresinyak yupu ara, ‘Diksukum kam un bisikuk bakirye, malye kum unamak’ tenen, peteresinyake. Ayupu moubuka kekepmunyopura, pia telebuk unamlume.

Salomo birye, talye yolalamak kilapu ati, nyabuk yupu

²⁴ Anggun ni yapu ap, anggun nin yapu ap arye, wenen deice arye peteresinyak yupu ara, ‘Diksukum kam un bisikuk bakirye, malye kum unamak’ tenen, peteresinyake. Ayupu moubuka kekepmunyopura, talye-talye yolamak kilapu arye, yukulon yupu nyanyak ning ap, yuk nang domikce kilapu ap arye, kanye lilon yupu nyabicopura, sik yupu pia kum kekenamlulume.

²⁵ Tonda na mapu, anggunce, talye-talye yolamak kilapu nong bol teleb kibuka urasin pia telebto upmaca ati, anggun kanye talima lipdopsiliba, pia kum tenenamlulume. Tonda, akilapu sik asing ikilanyaka deice arye, anggun kanye talima lipdoposiliba, ‘Malye winipmunyak’ tenen ati, pia moubuka kalikelanamlulume. Anggun kanye talima lipdopsikiba, eibuka dobolbimunyopura, ‘Ara tapu koulongona atonun akunum kipnamsiake,’ tenenamlume. Ati winina meme, nyapsine.

²⁶ Talye-talye yolamak kilapu arye, yo bok morobikceba, ayo bok arelulnye bira, aminyan talak el talilamlye ning nirya kum daliba, pia bona utotoa talina kumnye unamle. Yuk nang domikce kilapu ap, neika malamice nang ara, sik pil dobuka dololamice ning nirya ara, kum uplya anya arye, ititinamle.

²⁷ Ura domon yupu ton nyapnusine. Ninye arye baju deice uku dinmatu yo lola deibuka takupdaka yangatopura, uku arye el baju uku diptu do, kum do?

²⁸ Aning atouk, ninye arye pia weik uku pakanmatu noutam yan yanibuka bitopura, el yan uku arye diptu do, kum do?

²⁹ Aning atouk, ninye ton anggun kayapu domikce kilapu ap neika mapmatiringba, yuk nang eibuka kel biktingopura, ‘Amapmarak ning ara dauplye,’ tenebikirye, ‘Min kum wenepnuyabe’ tenen, batakanyak do, kum do? Kume, wenen uk upnamake.

³⁰ Ninye tonok, el din ning tonok ning babye kum wamliba, din ning ubula dopropmalinye bira, yuk nang eibuka kel kibikirye, anye biti, ‘Elda pia malinye,’ nyabuka, kum nyanyak bukni, tia ati wenebikirye, batakanyake.

³¹ Bukni, sik ubula uk dolonyak nang ara, yuk nang eibuka kel bikikirye, tongobuka tapu koubicopura, nyanamake. ‘Anggunda, ubula dopropmalum touk, ila tuba tamubuka tonok ninguk kum arepnamsilyame. Anggunce, like tekbarye deice arye, ila tamubuka arenamsilyame,’ nyabuka wenepnamake. Ati, sik ubula dolonyak nang arye, ubula dololamak ning, like tekbarye deice arenamak deice arye, sik talilamikce ning nirya, kum kipdeibikirye, sirya dakdanamake. Sik aik koproba delilamikce ning nirya ara, kum danamle.

³² Ninye ton sik kayapu domikce kilapu ap, neika malamice nang ara, pia walwal ninye unyak touk unyake. Yatanye birye do nirya, sikce yuk nang domikce kilapu neika mabice nang ara, sikce, sik bidamnye ati, ititildanyake.

³³ Aning atonun winilulnye bira, el bidamnye arye malye uplirye ikin ning delilanamle. Tonda, yuk nang arye, el wenena ati obikiba, dila weik upnamle. Anye bira, malye upliba, yuk nang arye elti, ‘Anda pia malye ulyamnye,’ nyanamake ning ara, tuba nyanamaka ati ara, el anye bira, alye pia weik dakalanamle.

³⁴ Anyapmasin yupu ara, talye ati kum nyapsine. Deiyok ara, ani. Ninye arye yuk nang domikce kilapu ubula dobuka neika mabicopura, akilapu sik domikce nang arye, tuba anang ati, pia teninauk unamake anya arye, anang ara kum batakanamake, pia tuba-tuba wenenamake. Akilapu sik domikce nang arye, sik malye wininyak nang ati, bico tenen babye, kum tenenamake.

³⁵ Tonda, akilapu ap neika mabice nang arye, akilapu sik domikce nang ati, “Anti malye winipkisa ati ara, teleb ning weika arye arenamkine,” nyaptua babye, akil domlya deiyoknye birye, el yupu pia kum kekenamle. Akil deiyoknye birye, amalye winiplinye biti, ‘Optinye’ tenena uk unamle. Tonda, akilapu ap neika mabice nang, sik kayapu nang arye, akil deiyoknye binyak, ‘Pia teleb arin ning, pia weika arye arepkitibyeba, nun kwit bataktume,’ nyabuka moroptinga babye, akil deiyoknye birye, ayupu pia kum kekenamle. Kil talye ubula yolana ara, pia malye weik winina ati nyapsine. Raja Salomo birye nyabuk.