Amsal 5 - Eipomek

Raja Salomo birye, “Talye ulamak kilapu ati, talye-talye yolana meme,” nyabuk yupu

¹ Na mapu anggunda, na yupu moubuka kekeplulume. Narye anggunti, ‘Aning ara telebe, aning ara malye’ tenen, pia weik kel bikna deiyok ning deice arye, minop talak dorapce, nyapdeiamsise yupu ara, pia moubuka kekepmunce, tenenamlulume. Moubuka tenena deiyok ning deice arye, nyapdeiamsise yupu ara, anggun amul deice arye, winibuka kekepmunce, anggun nirya moubuka tenenamlulume.

² Ayupu nyapmasina ara talye ati kume. Ara, narye anggunti nyapdeiamsise yupu, moubuka teninauk umunyopura, mangkau arye malye kum unamlume. Teleb asa arye kel bikmunyopura, ‘Teleb ning ani, malye ning ani’ tenen, moubuka dipdemunce, teleb ninguk talibuka unamlulume. Winibuka kel bikmunyopura, anggun bimunce, yupu talinamluma nirya ara, pia weik kel bikna deice aryuk nyanamlume. Winipmunyopura, mangkau arye malye yupu kum nyanamlume. Anggun si bam bol deice ara, yuk ninye arye, talye-talye yupu nyalamak touk, kum nyanamlulume.

³ Ayupu nyapmasina ara, talye ati kum nyapsine. Deiyok ara, ani. Ara, sik ninye talye-talye yolalamak kilapu arye, sik si bam bol deice arye nyanyak yupu ara, madu mong mek dibikiba to teleb lelamle touk, yupu nyanyake. Tonda winipmanto ara, ninye arye minyak mek diklopmacak tilil arye, alap ulamle touk, akilapu arye nyalamak yupu ara, pia namin yupu nyabica deice arye, yukulonyake.

⁴ Bukni, akilapu dam banyak nang ara, akilapu ap neika mabicopura, aminyan talak nong upnamle ning ara, ikin weik ulule. Winipmanto ara, pia sik weik ning kapang mana mitu dibikiba, sik lelamle atonun, akilapu arye ninye kanye lilona yupu nyabikiba, ayupu kekebice nang ara, ikin weik ning sik nong deice unamle. Winipmanto ara, si dana-dana tam ulamle parang ya arye, ninye weik olamak touk, akilapu ap neika unyaka deice, akilapu arye ninye weik olamak touk, unyake. Ara, akilapu dam banyak nang ara, sik nong deice, ikin ning weik unamle.

⁵ Sal arye talye-talye yolalamak kilapu ara, ninye dibikirye balamak sukumuk banyake. Akilapu banyak bisikuk dobolbanyak nang ara, akilapu ap, sik anang ap, neika uku din mutuku bisikuk banyake.

⁶ Akilapu ara, ‘Kam una ati, diksukum bisik ara ani’ tenen, moubuka tenina kumce, kwanim bisik balamak touk, sik akilapu ara, diksukum bisik bana kumce, kwanim bisikuk banyake. Wininyak kilapu ara, ‘Nunda kwanim bisik banyaba,’ kum tenebikirye, talye kanye bobuka banyake.

⁷ Ati ara, na mapu anggun nirya narye nyapdeiamsise yupu, anggun adiparyuk moubuka kekenamlulume. Na si deice arye nyapdeiamsise yupu ara, talye kekeltakna kum unamlulume.

⁸ Sal arye talye-talye yolamak kilapu, sik dam arye leibuka, pia yuk sukumuk unamlulume. Tonda, el akil aik dam ara, pia kum unamlulume. Memepdakuka, pera sukumuk unamlulume.

⁹ Anggunda, akilapu ap neika mapmumnyopura, yuk nang arye, anggunti, ‘Anang ara, teleb’ tenen, si erelamsiki bukni, aminyan talak ara, anggunti, ‘Nun like,’ tenenamsiyake. Oketeng tamun yupa weik deice arye, pil teleb ubuka dolamlumba, aning-aning nirya weika arye dolamunye bukni, akilapu ap neika mapmumnyopura, yu nang arye yanuka dobuka tapu koupsikirye yupu lipsisiknamsiak talak ara, anggun taleamunye ning nirya babye, alapdopnamsiyake. Anang arye anggunti bico kum tenepnamsiaka anya arye, ikin ning weik anggun nong deice delinamsiake. Minop talak arye, ‘Nunda wininamabe,’ tenelamlum ning nirya babye, nong kum upnamle.

¹⁰ Akilapu ap malye-malye ulamunyopura, anggun talibuka ulamunye ning nirya ara, yuk nang arye dibuka sirya daknamsiake. Tonda, anggun kwisi meka deice pil dolamunye ning ara, yuk mutuku nang, anggun kel kum bikamunye nang yakirye, aning nirya alapdopnamsiyake. Dopropsikirye, sik ning koproba atonun kipropnamsiake.

¹¹ Anggunda moubuka kekeplulume. Akilapu ap ansinibuka neika mapmumnyopura, adeice arye, ikin weik uk dilamsilya ani, dipnumunye talak ara, anggun nong nirya ara, bol malye bobuka ekropnamsile.

¹² Anggun bol malye bobuka ekropsilyopura, anggun nirya arye, ‘Se, yata deiyok ati wenen yupu nyalamik bukni, kum kekelamse do? Tonda, yata deiyok ati, na kanye talima pum tam arye, wenena yupu ara, na like, tenelamse do?’ tenelamunce, engenamlume.

¹³ Tonda, ‘Nara yata ati na peteren nang arye nyapman yupu ara pia kum kekelamse do? Tonda, na peteren nang arye, nyapman yupu ara, amul deice arye pia moubuka kum kekelamse do?’ tenelamunce, engenamlume.

¹⁴ ‘Se, wini talak ara, malye weik winilamupe deice arye, ninye nirya bulubuka dinmasicak arye, sakuka poulbanyabe,’ tenepdamunce, engenamlume.

¹⁵ Winipmanto ara, ninye arye sik bidamnye arye, mek pu sukumuk mek kwebuka dilamak touk, anggun akunum domunye kilapu ap melipdamunce, neika uk unamlulume. Aning atonun, ninye arye, ‘Mek dinamap’ tenen, palibuka lokeibikiba, delilamle mekwen, sik bidamnye arye kwebuka dilamak touk, ‘Na dopnamne’ tenen moun dilamunye kilapu ati, anggun kanye tenen ning nirya ara, sik akilapu deice uk delinamlume.

¹⁶ Ninye arye, mek dina ati, deiamikiba delilamle mek ara, yata ati diklobikiba, ninye asik ulamikca deice talye-talye banamle do? Aning atonun, yata ati anggun domunye kilapu ati, yuk nang arye talye-talye alabuka dolonamsiak do?

¹⁷ Anggun ap, anggun kilapu ap, anggun nong ara, anggun nang bitinye anggun mamun uka. Tonda, anggun ap, anggun kilapu ap, anggun nong ara yuk nang ap neika mana meme.

¹⁸ Ati ara, anggun wel ulamunye talak arye, taruk mourupsik kilapu ara, anggun kilapu koproba uka. Anya arye, akilapu atibuk bico tenepdamunce, unamlulume. Ara, anggun kilapu koproba atia. Anggunce anggun mining kilapu ati, teleb kibuka melipmunyopura, akilapu arye anggunti, kanye deipsikirye, teleb ulinamsiake.

¹⁹ Akam kilapu sik urasin teleb kibuka nelamikce talak, sik urasin ara, tuku deice balamle ning el si ara, kijang urasin teleb ulamle touk unyake. Ati anggunce anggun mining kilapu eipmunce, sik akilapu ati, kanye delinamlulume. Winipmanto ara, ninye arye kanye wangalamak mek dibikiba, kanye delilamak touk, anggunce anggun mining kilapu ati eipmunce, akilapu ati kanye delinamlulume. Atalak-atalak nirya ara, anggun kilapu koproba atibuk, neika ulamunce, kanye delilanamlulume.

²⁰ Se, na mapu anggunda, yata deiyok ati, anggun kanye talima tenen ning nirya ara, yuk kilapu deice uk delinamlum do? Ninye akunum domlye bukni, akilapu arye yuk nang ap, talye-talye yolanyak kilapu ara, yata deiyok ati, akilapu ati anggun kanye delinamlum do? Tonda, ninye arye talye-talye yolalamak kilapu ara, anggunce akilapu ati, kanye deibuka irilanamlum do?

²¹ Ayupu nirya ara, talye ati kum nyanmasine. Deiyok ara ani. Ara, tukwak mutuku-mutuku nirya unyak ninye ara, sikce wininyak ning nirya ara, nun ni koproba Allah Yahweh arye, elisulule. Elisilirye, ninye wininyak ning nirya ati, ‘Teleb ning ani, malye ning ani’ tenen, yupu lipsisikuka bokolisulule. Aning-aning nirya disulula anya arye, tonok ning babye kum batakalule.

²² Malye unyak ninye arye, sik malye wininyak ning deice arye malye winililanyake. Winipmanto ara, ninye arye wena tapu wemikiba, kapang mana mangkau arye wena pum bisik baliba, youlamle touk, sik malye unyak ninye arye, sikce sik bidamnye ati malye ulilanyake.

²³ Sik anang dipnamaka ara, min yuma talak wenen yupu deice nyapdeiamik ning ara, moubuka kum tenelamika deice arye dipnamake. Sik bidamnye arye, moubuka kum kalikilalamikca deice arye, opdeipdakirye, dipnamake. Tonda, sik pia talye walwal arye ulamika deice arye, dipnamake.