Amsal 4 - Eipomek

Raja Salomo birye, sik nin yapu ap, sik ni yapu ap, arye, “Sik mapu ati, ‘Wininamlulume,’ nyabuka, wenenamlulume,” nyapdeibuk yupu

¹ Se, amapo, anggun ni yapu arye nyasinyak yupu nirya ara, pia moubuka kekenamlulume. Winibuka umunce, anggun ni yapu arye nyanyak yupu nirya ara, moubuka kekepmunyopura, anggun kel bikna ning ara, pia weika arye kel bikinamlume.

² Anyapmasina ara, talye ati kum nyapsine. Deiyok ara ani. Narye anggunti nyasinye yupu nirya ara, pia teleb yupu ati ara, anyasinye yupu ara anggunce talye kanye bobuka mangkau kina pia meme. Anggun kanye talima pum tam deibuka, teninauk unamlume.

³ Winibuka na mitikop arye na nin ap, na ni ap, sik aik ulamse talak ara, na ni el mi, el kanye delinanye ulamse. Aning atonun, na nin birye, nati, ‘Na mi koproba,’ tenelamnukce, nati kanye pia delilamnuke.

⁴ Winibuka ulamse talak ara, na ni birye pia moubuka peterelamnuke. Na ni birye, pia moubuka peterelamnuk yupu ara, ani. Narye anti, nyakinye yupu ara, moubuka kekepmince, kanye talima pum tam deibuka, teninauk unamlame. Tonda, ance na nyakinye yupu nirya ara, tonok ning babye, pia kum luba kinamlyame. Narye anti, “Aning ara wininamlame,” nyabuka nyamkise yupu ara, ninye taruk deice arye, ‘Na tenen ning’ tenen, talibuka bolamak ning atonun, tenebuka unamlame. Winipminyopura, an pia kam unamlame.

⁵ Winibuka uminye talak ara, an pia weik kel bikna deiyok ning dopropnalam talak ap, ‘Aning telebe, aning malye’ tenen, moubuka tenena deiyok ning ara, moubuka dopropnalam talak ara, ‘Na ni el yupu deice arye wenena yupu nyalamnuk ning ara, ani,’ tenenamlyame. Tonda, ance, ‘Ayupu ara talye yupu’ tenen, doldonokna pia meme.

⁶ Ance pia weik kel bikna deiyok ning ati batakna meme. Pia tenenamlyame. Winipminyopura, akel bikna deiyok ning arye, anti pia melinamkile. Weik kel bikna deiyok ning ati, ‘Aning ara pia weik mambule,’ tenepniminyopura, aning arye anti, melibuka kalikinamkile. Winipkiliba, an kanye lamapdongobuka unamlame.

⁷ Anda, ‘Weik kelnye koproba unamne’ tenen, patapkiliba pia weik mambul unamlam ning ara, ani. Min yuma ning ara, ‘Weik kel bikna deiyok ning dopropnamne’ tenen, pi dobuka enamlame. Tonda, yuk teleb ning ton dopropnalam bukni, pia weik ikin ning ton ani. Ara, ‘Teleb ning ani, malye ning ani’ tenen, moubuka tenena deiyok ning ton dopropnamlame.

⁸ Ance, ‘Weik kel bikna deiyok ning ara, pia weik mambule,’ tenenamlame. Weik kel biknamlam ning moubuka taliminyopura, aning arye anti erelinamkile. Weik kel bikna deiyok ning ati, ‘Aning ara pia weik mambule,’ teneminyopura, yuk ninye arye anti, “Telebe,” nyabuka, si erenamkiake.

⁹ Yata ninye do nirya, pil pia teleb kibuka dobikcopura, yuk nang arye aninye sik si erena ati, yo kita sik kisok deice delinyake. Tonda, dekna weik kat ning, el si ara emas arye memebuka delinyak teleb ning, mahkota dobuka, pia ninye deiyok nang, Raja sik kisok deice delinyake. Aning winilamak touk, ance pia weik kel bikna deiyok ning ati, pia moubuka talimince, pil teleb kibuka dominyopura, yuk ninye arye anti, eipkikirye, si erenamkiake.

Raja Salomo birye el mapu ati, “Diksukum bisikuk banamlulume,” nyabuk yupu

¹⁰ Na mi anda, na yupu moubuka kekepnilyame. Narye nyakinye yupu, pia moubuka kekepminyopura, Allah arye an kam unamlam keting tamun ara, ouku pia cang arye arepra banamkile.

¹¹ Minop talak narye, ‘Elda pia weik kel bikina deiyok ning, weika arye kel kipnamle’ tenen, peterelamkise touk, narye, “Pia diksukum kam una deiyok bisik ara atia,” nyabuka peterelamkise.

¹² Apeterelamkise touk kibuka ulaminyopura, an bisik banamlam talak nirya babye, ikin ning ayala-ayala nirya arye, an banamlam bisik ara, kum sekenamkile. Tonda, ance, ‘Wininamne,’ teneminye ning nirya ara, pia kum sekenamkile. Winipmanto ara, an bikbik abuka banamlam talak ara, keil yan dum dukliba saklamak touk, kum unamkile.

¹³ Aning ati ara, minop talak narye peterelamkise yupu ara, an moubuka tuba tenenamlyame. Ayupu ara, pia moubuka tenenamlyame. Deiyok ara, apeteren deice arye, an kam unamlam talak ara, ayupu pia melibuka kalikinamkile.

¹⁴ Wini talak arye dipdongobuka, doryanamle talak, upra banamlum talak nirya ara, sik malye winin ninye arye winilamak ning atonun, pia kum wininamlyame. Tonda, sik malye ninye arye winilamak ning, an ton eipmince, pia kum winilenamlyame.

¹⁵ Winimince, anda aninye sik dam arye leibuka, pia yuk sukumuk unamlame. Unamlam talak ara, malye winin ninye sik winilamak ning eipmince, ‘Sik wininyak ning ara, na ton winiptinye’ tenen, ‘Kanye talima bouku sukupkiliba, malye winipminyak’ tenen, nyapkine. An kanye nirya ara, dobuka sik anang nong deice delina ara, pia meme. Tonda, anti minop arye nyamkise yupu uk, talibuka dobolbanamlyame.

¹⁶ Sik malye wininyak ninye ara, sik tenen ning, pia kum winipmacopura, sik aik pia moubuka kum manyake. Wininyaka deiyok ara, sik anang ara, lukunyan babye, keting noutam babye, beren tam babye nirya ara, sik kwit capu dib tenena nang ati, ‘Malye kipdeiptibye’ tenen, pia epra banyakce unyake. Ara, sik anang ara, yuk nang ati, malye kum kibuka deipmace talak ara, sik anang ara pia wi kum talilule.

¹⁷ Sik amalye ning atibuk epra banyak nang ara, sik talibuka unyak ning ara, malye yu ning ap, malye wininyak ning nirya ara, kwaning ap, mek ap, dilamak atonun unyake. Dilamaka atonun unyakce, sik malye ninguk pia unyake. Tonda, yu nang arye kanye wangalamak mek, weika arye dibikiba, kanye wangabica deice arye, yu upliba yuk nang ati olamak touk, kibuka unyake.

¹⁸ Wininyak bukni, sik diksukumuk unyak ninye ara, beren tam keting yalye talak ara, sika arye dawaplya ani, keting deiplirye, dirin ulamle touk unyake. Sik dib tenen ninye ara, tonok sum berekna deice arye, keting deiplirye, dirina weik ulamle touk unyake.

¹⁹ Unyak bukni, sik amalye yu kanye bonyak ninye, sik banyak bisik ara, lukunyan bisikuk banyake. Ati, sik anang ara, ninye mangkau bisik bakiba, yan dum dukliba kote sakikirye, sik kel kum kilamak touk unyake. Aninye ara, ‘Nun yan dum dukusila ara, ani,’ kum tenenyake.

²⁰ Aning ati ara, narye na mi anti nyapdeiamkise yupu ap, tonda, wenen yupu deice arye, anti nyamkise yupu ap, an amul deice arye kekepmince, kel bikinamlyame. Ara, ‘Na ni birye, yata mambul yupu nyapnunil do?’ tenen, moubuka kekepmince, tenenamlyame.

²¹ Ayupu nirya ara, ance talye dobuka kum donokonamlyame. Bukni, an kanye talima pum tam pia moubuka delinamlyame. Ayupu nirya moubuka tenepmince, kalikelanamlyame.

²² Aning ara, urdem ati kum nyapkine. Deiyok ara, ani. Narye anti, pia weik kel bikna ning ap, wenen yupu deice arye nyamkise ning ara, moubuka talibuka uminyopura, Allah arye an kam unalam talak ara, ouku pia weik arye arepkiliba, pia kam upra banamlame. Winipmanto ara, uk dilamle ninye arye, ‘Obat dibikiba, uk lopropsilyopura, kip unamap’ tenen, obat dilamak touk, na nyamkise yupu moubuka talipminyopura, telebuk unamlame.

²³ Ati ara, ‘Na mangkau arye malye winipnyak’ tenen, an talima pum tam pia kalikdamince unamlame. Ayupu nyapmasina ara, talye ati kum nyapkine. Deiyok ara, ninye arya kanye talima tenena deice aryuk banyake. Ati, an babye kanye talima tenena deice aryuk, ‘Abisik ara telebe, abisik ara malye,’ tenepmince, moubuka unamlame.

²⁴ Winibuka ulamince, talye peteren yupu nirya ara, an si bam bol deice, ‘Ayupu ara nyanune,’ tenena meme. Aning nirya ara, minina yupu nyana ap, an kwit biti, ‘Lik’ tenena yupu nyana ap, nyabuka nyalamikirye, ulamicak dam ara, batakmince, leibuka pia yuk sukumuk, unamlame.

²⁵ Ati an asing ara, ‘Talye-talye dipra banune,’ kum tenenamlyame. An asing dana-dana dipra bana kumce, pung bisikuk diprebuka banamlyame. An urasin menekuka banmalye bisikuk, banamlame.

²⁶ Abanamince, min kum binapminye talak ara, ‘Nong bisikuk banune,’ tenebuka, an kanye talima pia moubuka tenenamlyame. Ance umince, moubuka tenemince, pil mikip arye piribuka donamlam ning nirya ara, nong upra banam kile. Tonda, sik malye unyak ninye arye unyak ning ara, ‘Na ton winiptinye,’ tenena kumce, an telebuk uminyopura, an wininalam ning nirya ara, pia telebuk unamkile.

²⁷ Aning ati ara, yu kibuka malye unyak ninye ara, sik kanye arye, ‘Nara diksukum bisikuk binun do? Kwalin bisik binun do?’ tenelalamak touk, pia kum wininamlyame. Tonda, an yan deice arye yanibuka, ‘Amalye ning dam binune,’ pia kum tenenamlyame. Teleb un bisik eibuka, akunum kel kipminyopura, ‘Kwanim bisik binun do, sirik bisik binun do?’ pia kum tenenamlyame. Bukni, an amalye ning winina kumopura, an adiparyuk, pia teleb diksukum ubuka, kam uk unamlame.