Amsal 31 - Eipomek

Ninye deiyoknye el si ara, Sisinanye Raja Lemuel birye, sekdeipsuk yupu

¹ Ayupu ara, ninye deiyok kibuka ulamuknye el si ara, Sisinanye Raja Lemuel birye nyabuk. Amambul yupu ara, el lin birye elti, peterelamukba, kel kiamukce sekdeipsuk.

² Na mi koprop, narye deipkisenye, anti na talima an deice deipkise. Ara, narye Allah ati morolamsa deice arye, el kekepnukce arepnukba deipkise. Ati, narye anti mambul yupu nyapnukine.

³ An mikip ukilye ning ara, talye daunyak kilapu ati, talye-talye uk kum arenamlyame. Ninye deiyok talibuka Raja unyak nang weik arye, talye daunyak kilapu ati tenilaminyopura, aminyan talak akilapu arye, anti malye ulinamkiyake. Ati ara, talye-talye daunyak kilapu ati, pia tenina kum unamlyame. Akilapu sik dam bana kume.

⁴ Aning atonun, anda Raja Lemuel, ance yu mek kanye wangalamak mek dipmince, kanye wangapmince, ‘Malye winin ning winipminyak’ tenen, nyapkine. Ati ara, anyapkin yupu pia teninauk unamlyame. Teleb unyak Raja nang arye, kanye wangalamak mek weik arye kum dinyake. Weik ninye deiyok nang arye, sik amu tam unyak ninye ati, talinyaka anya arye, kanye wangalamak mek weik tonun patalul buk, kum dinyake.

⁵ Ayupu ara, talye ati kum nyapkine. Deiyok ara ani. Ara, ninye deiyok nang, Raja arye yu weik mek weik dibikcopura, sik pil dona deiyok ning nirya luba kinamake. Winibicopura, bona utotoa talina kum ninye do, mikip pia kum ninye do, ikin kanye bobuka unyak ninye do, ninye arye, ‘Aninye ara mambul kum ninye anya arye dauplye’ tenen, yanildongonyak ninye ap, sik amu tam unyak ninye nirya ati, teleb ubuka kum meliptinge. Tonda, yu mek dibice deice arye, sik kanye wangapliba, ninye yupu teleb ubuka kum bokipnamake. Sik amu tam unyak ninye ati, yaniltana uk ubikirye, aninye nirya ati malye ulinamake. Ati, Raja nang ara, kanye wangalamak mek weik arye dina kume, nyapkine.

⁶ Yu mek dipmakiba, kanye wangalamak nang ara, sik kanye talima nirya luba kilisinilul nang ara, sikce sik bidamnye ati olildanyake. Ara, dibina damak unyak ninye arye amek dinyake. Tonda, kanye imun weik upliba, ‘Nunda pia kum winipnamtibye’ tenen, malye kanye bobuka unyak ninye arye, ayu mek weik arye dinyake.

⁷ Tonda sik anang nirya arye, yu mek dinyaka ara, sik ikin ning noutamak unyak ning ap, sik talin ning nirya kum upmalibuk, pia bona utotoa talina kum ninye uk unyak ning ap, luba kibikirye, ‘Nun ikin usilye ning nirya tenena kumce, talye kanye bobuka unamap’ tenen, yu mek, kanye wangalamak mek dinyake.

⁸ Anda ninye deiyoknye, Raja ulyama anya arye, yuk ninye ara, an amu tamukirye, yupu mikip arye nyapmanto kum ninye ap, ninye arye, ‘Aninye ara auplye’ tenen, yanildongonyak ninye ap ati, tenemince, sik melina ati yupu melibuka nyanamlyame. Ton tam nang arye, yuk nang ati tomobikirye, “Anang oplopnuyabe,” nyabikcopura, ancuk aopnuce ninye sik melina ati, yupu melibuka nyanamlyame. Winipminya deice arye, ninye yupu teleb nyabuka bokipnamake. Anda Raja Lemuel birye, sik bona utotoa talina kum ninye nirya ati, ‘Anang ara na tam nang uka,’ tenebuka, melibuka kalikdanamlyame.

⁹ Dipkoprop tuba tamubuka tonap nyapkine. Anda ninye deiyoknye Raja akunum unmalama anya arye, ance sik mitang unyak ninye ap, bona utotoa talina kum ninye ap, yupu mikip arye nyapmanto kum unyak ninye ap ati, teleb yupu nyabuka, lipsisikuka bokolinamlyame. Winipminya deice arye, aninye ati teleb kilinamlyame. Sik damak teleb kibuka umince, talinamlyame.

Diksukum ulirye, ninye yupu kekebuka, amu tam ulul kil ati, nyabuk yupu

¹⁰ ‘Diksukumuk ulamturye, el akanye nyaptu yupu uk kekebuka amu tam upmanto kil uk, ato kil eibuka doptinye’ tenen, pia piribuka elamtuma babye, adiparyuk el atonun kil ara, minopce kum eipnamlame. Pia teleb ulirye, el akanye yupu kekepmanto kil ara, minopce eibuka kum binuka dopropmanto anya arye, atonun kilapu ati ara, pia piribuka epdetum bukni, ikin diparyuk epnamlume. Aning atonun, akil urasin ara winipmanto, weik nong teleb dekna weik keil el si ara, intan berlian keil ara, urasin pia weik teleb ning ulul bukni, aning ara mitik mambule. Bukni, pia teleb ubuka ulul kil ara, weik mambul ulule.

¹¹ Aning atonun kil doptunye bira, el kil arye nyaptu yupu nirya ara, dib teneptue. Akil arye nyalamle touk winilula atia. Akil ap, anye ap neika unamdak talak nirya ara, akil arye el akanye biti, melinamle deice arye, anye bira telebuk upnin banamle. Elce akil ati pia kanye deibuka unamle.

¹² Akil el kam unamle talak noutamak nirya ara, el akanye dam malye un ning ton kum wininamle. Ikin ning el dam kum delinamle. Sik kam tuba unamdak talak nirya ara, anye birye el kil arye teleb ubuka melinamle. Winibuka ulirye, teleb piluk donamle.

¹³ El akil ara, kil-kil deice aryuk baju wina ati, wilamak tapu ebuka dolona ap, tonda domba basam potong bulubuka delinamle. Aning nirya bulubuka deiplyopura, el akil arye, sik nong buppu kina ati, pi deibuka baju wilamak tapu olamlirye pil donamle. Baju wilamak tapu oplirye, aning nirya kintiniplyopura, adeice arye nong bol deice ongolamak baju winamle.

¹⁴ Tonda winipmanto, mekwen deice balamle kapal, el si ara kapal, akapal arye pera mutuku arye dauamlye bona ning libuka, bok yangalamle touk, el akil aryuk, el mapu silip sik dina ati, yuk pera mutuku arye din ning libuka boyangalule.

¹⁵ Tonda el akil aryuk, sik aik pum mapu silip, tuba mapmace karin aryuk, buklirye beren tam talak sik din ning ati, dakuka kintinililule. Tonda el akil aryuk, sik aik noutamak pil dona kilapu ap, sik wa win dam pil don kilapu ap ati, “Anggunda apil-apil donamlume,” nyabuka, ‘Sik pil donamake,’ teneplirye, pil yuk-yuk bokolilule.

¹⁶ El akil aryuk, sik wa wena ati, tuku ton epra balamlya ani, sik wa wena tuku akunum eiplyopura, atuku deiyoknye biti, yo bok areplirye atuku dekelule. Wa win tuku akunum deklyopura, sal arye wa wilamliba, akil arye anggur tapu duk yala koulule.

¹⁷ El akil arye, ‘Aminyan talak ikin pil donamne’ tenen, el kanye talima mikip kilina ap, el nong nirya moubuka dildana ap, ulirye kalikilalule.

¹⁸ El akil ara, elce libuka delilul ning ara, dekna teleb ninguk deklyopura, el mapu silip patalul ning dekelilule. Aning atonun, yuk nang arye, ‘Deknamap’ tenen, delilamak ning ara, akil el mapu silip patalul ning dekelbalamle talak ara, dekna pia teleb ning ton epra balule. Akil ara, pil dona ara, lik kum kil anya arye, beren tam talak arye dipdongobuka, pil donmalya ani, lukunyan kiplyopura, weisa uplirye pil dolule.

¹⁹ Yuk kilapu nirya ara, pil dona kum talak ara, talye dikdik sebuka bunyak bukni, akil ara dikdik sena kumce, aling wilamak tapu pia ona uk ulule.

²⁰ Tonda, el akil ara, yuk bona utotoa talina kum ninye ati ara, ‘Na ning kum bokuka arepnamne’ tenen, kunusa kanye bona kum kile. Elda pia kanye teleb arye yuk bona utotoa talina kum ninye ati, bico tenelirye, melibuka arelule. Tonda, yata patan ning do nirya, yuk ninye pataplye talak ara, akil arye bico tenelirye, melibuka arelule.

²¹ El akil ara, weik mok li min kum cepmalye talak arye, buppu baju akunum wibuka kintinililula anya arye, mok ceplirye, weik arukna li uplya babye, ‘Se, yata winipnamne do?’ tenen, kanye kum walwalalule. Ara, talye ati kume. El mapu silip arukna kiplye talak, buppu baju kintinina ati, buppu baju akunum wibuka kintiniyamlula atia.

²² Tonda el babye akil aryuk, ‘Weik arukna li uplye talak ara, buppu upnamle’ tenen, domba basam potong doplirye, buppu baju akunum wiamlula atia. Abutum wina ati, kain ara pia urasin teleb ning, kurun ning ap, mirin ning ap, bi ning ap arye akunum wiamlula atia.

²³ El akil domlinye bira, amutuku kota noutamak ulamice ninye talibuka, unyak deiyok nang noutamak arye, weik erenanye ulule. Sik mutuku talibuka ninye deiyok nang bulubikirye, yupu talinyak talak nirya ara, el anye ap neika unyake. Amutuku ninye nirya arye, anye biti weik arye kanye deibuka unyake.

²⁴ Tonda, el kil aryuk, ‘Yuk ninye dekenamak’ tenen, urasin pia teleb baju bukni, deiyating delina ati, kintinip deibuka wiplirye, ‘Dengna deiyok nang arye dekenamak’ tenen, deipliba, yuk nang arye dekenyake. Winilya deice arye, yo bok ara pia weik dololule.

²⁵ Akil ara, mikip weik ap, weik kel bikna ap, aning-aning nirya ati, pia moubuka tenena ap, doyanamle talak ati kabul talak arye kintinilina kil ulula anya arye, elda, ‘Se, aminyan talak ara ikin ning na damak yanilyak’ tenen, moubuka tenelirye, ilil kum ulule.

²⁶ El akil ara, weik arye yu yupu ton kum erebuka nyalule. Elda pia moubuka tenipdelirye, weik kel bikna yupu uk nyalule. Tonda yuk ninye ati lipsisikuka peterelamle talak ara, yu yupu arye kum nyalul bukni, nimalye aryuk, teleb yupu nyalya deice arye, yuk ninye ati peterelule.

²⁷ El akil ara, mikip kanye bobuka, pin-pina asa arye, el mapu silip winipnamak ning ap, patapnamle ning ap atibuk, moubuka tenipdelirye, apiluk dobuka kintinililule. ‘Pil uk dona ara, nun like’ tenen, talye kanye bobuka daunyak kilapu ara, aminyan talak ikin kanye bobuka unamak bukni, akil ara, pil teleb ubuka dolula anya arye, ikin ning el damak kum yanganamle.

²⁸ Winilya deice arye, el mapu arye sik nin biti, ‘Elda pia teleb kil ulula anya arye, Allah arye teleb kilinamle’ tenen, elti, teleb yupu uk nyakirye, weik arye kanye delinyake. Aning atonun, el akanye birye, el kil ati pia kanye delilule.

²⁹ Akil el akanye birye, el kil ati nyalule. “Pil teleb kibuka donyak kilapu ton, weik aunyak bukni, aunyaka noutamak arye, an uk ara, weik arye teleb ulyame. Yuk kilapu ara, mitik teleb unyak bukni, an uk ara, pia teleb piluk dolyame. Yuk kilapu wininyaka atonun kum winilyame,” nyabuka, akil el akanye birye, elti, kanye deibuka kilule.

³⁰ Ninye arye, kilapu ulamice ning urasin eibikirye, tenenyaka ara nyapnusine. Ara, sal arye, “Se, akilapu banmace ning ap, teleb ubuka yupu nyalamak ning ap, urasin kamo teleb ubuka unyak ning ap ati, pia teleb unyake,” nyabikirye, akilapu ati, ‘Sikda pia telebe,’ tenenyak bukni, akunum wisi danin bacopura, aning nirya ara kum danin banamlarya. Bukni, yata kil do nirya, Allah ati dib teneplirye, kanye talima amu kibuka ulirye, Allah atibuk ilil ulul kil ara, weik mambul kil ulule. Akil atonun unyak kilapu ati ara, yuk ninye nirya arye sikti, kanye delinyakce, “Sikda pia telebe,” nyabuka unamake.

³¹ Akil ara, pil ayala-yala nirya teleb ubuka dolula anya arye, el pil dolya deice arye, dololulum ning nirya ara, akil kanye delina ati, bokuka el ton arenamlume. El akil ara, dan tam do, el balulak nirya ara, ninye yuk nang arye, akil winilul ning ati eibikirye, “Akil ara teleb kile,” nyabuka, elti, kanye deibuka kinamake.