Amsal 3 - Eipomek

Wel nang ati, kel bikna deiyok ning ara, “Winibuka kel bikinamlulume,” nyabuk yupu

¹ Se, na mapu, narye anggunti peterelamsise ning ara, luba kina meme. Narye, “Aning ara wininamlulume, aning ara kum wininamlulume,” nyapdeiamse ning nirya ara, anggun kanye talima noutam deipmunce, pia tuba tenebuka unamlume.

² Winibuka umunyopura, lo tonap cang arye arisiliba, kanye deibuka teleb un ninguk umunce, kam pia unamlume. Na peteryamsise ning nirya, anggun kanye talima pum tam deipmunce, aninguk moubuka umunyopura, aminyan anggun unamlum ning nirya ara, pia telebuk unamsile.

³ Anggunda teleb kibuka unamlume. Ara, narye peteryamsise yupu ara, talye ning tenebuka batakna meme. Winipmanto ara, bace duk ngang karaklamak atonun, narye peteryamsise yupu moubuka talipmunce, telebuk unamlume. Tonda, winipmanto ning ton, ninye arye, ‘Ayupu ara mambul weik’ tenen, kat ning deice sekuka deibikirye, dilamak atonun, narye peteryamsise yupu anggun kanye talima pum tam moubuka tenepmunce unamlume.

⁴ Anggunce anyapmasin touk umunyopura, Allah el kanye teleb ap, ninye sik teleb kanye ap, anggun deice delinamsiake.

⁵ Anggun ni koproba Allah Yahweh atibuk, pia dib tenebuka unamlume. Angguncuk, anggun kanye talima pum tam tenelulum ninguk, ‘Akunuma,’ tenena meme. Tonda, anggunce, kel bikilulum ning ap, wini talak kel bikra banamlum ning ap ati, ‘Nara pia weik kelnye,’ tenena meme.

⁶ Yata pil do nirya, dopmunyopura, Allah ati moropmunce donamlume. Tonda, yata wirin ning do nirya, ‘Allah melisilya deice aryuk apil donamabe,’ tenenamlume. Tonda, ‘Allah el si erena ati, apil donamabe,’ tenebuka unamlulume. Allah ati, si eremunyopura, elce, “Pia diksukum un bisik ara, ani,” nyabuka peterenamsile. Winipsilirye, anggun wininamlum ning nirya ara, telebuk ulinamsile.

⁷ Angguncuk tenebuka, kel bikamlum ning atibuk, ‘Nunda pia weik kel nang’ tenen, kwalina meme. Ati ara, malye winin ning nirya ara batakmumce, anggun ni koproba Allah Yahweh ati, ‘Elda pia weik mambulnye,’ tenebuka ilil unamsile.

⁸ Winipmanto ara, uk dilamle ninye, obat dibice talak lopliba bulongolamak touk, anggun ni koproba Allah ati, ilil tenebuka umunce, diksukumuk upmunyopura, anggun nong ap, anggun kanya ap nirya ara, pia telebuk unamlume.

⁹ Anggun ni koproba Allah Yahweh ati, “Telebe,” nyabuka, el si erena ati, arelyanganamlum ning nirya ara, pia teleb ninguk bobuka arelyanganamlulume. Tonda, anggun wa wibuka koupmunba, minopce paplirye, nong upnamle weinye ning ayala-ayala nirya ara, Allah el si erena ati, arelyanganamlulume.

¹⁰ Winipmunyopura, anggun kounamlum ning ayala-ayala nirya ara, Allah arye weik arepsiliba, anggun din libuka yamunce, delinamlum aik ara, langdipnamle. Din ara, kum kum danamsile. Allah arye tuba-tuba yamubuka arisiliba, pia weik unamsile. Tonda, anggun anggur tapu duk purubuka, pia weik makau pum tam delinamlum sukum ara, kum kum danamsile. Aning ara, pia aunamsile.

¹¹ Na mapu, Allah arye anggun kel bikna ap, winilen ap ati, weik imun ning arisiliba, anggun dam yangasilye talak ara, ‘Se, yata deiyok ati, nun dam yanmasil do?’ tenen, kum teniltonamlulume. Malye winipmunba, Allah Yahweh arye wenenamsil talak ara, anggunce, ‘Se, aning ara yata ati unmasil do? Aning ara, nun like,’ kum tenenamlulume.

¹² Anyapmasin yupu ara, talye ati kum nyapsine. Ara, Allah ati dib tenelulnye bira, Allah arye anye biti kanye delilirye, el winilen ati, kanye ikin ning arelule. Winipmanto ara, ninye sik mining delinyak mapu ati, ‘Malye winibicak’ tenen, moubuka wenelamak touk, Allah arye kanye delilul ninye ati, ‘Malye winibicak’ tenen, wenelule. Bico kum tenepsetu toura, kum wenepsutue.

¹³ Yatanye do nirya, ‘Weik kel bikna deiyok ning ap, ‘Aning ara telebe, aning ara malye’ tenen, moubuka tenena deiyok ning ap, doproptinye’ tenen, piribuka epdelirye, eibuka dololulnye bira, kanye deibuka unamle.

¹⁴ Anyapmasin yupu ara, talye ati kum nyapsine. Deiyok ara, pia weik kel bikna deiyok ning ap, ‘Aning ara telebe, aning ara malye’ tenen, ‘Moubuka tenena deiyok ning ap, doproptinye’ tenen, piribuka epdelirye, eibuka dololul ning ara, pia mambul weik ulule. Ara, dekna weik ning el si ara, perak ap, emas ap ara, teleb kat ning ulul bukni, aning ara mitik teleb uka. Bukni, pia weik kel kina deiyok ning ap, moubuka tenena deiyok ning ap ara, pia weik mambul ning ulule.

¹⁵ Urasin pia teleb keil, el si ara permata, nyanyake keil ara, yo bok weika arye deklamak bukni, aning ara mitik teleb uka. Bukni, pia weik kel bikna deiyok ning ap, moubuka tenena deiyok ning ap ara, pia weik mambul ning ulule. Ninye arye, ‘Aning-aning nirya ara pia weik mambule ati ara, doproptibye,’ tenebuka patalul ning nirya ara, mitik mambul uk ulule. Allah arye ninye ati, pia weik kel bikna deiyok ning ap, moubuka tenena deiyok ning ap, arisilye ning ara, pia weik mambul ulule.

¹⁶ Weik kel bikna deice arye pia diksukum ninguk, moubuka tenepmunya deice arye, ouku weik tonap arepsiliba, pia kam unamlume. Weik kel bikna deiyok ning moubuka talimunyopura, bon ayala-ayala ning nirya weika arye dopropmunce, bona utotoa talin nang unamlume. Tonda, yuk ninye nirya arye, anggunti, ‘E, anang ara, mambul nang unyake’ tenen, si erenamsiake.

¹⁷ Weik kel bikna deiyok ning dolonyak nang ara, kanye deibuka unamake. Tonda, aninye ara, yuk nang ati, yu upliba olana ap, yupu si dalana ap, malye kilana ap ara, kum unyake. Sik ap yuk ninye nirya ap, dukdongobuka neika telebuk unyake.

¹⁸ Weik kel bikna deiyok ning moubuka talipmunyopura, Allah arye ouku weik ton arepsiliba, kam pia unamlume. Teleb winin ninguk moubuka, mikip arye talinamak ninye ara, pin-pin asa arye kanye deibuka unamake.

Allah el pia weik kel deice arye, tukwak mutuku ap, tukwak mutuku noutamak ulul ning nirya ap, kwepdeibuk

¹⁹ Allah el pia weik kel deice arye, tukwak mutuku ap, tukwak mutuku noutamak ulul ning nirya ap, kwepdeibuk. Aning atonun, elce, ‘Aning telebe, aning ara malye’ tenen, moubuka tenelamuka deice arye, im deice ulul ning ap, im noutamak ulul ning nirya, kwepdeibuk.

²⁰ Allah el pia weik kel deice arye mek nirya kwepdeibukce, tuku dilikamukba abisik arye, mek kutukuka balule. Atonun, mek pito dobuka, im deice dua noutamak deibukba, mok purwu tukwak mutuku nirya saklirye teleb ulule.

Raja Salomo birye, el amu tam ulamik ninye ati, ‘Ilil una kumce, telebuk unamak’ tenen, nyabuk yupu

²¹ Na mapu, anyapmasa ati, pia kum teniltonamlulume. Weik kel bikna deiyok ning ap, ‘Aning ara telebe, aning ara malye’ tenen, moubuka tenena deiyok ning ap ara, pia kum luba kinamlulume. Kel kibuka diksukum un ninguk umunce, anggun asing koproba babye moubuka kalikuka dilamunce unamlume.

²² Winipmunyopura, Allah arye ouku weik tonap arepsiliba, pia kam unamlume. Winipmanto ara, ninye arye urasin teleb ning ngang karaklamak atonun, pia weik kel bikna deiyok ning moubuka talinamlulume.

²³ Winibuka umunyopura, anggun ban bisik nirya babye, dipkoprob teleb aryuk banamlulume. Anggun keil yan dum duksiliba, kote kum sakanamlume.

²⁴ Ati, anggun binuka mapnumunye talak ara, ton lukdamunce, ilil kum upnamsile. Tonda, alukunyan noutamak nirya ara, talye mangkau kanye bobuka, maplukuna uk unamlume.

²⁵ Tonda, anggun dam pia weik ikin ning ap, pirilen ning ap yalye talak ara, yuk ninye nirya sik ilil upliba, lukdakirye, kwarabuka bikbik abuka banamake. Bikbik abuka banamak bukni, sikda awininamle ning ati, ilil kum unamle. Aning atonun, anggun dam ara, talye karin arye pia weik mok piriripna mikip yanganamle talak ara, anggunce, ‘Kume, Allah arye malye winin ninye ati wenebuka onmalce, unmala,’ tenebuka ilil kum unamsile.

²⁶ “Ilil kum unamsile,” nyapmasina ara, urdem ati kum nyapsine. Ara, nun ni koproba Allah Yahweh arye, anggunti melibuka kalikinamsile. Winipmanto ara, mana wena wemicak kapang mana mangkau arye banmalyak, wena tapu pum bisik wekliba youlamle atonun, kum upnamsile. Allah arye anggunti, moubuka kalikinamsile ati, nyapsine.

²⁷ Imun kanye bobuka unyak ninye ati, eipmunce sikti, melipmanto ning aupmalyopura, ‘Melipnun do, kum do?’ tenena kum diparyuk, pi dobuka aninye ati melipnamlulume.

²⁸ Yata ninye do nirya, anggun dam yakirye moropsikcopura, anggunce aninye ati, “Arup ara daupmalye ani, ambusum nyapnamsin ati, kintinina uk upnamlume,” nyana meme. Sik morobikce ning awapsilyopura, amorobice sum uk, melibuka arena telebe.

²⁹ Anggun kwit capu, mining dam unyak nang ati, sik deiyok ton kum upmalibuk, ‘Anang ati malye kipdeipnuyabe,’ tenena meme. ‘Sik talye mangkau kanye bobuka unmace nang ati, ititip singipmunyak’ tenen, ayupu nyapsine. Ara, anggun dam unyak ninye arye, anggunti, ‘Anang ara nunti malye kum kilisinyak’ tenebikirye, ‘Anyaik nang ara, nun kwit capu koproba uka,’ tenesinyake ati nyapsine.

³⁰ Tonda anggun kwit capu nang arye, anggunti malye kum kipdeipmasikibuk, anggunce sikti, pia weik yupu arye nyabuka, kum derenamlulume.

³¹ Atonun, talima pum tam yu kanye bobuka, yu yupu nyanmalinye biti, ‘Se, el unmal touk, nun babye atonun unamabe’ tenen, tenena meme. Anggunce tonap tamubuka yu kilina kumce, batakuka namin kinamlulume. Tonda, aninye yu kanye bobuka unyak touk, anggun babye atonun, kum wininamlulume.

³² Aning ara, urdem ati kum nyapsine. Deiyok ara, anggun ni koproba Allah, el si Yahweh arye, sik malye winin ninguk talibuka unyak ninye nirya ati, ‘Na like,’ tenelule. Bukni, ninye ton diksukum winin ninguk, ulamak nang ara, Allah ap dukdongobuka unyakce, kam pia unamake. Winibuka unyak ninye ati, Allah arye tenelye ning laka nyalule.

³³ Aning atonun, malye unyak ninye, sik aik noutamak ara, Allah el si Yahweh arye wibuka malye kililule. Bukni, el nyalul touk, kanye talima lamapdongobuka unyak ninye ara, sik dam aulirye melibuka, sikti, pia teleb ulilule.

³⁴ Tonda, ninye ton kanye talima erebuka unyak ninye arye, Allah ati, ‘Elda mambul kume,’ tenebikirye, elti, nalinyak ninye ati, Allah Yahweh arye, ‘Aninye ara, na like ati ara, dadeptinge’ tenen, eibuka batakalongolule. Bukni, sik talima darapdongobuka nimalyap asa, amu tam unyak ninye ara, sik dam Allah ulirye melibuka, sikti, pia teleb kililule.

³⁵ Aning atonun, ninye ton pia weik kel bikna deiyok ning ap, teleb winin ning ap, upre bace nang ara, sik si telebuk upra banamle. Yuk ninye nirya arye, anang eibikirye, ‘Se, sikda mambul weik nang unyak’ tenen, si erenamake. Bukni, sik malye ninguk ukirye, malye kibuka kekena kumce unyak nang ara, pia malye ninguk talibuka unamake. Winibuka ulamikiba, yuk ninye eibikirye, ‘Anang ara, pia malye nang,’ tenebikirye, eibuka mangkau kinamake.