Amsal 26 - Eipomek

¹ Winipmanto weik dou man talak kiyamliba, dou malamlirye buppu weik ulamliba, mok ceplirye mul dumduma weik arye saklyopura, ninye nirya arye, ‘Se, aning ara yata ati upsil do? Aning ara kum winipmanto,’ tenebikirye, malye nyanyake. Aning atonun, ninye arye weik uku dinibikirye, ‘Wa wibuka, yala ning ap weik arye kounamabe’ tenen, kintinibuka koulamiki bukni, mok weik ceplirye, kouamice ning deice saklirye, keirye dibuka malye kiplopliba, ninye arye, ‘Se, aning ara, pia malye,’ tenebuka, malye nyanyake. Aning atonun, walwal una ap, ‘Deiyok ani,’ kum tenepmanto ap ululnye ati, yuk ninye nirya arye, kanye deibikirye anye bira erebikcopura, yuk ninye nirya arye, ‘Se, aning ara, yata deiyok ati, walwala ululenye biti ereipmak do?’ tenen, malye kanye bonyake.

² Maka bukmalya erepdoplirye, im deice lakuka balirye kum amulamle touk, ninye arye yuk diksukum unyak ninye ati, “Sikda malye weik unyake,” nyabuka lulundana yupu deice arye nyaplopting bukni, atilila yupu nyabikca babye, diksukum unyak ninye damak yalirye, sik nong deice kum upnamle. Anang ara, ikin ning kum dopropnamake. Deiyok kum upmala ati, yuk ninye nirya atilila yupu kekebikirye, ‘Kume, anang ara, telebuk unyak nang anya arye, ayupu ara, tilila yupu uk ulule’ tenen, moubuka kel kipnamakca.

³ Keledai basam u pum bisik tapu kerikdongobikirye, atapu talibuka lipdobikiba, balamle touk, pia walwal una ap, ‘Malye winin ninguk mangkau arye unamne,’ tenen, amalye winin ninguk talibuka unyak ninye ati ara, sik wenena ati, kama dopropmunce, sik balye tam kulanamlulume. Winipmunya deice arye, kel kipnamake. Kumopura, kume. Aning atonun, ninye arye kuda basam balye deice tam bukikirye, “Bilyame,” nyabuka, yo barala arye, akuda el balye deice kulalamak touk, sik malye winin ninguk pia talibikirye, walwal kanye bobuka, malye weik unyak nang ara, sik peterena ap, wenena ap ati, adiparyuk kama dopropmunce, sik balye deice kulabuka wenenamlulume.

⁴ Walwal tuba unyak ninye arye, yu upliba, yupu deice arye oldana uk unyak talak ara, sik pia walwal arye nyalamak ning, kekepmunce, sik nyanyak yupu atonun tamubuka kum nyanamlulume. Sik walwal kanye bobuka nyanyak nang arye, nyanyak yupu kekepmunce, sik nyanamak touk, walwal arye tamubuka nyapmunyopura, anggun babye awal-wal arye nyanyak ninye atonun unamlume. Ati, winina meme nyapsine.

⁵ Bukni, walwal tuba unyak ninye arye yu upliba, yupu deice arye oldana uk ukirye, anggunti malye yupu nyapsikcopura, talye kanye bobuka kum luba kipnamlume. Sik walwal arye nyanyak yupu kekepmunce, tuba tamubuka, weik kel yupu nyapmunce, sik nyanyak yupu ara, sekdongopnamlulume. Sik walwal deice arye nyanyak yupu kum sekdongopmunyopura, sik walwal arye nyanyak ninye ara, ‘E dipkoprop, nunda kel nang atonun unyabe,’ tenebikirye, malye yupu ap, walwal yupu ap, tuba-tuba nyanamsiake. Ati ara, walwal arye nyanyak ninye ati, ‘Yo, dauplye, sikce dayanmanyake’ tenen, kum luba kipnamlume. Weik kel yupu nyanamluma deice arye, sik walwal arye nyanyak yupu ati, sekeldongonamlume. Winipmunyopura, tunim anamake.

⁶ Walwal tuba ululnye biti, ‘Anye birye na mambul yupu dobuka, yuk nang ati laka nyalbinamnile,’ tenepmunce, ‘Ayupu laka nyalbinamle’ tenen, walwal kanye bobuka ululnye anyuk wibuka deipmunba, anggun mambul yupu bobuka laka nyapra balyopura, aminyan talak ikin ning weik, sik damak yanganamle. Winipmanto ara, anggunce anggun bidamnye yan ya sekdamunba, ikin weik ulamsil touk, unamsile. Tonda, walwal nang arye, ninye olamle yu mek dipmakiba, adiparyuk uk weik dinmalya ani, dibilamak touk, anggunce, walwal unyak ninye ati, “Na mambul yupu bobuka laka nyalbilyame,” nyapmunyopura, aminyan talak ikin weik unamsile. Ati, ‘Walwal uk unyak ninye arye melinamsiyake,’ tenena kume.

⁷ Winipmanto ara, yan malye ulamlanye, el yan talye dawinipmali bukni, yanibuka kum balamle touk, sik walwal kanye bobuka unyak ninye arye, weik kel yupu ap, domon yupu ap bobuka, laka nyapnin banmace talak ara, ayupu teleb ubuka nyapmanto kum unyake. Ara, talye ati kume. Sik walwal uk unyak ninye arye, ‘Ayupu ara deiyok ara ani’ tenen, kum kel kinyaka atia. Talye nyaltakana uk unyaka anya arye, sikce, ‘Weik kel yupu nyapnuyabe,’ tenenyak bukni, yan malinye birye teleb ubuka kum balamle atonun, walwal unyak ninye arye, weik kel bikna yupu dobuka, laka kum nyapmanto unyake.

⁸ Moubuka kel kin ning kum kel bikmaliryuk, yuk ninye arye, pia walwalnye biti, “Anye bira weik kel bikuknye,” nyabuka elti, kibuka erebikcopura, ara pia walwal arye wininyake. Winibicopura, aminyan talak ikin ning weik, sik damak yanamle. Winipmanto, keil duk dobuka, kartapel deice koupdongobikirye, pibuka dobikibuk, akeil akunum koupdongopmanyaka anya arye, kum balamle touk, unyake. Ati, walwal ninye erepdeipmunce, ‘Nun deiyok nang unamsiake. Tonda, nun mambul pil donamsiyak’ tenen, anang ati kibuka kum kanye delinamlulume. Winipmunyopura, dipkoprob aminyan talak, ikin ning weik anggun damak yanganamsile.

⁹ Weik kel yupu aupmatu babye, pia walwal kanye bobuka malye ninguk talibuka ululnye birye, ayupu ara teleb ubuka laka nyabuka, kum petereptue. Dipkoprop ara, malye yupu uk nyapnamle. Aning atonun, winipmanto ara, ninye kanye wangalamak yu mek dipmace nang arye, tace ning bobikirye, yuk ninye damak lukunmakirye, malye ulamak touk, pia walwalnye birye, weik kel yupu bobuka, laka nyalbitu bukni, teleb ubuka kum petereptue. Anye birye, malye yupu uk nyanamle.

¹⁰ Yata pil dona deiyoknye do nirya, ‘Ninye ton wibuka deipniba, na mambul pil donamak’ tenen, sik winilamice ning, kum kel bikamikce nang bukni, talye dabalamice nang ap, walwal kanye bobuka, talye-talye uk ulamice nang ap ati, wibuka doproplirye, anang ati pil areplyopura, pia malye ulule. Adeice arye ninye weik ititildanyake. Winipmanto ara, walwalnye birye, ‘Yuk ninye ton outam unmak do, kum do?’ tenena kum aryuk, moubuka dildena kum diparyuk, el mal doplyopura, ninye unmakca damak poulbilya deice arye, ninye pia weik olamle. Aning atonun, pil dona deiyok nang arye walwal ninye ap, kum kel bikamik ninye ap wibuka doprobikirye, ‘Nun pil donamak’ tenen, mambul pil arebica babye, pia walwal arye donyake. Winibicopura, ninye weik ititildanyake.

¹¹ Winipmanto ara, kam dukna dukloplirye, tuba tamubuka asukumuk binuka dilule. Aning atonun walwal unyak ninye arye, malye wininyak ning ara, kum batakanyake. Tuba-tuba aninguk, tuba tamubuka wininyake. Ara, malye winin ninguk talibuka unyak ninye ara, malye ubikiba, kel nang arye wenenmakirye, lipsisikuka petereptinga babye, aning moubuka tenena kumce, mince malye winilamikce touk, tuba tonap malyeuk upnin banyake. Sik talima malyeuk upra banyak ninye ara, aminyan talak amalye ninguk, talibuka unyak ninye ara, malye un ning, tia talak atibuk batakmaca ani, tuba tamubuka, amalye ninguk talibikirye, malye weik upnin banamake.

¹² Ninye arye wininyak ning moubuka dinamlulume. Yata nang do nirya, sik babye sik bidamang atibuk, ‘Nunda weik kel nang unyabe,’ tenelanyak ninye ara, dipkoprob walwal uk unyake. Dipkoprop aning-aning nirya kum kel bikamik bukni, tuba walwal kanye bobuka unyak ninye arye, “Se, nunti peterepsululume,” nyabuka moropsicopura, nunce moubuka, lipsisikuka peterebibi buk, anang ara kel biktinge. Bukni, yuk ninye ara, sikce sik bidamang atibuk, ‘Nunda weik kel nang akunum unyabe,’ tenelanyak ninye ara, lipsisikuka kum peterepmanto unyake. Kel nang arye nyanyak yupu ara, moubuka kum kekenyake. Sikda maknya kintinildan nang unyak ninye anya arye, sik bidamang aryuk tenen ninguk tenenyake. Yuk nang arye nyanyak yupu ara, pia kum kekenyake.

¹³ ‘Ikin pil donamne ning ara, na like, kum donamne,’ tenebuka ululnye bira, ‘Yuk nang arye, pil dolbilyame, nyapnicak’ tenen, nyalule. “Kume, bai tam bana na like. Aik pum tam uk unamne. Deiyok ara, bai tam banyopura, bai tam ulamle weik yu kus, el si ara, singa arye yanuka opnilyak ati, bai tam kum binune. Tonda, ninye aik dobupa noutamak banyap bisik ara, weik yu singa kus arye, yanuka opnilyak ati, bai tam binuka pil kum donamne,” nyalule. Dipkoprop deiyok kum upmale bukni, talye nyaltakalule. Deiyok ara, anye birye, pil dona lik ati winilule.

¹⁴ ‘Ikin pil kum donamne, na like’ tenen, aik pum tam uk ulirye, talye-talye uk balinye bira, winilule. Winipmanto ara, aik bublan tirikne ning, ensel arye domikca pakicopura, dangultolamle tonun, pil dona ati lik ululnye bira, el babye amsuna deice uk maplirye, dangultolule. Bukroplirye, pil kum dolbalule.

¹⁵ ‘Ikin pil kum donamne, na like’ tenen, aik pum tam uk ululnye bira, dina din talak ara, anye bira el din ning talibuka bukmaliryuk, el taruk dobuka, ‘Dipnyak’ tenen, el taruk dobuka, el si bam bol dam kum dongolule. Anye bira, lik-lik asa ululnye atia.

¹⁶ ‘Ikin pil kum donamabe, nun like’ tenen, aik pum tam talye daunyak ninye ara, sik babye, sik bidamang atibuk, tenelanyak ning ara, ani. ‘Nunda, weik kel nang unyabe,’ teneldanyake. Winipmanto ara, dipkoprob weik kel nang ara, tekbarye aulamtingce, weik kel yupu nyaptinge. Anang arye, weik mambul yupu ara, teleb ubuka laka nyaptinge bukni, sikce sik bidamnye ati, ‘Nunda weik kel nang unyabe’ tenen, maknya kum kintinildanyake. Bukni, pil nirya ati, ‘Nun like,’ tenenyak ninye arye, ‘Kume, sik atekbarye nang ara, walwal aryuk nyanyak bukni, nun tonok ara, weik kel deice arye, teleb yupu uk nyanyabe,’ teneldanyake. Ayupu nyanyak ninye ara, dipkoprob walwal uk unyak bukni, sik bidamang kanye talima erepdakirye, walwal deice arye, ayupu nyanyake.

¹⁷ Ninye ton yuk nang weik yupu nyabuka, oldanmakca noutamak binuka, “Anggunda yata deiyok ati nyaldanmalumce, oldanmalum do? Anggun bataklulume,” nyabuka, tabakuka binuka yupu nyanyak nang ara, pia walwal arye unyake. Ara, opdanmanto unyaka ati nyapne. Winipmanto ara, pia walwalnye birye, talye dabanmalirye, el kum talamlye kam bukni, talye daunmalye kam, el amul mikip arye talibuka lilolirye, akam arye si tolamle atonun, wininyake. Ati, deiyok kum bikmakiryuk, talye banmace talak ara, yuk nang arye yupu deice waldakirye, oldace talak ara, anang dam binuka, yupu tabakuka kum nyanamlulume. Yupu ton pia kum nyanamlulume.

^18-19 Ninye ton el ka biti, tilila yupu nyaplopmalye bukni, yuk talak ara, “Amio na talye nyaplopkise,” nyaltakalule. Atonun, yupu nyalulnye bira, motona taleamliba, sirim taliplirye, ‘Ninye opnun do?’ tenen, tenilena kumce, mal talye-talye dolamak touk ulule. Anang arye moubuka kum tenipdekirye, yuk nang nirya bulubuka wekmakca noutamak donyake. Aning atonun, ninye ton uku dinmalyeuku sirik dobuka, el kwit asik deice doplirye, ‘Aning ara na walwale,’ nyabuka, el ka biti dungnuldongolule. Anye bira, moubuka tenilena kum anya arye, ‘Anye bira na kwit koproba ati, kanye imun kipdeipniba, ikin kanye bobuka unamle do?’ pia kum tenelule.

²⁰ Ara, ninye arye yo dobuka, uku dapmakiba, winiryuk dibuka sirya dakdopliba, yo tabakuka kum dabicopura, uku tangalamle touk, ninye arye malye yupu ap, lulundana yupu ap, batakikirye, malye yupu tonap kum nyaldacopura, ninye arye yupu deice arye pakalanyake ning ara, kum upliba, talye yupu tunim abuka unamake. Bukni, tuba-tuba malye yupu nyabikcopura, tuba-tuba nyalakirye, oldana uk unamake.

²¹ Aning atonun winipmanto ara, uku duk ongonmalye ning dobuka yuk yo damak deipmunba, adinmalya uku arye, yuk yo ton minopce sekroplirye dilamle tonun, weik yupu deice arye, “Anda yata ati do?” nyabuka, yu yupu deice arye wenena yupu ap, waldana yupu ap nyalirye, yuk nang ati, derelulnye bira, el malye yupu nyalya deice arye, minopce yu upliba ninye weik tonap yupu deice arye waldakirye, oldanyake.

²² Talye tilila yupu ap, lulundana yupu ap, “E, aning ara diba, na asing arye elilamse ning ara ani-ani,” nyabuka nukunyak yupu ara, ninye nirya teleb ubuka kekebikirye kanye delinyake. Winipmanto ara, din ning pia telebto ning dipkwetebikiba, sik mun pum tam biliba, kanye delilamak tonun, ninye arye talye-talye nyanyak yupu, yuk nang kekena ak nyabikcopura, kekebikirye, sik talima noutamak malbalule. Ninye arye talye nyaltakalamak yupu, yuk nang ton kekebiceura, kanye delinyake. Aning ara, malyeuk unyake.

²³ Winipmanto ara, kira tuku doprobikirye, talye lulin makau memebikirye, ‘Urasin teleb upnamle’ tenen, urasin teleb ning, perak dobuka, akera tuku arye kintinibuka deipmace ning deice, palibuka deibikiba, urasin pia teleb ulule. Aning atonun, talima pia malyeuk unyak ninye ara, sik si bam bol deice arye teleb yupu nyakiba, ayupu kekebice ninye arye, ‘E, sikda teleb nang unyak,’ tenenyak bukni, dipkoprob aninye sik talima noutamak ara, tuba pia malyeuk ulule.

²⁴ Ninye ati yu tenebuka wilililulnye, el nyalye yupu ara, ‘Kekena pia telebe,’ nyapkutu babye, aning ara dib kum tenenamlume. Yu weik ululnye, el talima noutamak ara, tilila ninguk langdibukce, tuba aulula anya arye, teleb yupu nyaptu babye, dib tenena kume.

²⁵ Ati el anye birye, ‘Teleb yupu nyapnyopura, yuk nang kekepnicopura, sikce nati, ‘E, elda telebnye ulule,’ tenenamniake,’ tenelule. Bukni, sik talima noutamak, yu ning tuba awaplibuk, sikce nyanyak yupu ara, ‘Dib nyanmaka,’ tenebuka, kum unamlume. Ato ninye ara, yuk nang ati, tuba, ‘Nun like,’ tenena uk unyake.

²⁶ Yu tenebuka wililin ning, sik talima noutamak awamli bukni, tenepce teleb yupu ap, teleb una ap uptinga babye, aminyan talak sik talima noutamak yu ning ap, ninye ati, ‘Like’ tenena ap, tuba aubuka deice arye laka upliba, yuk ninye nirya arye, eibikirye kel kipnamake. Pia talima malyeuk usilye ning ara, kum duknupmanto.

²⁷ Tonda yata nang do nirya, yuk ninye ati, ‘Aninye ara na lik ati ara, tuku pum bisik saktinge,’ tenebikirye, tuku palibuka bisik botolinyak bukni, aminyan talak ara, sikce palibuka deibik tuku pum sakuka opnamle. Aning atonun, yata nang do nirya, ‘Yuk nang ati opnamak’ tenen, keil lukuka kurukuka dolkwetenyak nang ara, aminyan talak akeil aryuk, tuba tamubuka sik nong deice yanuka opnamle.

²⁸ Ninye ton el sitang deice arye, el kayapu nang ati, tilila yupu nyaltakalulnye bira, dipkoprob el kayapu nang ati, ‘Sikda na like,’ tenelirye, sikti, malye ulilule. Aning atonun, sik talima noutamak arye, ‘Anang ara nun like,’ tenenyak bukni, tenebuka yupu deice arye, ‘Kume, anggunda telebe, nun ap neika ulamtibye. Anggun ti kanye deibabe,’ nyabuka, talye yupu deice arye nyaltakanyak ning ara, dipkoprob anyanyak yupu deice arye, sik kayapu nang ati malye ulinyake.