Amsal 2 - Eipomek

Raja Salomo birye, el amu tam ninye ati, ‘Kel bikna deiyok ning, moubuka kel biknamake’ tenen, nyabuk yupu

¹ Se, na mapu anggunda, narye nyanamsin yupu ara, anggun moubuka dolonamlulume. Winibuka dopropmunce, anggun kanye talima pum tam ara, ‘Aning ara wininamlulume, aning ara kum wininamlulume,’ nyabuka nyalinamsin yupu ara, pia moubuka kekenamlulume.

² Ati ara, anggun amul deice arye moubuka kekepmunce, ‘Kel bikna deiyok ning kel bikinamap’ tenen, pia piribuka kel bikinamlulume. Tonda, anggun kanye mikip kipmunce, ‘Teleb una ara ani, malye una ani’ tenen, ‘Moubuka kel kipnamap’ tenen, dib tenebuka, kel bikinamlulume.

³ Na amu tam ululum ninye nirya ara, anggunce, ‘Se, pia weik kel bikna ning kel kiptibye’ tenen, weika arye moropmunyopura, Allah arye aning arenamsile. Aning atouk, ‘Teleb una ara ani, malye una ara ani’ tenen, ‘Moubuka kel bikinamap’ tenen, weika arye moropmunyopura, Allah arye aning arenamsile.

⁴ Winipmanto ara, ninye arye, ‘Aning ara pia weik mambule,’ tenelamikce, duknubuka delilamik ning, ‘Dopropnune,’ tenen, mambul kirikuka, elamak touk, ubuka enamlulume. Ara, anggunce, pia weik kel bikna deiyok ning ap, moubuka tenena deiyok ning ap ati, enamlum ning ara, dekna weik kat ning, emas ap, perak ap ati, ‘Doproptinye’ tenen, elamak touk ubuka enamlume.

⁵ Winibuka elamunya ani, eipmunyopura, Allah Yahweh el winilul ning ati, moubuka bikmunce, anggun ilil unamsile. Tonda, Allah el pia weik kel bikna deiyok ning talibuka ulul touk, anggun babye, pia weik kel bikna deiyok ninguk, talibuka unamlume.

⁶ Anyapmasina ara, talye ati kume. Deiyok ara, pia weik kel bikna deiyok ning ara, Allah Yahweh elcuk aresulule. Winibuka arisilye ning ara, ‘Teleb una ani, malye winina ani’ tenen, moubuka kel bikna deiyok ning aresulule. Elce kel bikna deiyok ning ap, moubuka tenena deiyok ning ap, ninye nong deice arisiliba, dib tenebuka kel kinyabe.

⁷ Winibuka kel kinyaka ati, sik ninye kanye talima diksukum unyakce, teleb winin ninguk unyak ninye ati, pia weik kel bikna deiyok ning aresulule. Tonda, kanye talima diksukum unyak ninye ati, Allah arye, ‘Na tenena ninye malye kibuka deipnicak’ tenen, melibuka kalikisulule.

⁸ Tonda, sik diksukum telebuk unyak ninye ati, Allah Yahweh arye melilule. Winibuka melilya ati, sik anang arye el tibuk, asum-asum nirya tenekirye, kanye deibuka unyake. Winibuka unyak ninye ati ara, elcuk melibuka kalikilule.

⁹ Ati ara, anggunce, Allah ati dib tenepmunyopura, anggunda ninye ati bico tenebuka melin ning ara, kel bikinamlume. Tonda, ninye ati, yupu lipsisikuka bokolinalum ning ara, tilila yupu nyana kum aryuk, dipkoprob yupu uk nyanamlume. Tonda, ‘Teleb una ara, ani’ tenen, moubuka tenepmunce, kel biknamlulume.

¹⁰ Aning winibuka kel biknamlume. Anggun winibuka kel bikmunyopura, dib tenebuka kel bikna deiyok ning, sik kanye talima pum tam wekuka langdipsiliba, kanye lamapdongobuka arye unamlume.

¹¹ Anggun kel bikmunye deice arye, ‘Teleb ning ani, malye ning ani’ tenen, moubuka tenena deiyok ning anggun kanye talima pum tam akunum usilyopura, anggunti melibuka kalikinamsile. Tonda, anggun moubuka tenemunya deice arye, anggunce anggun bidamnye ati, kalikelanamlulume.

¹² Aning winipmunyopura, anggun adiparyuk malye bisik balamak ning batakuka, diksukum bisik ban tam uk kinamlulume. Ninye sik si bam bol deice arye, tilila yupu nyanyak nang ara, sik ap neika una pia meme. Anggun leibuka yuk sukumuk unamlume.

¹³ Diksukum bisikuk bamunyopura, malye unyak ninye ap neika kum unamlume. Ara, sik anang ara, teleb un ning ati, ‘Nun like’ tenen, nang ara, wininyake. Sikda, ‘Diksukum bisik ara, nun like’ tenen, kuna bisikuk patalule. Apatalul nang ara, sik kanye talima noutam ara, malye winin ninguk langdibukba unyake.

¹⁴ Wininyak nang ara, sik talibuka unyak ning ati, ‘Nunda teleb ning talibuka unyaba’ tenen, aning siuk erebuka unyake. Aning ara, ‘Nun wininyap ning ara, pia malye ninguk unyabe,’ tenenyak bukni, ila tuba aninguk tuba patalibuk, kanye deibikirye, tuba malyeuk unyake.

¹⁵ Winipmanto ara, bai tam noutamak, ninye arye kwalin bisik balamak touk, anang arye yuk nang ati, tilila yupu nyabuka delinyak deice arye, malye weik ulinyake. Ati ara, anggunce, ‘Malye ning ani, teleb ani,’ tenemunce, diksukum bisikuk bamunyopura, sik anang malye wininyak touk, kum wininamlulume.

¹⁶ Tonda, anggunce, ‘Malye ning ani, teleb ning ani,’ tenemunce, diksukum bisikuk bamunyopura, ninye arye talye yoltalamak kilapu arye, yukulon yupu deice arye, teleb yupu nyapsikcopura, pia kum kekenamlulume. Sik akilapu arye, talima lilona yupu nyapsikce babye, sik yupu kum kekenamlulume.

¹⁷ Akilapu nirya ara, sik ninye akunum domik bukni, sik akilapu arye, ‘Nunda, ninye akunum domupu,’ kum tenenyakce, sik minop talak kam ulamik kanye uk bopmakirye, Allah arye nyapdeiamuk yupu ara, akunum yaniltanyake. Tonda, akilapu arye, ‘Nun ninye akunum erepsik nang ap, neika pia unamabe,’ nyalamik ning ara, batakalongonyake.

¹⁸ ‘Akilapu ap neika kum unamlume,’ nyapmasina deiyok ara, ani. Ara, anggunda akilapu sik aik dam bimunyopura, anggunda kam un tam kum unamlulume. Winipmunce, otam binamlumak babye, ninye dibikirye wekelbalamak kunuklamle bisikuk binamlume.

¹⁹ Tonda, ninye aning-aning nirya talye yoltalamak kilapu dam binamak ninye nirya ara, pia tonok babye, ila tamubuka kum yanamake. Kam una deiyok bisik ara, pia kum binamake. Kuna bisikuk banyake.

²⁰ Winipnamaka ati, na mapu anggunda, diksukum nyanyak yupu uk, kekebuka dobolbanamlulume. Diksukum un bisikuk bamunce, anggunda ateleb yupu uk kekebuka, dobolbamunyopura, anggun kam una ara, Allah el kam ulul touk, anggun babye pia kam unamlume. Tonda, Allah arye, ‘Wininamake,’ tenesilye touk, diksukum unyak ninye banyak bisikuk banamlulume.

²¹ Anyapmasina deiyok ara ani. Ara, Allah arye nyapsuk touk, pil dobuka unyak ninye ap, sik kanye talima teleb kibuka unyak ninye ap, Allah arye areamsuk mutuku noutamakuk pia unamake. Malye una kumce, pia diksukum unyak ninye ara, amutuku noutamak, pia tuba aunamake.

²² Bukni, ninye yu unyak nang ap, malye unyak nang ap, aninye nirya ara, ninye arye tukwak mutuku wa wiamica, dola kwelamak touk, Allah arye aninye ati dobuka, el min arye kintinip deibuk mutuku noutamak dopkwetepnamle.