Amsal 17 - Eipomek

Ninye tukwak mutuku unyak ninye nirya, teleb wininyak nang babye, malye wininyak nang babye, sik kanye talima noutamak ulul ning ara, Allah Yahweh arye teneplirye, lakakuk deipnamle.

¹ Teleb ning ara, anggun ap, anggun mapu silip nirya ara, yuk nang arye dinmaca ani, bouplya ati, batakanyak din ning, tarikna upmalye din ninguk dipmunce, kanye deibuka unamlume. Aning ara teleb bukni, malye ning ara nyapnusine. Ara, yuk nang ap, sik ap neika unyak nang nirya arye, pia teleb din ning ayala-yala nirya dinyak bukni, sik nirya arye derelana ap, walana ap unyake. Winibuka ulamice ning ara, weik malyeuk ulule.

² Ninye ton, weik kel deice arye, el deiyoknye amu tam, talye pil melibuka dolulnye ulul bukni, aminyan talak ara, elcuk el deiyoknye taleamuk ning nirya talinamle. Wininamle ara, talye ati kume. Deiyok ara, anyaik deiyoknye birye deiamuk mapu nirya ara, pia malyeuk ulamika ati, sik ni koprop arye, ‘Na talilamse ning dobuka, na mapu malye unyak nang ati, kum arenamne,’ teneplirye ati, el pil melinanye ak arepnamle. Tonda anyaik deiyoknye, el mapu koprop arye, tuba-tuba malyeuk upnin bacopura, sik ni koproba uk alye weik unamle. Aning ati, sik ni koprop anyaik noutamak talilye bona ning nirya ara, noutamak arye bokuka, el mapu koproba ap, el melinanye ap, ‘Arepnamne,’ tenelula ati, el mapu sirika arye, tuba malye-malye ubicopura, sik ni koprop arye sikti, aning bokuka, mitik anunuk arepnamle. El mapu koprop arye, aning weik arye kum dopdopnamake.

³ Ninye arye talye tuku ap, keil ap palibuka doprobikirye, ‘Aning nirya noutamak ara, emas ap, perak ap, tabakuka aupmal do?’ tenen, weik uku dinmalyak dongobikiba, uku arye dinmalya ani, malye ning palilamlya ning nirya diplirye, kat ning pia teleb ning batakliba, emas ap, perak ap, nong uk lakak upliba dolonyake. Winilamaka deice, ninye arye emas ap, perak ap ara, uku deice arye, winilinyake. Bukni, ninye tukwak mutuku unyak ninye nirya, sik kanye talima noutamak ulul ning ara, Allah Yahweh arye asipdenamle. ‘Teleb ning ara ani, malye ning ara ani,’ teneplirye lakak uk deipnamsile.

⁴ Ninye ton, ‘Malye winin ninguk tuba-tuba wininamne,’ tenebuka ululnye bira, yuk nang arye, malye-malye yupu uk nyanyak talak ara, elce kanye deibuka, anyapmace yupu uk kekelule. Malye yupu uk kekelirye, malye winin ninguk ulule. Aning atonun, tilila yupu nyapra banyak nang nirya arye, yuk ninye ati, malye kilina yupu uk, nyanmakiba kekenyake. Tonda, deiyok ton kum upmalibuk, lulundana yupu nyakiba kanye deibuka kekenyake. Ayupu kekebikirye, malye ninguk unyaka deice arye, yuk nang ati malye ulinyake.

⁵ Yata ninye do nirya, talye bona utotoa talina kum ninye ati, nalibuka akutunyak ninye ara, bona utoto talina kum ninye ati nalinyake. Bukni, winilamice deice arye, bona utoto talina kum ninye kwepdeiamuka deiyoknye Allah ati, malye nyalinyake. Aning atonun, yata ninye do nirya, bona utotoa talina kum ninye ap, yuk mutuku daunyak ninye nirya ap ati, kanye imun ning, sik damak yalyopura, ‘Aninye ara, ikin kanye bonyaka ara, merekuka ulule,’ tenebikirye, kanye delinyak nang ara, Allah arye awininyak ninye ati, ‘Dauplye,’ pia kum tenelule. Allah arye aninye sik wenena ati, dipkoprob wenebuka opnamle.

⁶ Ninye ton akunum wisi deiplyopura, elce deiamliba, dadeipdanin, banamak ninye nirya, pia weik upra banamakopura, el mapu weik kipnin baca ati, kanye delilule. Winipmanto ara, ninye deiyoknye Raja arye, kweirya ning, sik kisok deice kalulamak tonun, wisi nang sik mapu weik ucopura, atonun ulule. Anang ara, kanye delinyake. Tonda sal ap, kilapu ap deibikiba, dadeipdanin banamak mapu nirya arye, sik ni yapu ap, sik nin yapu ap ati, kanye delinamake.

⁷ Pia walwal kanye bobuka unyak nang arye, pia teleb yupu kum nyaptinge bukni, teleb yupu nyapdekiba, yuk ninye kekebiceura, “Kume, anang ara, pia walwal aryuk, malye winin ninguk unyak nang anya arye, sikce nyapmasiyak yupu pia kum kekenamabe,” nyabuka, anang ati batakanamake. Walwal ninye arye, teleb nyana yupu peterepmace ning ara, malye ulule. Bukni, weik malye weik ning ara, nyapnusine. Ara, ninye deiyok nang, sik Raja weik nang do, sik amu tam yuk ninye deiyok nang do, sik amu tam daunyak ninye nirya ati, tilila yupu uk nyabikcopura, ara pia weik arye malye ulule.

⁸ Ninye arye weik deiyok nang ati, ‘Ara, nunce anang ati yo bok weik arepipyopura, nun patasiliba, morolbinamap ning ara, dipkoprob arenamsiyak’ tenen, aninye deiyok nang ati, yo bok dungnubuka arebikirye, morolbanyak talak ara, sik ninye deiyok nang kanye deibikirye, anang arye moronyak yupu kekenyake. Aning-aning nirya morolbinulinye birye, yo bok ap, yuk teleb ning ap kintinipmalye arye, ninye deiyok nang ati, dungnubuka arelbinamalye talak nirya ara, anang arye el morolye yupu kekebikirye, elti, arinyake. Elce morolul ning nirya nong ulule. Wininyak bukni, aning nirya ara, malyeuk ulule nyapsine.

⁹ Yatanye do nirya, yuk ninye arye elti, malye kipdeipmace ning nirya ati, “Se, na kayapu, talye arye winipmanuluma anya arye, dauplye. Yuk nang kekena ak binuka sikti, malye yupu nyapnirye, anggunti malye kum upra deipnamsile,” nyalulnye bira, weik arye akunum kel bikamuk. Yuk nang arye, elti, malye unyak ning luba kilirye, yupu tonap tabakuka kum nyaplyopura, el ap, sik anang ap, teleb ubuka neika unamake. Sik nirya arye bico tenebuka, kanye delilanamake. Bukni, yatanye do nirya, yuk nang arye elti, malye kipdeipmace ning ati, “Winibuka malye updeipmaniake,” nyabuka, sik nong deice malye yupu weik arye, nyapra balamliba, ayupu weik uplyopura, adeice arye yuk nang nirya kekebuka, kel kibicopura, el kayapu nang koprop ati, yupu bokipliba, kanye talima wilipdakirye, ‘Nun like,’ tenebuka, memepropnamake.

¹⁰ Yata ninye do nirya, malye ubikiba, weik kel bikamik ninye arye sikti, “Anggun malye upmalum ning ara, ani, ani,” nyabuka, tonok talak deice aryuk wenebicopura, adiparyuk anang ara, ‘Se, aning ara, na dipkoprob winipmanubuk nyapmaniake’ tenen, moubuka kel bikinyake. Bukni, malye winin ninguk pia tuba-tuba upnin banamlanye bira, pia walwal kanye bobuka ulula anya arye, malye upliba, ninye deiyok nang arye, kama doprobikirye, yupa weik seratus kali deice arye, el balye deice kulabuka optinga babye, adeice arye kum kel kipnamle. Ara, talye ati kume. Anye birye, ‘Aobuka wenepmaniyaka ati, moubuka kum kekepnamne,’ kum tenelule. El kanye malye ning batakuka, teleb ning kum punupnamle anya arye, pia tuba malyeuk upnin banamle.

¹¹ Malye winin ninguk talibuka, tuba-tuba malyeuk upra banyak nang arye, yu upliba nyanyake. “Nun yupu nyana deiyok nang arye nyanyak yupu nirya ara, pia kum kekenamne,” nyanyake. Tonda, “Nun mutuku talisinyaka ninye deiyok nang obibirye, nuncuk amutuku nirya talinamabe,” nyanyake. Winibuka malyeuk unyak nang ara, sik yupu nyana deiyok nang arye, sik yin talin nang ati, “Anang tomopmunce, tapu koubuka nun dam boyalulume,” nyabikiba, anye bira bobuka sik damak boyakiba, pia yu kanye bobuka wenenamake.

¹² Teleb ning ara, bai tam noutamak, yu pia weik ulamle kam, el si beruang, kil beruang arye el mi tunim apliba, ‘Aning deiyok ati tunim apmale,’ teneplirye, pia yu weik upliba, anang ati olyanamale. Aning ara ikin bukni, weik ikin usilye ning ara nyapnusine. Bura tam beruang kil arye, ‘Ninye opnun’ tenen, olyangalamle touk, malye ubuka ulinye, malye upliba eipmunyopura, elti, “Amio, anda dipkoprob malye upmalame. Aning ara bataklyame,” nyabuka wenepmunyopura, anye birye anggunti, yu weik upliba, opnamsile. Aning ara, weik ikin upnamsile.

¹³ Yata ninye do nirya, yuk ninye arye sikti, pia teleb ubuka melilamiki bukni, aminyan talak ara, sik melilamice ninye ati, tamubuka malye kipdeibicopura, pia malyeuk unyake. Amalye un ning winibicopura, dipkoprob aminyan talak noutamak nirya ara, sik aik noutamak aniryuk ikin ning weik, tuba-tuba panapliba, malye kanye bobuka, ikin pia weik unamake. Kanye imun ning, sik damak tuba-tuba yanganamle.

¹⁴ Winipmanto ara, mek bisik wakibikirye, kukdeibikiba, mek mikip arye balamle atonun, ninye arye kabul deiyok koubuka, derelana unamak talak ara, adiparyuk, adeiyok ning ati, “Dauplye,” nyabuka batakaldongonamlulume. Opdanmanto unyak ninye ati, lyelina telebe. Kumopura, ninye arye derepdakirye, ayu yupu uk tuba nyapdanin, bakibuk weik upnin balyopura, sikce nyaldanamal ning ap, oldanamak ning ap ara, min kum kum daneipnamsile. Ati, yu upliba, deiyok koubice talak aryuk, lyelina telebe. Yu yupu tuba nyaldana kume. “Dauplye,” nyabuka, batakaldongonamlulume.

¹⁵ Ninye ton, dipkoprob malye un ning ubikiba, amutuku yupu bokolina deiyok nang arye, ninye yupu lipsisikuka bokolin talak noutamak arye, “Kume, anang ara malye kum upmaka anya arye, lopdongoplulume,” nyabuka lopdongobicobicopura, Allah Yahweh arye, ‘Aning ara na pia like,’ tenelula anya arye, sik ninye deiyok nang ati, weik arye wenepnamle. Aning atonun, yuk ninye ara, dipkoprob teleb ubuka ulamica ani, amutuku yupu bokolina deiyok nang arye, ninye yupu lipsisikuka bokolin talak noutamak arye, “Kume, anang ara dipkoprob malye upmaka anya arye, wenebuka oploplulume,” nyabuka wenebicopura, Allah Yahweh arye, ‘Aning ara na pia like,’ tenelula anya arye, sik ninye deiyok nang ati, weik arye wenepnamle.

¹⁶ Ninye ton, malye winin ninguk upnin balulnye birye, “Kume, na yo bok weik arepnumunya deice arye, weik sekolah binuka kel kipnirye, weik kelnye unamne,” nyabuka nyaptu babye, el yupu kekena pia kume. Anye bira, el kanye talima noutamak ara, ‘Weik kel bikna deiyok ning, pia patanulule’ tenen, kum ululnye anya arye, ayupu ara talye nyaltakalule. Ati, anggunce, ‘Sekolah wekenamle’ tenen, atonye biti, yo bok arepmunyopura, talyeuk ititilalulume. Aning ara, dipkoprob nong ton pia kum upnamle.

¹⁷ Ninye tonoknye ton, dipkoprob el ka biti, ‘Na kwit,’ tenebuka, kanye deipdanuka ulamdice nang ara, sik ikin uplye talak ap, yuk nang arye, ikin ning deibice talak nirya ara, “Kum batakdananame,” nyabuka ulamdake. Ati ikin uplyopura, sik anang bitinye ara, dipkoprob melilana uk ulamdake. Aning atonun, nun kwit capu koprop ap, nun du yapu koprop ap ara, tonok mun pum tam arye, deiamsik nang unyaka anya arye, yata talak do nirya ara, melilana uk unyake.

¹⁸ Ninye ton, sik kanye moubuka kum tenipdenmakiryuk, sik kayapu nang bona ati, “Nuncuk anang sik bona talye dopropnuyabe. Kum arepmanto ubicopura, nuncuk tamubuka arenamsiyabe,” nyanyak nang ara, pia dipkoprob walwal arye nyanyake. Aning atonun, yata nang do nirya sik damak unyak ninye ati, “Nuncuk, anang sik bona talye dopropnuyabe. Kum arepmanto ubicopura, nuncuk aning ara tamubuka arepnamsiyapca,” nyanyak nang ara, pia dipkoprob walwal arye nyanyake. Anang arye kum arepmanto ubikiba, ikin ning ton sik damak yalyopura, aninye sik bona punubuka kum arepmanto unamsile. Ati, “Yuk nang sik bona nuncuk punupnamabe,” nyana meme.

¹⁹ Yatanye do nirya, elce, yuk nang nirya ati, ‘Weik arye derenamle,’ tenebuka nyalulnye bira, dipkoprob el bidamang ati malye kililalule. Ayupu nyalulnye bira, ‘Malye winin ninguk talibuka, malyeuk unamne’ tenen, kanye delilule. Tonda, ninye arye, ‘Nun aik ubula don nang yanuka weksicak’ tenen, weik cang poka wibuka antanapdongamik bukni, yuk malye winin nang arye, aning eibikirye, ‘E, anye birye pia teleb dekna weik ning el aik pum tam dongobuka ati, apoka dobuka,’ tenebikirye, aminyan talak, ‘El ning ubula dopropnamap’ tenen, anang arye, el aik yanuka weknamake. Winibikirye, malye kilinyake. Aning atonun, yata ninye do nirya, kwalibuka etekdop yupu nyabikcopura, aminyan talak alye uk daknamake.

²⁰ Yatanye do nirya, tilila ninguk talibuka ulirye, talye yupu nyalulnye bira, el pil donamle ning nirya ara, nong ton pia kum unamle. Ikin ning weik, el damuk yanganamle. Aning atonun, yatanye do nirya, kanye kwalibuka ululnye bira, el pil donamle ning nirya ara, nong ton pia kum unamle. El dam ara, weik kanye imun ning aning-aning nirya weik yangaliba, el nong deice saknamle.

²¹ Yata nang mapu do nirya, sikce delilamak mapu walwal una ap, tuba-tuba malye una ap, upnin bacopura, amapu sik ni yapu ap, sik nin yapu ap uk, kanye talima ikin ulule. Aning atonun, ninye ton, el mi tuba-tuba malyeuk upnin balirye, ‘Amutuku ninye deiyok nang arye nyanyak yupu pia kum kekenamne,’ nyaplyopura, el li koproba ara, pia kanye kum delilule.

²² Ninye kanye talima teleb upliba, kanye deibuka unyak nang ara, sik nong nirya babye, atonun ubuka mikip arye, teleb ubuka unamake. Bukni, ninye kanye talima ikin upliba teniltona uk unyak nang ara, sik kanye talima ikin weik uplirye, kanye imun kanye uk, bobuka unyak atonun, sik nong arye dipdongobuka, yok noutamak nirya atonun, upnin banamle anya arye, teleb ubuka kum unamake. Ikin kanye uk unamaka ati, sik kanye tenina ning ara, ‘Se, aning-aning nirya ara, kum winilamtibye,’ tenena uk unamake.

²³ Ninye arye malye ubikiba, ‘Ninye deiyok nang arye, yupu bokipnamak’ tenen, wenena aik delilbanyak bukni, amutuku ninye deiyok nang, kanye talima malye nanguk, ucopura, sik malye upmace nang, sik kayapu arye, yo bok weik arelyanganyake. Aning weik arye, dungnubuka arebicopura, amutuku deiyoknye birye, aning lipsisikuka yupu bokolina kum diparyuk, arepmace yo bok uk dungnubuka dopdoplirye, yupu moubuka kum lipsisikuka bokolilule. Winipliba, amalye winipmace nang arye, talye lukparabuka weik arye tonap malyeuk upnin banyake.

²⁴ Ninye ton, weik kel bikna deiyok ning akunum kel bikamlinye bira, ‘Weik kel bikna deiyok ninguk, tonap tabakuka kel kipnamne’ tenen, moubuka tenipdelirye, kel kina deiyok ninguk elkirikilule. Winipra balulnye bira, el tenelamlye touk, kel biknin banamle. Bukni, walwalnye bira, teleb ubuka kum tenelula anya arye, el tenepmalye touk, nong kum ulule. Anye bira, ‘Deiyok ani,’ tenena kumce, ‘Otam mutuku bitinye do? Sirik tam mutuku orbitinirye kel kipnamne do?’ tenen teninmalirye, el patalye ning ati elkirikilul bukni, moubuka kum kel biknamla anya arye, aning nirya, nong ton pia kum unamle.

²⁵ Yata nang do nirya, sikce delilamik mapu walwal una ap, tuba-tuba malye una ap, upnin bacopura, amapu sik ni yapu arye, malye kanye bobuka, kanye talima sukunamle. Sik nin yapu ara, talima ikin upliba, ‘Se, yata ning deiyok ati, na deipse mi malyeuk ulul do?’ tenebuka teniltona uk ulirye, engena weik unamle.

²⁶ Yata nang do nirya arye, ninye ton el upmalye ning, deiyok malye ning ton kum upmalibuk, yupu bokolina deiyok nang arye, lulupdeipnirye, talye ikin ning delina ap, ona ap, ubikirye, “An malye una ati, yo bok weik arenamsilame,” nyabuka, ateleb unanye wenebicopura, wininyaka deice arye, sik anang ara, weik malye ulilanyake. Aning atonun, ninye deiyok talibuka unyak nang weik arye, sik amu tam talibuka unyak ninye ati, diksukum yupu uk peterebiki bukni, sik deice tam yuk ninye deiyok nang arye, adeiyok nang ati wenebikirye, talyeuk obicopura, aning ara weik malye unyake.

²⁷ Ninye weik kel bikamikce nang arye, weik kel kibuka unyaka deice arye, yupu nyan talak ara, yupu canga arye kum nyanyake. Yupu bumang uk nyanyak bukni, sikce nyanyak yupu ara, weik kel bikne ninguk nyanyake. Aning atonun, weik kel kinyak nang ara, sik yupu nyapnuce talak ara, ‘Malye yupu nyapmap do, ara teleb yupu nyapnamap do?’ tenenmakirye, nyabice talak ara, tenipdekirye, nimalye arye nyanyake. Yuk nang arye sikti, malye updeipnamak babye, minopce derena uk kum unyake. Sik kel nang arye, ‘Nun kayapu ati, derebibyap’ tenen, sik nyanyak yupu moubuka kalikildanyake. Sik talima teleb unyak nang anya arye, namin yupu aryuk nyanyake.

²⁸ Ninye tonok ton, walwalnye unmatua babye, elce, ‘Walwal yupu nyapnun’ tenen, moubuka tenipdelirye, yupu minopce nyana kum bukni, talye tunim abuka buklyopura, yuk nang arye anye bira eibikirye tenenyake. ‘E, anye bira, talye lukparabuka yupu kum nyanmala anya arye, elda akunum weik kel bikamuknye ulul darebe,’ tenenamake. Walwalnye ulul bukni, moubuka tenina kumce, talye yupu kum nyaltakalulnye, tunim abuka buklyopura, yuk nang arye, elti, ‘Se, elda kel bikamuknye kum ulul danya,’ tenenamake. Ati, teleb ning ara, ‘Minopce na yupu nyapnun’ tenena kume. Talye tunim abuka bunamlulume.