Amsal 16 - Eipomek

Walwal arye unyak kili sal ap, moubuka tenebikirye, teleb unyak kili sal ap ati, nyabuk yupu

¹ Ninye arye sik kanye talima noutamak, ‘Wininamabe, wininamabe’ tenen, yupu talikirye, “Dipkoprop, aninguk wininamabe,” nyapting bukni, Allah Yahweh arye, ‘Dipkoprop aninguk wininamake’ tenen, yupu nyalisulule. Dipkoprop pia teleb ning ara, Allah elcuk, tenelul touk, teleb upra deipnamsil.

² Ninye nirya, sik kanye talima noutamak arye, ‘Nun wininyap ning nirya ara, diksukumuk unyabe. Nun babye bisik ara, telebuk unyabe,’ tenebuka banyake. Wininyak bukni, Allah Yahweh arye, ninye kanye talima noutamakuk dilirye, moubuka asilesulule. Ara, ‘Ninye nirya sik wininyak aning ara, yata ning tenekirye, wininyak do? Yata deiyok ati, apil donyak do?’ tenen, asilesilirye, kel kisulule.

³ Aning ati, anggunce, ‘Wininamabe,’ tenelulum ning nirya ara, ‘Allah Yahweh elcuk melisilya deice arye, teleb upnin banamap’ tenen, anggun tenelulum ning ap, winipnin banamlum ning nirya ap, Allah el tibuk arenamlume. Arepmunyopura, Allah arye melisilyeba, anggun tenepmunce winipnin banamlum ning nirya ara, nong teleb ubuka nong unamle. Anggun wininamlum ning nirya ara, ‘Kume, nun mikip deice aryuk wininamabe,’ tenena pia kume.

⁴ Ayupu ara talye ati kum nyapsine. Allah Yahweh arye, ‘Wininamne, wininamne,’ tenebuka, winilul ning nirya ara, minop talak arye, ‘Aning ara winipnamne,’ tenyamuk touk, aning-aning nirya kwepdeibuk ati, aning nirya telebuk ulule. Ara, malye ubuka unyak nang arye wininamak ning babye, Allah arye, ‘Winibuka malye upnin banamake’ tenen, akunum kintinibuka tenelamuk bukni, aminyan sirya talak ara, Allah arye amalye unyak ninye ati, wenebuka oplirye, uku dilye mutuku dopkwetepnamle.

⁵ Ninye nirya, sik kanya deilin erebuka ukirye, kwalinya nang ara, Allah Yahweh arye, ‘Anang ara na like,’ tenelule. Ara, dipkoprob elce, sik anang ati tenelye ning ara, ton pia luba kum kinamle. Nunda aning pia dipkoprob bikinyabe. Allah arye sik aninye ati, ‘Na like,’ tenelamlya ani, kum daneipnamle. Dipkoprop yuk talak ara, aninye ati weik arye wenebuka oplopnamle.

⁶ Ninye ton teleb ubuka ukirye, Allah atibuk batakana pia kumce, elti, ilil tenebikirye, dib tenebuka telebuk ucopura, Allah arye sik malye unyak ning nirya, namin kipnamle. Bukni, pia teleb ning tuba tenenamle ning ara, ani. Yata ninye do nirya, dipkoprob Allah ati, ilil tenebikirye, el si erebuka kinamak ninye nirya ara, Allah el amu tam telebuk unamake. Aning atonun unyak ninye nirya arye, ‘Malye un ning tonok ning babye, kum unamabe,’ tenebikirye, pia telebuk upnin banamake.

⁷ Sik ninye nirya arye, teleb winin ninguk, talibuka ucopura, Allah Yahweh arye, sik unyak ning ati, pia kanye delinamle. Allah Yahweh arye, aninye ati kanye deiplyeura, elce melipliba, aninye sik oldan nang nirya, winiryuk kanye tenen ninguk, punubuka areplirye, aninye ap ansinipdeipliba, telebuk unamake. Minop talak ara, oldana uk ulamik bukni, aminyan talak nirya ara, sik kayapu nang koprop atonun ubuka unamake. Sik kam unamak talak noutamak nirya ara, tonap pia kum oldanamake.

⁸ Ati teleb ning ara, Allah Yahweh arye tenelula ara ani. Yata ninye do nirya, bona ning weik arye dekuka delina kumce, talye bona utotoa talina kum ninye uk unamak bukni, teleb winin ninguk talibikirye, Allah el yupu moubuka kekebiceura, ‘Sikda pia telebuk unyake,’ tenelule. Yuk ninye arye, ‘Bona ning weik arye doproptibye,’ tenena ap, ‘Yo bok weik arye taleptibye,’ tenena ap deice arye, malye kanye bobuka enyaka anya arye, anang arye sik yuk ninye ati, tilila yupu nyanyaka deice arye, malye kilinyake. Aninye ati ara, Allah el kanye ara, ‘Sikda pia malyeuk unyaka anya arye, na like,’ tenelule.

⁹ Ninye nirya sik kanye talima noutamak arye, ‘Aning ara winipnamne,’ tenebuka, yuk-yuk tenenyak bukni, sik dipkoprob upnamak ning nirya ara, Allah Yahweh elcuk, “Teleb bisik ara ani, dipkoprob winipnamaka ara ani,” nyabuka kintililule. Elce tenelul touk, wininamake. Yuk ton kume.

¹⁰ Allah arye sik ninye deiyok talibuka unyak weik nang ati utenelule. ‘Narye sikti, na mikip weik arepneba, sik weik arye kel kin ning moubuka tenebikirye, sik mutuku noutamak unyak ninye nirya ati, teleb ubuka talinamake. Tonda, yupu diksukum ubuka yupu bokolinamak. Teleb yupu nyabikiba sik amu tam unyak ninye ayupu kekebikirye, telebuk unamake,’ tenelule. Ati sik ninye deiyok nang, Raja weik nang ara, Allah Yahweh arye, el mikip weik talibuka ulul ning ara, sikti, arepliba doprobice bukni, yupu bokolina talak malye yupu uk nyabikirye, sik amu tam ninye ati, malyeuk ubicopura, Allah arye pia malye kanye bonamle. Aning ara, pia malye weik unyaka anya arye, Allah arye aRaja nang ati, wenepnamle.

¹¹ Ninye arye, sik bona ning dekna ati, ‘Ikin do, kanam do?’ tenen, kiklildelamak ning deice arye, kiklipdekirye, pia dipkoprob ninguk upliba nyabikcopura, Allah Yahweh arye sikti, kanye delilule. Deiyok ara, kiklildelamak ning, pia dib dipkoprob ning deiyoknye bira, Allah el uk ulule. Ati kiklildelamak ning, kiklildenyak bukni, tilila yupu uk nyanyak nang ara, Allah arye weik wenepnamle.

¹² Dan mutuku do nirya, amutuku talibuka unamak Raja weik nang nirya arye, ‘Atalenye mutuku, keting tamun weik arye taliptinye’ tenen, pataplyopura, adiparyuk moubuka talina ap, teleb ubuka yupu nyana ap, sik amutuku tam unyak ninye, teleb kilina ap, aninguk unamake. Winibuka diksukumuk, winipnin bakirye, tilila yupu nyana kum diparyuk, amutuku teleb ubuka talibicopura, tonok mutuku arye dipdongobuka dorunamle keting tamun tuba talinamake. Bukni, ninye deiyok Raja weik nang arye, sik talinyak mutuku nirya, teleb ubuka kum talibikirye, tilila yupu weik nyakcopura, sik amu tam unyak ninye arye aRaja nang ati, yu upliba, batakikirye bisibicopura, sik pununa ati, ‘Yuknye nun ninye deiyoknye upnamsil’ tenen, yuknye wibuka ereipnamake. Ati ara, sik ninye deiyok nang, Raja weik nang nirya arye, ‘Tilila yupu nyana ap, nun amu tam unyak ninye ati, malye ulina ap, ikin ning sik nong deice delina ap nirya ara, nun like,’ tenena uk unamake.

¹³ Tonda yata nang do nirya, sik ninye deiyoknye, Raja weik nang ati, yupu laka nyalbice talak nirya ara, sikce winilamice ning ap, laka nyapnamak yupu nirya ap, tenepce tilila yupu nyana kum diparyuk, pia dipkoprob yupu uk nyabikcopura, sik Raja weik nang ap, yuk ninye deiyok nang ap, ayupu kekebikirye, kanye delinamake. Sik ninye deiyoknye Raja weik nang ap, sik amu tam bukni, yuk ninye deiyok nang ap nirya ara, dipkoprob yupu nyanyak ninye ati, kanye delinyake. Tilila yupu deice arye, talye nyaltakanyak ninye ati, ‘Nun like,’ tenenyake.

¹⁴ Ninye deiyoknye Raja arye, el amu tam unyak ninye ati, yu upliba wana weik upyopura, elce wenena yupu nyalya deice arye, el yin talin nang arye, el amu tam unyak ninye ati, talye lukparabuka olyanganyake. Ati ara, Raja weik nang amu tam unyak ninye nirya arye, ‘Kume, nun Raja arye derepsilirye, opsilyak’ tenen, kanye moubuka tenebikirye, telebuk unyake. Sik weik kel bikamik nang arye, ‘Nun ninye deiyoknye derepsilirye, opsilyak’ tenen, moubuka tenenyake. Raja arye malye kanye bobuka, ninye uapmanto ning nirya ati, pia leibuka unyake. Awinin ning ara, pia kum wininyake.

¹⁵ Dan talak do nirya, ninye deiyok nang, sik Raja weik nang kanye deibikirye, sik kanye talima mitang uplyopura, sik amu tam unyak ninye ati, teleb ubuka melibikiba, aninye nirya telebuk unamake. Winipmanto ara, weik dou maplirye, wa wibuka kouamice ning nirya kolulamle bukni, dua arye mok bobuka yaliba, mok ceplirye, wa wibuka yala ning kouamice ning, teleb ulamle touk, ninye deiyoknye birye, yuknye biti kanye deiplyopura, anye biti teleb ulinamle.

¹⁶ Ton ninye arye, dekna weik ning el si ara emas ap, perak ap, ‘Aning weik arye dolonamap’ tenen, pataliba, pia pi dobuka elinyak bukni, aning ara mitik teleb uka. Weik teleb ning ara, ninye arye, ‘Se, weik kel bikna deiyok ning, weik arye kel biktibirye, telebuk unamap’ tenen, pia pataliba, pi deibuka, diksukum winin ninguk eldenyake. Aning ara dipkoprob weik teleb ning wininyake. Aning atonun, ‘Se, weik kel bikna ning kel kiptinirye, pia telebuk unamne’ tenen, aninguk weik arye pataplinye bira, weik telebuk ulule. Bukni, ‘Se, dekna weik ning, el si perak doproptinirye, bona utotoa talinanye unamne’ tenen, pataliba elkirikilulnye bira, teleb kum ulule.

¹⁷ Ninye ton malye un ning nirya batakikirye, teleb ubuka pia diksukumuk unyak nang ara, amalye un ning tonap pia kum unamake. Sikce, ‘Kume, tuba tonap malye ubipyak’ tenen, pia leilonyake. Adiksukum unyak ninye ulamak touk, yatanye do nirya, ‘Malye un ning nirya bataknirye, diksukumuk unamne’ tenen, pia moubuka ululnye bira, el kam unamle talak noutamak nirya ara, telebuk unamle. Ikin ning, el damak kum yanganamla anya arye, el pil donamle ning ap, unamle ning nirya ap, teleb ubuka upnin banamla ati, pia telebuk unamle.

¹⁸ Ninye ton el kam ulul talak nirya, kanye talima erebuka kwalilulnye bira, aminyan yuk talak, Allah arye anye biti wenepliba, sakuka opliba, kanye imun weik unamle. Aning atonun, yata ninye do nirya, sik kanye talima erebuka unyak ninye ara, aminyan talak ara, Allah arye aninye nirya ati, weneplirye kum daneipnamle.

¹⁹ ‘Malye upnyak’ tenen, el kam unamle talak nirya ara, kanye dakdongobuka ulirye, ninye bona utotoa talina kum ninye ap, neika ululnye bira, telebuk ulula anya arye, Allah el kanye ara, ‘Elda weik teleb ning ulul,’ tenelule. Ton nang ara, pia malye ubuka kwalinyak ninye ap, dukdongobuka ukirye, maknya kiknildan ninye arye, dalubuka ubula dolamak ning, bokuka dolonyake. Aninye ara, bona weik talininye weik unyak bukni, Allah el kanye ara, ‘Aninye ara pia malye weik unyake,’ tenelula anya arye, ato unyak ninye ati, weik arye wenepnamle.

²⁰ Yata nang do nirya, sik deiyok nang arye, “Wininamlulume, aning ara, kum wininamlulume. Teleb ning ara ani, malye ning ara ani,” nyabuka, lipsisikuka peterena yupu ap, wenena yupu ap nyabikiba, ayupu moubuka kekebikirye unyak nang ara, pia telebuk unamake. Sik unamak ning nirya babye, telebuk upnin banamake. Aning atonun, yata ninye do nirya, ‘Allah arye teleb ubuka melipsilirye, elce nyasilye yupu moubuka kekebipyopura, nun unamap ning nirya telebuk unamsile’ tenen, Allah ati dib tenebikirye, pia diksukumuk ucopura, aminyan talak, pia kanye deibuka telebuk unamake.

²¹ Ninye nirya weik kel bikna deiyok ning, weik arye kel bikikirye, telebuk upra balamica ani, yuk ninye arye sikti, eibikirye, kel kipnamake. Kel kibicopura, nyanamake, “E, aninye ara, dipkoprob weik kel bikamikce, weik mambul ning nirya ati, ‘Nong noutam ning deiyok ani’ tenen, kel bikna nang unyake,” nyabuka, aninye ati kanye delinamake. Yatanye do nirya, ‘Yuk nang ati, mambul yupu laka lebuka peterenamne,’ teneptopura, el yupu min kum nyapmalye talak arye, aning-aning moubuka tenipdelirye, na nyanamne yupu ara ani. ‘Ayupu deiyok ara ani’ tenen, akunum moubuka teniplyopura, aminyan talak, elce yuk ninye ati peterenamlye talak ara, ‘E, deiyok ani’ tenen, teleb ubuka kel kipnin banamake. Akunum kel kibicopura, sik aninye nirya arye, ayupu peterenanye biti, “Nun kwit telebe, anda pia teleb ubuka peterenmasilame,” nyabuka, elti, kibikirye, kanye deibuka unamake.

²² Yata ninye do nirya, pia moubuka tenipdekirye, ‘Aning winibipyopura, aminyan talak yata wiripnamsil do? Kanam upnamsil do, ikin upnamsil do? Awinipnamsil ning ara teleb do, malye do?’ tenen, moubuka wininyake. Ara, sik winin ning min kum winipmace talak ara, minopce moubuka tenipdekirye, teleb ninguk wibuka wininyake. Aning atonun wininyak ninye, sik wininyak ning ara, winipmanto ara, mek nong dem kutukuka balamle atonun unyake. Bukni, diksukum ubuka ninye arye, sik ayupu kum kekepmanto ukirye, keil kisok kibuka unyak ninye ati, “Wininamlulume, aning ara pia kum wininamlulume,” nyabuka wenena yupu weik arye nyaptinga babye, sik kisok kat deibuka, mandipna unyake ninye anya arye, pia moubuka kum kekenamake. Ayupu ara, kum dobolbanamake. Kekeltana uk unamaka anya arye, ayupu nirya ara, nong pia kum upnamle. Amalye ululnye biti, “Winina pia meme,” nyabuka nyanyak yupu nirya ara, pia talyeuk unamle. Dipkoprop nong kum upnamle.

²³ Yata ninye do nirya, sik kanye tenen ning noutamak ton, weik kel bikamik ning auplyopura, sikce yuk ninye ati laka lebuka peterenamak talak nirya ara, dipkoprob pia teleb yupu uk nyanamake. Winibuka moubuka tenen ning dobuka, peterenyaka deice arye, sik yupu kekenamak ninye, ayupu dobuka dobolbanamake. Moubuka kel bikikirye, weik kel kibikirye, peteren nang ati, “Se, sikce peterenmasiyak wenena yupu ara, pia dipkoprob ninguk nyanmasiyake,” nyabuka, kanye deibikirye, apeteren nang ati kanye delinamake.

²⁴ Winipmanto ara, ninye arye madu mong mek purubuka dipmakiba, to lepliba, kanye delilamak touk, ninye nirya arye, teleb yupu nyabikiba, yuk ninye kekebikirye, kanye delinyake. Ateleb yupu nyabikiba, kekebikca deice arye, sik kanye talima mikip upliba, kanye delinyake. Winipmanto ning ara, ninye ton uk dilamliba, ninye kwetena deiyok nang arye, obat dipkoprob ning arepmakibuk, sik uk dilamle ninye dibikcopura, yok pum bisik nirya weklirye, teleb ubuka kwetelamle atonun, teleb yupu nyanyak ninye arye, sik nyanyak yupu deice arye, yuk ninye ati, teleb kilinyake.

²⁵ Ara, ninye nirya arye, sik tenebice bisikuk bakirye, ‘Kume, nun banmap bisik ara, teleb bisik anya arye, abisikuk banamabe. Nunda diksukumuk unyabe,’ tenebuka banyake. Bukni, abisik urasin teleb bisik upmatu babye, sikda moubuka kum tenipdekirye, malye bisikuk balamicopura, dipkoprob dipna damuk banyake. Dipkoprop teleb bisikuk wibuka kum banamake. Aminyan talak, sik banamak bisik nirya ara, uku din mutuku uk banamake. Ati, ‘Awininamap ning ara, teleb ning do, malye ning do?’ tenen, pia moubuka tenipdemunce, banamlulume. Talye lukparabuka bana meme.

²⁶ Ninye ton ikin pil dolamlinye birye, din pataplyopura, din patan deice uk ulirye, tenelule. ‘Kume, ikin pil donmap bukni, nun pil dolamepya ani, sirya dakipyeura, aminyan talak din weik arye neika dinamapa ara telebe.’ Aning ara, sik apil doninye arye, ‘Dina pataple bukni, pia pi dobuka pil dolamepya ani, sirya dakipyeura, din ning weik arye dipnamapca,’ tenenyaka anya arye, atenena deice arye, pia piribuka, mikip arye pil donyake. Ara, sik dina patanmalibuk, piribuka pil donyaka ati nyapne.

²⁷ Ninye ton pia yu kanye bobuka, malyeuk ululnye birye, malye winin ninguk tenebuka, patalula anya arye, el kayapu nang ap, yupu tanamak talak nirya ara, malye un ning atibuk, yupu talinyake. Malye winin ninguk nukuldakirye, kanye delildanyake. Bukni, sik malye winin ninguk pataliba, malye yupu uk nyanyak nang arye, sik kayapu nang damak ati, amalye yupu nukunmakiba, yuk ninye kekebiceura, malyeuk ulinyake. Winipmanto ning ara, uku buk arye, aning-aning nirya dilolamle tonun, sik malye yupu nyanyaka deice arye, amalye yupu kekenamak ninye nirya ati, malye ulinyake.

²⁸ Ninye ton, ‘Asum-asum nirya yu kanye bobuka, nyaldana ap, oldana ap unamabe,’ tenekirye, sik ap neika unyak ninye ati malye ulinmaki bukni, sik ap sik neika unyak nang ati, derelana ap, oldana ap ulamikca ani, sik amalye una deiyok nang arye, kanye deibuka unyake. Winibuka unyak nang ara, winipmanto yupu ton nyapnusine. Ara, ninye arye malye yala ning koubikiba, sik yo duk moulamla atonun unyake. Tonda, din ning dibikirye, kwal talye deiplopmakiba, daupmalya ani, aminyan talak tong weik lelamle tonun unyake. Yuk yupu ton nyapnusine. Ninye bitinya nang, sik ap neika dukdongobuka ulamtiring bukni, atalak arye tonoknye birye, ‘Yuk nang kekepnamak’ tenen, el ka biti, malye yupu nyapra balibuk, yuk nang ayupu kekebikirye, el ka biti malye kanye bobikcopura, aminyan talak sik abitinye nang babye, kanye talima wilibuka bokoldadurake. Talima wilibuka bokolidaruka deice arye, like teneldalamdake. Bukni, winipnamle ning ara, talye ati kume. Deiyok ara, ninye tonoknye birye sik neika tonok dukdongobuka ulamlinye biti, minina yupu nyabuka, nyalina deice arye, bokolilule. Minopa ara, kanye deipdanamdik bukni, aminyan talak nirya ara, malye kanye bolanamdake.

²⁹ Ninye ton yu tenebuka malye winin ninguk pataliba, talibuka ululnye bira, ‘E, nun ap, yuk nang ap, oldana uk winibipyopura, ara teleb uka,’ tenelule. Winibuka tenelulnye birye, el kayapu koprop yuk nang ap ati, tuba-tuba tilila yupu nyalirye, anang ati malye ulilule. Winilya deice arye, el kayapu nang nirya bobuka ona damuk, delilbalule. Elce malye ulya deice arye, el kayapu nang nirya ati, malye ulilule. Anang nirya, sik damak ikin ning weik yanganamle.

³⁰ Ninye ton, sikce yuk nang ati, sik kanye talima noutamak ara, yu ninguk tenebikirye, ‘Anang ati malye upnamabe,’ tenenyak bukni, ‘Aning ara, yuk nang arye kum kel biknamsiyak’ tenen, urasin etek-etek ana uk unyake. Tonda, anang ara, sik malye tenenyak ning laka nyana kum bukni, si bama mur-mur ana ap, asing ngikilongona ap, nong urasin nirya bamnalakana uk unyake. Bukni, sik kanye talima noutamak ara, pia malye winin ninguk tenebuka, dungnubuka unyaka anya arye, yuk ninye nirya kum kel bikinyake. Winibuka tenenyaka deice arye, yuk ninye nirya ati, malye ulinyake.

³¹ Ninye ton el malye ulamle ning nirya bataklirye, teleb ninguk talibuka upnin banamlanye bira, el kam unamle talak ara, Allah arye el unamle talak ati, ouku weik arye tabaknamle. Anye bira, Allah yupu nirya kekeplirye, ayupu nyalye touk, moubuka taliplirye dobolbalule. Winilya deice arye, kul potong panamle. Yuk ninye nirya arye, atonye biti, ‘E, keting tamun weik arye kam ulamuka ani, kul potong akunum ubuk. Ara, diksukum ulamuka deice arye, ulule’ tenen, kel bikikirye, elti, kanye delinamake. Winipmanto ning ara, ninye deiyok Raja weik nang arye, sik kisok deice urasin pia teleb ning, el si ara mahkota kalulamak atonun, Allah arye diksukum ubuka ulamice, wisi nang ati, kul potong palule.

³² Nong mikip weik ululnye bira, mitik teleb ulul bukni, weik teleb ning ara nyapnusine. Yata nang do nirya, yu weik upmale bukni, ‘Na adiparyuk ninye wana yupu kum nyapnune. Bataknin banmanya ani, aminyan talak namin yupu uk nyapnamane,’ tenelulnye bira, weik teleb ulule. Yata ninye do nirya, sikce, ‘Kume, nuncuk wininmabirye, malye ubipyak’ tenen, moubuka tenipdekirye, sik bidamnye ati, kalikildanyak nang ara, pia teleb unyake. Tonda, yata mikip weiknye do nirya, elcuk yuk mutuku ninye arye, dolamik weik asik nirya uluplopturye, amutuku ninye nirya obuka daktua babye, aning ara mitik teleb ulule. Bukni, weik teleb ning ara, ‘Malye ubipyak’ tenen, moubuka tenipdekirye, sikce, sik bidamnye ati, kanye talima moubuka kalikildanyak nang uka.

³³ Ton nang ara, ‘Aminyan unamap ning tenena ati ara, aning wininamap do, aning batakuka yuk ning wininamap do?’ tenen, lak kilin ning, el si ara, undi deice arye winildenyake. Bukni, dipkoprob upnamle ning nirya ara, Allah Yahweh elcuk, ‘Wininamake,’ tenebuka kintinip deiamuk ning tonok ara, dipkoprob unamle.