Amsal 13 - Eipomek

Diksukumuk wininyak nang ap, malye weik wininyak nang ap ara, pia yuk-yuk wininyake

¹ Kanye lamapdongobuka arye, pia diksukumuk ulirye, pia weik kel bikne mi ara, el li birye, wenen yupu nyalul ning ara, moubuka kekelule. Bukni, kanye erelan deice arye, el li yupu kum kekelul mi ara, el li koproba nyalamle yupu ara, moubuka kum kekelule. ‘Talye yupu nyanmanil’ tenen, kekebuka batakalule.

² Diksukum telebuk ululnye birye, nyalul yupu ara, aminyan tam ara, yuk ninye ton kekebicopura, el nyalul yupu deice arye, aninye ati teleb ulilule. Winibuka pia telebuk upra baliba, el anye akunum eiplyopura, kanye deibuka unamle. Bukni, ‘Malye yupu ap, tilila yupu ap, minilan yupu ap uk, nyanamabe. Ayupu nyanamabe deice arye, yuk ninye ati malye ulinamabe,’ tenebikirye, malyeuk unyak ninye ara, ninye walana ap, olana ap, yuk malye un ning ap ati, ‘Aning ara teleb uka,’ tenekirye, malyeuk unyake.

³ ‘Na yupu nyapnya deice arye, yuk ninye ati, malye updeipnyak anya arye, moubuka tenepnirye, teleb yupu uk nyanamne,’ teneplirye yupu moubuka nyalulnye bira, el kam unamle talak ara, ouku weik unamle. Bukni, ninye arye yupu nyabikiba, kekeplirye, moubuka tenilena kumce, talye lukparabuka malye yupu ap, yu yupu ap, minopce nyaltakalulnye bira, yuk ninye ati malye kililule. Talye nyaltakalulnye bira, el dam ikin ning tamubuka yaliba dololule.

⁴ ‘Pil dona ara na like’ tenen, talye-talye urdemuk ulirye, moubuka kum tenelulnye bira, el kanye aniryuk, ‘Se, aning ton winipnamne. Aning ton doproptinye,’ tenelul ning ara, pia patalyeba, aning-aning nirya ati, tenelul bukni, atenelamle ning nirya ara, tonok ning babye nong kum upnamle. Elda talye atibuk tenelule. Bukni, yata ninye do nirya, pin-pin kanye bobuka unyakce, mikip arye pil donyak ninye ara, ‘Winiptibyopura, aning ton doproptibye,’ tenelamice ning ara, atenelamaka atonun, kibuka nong upnamle. Sik aninye ara mikip arye, pil donyaka deice arye, sik patan ning dolonamake.

⁵ Allah arye, ‘Wininamlulume, aning ara pia kum wininamlulume,’ nyapdeiamuk yupu moubuka talibikirye, diksukum telebuk unyak ninye ara, ‘Tilila yupu nyalana nun like,’ tenenyake. Bukni, aning tenena kumce, talye lukparabuka tilila yupu nyana ap, malye ninguk talibuka una ap, unyak ninye ara, sik mining dam anyuk, pia weik ikin ning yaliba doprobikirye, alye dakalanyake. Yuk ninye nirya arye, anang ati, ‘Sikda pia malye wininyake,’ nyabuka, batakalongonamake.

⁶ Allah arye, ‘Wininamlulume, aning ara pia kum wininamlulume,’ nyapdeiamuk yupu moubuka talibikirye, diksukum telebuk unyak ninye ara, sik kam unamak talak noutamak nirya ara, telebuk unamake. Allah el yupu arye sikti, pia melinamle. Bukni, aning tenena kumce, malye ninguk talibuka unyak ninye ara, sik bidamnye arye, sik bidamnye atibuk, malye winililanyake. Sik bidamnye arye, sik bidamang ati ititilanyake.

⁷ Ton nang ara, sik talinyak ning kum upmalibuk, tilila yupu deice arye, “Kume, nara bona utotoa talina weiknye unune,” nyabuka nyaltakanyake. Ton nang ara, sik talinyak ning weik ululba, dipkoprob bona utotoa talina weik nang unyak bukni, sikce, “Kume, nunda bona utotoa talin weik nang kum unyabe,” nyabuka talye nyaltakanyake.

⁸ Malye wininyak nang arye, yu kanye upliba, sik pia weik bona utotoa talin weik nang unyak ninye ati, “Anggun ti, opnusiabe, tenenmap bukni, yo bok weika arye arepsumunyopura, kum opnusiabe,” nyabicopura, sik bona utotoa talin weik nang arye, ‘Ayu nang arye opsicak’ tenen, yo bok weik arinyake. Bukni, yu kanye unyak nang arye, sik talye bona utotoa talina kum ninye ati, ‘Opnusiabe, nyabibya babye, anang arye yo bok kum arepsitinga ati ara, aninye ara, dauplye,’ tenekirye, sik bona utotoa talina kum ninye ati, malye yupu kum nyanyake. Mangkau kilongona uk unyake.

⁹ Allah arye, ‘Wininamlulume, aning ara pia kum wininamlulume,’ nyapdeiamuk yupu moubuka talibikirye, telebuk unyak ninye ara, sik kam unamak talak noutamak nirya ara, telebuk unamake. Sikda pin-pin kanye bobuka unyakce, winipmanto ara dirina weik ulula noutamak arye unyake. Bukni, malye winin ninguk talibuka ululnye, el dam ara, ikin ning weik yanganamle. Winipmanto ara, upna lapmalya tangaplirye, kunuklamle touk unamle. El kam unamle talak ara, mitik anun aryuk unmalya ani, minopce dibinamle.

¹⁰ Kanye talima erena ap, kwalina ap, una deice arye, ninye nirya pia walana ap, olana ap, diamuk unyake. Bukni, yata ninye do nirya, yuk pia kel bikamikce nang arye, sikti, “Teleb una ara ani, malye una ara ani,” nyabuka lipsisikuka nyan yupu nyabikiba, moubuka kekebice ninye ara, sik babye pia weik kel nang unamake. ‘Aning ara teleb, aning ara malye’ tenen, kel bikinamake.

¹¹ Ninye arye, “E, aning-aning nirya ton, winibipyopura, minopce bona utotoa talin weik nanguk unamabe. Ati sikce, ‘Winipnamlulume,’ nyabuka nyasinyak yupu, kekepmunce, adiparyuk winipmunyopura, minopce bona utotoa talin weik nanguk unamlume,” nyanamsiyake. Winibuka nyanamsiak bukni, ayupu atonun yupu nirya ara, pia kum kekenamlulume. Sik nyanyak yupu winipmunce, yo bok weik doproptuma babye, aminyan talak aning nirya minopce kum dananamsile. Bukni, pia pi dobuka mikip arye pil donmamunya ani, adeice arye yo bok weik dopropmunyopura, aning ara minopce min kum danapnamle. Pil teleb kibuka donmamunya deice arye dolonalum ning ara, min pola kume kum dananamsile. Pia aulirye, weik upra banamsile.

¹² Kanye pum tam aniryuk, ‘Se, aning ton winiptinye, aning ton doproptinye,’ tenelamlanye bira, atenelamlye ning kum uplyopura, ‘Yata deiyok ati kum upmanil do?’ tenen, malye kanye bobuka ulule. Bukni, aminyan talak el kanye pum tam arye, ‘Se, aning ton winiptinye, aning ton doproptinye,’ tenelamle touk akunum yalyopura, anye bira pia pin-pin kanye bobuka unamle.

¹³ Yata ninye do nirya, yuk pia weik kel bikamik nang arye, sikti, “Teleb una ara ani, malye una ara ani,” nyabuka lipsisikuka teleb yupu nyabikiba, ayupu kekena kumce, ‘Kume, lipsisikuka nyan yupu ap, wenen yupu ap ara, nun like,’ tenebikirye, batakanyak ninye ara, aminyan talak, sik dam anyuk ikin ning weik yaliba dopdobikirye, ikin kanye bobuka unamake. Bukni, dan ninye do nirya, wenen yupu ap, lipsisikuka peteren yupu ap ati, ‘Kume ayupu ara, nun dam peterenamsulume,’ nyabuka pia weik kel bikna ning patalibuk, unyak ninye ara, telebuk upre banamake. Sikce, ‘Aning wininamabe, apil ara donamabe’ tenen, piribuka donamak ning ara, nong upnamle.

¹⁴ Kel pia weik bikamik nang arye, “Winina ara telebe, aning ara malye,” nyabuka, lipsisikna yupu ap, wenen yupu ap nyasinyak yupu ara, pia telebuk ulinamsile. Winipmanto ara, pia teleb mek puak arye mek kwebuka dipmunce, telebuk ulamlum touk, aweik kel bikamik nang arye, nyasinyak yupu moubuka talimunce, upmunyopura, telebuk unamlulume. Sikce nyasinyak yupu moubuka kekebikirye, ayupu talibuka dobolbanyak ninye ara, malye un ning sik dam yalyopura, adiparyuk, ‘Kume, aning dobolbanyopura, aminyan talak opniliba dipnyake,’ tenebikirye, adiparyuk memelonyake.

¹⁵ Moubuka tenepdelirye, teleb yupu nirya el asok deice delilunye bira, telebuk upre banmalya ani, yuk ninye eibikirye, ‘E, anye bira dipkoprob telebnye ulule’ tenen, kel kibikirye, elti, kanye delinamake. Bukni, ‘Malye un ninguk, talibuka unamabe,’ tenenyak ninye ara, ikin ning, sik dam pia yanganamle. Winipmanto ara, amalye ning talibuka unyak ninye ara, keil pum weik likilul bisik noutamakuk, banyaka ati ara, ikin diparyuk banamake.

¹⁶ Kel pia weik kiamuknye bira, min kum winiplye talak, moubuka tenepdelirye, ‘Aning winipnaman do, aning winipnaman do?’ tenen, akunum moubuka teneplyopura, el winin ning ap, el pil ap dolule. Bukni, sik walwal asa uk unyak ninye ara, min kum winibice talak pia kum tenenyake. Sik bidamang kanye aryuk tenenyak ninguk, talye lukparabuka wininyake. Tonda, sik moubuka kum tenilenyak ninye ara, malye kiplirye winipliba, yuk ninye kekenak ara, “Nun tenepmapu ninguk, talye lukparabuka winipmabe,” nyabuka erepdanuka kwalibikirye talye nyaltakanyake. Aning ara, walwal asa aryuk, ‘Malye winipmap do?’ pia kum tenenyake.

¹⁷ Malye un ninguk talibuka ululnye bira, ‘Nun mambul yupu lak nyalbinamle’ tenen, wipdeipmumnyopura, moubuka kum tenepdelye diparyuk, talye lukparabuka wininamla ati ara, aminyan talak ara, ikin ninguk bobuka anggun dam tamubuka boyanganamsile. Bukni, moubuka tenenanye wipdeipmunce, ‘Nun mambul yupu laka nyalbinamle’ tenen, dopdeipmunyopura, moubuka teneplirye, telebuk unamla ati ara, aminyan talak ara, ninye teleb ulina ninguk, bobuka anggun dam tamubuka boyanganamsile.

¹⁸ Yata ninye do nirya, yuk pia weik kel bikamikce nang arye, sikti, “Teleb wininmalum ning ara ani, malye unmalum ning ara ani,” nyabuka, lipsisikuka nyan yupu ap, wenen yupu ap nyabikiba, ayupu kekena kumce, ‘Kume, lipsisikuka nyana yupu ap, wenen yupu ap ara, nun like,’ tenebikirye, batakanyak ninye ara, aminyan talak, sik dam anyuk ikin ning weik yanganamle. Ato wininyak ninye ara, sik talinyak ning nirya, kum upra banmalya ani, aminyan talak ara talye bona utotoa talina kum ninye uk unamake. Yuk ninye nirya arye, anggunti, “Kume aninye ara, malyeuk winilamika ati, anang ara dauplye,” nyabuka, yep-yep abikirye, anggunti bataknamsiake. Bukni, yata ninye do nirya, wenen yupu ap, lipsisikuka peteren yupu ap ati, ‘Kume ayupu ara, nun dam peterenamsulume,’ nyabuka pia weik kel bikna ning pataliba wininyak ninye ara, telebuk upra banamake. Yuk ninye eibikirye, “Aninye ara telebuk unyake,” nyabuka kanye delinamsiake.

¹⁹ Pia teleb ning ara, ‘Wimipnamnarya, aning ara pia se tenenune’ tenen, pia pi dobuka mikip arye pil dobibiba, aning tenelamak touk akunum nong kiplyopura, ‘Aning ara pia telebe,’ tenebibirye, kanye delinyabe. Bukni, aning nirya moubuka tenena kumce, pia walwal kanye bobuka unyak nang ara, ‘Malye winin ninguk talinamabe’ tenen, pia malyeuk wininyake. Aning ara, ‘Kume, teleb winin ning dolona ati ara, malye wininyap ning nirya batakanamabe,’ kum tenepmanto nang unyaka anya arye, malye winin ning kum batakmanto ninye unyake. Ati ara, sik pataplye ning ara, nong pia kum upnamle. Talye-talye uk tuba unamake.

²⁰ Kel pia weik biklirye, moubuka tenelulnye dam melibuka balamlanye bira, el babye pia weik kel bikna deiyok ning, kel kiplirye, telebuk unamle. Aning atonun, moubuka tenena kumce, walwal kanye uk bobuka, ululnye ap melibuka balulnye bira, el babye tuba walwal uk ulirye, el dam ara, ikin ning weik yanganamle.

²¹ Aning ara, talye ati kum nyapsine. Deiyok ara ani. Malye winin ninguk talibuka ululnye bira, el donga tam arye, malye una deiyok ning ton dobolyanganamle. Ati anye bira, ikin asa uk unamle. Aning atonun, diksukumuk ululnye bira, el donga tam arye teleb winin deiyok ninguk, tuba-tuba doryanganamle. Ati, adiksukum ululnye bira, teleb ninguk dololirye, kanye deibuka unamle.

²² Teleb unyak ninye, sik taleamice ning dobuka, sikce deibikiba, dadeipdanin, banamak mapu ati, aning arebikiba, amapu arye, ateleb ning dolonamake. Bukni, malye winilamice ninye ara, sik taleamikirye, bona utotoa talin nang ulamle ning nirya ara, batakikiba, aminyan talak ara, diksukum ulamak nanguk dolonamake.

²³ Tonda, sik bona utotoa talina kum nang ara, wa wibikirye, sik koulamak ning, teleb kibuka paplirye, nong neplirye, aning ayala-ayala nirya, weika arye aupmalye babye, sik malye wininyak ninye yakirye, aning nirya dalubuka, ubula dolonamake.

²⁴ Tonda, yata ninye do nirya, sik mapu malye winibice talak ara, ‘Kume, nun mapu kum wenenamabe,’ tenebikirye, sik mapu malye wininyak ning aupmalebuk, talye mangkau kilongonyak ninye ara, dipkoprob sik mapu ati, bico kum tenekirye, sikti, kanye kum delinyake. Bukni yata ninye do nirya, sik mapu malye ubice talak ara, adiparyuk, “Aning ara malye unmaluma ati, bataklyame,” nyabikirye, sik mapu ati wenenyak ninye ara, dipkoprob sik mapu ati, bico tenekirye, kanye delinyake. Sik nin yapu ap, sik ni yapu ap arye, sik delinyak mapu ati, wenenyak ninye ara, dipkoprob sik mapu ati, bico tenebuka kanye delinyake.

²⁵ Allah arye, ‘Wininamlulume, aning ara pia kum wininamlulume,’ nyapdeiamuk yupu, moubuka talibikirye, diksukum telebuk, unyak ninye ara, sik kam unamak talak noutamak nirya ara, sik din ning dibikirye, boulule. Bukni, malye un ninguk talibuka, tuba-tuba malyeuk unyak ninye ara, pil teleb kibuka kum donamaka anya arye, din ning mitik tonun dem dibikiba, bouna kumce, patana uk upliba, imun kanye bobuka unamake.