Amsal 12 - Eipomek

Telebuk wininyak nang ap, malyeuk wininyak nang ap ati, nyabuk yupu

¹ Yatanye do, ‘Kel bikne nang arye peterepnitinge. Tonda, malye winipnyopura, lipsisikuka peterepnamniyake. Malye winipnyopura, tonap wenepnamniyak’ tenen, pataplinye bira, weik kel bikinanye ulule. Aning patapliba ululnye bira, weik kel bikne ning ap, peteren ning ap, ‘Aning ara ilile,’ tenebuka kanye delilulnye ulule. Wenen yupu babye kanye deibuka dolonamle. Atonye bira, dipkoprob weik kel bikne deiyok ning kel bikinamle. Bukni ninye ton, ‘Malye upniba, wenen yupu kum nyanamnulume. Ayupu kekena ara na like,’ tenelulnye bira, dipkoprob walwalnye ulule.

² Ninye ton teleb winin ninguk talibuka ululnye bira, Allah Yahweh arye kanye deiplirye, “Anye bira, telebnye ulule,” nyaplirye, anye biti teleb kililule. Bukni, ninye ton, ‘Malye winin ninguk talibibirye, tilila yupu ap, duknun yupu ap nyanamabe’ tenen, yupu sisikilulnye biti ara, Allah Yahweh arye, anye el deice wenen ninguk delinamle. Sirya talak ara, wenebuka oplopnamle.

³ Yata ninye do nirya, tuba malye winin ninguk talibuka winipnin balamak nang ara, telebuk kum unamake. Sikce, ‘Nun kanye tenenyap ninguk, winipnin balamipya ani, aminyan talak ara, pia telebuk unamabe,’ teneptinga babye, dipkoprob aning nirya nong kum upnamle. Aminyan talak ara, sik ap, sik wininyak ning nirya ara, kum danamle. Winipnamak bukni, dipkoprob teleb winin ninguk talibuka unyak ninye ara, telebuk winipnin bakirye, aminyan talak ara, kanye lamapdongobuka telebuk unamake. Yuk nang arye sikti, kum malya kipnamake.

⁴ Ninye don kilapu arye, malye una kum diparyuk, teleb ubuka unyak ning ara, sik akanye yapu arye, ‘E, akilapu ara, pia telebuk unyake’ tenen, kanye deibuka unamake. Yuk ninye arye, anang ati, kanye delinamake. Bukni, yata kilapu do nirya, malye-malyeuk winipnin balamikiba, sik akanye yapu ati, malye ulinyakba, sik akanye yapu nirya alye daknamake. Akilapu malye unamak deice arye, sik akanye yapu, sik nong pum tam malye uplirye lyulamle touk unyake. ‘Se’ tenen, lik kanye uk bobuka unyake.

⁵ Diksukum unyak ninye arye, ‘Aminyan talak wininamabe,’ tenebuka, winipnin banamak ning ara, teleb winin ninguk tenebikirye, unamake. Bukni, sik malye ninguk talibuka unyak ninye arye yuk nang ati, ‘Wininamlulume, wininamlume,’ nyabuka nyanyak yupu ara, tilila ninguk ulule. Malye winin ninye arye, tenenyak ning nirya ara, tilila ninguk ulula anya arye, aninye arye nyanyak yupu ara, pia kum kekenamlulume.

⁶ Malye kanye bobuka yu tenenyak ninye arye nyanyak yupu ara, yuk nang arye kekebiceura, ninye oldana ap, yupu deice waldana ap uk unamake. Bukni, malye ning winina pia kum diparyuk, teleb ulul ninguk, talibuka unyak ninye arye, nyanyak yupu ara, yuk nang arye kekebiceura, yuk ninye ati melibikirye, teleb ulinyake. Teleb unyak ninye arye nyanyak yupu ara, yuk ninye kekebikirye, ayupu deice arye, aninye ati lyelilule.

⁷ Malye winin ninguk, talibuka unyak nang ara, aminyan talak yuk nang arye anang ati, lik upliba, obisibikirye, kum daneipnamake. Sik malye wininyak nang ara, kum danin banamake. Bukni, malye un ning talina kum diparyuk, diksukumuk unyak ninye ara, pia telebuk ukirye, tuba-tuba teleb upnin banamake. Sik ap, sik wininyak ning ap, sikce deibikiba dadeipdanin banamak ninye babye, kanye lamapdongobuka pia telebuk unamake.

⁸ Ninye arye pia weik kel bikne deice arye nyakiba, yuk nang kekebikirye, ‘E, anang ara, teleb yupu uk nyanyaka anya arye, anggunda teleb nanguk unyake,’ nyabuka kanye delinamake. Bukni, yuk nang ara, sik kanye talima malyeuk unyak nang ara, kwalin yupu ap, kanye bona kumce, nyanyak yupu ap nyakiba, yuk ninye arye kekebiceura, ‘E, anang ara, pia malye ninguk nyanyaka anya arye, nun lik weike. Anang ara nun lik,’ tenen, batakanamake. Amalye ning tenebuka wininyak ninye ara, teleb unyak ninye arye, batakikirye, memepropnamke.

⁹ Teleb ning ara, ‘Pia mambulnye unamne,’ tenena kumce, sik ap sik amu tam pil melina nang ap, teleb piluk dopnin balamunya ani, aminyan talak anggun patan ning ap, din ap upnamsile. Bukni, ton nang ara, ‘Yuk nang arye nunti, se, sikda pia weik mambul nang unyake, tenepnamsiyak’ tenen, kwalibukabikirye, sik bidamang kanye erebikirye, kwalibuka dildanyake. Bukni, aning atonun wininyak nang ara, pil teleb kibuka kum donyaka anya arye, aminyan talak sik din ning babye, kum danin banamle. Ikin uk unamake.

¹⁰ Talima telebnye birye, teleb kibuka ulula anya arye, el basam do, el weilul ning nirya ara, teleb ubuka weilula ati, telebuk unamake. Bukni, malye winin ninguk talibuka ululnye bira, ‘Teleb winipnamne,’ teneplirye, pirilul bukni, teleb un ning kum winipmanto ulule. El kanye talimak ara, yu un ninguk winilula ati, el winilul ning nirya ara, ninye oldan nang atonun ulule. Elda, yuk ninye nirya ati, malyeuk kililule.

¹¹ Ninye wa moubuka mikip arye wilamak nang ara, sik dam din ning weik upliba, teleb ubuka dinamake. Sik din ning aning-aning nirya weik upnamle. Bukni, yatanye do nirya, ‘Nara weiknye uptinye’ tenen, kum winipmanto bukni, ‘Aning winipnamne do, aning winipnamne do,’ teneplirye, talye ninguk eibuka dobolbalulnye bira, talye-talye uk unamle. Elda, kanye moubuka kum tenepmantonye ulula ati, ‘Teleb ning ani, malye ning ani,’ teneplirye min kum wipmantonye ulule.

¹² Malye un ninguk, talibuka unyak nang arye, ‘Se, sik malye wininyak nang arye, ubula dolonyak ning ara, na babye ton doproptinye’ tenen, patapliba, kanye wililanyakce, yuk nang arye talinyak ninguk, teninauk unyake. Bukni, malye una kumce, diksukum ninguk talibuka unyak ninye, sik bidamang pil teleb ubuka donyaka deice arye, dipkoprob teleb ninguk dolonyake. Winipmanto ara, teleb yo arye, teleb yo duk weik moulamle tonun, unyake.

¹³ Malye yupu ap, tilila yupu ap, nyalulnye birye nyalye yupu ara, malyeuk winilya deice arye, elcuk el bidamang atibuk wena youlalule. Bukni, teleb un ninguk, talibuka ululnye birye, nyalul yupu deice arye, lyelilalule. Kanye imun ning ara, sik diksukum ninye dam yanamle talak nirya ara, lyepdakirye, telebuk unamake. Ikin ning ara, sik dam tuba-tuba kum unamle.

¹⁴ Ninye nirya arye, pia pi deibuka, mikip arye teleb piluk dolamikca deice arye, teleb ning ayala-yala nirya, sik dam yangalule. Aning atonun, yata ninye do nirya, teleb yupu uk nyanyaka deice arye, teleb ning ayala-yala nirya, sik dam yanganamle.

¹⁵ Tonda kanye moubuka tenena kumce, walwal ninguk wininyak nang arye, tenenyak ning ara, ‘Kume, nunce, wininamabe, wininamabe, tenenyap ning nirya ara, telebuk tenenyaba anya arye, telebuk unamabe,’ tenenyake. Bukni, sikda pia walwal uk unyake. Bukni yatanye do nirya, ‘Na tenenye ning ara telebuk ulula anya arye, aninguk winipnin banamne,’ kum teneplirye, yuk kel bikne nang arye nyanyak yupu ton moubuka kekelulnye bira, dipkoprob pia weik kel bikinanye ulule. Kel bikne nang arye elti, ‘Wininalyame,’ nyabuka peterenyak yupu moubuka kekeplirye, ulula anya arye, elda dipkoprob kel bikinanye ulule.

¹⁶ Yuk nang arye, wenen yupu nyabikiba, walwalnye birye kekeplyopura, adiparyuk yu teneplirye, minopce tamubuka yu yupu talye lukparabuka nyalule. Bukni, sik kel bikne nang arye, kanye moubuka teninyaka anya arye, yuk nang arye sikti, wenen yupu do, malye nyan yupu do, sik nong deice deibica babye, adiparyuk yupu tamubuka kum nyanyake. Sik kel bikne nang arye, ‘Kume, teleb ning ara aning do, aning do, moubuka tenipdekirye, aminyan talak uk yupu nyapnamabe,’ tenenyake.

¹⁷ Yatanye do nirya, dipkoprob teleb yupu uk nyalulnye bira, ninye yupu lipsisikuka bokolina talak ara, diksukum yupu uk nyalule. Ninye dipkoprob winilamak touk, ubuka lakak arye, nyalule. Anye birye nyalul yupu ara, dib tenetibye. Bukni, malye yupu ap, tilila yupu ap uk, nyalulnye bira, ninye yupu lipsisikuka bokolina talak nirya ara, ninye arye winilamak touk, dipkoprob ubuka kum nyalule. Anye birye nyalul yupu nirya ara, tilila yupu uk nyalula ati, elce nyalul yupu nirya ara, dib kum tenenamlume.

¹⁸ Ninye ton sik yupu nyapnuce talak ara, moubuka tenena kumce, talye-talye yupu uk, nyalamak ninye ara, sik yupu nyanyaka deice arye, ninye talimak parang ya tace arye, talimak lukliba, uk dilamle touk wininyake. Bukni, weik kel bikin nang arye nyanyak yupu ara, teleb yupu uk nyanyaka ati, sik yupu nyanyaka deice arye, ninye nirya ati, teleb ulinyake. Winipmanto ara, ninye kwetena deiyok nang arye, uk dilamle ninye kwetelamak touk, weik kel bikin nang arye nyanyak yupu deice arye, yuk ninye kekebicopura, sik kanye talima melilanyakba, teleb kilinyake.

¹⁹ El si bam bol deice arye, teleb yupu uk nyalulnye bira, pia ati kam uk unamle. Bukni, el sitang deice arye, malye yupu ap minina yupu ap, tilila yupu ap, nyalulnye bira, pia kam kum unamle. Anye bira, pia kam kum unamle. El ap, el nyalye yupu ap ara, pia kam kum unamle.

²⁰ ‘Malye un ninguk wininamabe,’ tenebikirye, yupu sisikinyak ninye, sik talima noutamak ara, tilila ninguk ulule. Bukni, ‘Nun ap, yuk nang ap, talima dukdongobuka teleb ubuka, neika uk unamap’ tenen, yupu sisikinyak ninye ara, sik kanye talima noutam ara, teleb kanye bobuka unyake. Sik kanye talimak ara, teleb tenen ninguk ulula anya arye, teleb ninguk tenekirye, kanye deibuka teleb yupu uk talinyake.

²¹ Teleb ninguk talibuka unyak ninye, sik dam ara pia weik kanye imun ning ap, yuk ikin weik pirilen ning nirya ara, sik dam ton pia kum unamle. Bukni, malye un ninguk talibuka unyak nang ara, sik unamakak nirya ara, pia weik kanye imun ning ap, pia weik pirilen ning ap, tuba-tuba yangaliba, imun kanye bobuka unamake.

²² Sik si pum bisik arye, tilila yupu uk panalul nang ati ara, Allah Yahweh arye, ‘Aninye ara na like,’ tenelule. Bukni, teleb ubuka ukirye dipkoprob yupu uk nyanyak ninye ara, Allah Yahweh arye, ‘Aninye ara, na kanye pia delinune,’ tenelirye, aninye ati melibuka teleb kililule.

²³ Weik kel bikamuknye birye, el kel bikamuk ning ap, pia weik kel arye tenelul ning ap ara, lakak aryuk weik arye kum nyalule. Ara elce, ‘E yuk nang nirya ara nati, se elda pia weik kel bikilulnye ulule, tenenamniyak’ tenen, min kum nyalule. Elce weik kel bikne ning kel bikamuk ning ara, duknuna atonun ulule. Bukni, dipkoprob walwalnye birye, ‘Yuk ninye nirya ati, nati, elda weik kel bikinanye tenepnamniak’ tenen, yupu weik arye nyalule. Bukni, elce nyalul yupu ara, dipkoprob walwal aryuk nyalula anya arye, ayupu kekenamak ninye ara, ‘Dipkoprop anye bira, walwal uk ulule,’ tenenamake.

²⁴ Ninye ton, pia pi dobuka, el taruk mikip arye, pil dolulnye bira, aminyan talak yuk nang eibikirye, ‘Elda teleb pil dolulnye binya arye, nun ninye deiyoknye upnamsil’ tenen, anye bira erepdeipnamake. Aminyan talak, anye birye, ninye deiyoknye unamle. Bukni lik upmalibuk, teleb kibuka pil kum dolirye, talye-talye uk ululnye, elda yuk nang amu tam uplirye, talye pil melinanye unamle. Elce pil donamle ning ara, deken ning kum dolonamle. Talyeuk unamle.

²⁵ Yatanye do nirya, elce, ‘Se, yata wiripnamnil do? Ikin ning na dam yanamle do? Yuk ninye arye, nati, ikin ning dobuka, na nong deice deilinamniyak do?’ tenen, malye kanye bobuka ululnye bira, ilil kanye bobuka, talima noutam engena uk unamle. Bukni, yuk nang arye, anye biti eibikirye, el ikin ulye ning kel bikikirye, ‘Se, nun kwit melipnuyap’ tenen, el talima melina ati, teleb yupu nyabikcopura, anye kekeplirye, aminyan talak tuba tamubuka kanye deibuka unamle.

²⁶ Malye un ning nirya batakuka, dipkoprob teleb ninguk talibuka ululnye birye, el kayapu nang ati, ‘Wininamlulume, wininamlume,’ nyabuka peterelul yupu ara, teleb yupu uk nyalule. Sikda teleb un bisikuk banamake. Bukni, sik malye un ning ayala-yala nirya talibuka unyak ninye arye, sik kayapu nang ati, nyanyak yupu ara, malye yupu uk nyanyaka ati, anang ayupu kekebikirye, dobolbakcopura, malye un ning aning-aning nirya weik tonap winipnin banamake. Malye un bisikuk banamake.

²⁷ Ninye ton lik-lik asa arye unyak nang arye, bai tam ulamle kam ning mal arye obicopura, ‘Nun ap, nun kayapu nang ap arye, aning kwalibuka dinamap’ tenena kumce, lik upliba, aning talye batakanyake. Bukni, sik diksukum ninguk talibuka unyak nang arye, sik talinyak ning nirya ati ara, ‘Aning-aning nirya ara, teleb ning anya arye, aning nirya moubuka talibibirye, telebuk unamabe’ tenen, wininyake. Dekna weik ning babye, dekna mitik ning babye, moubuka talinyakce, teleb piluk donyake. Tonoknye babye, talye kum batakanyake.

²⁸ Ninye ton teleb un ninguk talibuka ukirye, diksukumuk un bisikuk banyak ninye nirya ara, pia kam una deiyok ning doprobikirye, kanye deibuka pia ati unamake. Diksukumuk unyak ninye ara, kam pia unamak bukni, malye ninguk talibuka unyak ninye ara, sik banyak bisik ara, dipna damuk banyake.