Amsal 10 - Eipomek

Salomo birye kam nang ati, ‘Teleb kibuka unamak’ tenen, nyabuk yupu

¹ Raja Salomo birye teleb yupu nyabuk ning ara ani. Pia kel weik bikikirye, teleb kibuka upra banamak mapu nirya ara, sik ni yapu arye, amapu ati, pia kanye delinyake. Bukni, malye ninguk winipra banamak mapu ara, sik winipra baca deice arye, sik nin yapu ati, malye kipdeibikiba, sik nin yapu koprop ara, talima uk dinamle.

² ‘Bon-bona weik ning talibuka ubirye, kanye deibuka unamabe,’ tenekirye, tilila yupu ap, tenepce arye nyana ap, ubula dona ap deice arye, dekna weik ning dolonamlum ning nirya ara, nong ton pia kum upnamsile. Malye uk upnin banamsile. Bukni, malye un ning nirya ati, ‘Na like,’ tenebuka batakikirye, diksukum un ninguk, talibuka unyak ninye ara, sik nong dibica babye, kam pia unamake.

³ Winibuka, malye un ning batakikirye, teleb un ninguk upre banamak nang ati ara, Allah Yahweh arye, melibuka kalikilya anya arye, din patana ap, ikin kanye bona ap, pia kum unamake. Bukni ninye ton, ‘Malye uk winipre banamap,’ tenenyak nang ati ara, Allah arye, ‘Aning ara, na like,’ tenelirye, sik patan ning kum arelule.

⁴ Ninye ton, ‘Pil dona na like,’ teneplirye, talye kanye bobuka talye-talye urdemuk balamlanye bira, aning-aning nirya talibuka kum unamle. Elda bon-bona talina kumce, pia bona utotoa talina kumnye unamle. Bukni, ninye ton taruk mikip arye, pia pi dobuka pil donyak nang ara, bon-bona weik talibikirye, bona weik talin nang unamake.

⁵ Yatanye do, dou malamle talak, min arye kouamlye ning akunum wisipliba, aning nirya bulubuka delilulnye bira, pia weik kelnye ulule. Bukni, yatanye do nirya, dou malamle talak, koulamle ning ati, ‘Lin talak akunum upliba, adin ning lin talak akunum unmale,’ tenebuka kintinilina kumce, talye kanye bobuka ulula ati ara, tuba-tuba mana uk ulule. Winilamlanye bira, malye ulula anya arye, el li yapu arye elti, alye dakalinamake.

⁶ Ninye ton malye un ning nirya batakikirye, diksukum teleb un ninguk, winipra banamak ninye ara, Allah arye sikti, meliplirye, pia telebuk ulinamle. Winipmanto ara, ninye arye, sik deiyok nang ati, ‘Sikda pia weik mambul nang unyake, tenenamak’ tenen, sik kisok deice teleb ning, el si ara mahkota, ongolilamak touk, Allah arye sik diksukum unyak ninye ati, weika arye meliplirye, telebuk ulinamle. Bukni, malye un ninguk talibuka unyak ninye ara, ‘Yuk nang arye, nun malye un ning kel biksikirye, wenepsicak’ tenen, kunusa dokirye, tilila yupu nyanyake. Namin yupu uk nyanyak bukni, sik talima pum tam ara, malye un ning weik ulule.

⁷ Ninye ton teleb ubuka ululnye diplyopura, aminyan talak unamak ninye arye, elti, tenebikirye, ‘Se, anye bira dipkoprob pia telebuk ulamuka ati ara, nun kanye deibabe,’ tenenamake. Bukni, malye un ninguk talibuka upre banyak nang dibicopura, aminyan talak unamak ninye arye, sik si ara, luba kinamake. Amalye unyak ninye ara, sik si nirya kum upra banamle.

⁸ Yata nang do, sik kanye teleb asa arye ukirye, pia weik kel bikinyak nang ara, sik deiyok nang arye, “Wininamlulume, aning ara kum wininamlulume,” nyabuka wenebicopura, moubuka kekebikirye, telebuk unamake. Bukni, yatanye do el talima pum tam malye un ninguk upliba, walwal arye talye-talye yupu weik nyaltakalul walwalnye bira, aminyan talak saknamle. El winilul ning nirya, malye upra banamla anya arye, aminyan talak saknamle.

⁹ Ninye ton, tilila yupu nyana kumce, diksukum ninguk talibuka ululnye bira, kanye lamapdongobuka teleb bisikuk banamle. Elda telebuk unamle. Bukni, yata nang do nirya, tenepce arye minina yupu uk nyanyakce, kirikuka yuk malye un nang ban bisik banyak ninye ara, wini talak sik malye un ning kunusa donyak bukni, aminyan talak ara, yuk ninye nirya arye, sik malye un ning ati, kel kibikirye, lakak arye laka nyanamake.

¹⁰ Aning atouk, yata nang do nirya, malye un ning ati, ‘Dauplye’ tenen, kunusa dobuka, mangkau kibikcopura, diksukum wininyaka deice, yuk ninye sik dam ara, ikin weik ning yanganamle. Tonda, yatanye do el kanye pum tam malye un ning tuba auplya deice arye, talye-talye yupu weik, nyaltakalul walwalnye bira, el winilul ning nirya malye upra banamla ati ara, aminyan talak saknamle.

¹¹ Ninye ton malye un ning nirya batakikirye, diksukum un ninguk winibikirye, teleb yupu nyabikiba, yuk ninye kekebicopura, sik kanye talima kwa dilule. Tonda aninye nyanyak yupu deice arye, yuk ninye ati teleb ulikiba, kam unamake. Bukni, malye un ninguk talibuka unyak ninye ara, ‘Yuk nang arye, nun malye un ning kel biksikirye, wenepsicak’ tenen, tenepce arye, tilila yupu uk nyaltakanyake. Namin yupu uk nyanyak bukni, sik talima pum tam ara, malyeuk ulirye, malye un ning nirya duknunyake.

¹² Tonda, ton nang arye yuk nang ati, ‘Aning ara nun like,’ tenebikirye, kanye talima wilibuka, mal pipdacopura, yu ning kutukuka, minopce olana uk unyake. Bukni, ninye arye yuk nang ati bico tenebuka kanye deipdacopura, amalye tenenyak ning ap, yu tenen kanye ap, malye ulilanyak ning nirya ap ara, adiparyuk luba kinyake.

¹³ Ninye ton kanye moubikirye, ‘Teleb kibuka un ning ara ani, malye un ning ara ani,’ tenebuka, diksukum unyak ninye ara, weik kel bikna yupu arye nyanyake. Sik yupu ara, pia telebuk nyanyake. Bukni ninye ton, ‘Teleb una ara ani, malye ning ara ani’ tenen, moubuka tenena kumce, malyeuk winipra banyak ninye ara, sik wenena ati, kama dobuka, sik balye deice opnamlulume.

¹⁴ Ninye ton pia weik kel bikna deiyok ninguk, talibuka unyak nang ara, teleb un ninguk unyakce, aning-aning nirya teleb kibuka, kel kibikirye, aninguk moubuka delinyake. Bukni, yatanye do, el talima malye un ninguk upliba, walwal arye talye-talye yupu weik nyaltakalulnye bira, aminyan talak saknamle. El ulul ning nirya, malye upra banamle. Bukni, malye un ninguk ululnye, el si bam bol pum tam arye, malye yupu uk panamliba nyalule.

¹⁵ Sik bona utotoa talin weik unyak ninye arye, talinyak dekna weik ning dobuka, ‘Nun dokola’ tenen, moubuka delinyake. Ara, kota mutuku, pia weik asik domikirye, ‘Yuk nang arye yanuka wekuka, ubula dopsicak’ tenen, pia weik cang keil poka antanap dongobuka dobikirye, apoka pum uk unyake. Bukni, sik talye bona utotoa talina kum ninye ara, weik imun ninguk, talibuka unyaka ati ara, sikda aning-aning nirya talibuka kum unyake. Bona utotoa talina kum ninye uk unyakce, amu tam unyake.

¹⁶ Ninye ton, malye ning nirya batakikirye, diksukum un ninguk, talibuka unyak ninye ara, teleb un ninguk upra balamica ani, aminyan talak dekne ning dopdobikirye, pia kam uk unamake. Bukni, malye kibuka ulirye, malye piluk dolulnye bira, amalye piluk dopra balamlya ani, aminyan talak ara, el pil dolul ning dekna ati, ikin ning weik dopropnamle.

¹⁷ Yatanye do nirya, malye upmaliba, teleb kibuka unyak nang arye, wenen yupu deice arye peterebikiba, teleb kibuka kekelulnye bira, kam un bisik tam uk kilongolule. Bukni, yatanye do, malye winipliba, teleb kibuka unyak nang arye, wenen yupu nyabikiba, elce, ‘Ayupu ara na like, pia kum kekenamne,’ tenelulnye bira, malye winina dam anyuk balule. Tonda, el malye winipra balamle ning, yuk nang eibikirye, ‘E, el winilul ning ara, nun babye atonun wininamabe’ tenen, kel bikikirye, sik babye malye bisikuk banyake.

¹⁸ Yata nang do nirya, sik sitang deice arye ninye ati, minina yupu nyabuka kunusa donyak nang ara, tilila yupu uk nyaltakanyake. Atonun, yatanye do, deiyok kum upmalibuk, yuk nang ati, tilila yupu ap, minina yupu ap, lululan yupu ap, nyaltakalulnye bira, dipkoprob kanye bona kum anya arye, pia walwalnye koproba ulule.

¹⁹ Anggun nirya kanye mouplulume. Yupu weika arye nyapra bamunya deice arye, dipkoprob malye un ning ton, upra banamlume. Ara, ‘Talye yupu weik nyapra bamunya deice arye, malye winipmunyak’ tenen, nyapsine. Bukni yatanye do, ‘Na mangkau arye malye yupu nyapnyak’ tenen, el sitang moubuka kalikdalirye, nimalya arye nyalulnye bira, dipkoprob pia weik kelnye ulule.

²⁰ Ninye ton malye un ning nirya batakikirye, diksukumuk unyak ninye arye, nyanyak yupu ara, pia telebuk ulule. Winipmanto ara, dekna weik ning, el si ara perak ara, mitik teleb ulul bukni, sik diksukumuk unyak ninye arye, nyanyak yupu ara, pia weik telebuk ulule. Bukni, malye un ninguk talibuka ululnye bira, el talima pum tam babye, pia malye ninguk, weik ulule. El kanye talima pum tam tenelul ning ara, mambul pia kum tenelule. Elda talye ninguk tenelule.

²¹ Tonda, malye ning nirya batakuka, diksukum un ninguk talibuka unyak ninye arye, nyanyak yupu peterebikiba, yuk nang arye kekebicopura, ayupu kekece ninye nirya ara, telebuk unamake. Sik nyanyak yupu deice arye, ninye pia weik teleb kililanyake. Bukni, ‘Teleb un ning ara ani, malye un ning ara ani’ tenen, moubuka kum tenebikirye, talye walwal uk unyak ninye ara, moubuka tenina kumce, malye ninguk winipre banyaka anya arye, sik bidamanguk, akunum olilanyaka ati, dipnamake.

²² Allah Yahweh arye, ninye melina ati, kintinilisulul ning teleb ning ara, dolonyaba deice arye, bona weik talin nang kilisulule. Tonda, Allah arye bona weik talin ning arisilya atonun ning ara, ikin ning ap, kanye imun ning ap, ton tabakuka arisilya ak, ton kum dolanamabe.

²³ Kanye teleb bona kumce, talye walwal kanye uk bobuka unyak nang ara, malye winin ninguk, kanye deibuka unyake. Bukni, kanye moubuka tenelirye, ‘Teleb ning ani, malye ning ani’ tenen, teleb un ninguk winilinye bira, pia weik kel bikna deiyok ning atibuk, kanye deibuka ulule.

²⁴ Malye ninguk talibuka unyak ninye arye, ‘Se, weik imun ning nun nong deice yanuka upsilyak’ tenen, ilil upliba, mambul kanye donyak ning ara, dipkoprob aminyan talak, sik dam yaliba, dolona uk unamake. Bukni, malye un ning nirya, batakuka diksukumuk unyak ninye arye, ‘Se, pia teleb un ninguk unamsil’ tenen, kintinibuka dinauk unyak ninye ara, Allah arye sik patalul teleb ning arepliba, dolona uk unamake.

²⁵ Winilula ati ara, malye, el dam ara, pia weik kumanya mikip yalirye, amalye ululnye dam, yanuka puplirye, el nong bobiliba, kum danamle. Bukni diksukum teleb ubuka unyak ninye ara, pirilen ning ton, sik dam yatua babye, kum lulukdenamake. Pia tunim abuka telebuk unamake.

²⁶ Winipmanto ning ara, ninye wekmace aik pum tam tulum wekliba, anyaik bukmace nang, sik asing uk dipliba malye kanye bonyake. Aning atouk, pia yu ning dibipyopura, siuk arye malye kanye bonyabe. Aning atouk, ninye deiyok nang arye, ‘Mambul pil dopnamsil’ tenen, ninye tonoknye ton, wibuka dolinyak bukni, anye birye, ‘Ikin pil dona na like’ tenen, talye kanye bobuka, mana uk ulyopura, sik deiyok nang ara, pia malye kanye bobikirye, lik weik ulule. Ninye yupu kekepmanto kumnye birye, el deiyok nang ati, sik kanye malye ulin uk ulule.

²⁷ Allah Yahweh atibuk, ilil tenebuka ukirye, ‘Elda pia weik mambulnye ulule’ tenen, el siuk erebuka, el tibuk kanye deibuka unyak nang ati, Allah arye, lo tonap ouku weik arepliba, keting tamun weik tonap, kam unamake. Bukni, malye un ninguk talibuka unyak nang ara, Allah arye sik kam una ati, ouku kum arepliba, keting tamun tonap ouku arye, pia kum unamake. Noutam karin arye, wisi kum danmakibuk, dibini uk unamake.

²⁸ Malye winin ning batakikirye, diksukumuk unyak ninye ara, pia telebuk upra balamica ani, aminyan talak ara, pin-pin kanye bobuka unamake. Bukni, ninye ton pia malye ninguk ululnye birye, ‘Se aninguk uptinye’ tenen, patalul ning ara, pia dipkoprob nong kum upnamle. Elce tenelul ning nirya ara, kum danin banamle.

²⁹ Allah Yahweh arye, “Wininamalulume, teleb un ati, ban bisik ara ani,” nyabuka, peteresulul yupu moubuka talibikirye, diksukum bisikuk dobolbanyak ninye ati ara, Allah Yahweh arye, aninye ati melibuka kalikinamle. Weik imun ning ton, sik dam kum yanamle. Bukni, malye winin ninguk winibikirye, malye bisikuk dobolbanyak ninye ara, Allah Yahweh arye aninye ati, wenebuka oltakanamle.

³⁰ Malye winin ning batakikirye, diksukumuk wininyak ninye ara, kanye deibuka telebuk unamake. Allah arye, sik unamakak ati, teleb mutuku areplyopura, ikin ning anggun dam yatua babye, sikda pia diksukum unyak ninye ati ara, pia kanye darabuka unamake. Yukak leibuka kum bindopnamake. Bukni, malye winin ninguk talibuka ululnye bira, pia kanye darabuka ulirye, el mutuku koproba ton, talibuka kum unamle. Ikin ning yalyopura, yukak leibuka bindopnamle.

³¹ Ninye ton malye winin ning nirya batakikirye, diksukum kibuka unyak ninye ara, sik si bam bol pum bisik arye, teleb yupu nyanyak ning ara, pia weik kel bikna ninguk nyanyake. Bukni, malye ninguk talibuka ululnye, el si bam bol deice arye nyalul yupu ara, tilila yupu ap, minina yupu ap, nyalul yupu nirya ara kum danamle. El sitang babye, seklobikba, yupu kum nyapmanto unamle.

³² Ninye ton sik talima diksukumuk unyak ninye, sik si pum tam arye nyanyak yupu ara, ninye nirya kekebikirye, sik kanye talima nirya, kil-kil upliba, kanye delinyake. Bukni, malye winin ninguk ulamak nang arye, nyanyak yupu ara, tilila yupu ap, minina yupu ap, lululan yupu ap, tenepce arye nyan yupu ap nirya, ansinibuka nyanyakba, yuk ninye kekekirye, sik kanye talima like ulule.