Amsal 1 - Eipomek

Raja Salomo bira, ‘Israel ninye nirya ara, weik mambul ning kel kibikirye, diksukumuk unamak’ tenen, nyabuk yupu

¹ Ayupu ara, Israel mutuku ninye talibuka ulamuk ninye deiyoknye, Daud el mi Raja Salomo bira, pia weik kel bikna yupu deice arye nyabuk.

² Anyapnusin yupu deiyok ara, ani. Yata ninye do nirya arye, dipkoprob pia weik kel bikna ning kel biknirye, ‘Dipkoprop teleb winin ning ara, ani’ tenena ap, tonda nong bol deice uk kum bukni, mambul yupu nong noutam ninguk, kel bikna ap ati, ayupu nirya nyapnusine. Ara, talye kanye bobuka una kum bukni, ‘Malye winibipyak’ tenen, moubuka tenekirye, diksukumuk winibuka, una kel bikna ati, ayupu ara nyapnusine.

³ Tonda, anyapnusin yupu kel bikmunyopura, talye-talye kum unamlulume. Anggunce, ‘E, diksukum un ning ara ani, ninye arye winilamak touk, teleb kibuka yupu bokolina ning ara ani.’ Tonda, ‘Na kayapu, tenena kum diparyuk, yu kanye bolana kumce, ninye nirya ap neika teleb una ara ani’ tenen, kel biknamlulume. Anyapnusin yupu moubuka kel bikmunyopura, anggun nirya ara, talye mangkau asa una kum bukni, ‘Malye ubipyak’ tenen, moubuka tenepmunce, kalikelanamlulume. Tonda, ‘Diksukumuk una deiyok ning ara ani’ tenen, moubuka kel kipmunce, teleb asa ubuka unamlulume.

⁴ Ninye ton mitik walwal unyak ninye arye, anyapnusin yupu moubuka kel kibikcopura, sik babye pia weik kel bikna deiyok ning moubuka tenenamake. Tonda, wel ninye babye, ayupu moubuka kekebikirye, talye-talye kum unamake. Aning kum bukni, talye mangkau asa una kumce, ‘Malye ubipyak’ tenen, moubuka tenebikirye, diksukumuk unamake.

⁵ Yata ninye do nirya, pia weik kel bikna deiyok ning akunum kel bikamik ninye babye, ayupu kekebicopura, pia weik kel bikna deiyok ning ton tabakuka, kel bikra banamake. Aning atouk, nong bol deice uk kum bukni, nong noutam ning akunum kel bikamik nang babye, ayupu kekebikirye, ‘E, bana teleb bisik ara ani,’ tenebikirye, diksukumuk upre banamake.

⁶ Anyapnusin yupu nirya ara, pia weik arye kel bikmunyopura, domon yupu ikin weik ning ap, winipmanto yupu ap, deiyok ning aupmatu babye, moubuka kel bikinamlume. Tonda, pia weik kel bikamik nang arye, domon yupu nyanyak yupu ap, duknubuka nyanyak yupu ap ara, ‘E, ayupu deiyok ara, ani’ tenen, pia weik arye kel bikinamlume.

⁷ Weik ikin yupu nyapnusin ning ara ani. ‘Weik kel bikna deiyok ning, moubuka tenepnirye, telebuk unamne’ tenen, patalul ninye ara, minopce nun ni koproba Allah, el si Yahweh ati, ‘Elda pia weik mambulnye’ tenen, ilil upliba, el siuk erebikirye, el amu tamuk unyake. Bukni, kanye bona kumce, pia walwal asa unyak ninye ara, diksukum un ning nirya ati, ‘Nun like,’ tenenyake. Sikce pia weik kel bikna deiyok ning ap, tonda talye mangkau asa una kum bukni, ‘Malye ubipyak’ tenen, moubuka tenebikirye, diksukumuk un ning ati, ‘Nun like,’ tenenyake. Ara, pia walwal uk unyak ninye ati nyapne.

Wel ninye arye, ‘Moubuka kekebikirye, telebuk unamak’ tenen, nyabuk yupu

⁸ Na mapu nirya ara, anggun ni yapu arye peteresikce yupu nirya ara, moubuka kekepmunce, talinamlulume. Aning atouk, anggun nin yapu arye, nyasinyak yupu nirya babye, moubuka kekepmunce, pia kum batakanamlulume. Ayupu nirya ara, talibuka unamlulume.

⁹ Ara, anggun ni yapu ap, anggun nin yapu ap, sikce nyanyak yupu moubuka kekepmunyopura, pia telebuk unamlume. Winipmanto ara, ninye arye, urasin pia teleb ning dobuka, ‘Nun ninye deiyoknye ati, ninye nirya arye kwerya dolinamap’ tenen, el kisok deice dolilamak. Aning atouk, ninye arye, pia dekna weik ning dobuka, rantai tapu atonun ning kintinip deibikirye, weik sisin nang sik ngang dam karaklamak touk, anggun ni yapu ap, anggun nin yapu ap arye, nyasinyak yupu nirya ati, moubuka kekenamak mapu ara, pia teleb ulinamsile.

¹⁰ Se, na mio, malye un ninguk talibuka unyak nang arye, ‘Ami el kanye talima arukdeibiba, malye unamle’ tenen, an dam yanuka yukupdopkicopura, sik yupu pia kum kekenamlyame.

¹¹ Winipmanto ara, amalye wininyak nang arye, nyanamkiyake. “Anda nun melipsilyame. An ap, nun ap nun nirya arye, yuk nang talye opribatakanamabe. Tonda, malye kum upmakirye, mangkau kanye bobuka dabanamak nang ati, nun duknupmabya arye, anang yangakibuk, oltakanamabe.

¹² Ninye dibikiba, tuku lukikirye, sik nong nirya dobuka atuku pum bisik dongolamak touk, talye dabakce ninye obuka, batakibiba kum unamake. Sikda, wel nang tuba unyak bukni, nunce aninye obibiba, tuku lukikcopura, dibinyak nang wekelbanyak sukumuk, binuka unamake.

¹³ Nun adiparyuk yuk nang sik aik bibirye, yo bok dekna weika arye deklamak pia weik mambul ninguk ubula dopropnamabe. Yuk nang talinyak ning ubula doprobibyopura, nun aik koproba tamubuka yanuka delinamabe. Urasin pia teleb ning weika arye doprobibya deice arye, nun aik yanuka deibibyeba, aminyan talak nun aik langdipnamle.

¹⁴ Wininamaba ati ara, anda nun melipsiminba, an ap nun ap neika ubula don ning weika arye, doprakda nun aik delilbalamipaya ani, aminyan talak aning-aning nirya weik uplyopura, nun nirya arye, neiktoto uk aning bokuka dolanamabe,” nyabuka amalye un ning talibuka unyak nang arye, anti nyabuka yukunamkiyake.

¹⁵ Se, na ni mio, malye un nang arye nyabuka yukunamkiyak bukni, anda sik anang ap melibuka bana pia meme. Sik malye nang arye banamak bisik ara, neika kum banamlulume. Anda tonok yan aniryuk kum banamlyame. Sik anang arye nyabikce yupu kekepmince, sik ap melibuka dobolbana pia meme.

¹⁶ Ara, talye ati kum nyapkine. Deiyok ara, sik anang ara, ‘Malye ninguk talibuka unamap’ tenen, minopce pol asa arye, malye un ning ati elbanyake. Aning atouk, sik anang arye, moubuka tenilena kum diparyuk, yuk ninye ati yu upliba, oltakanyake. Talye kanye deibuka aik kum bunyak bukni, ‘Ninye ton opnamabe’ tenen, pol-pol asa elbanyake.

¹⁷ Winipmanto ning ara, nyapnukine. Maka weika arye bulubuka amubikirye dinmakibuk, ninye arye, ‘Amaka tomopnuyabe’ tenen, maka tomon ning lakak uk delinyak do? Kume, sik lakak aryuk maka tomon ning deipmace talak, maka nirya arye, adeipmak ning akunum eibicopura, aning pum tam kum wekenyake. Ara, kanye bona kum ning ara, wininyak bukni, sik malye ninguk talibuka unyak ninye arye aning atonun unyake.

¹⁸ Ara, talye ati kum nyapkine. Amalye unyak nang arye, ‘Yuk ninye mangkau kanye bobuka bakibuk, talye karin arye anang oplonamabe’ tenen, duknunyake. Bukni, sik amalye wininyak nang ara, sik bidamnye atibuk wena welanyake. ‘Yuk nang opnuyap,’ tenenyak bukni, sik bidamnye arye, sik bidamnye ati olanyake. Aning ara, sik bidamnye uk tamubuka youlule.

¹⁹ Aning atonun, yata ninye do nirya, ‘Nun patasulul ning ara, yuk nang sik nong obibirye, sik talinyak ning ara, mikip arye dalubuka ubula dolanamabe’ tenen, wininyak ninye nirya ara, amalye winin ning wininyaka deice arye dipnamake. Dipnamaka deiyok ara, ubula donyaka deice arye, sik nong uk dekelanyake.

“Weik kel bikna deiyok ning ati, ‘Nun like’ tenen, batakna kume,” nyabuk yupu

²⁰ Winipmanto yupu deice arye nyapnusine. Weik kel bikna deiyok ning ara, kil atonun ulule. Akil ara, pia weik kel kiamuk kil ati ara, ninye banyak bisik noutamak arye, pia weik yupu deice arye, “Anggunda, ‘Kanye imun ning nun dam yanamsil’ tenen, anggun kanye mouplulume,” nyalule. Ninye asik pia weik arye dolamika noutamak, ninye bulubikiba, ‘Yupu nyanamak’ tenen, kintinibuka deibikba, lo ubuk noutamak yanuka tiklirye, pia weik yupu deice arye, “Na yupu nyapnusin ning ara, anggun kanye moubuka kekeplulume,” nyalule.

²¹ Tonda ninye weika arye, banyak bisik noutamak tiklirye, yupu pia weik arye nyalule. Tonda, ninye asik dolamikce, ongomkanim abuka, domik keil poka bisik bublan dam yanuka tikuka, pia weik yupu deice arye, “Anggun kanye mouplulume,” nyabuka, wenen yupu nyalule.

²² Se, anggunda walwal ninye uk ululume. Kanye bona kumce, pia walwal deice aryuk umunye ning, pia malye weik ulamunye ning atibuk, kanye deibuka ululume. Yata talak tonap, amalye winin ning ati, kanye deibuka unamlum do? Anggun yep-yep alulum ninye ara, yata talak arye, yata karin arye tonap, talye kanye deibuka, yep-yep tuba nyanamlum do? Anggun kel bikna deiyok ning ati, ‘Nun like’ tenen, walwal kanye bobuka umunye ninye ara, yata talak karin arye tonap, walwal un ninguk winiltakanamlum do? Aning atonun, dan talak na nyasinye yupu ati, moubuka kekepmunce, kel biknamlum do?

²³ Narye anggunti, “Aning ara malye winipmalame,” nyabuka, wenepsise ning ara, kum kekenululume. Narye, anggunti, “Aning ara, malye umunye ning ara batakso,” nyabuka wenelamse ning, akunum kekepnutum toura, narye anggunti bico tenebuka, pia weik kel kiamsa deice arye, na kanye talima pum tam tenenun ning nirya laka nyapsitinyeba, akunum bikamtume. Bukni, na nyasinye yupu nirya ara, pia kum kekenululume.

²⁴ Bukni, narye anggunti yukupsise talak ara, anggun nirya ara nati, ‘Nun like’ tenen, batakamnulume. ‘Aninye melinamne’ tenen, na taruk erebuka anggunti arepse bukni, anggun nirya arye, ‘Nun like’ tenen, nati mangkau kanye bokuka bataklamnulume.

²⁵ Narye anggunti, “Teleb kibuka un ning ara ani, teleb kibuka ban bisik ara ani,” nyabuka, laka nyalamsise bukni, na nyalamsise yupu nirya ati, mangkau kina uk ulamlume. Anggunce, ‘Akil ara wenena yupu nyasulul ning ara, nun like’ tenen, yaniltana uk ulamlume.

²⁶ Na nyalamsise yupu nirya, yaniltana uk ulamnuluma ati ara, wini talak ara, pia weik ikin ning anggun nong deice yaliba, imun kanye bobuka unamlum talak ara, narye anggunti, ‘Dauplye’ tenen, akutunamsine. Kanye imun ning anggun dam yalyopura, narye, “Akunum nyalamsise bukni, bita merekuka ikin upnamsile,” nyapnirye, yep-yep nyanamsine.

²⁷ Winipmanto ara, pia weik kumanya ap, bebeya lingum ana ap, liman ap, talye karin arye yangalamle touk, aminyan talak pia weik ikin ning, anggun nong deice yanamsile. Tonda, kumanya mikip kumanya dobuka yalirye, min yuma butbuta bobuka adiparyuk bobalamle touk, imun kanye ning anggun dam yalyopura, narye akutunamsine. Aikin ning anggun dam yalyeura, dopropmunce, imun kanye bobuka bukmunye talak ara, talima uk dilamsiliba, pia teleb upmanto kum unamlume. Atalak ara, narye anggunti, “Kume na nyalamsise yupu kum kekelamluma dekna ara, ikin ning doproplume,” nyabuka, akutunamsine.

²⁸ Aminyan talak, ikin ning weik anggun dam yalyopura, anggunce nati, “Se, nun melibuka lyepsilyame,” nyabuka moronamnulum bukni, nara, “Aunmana ati ara, melipnusine,” kum nyanamsine. Anggunce moropnamnulum yupu ati, kekepnirye tamubuka kum nyapnamsine. Tonda, anggunce nati, ‘Se, nunda pia weik kel bikna deiyok ning patasulula ati ara, dobuka kel kiptibye’ tenen, epra banamnulum bukni, pia kum eipnamnulume.

²⁹ Ara, talye ati kume. Deiyok ara ani. Anggunce, ‘Pia weik kel bikna deiyok ning ara, talye yupu ati ara, nun like’ tenen, mangkau kanye bomluma dekna deice arye winipnamlume. Tonda, anggun nirya arye, ‘Nun ni koproba Allah Yahweh, elda pia weik mambulnye’ tenen, elti, ilil kum tenyamlumce, el si kum erelalume. Ati ara, anggun malye ulamluma dekna ati winipnamsile.

³⁰ Narye anggunti, “Teleb un ning ara ani, diksukum bana ati, teleb bisik ara ani,” nyabuka laka nyalamsise bukni, na nyalamsise yupu nirya, mangkau kanye uk bolamlume. Anggunce, ‘Aweik kel bikna deiyok ning lak len kil arye wenen yupu nyasulul ning ara, nun like’ tenen, yaniltana uk ulamlume. Ati ara, anggun malye ulamluma dekna ati winipnamsile.

³¹ Aning ati ara, anggunce winilamluma dekna ara ikin ning dopropnamlume. Tonda anggunce, ‘Winibuka malye wininamabe,’ tenepce arye, ‘Malye winin ninguk talibuka unamabe’ tenen, malye piluk dolamluma deice arye, dekna dopropnamlume. Aning deiyok ara, talye ati kume. Anggun bidamnye arye, anggun bidamnye ati, malye winililalulume.

³² Aning ara, talye ati kum nyapsine. Teleb un ning nirya ati, moubuka tenina kumce, walwal arye malye winin ninguk, talibuka unamak ninye nirya ara, sik bidamnye arye, malye wininyaka deice arye, olana atonun unamake. Sik bidamnye arye, sik bidamnye ati malye unyaka deice arye olanamake. Aning atonun, sik pia walwal uk unyak ninye ara, aning-aning nirya kel bikna kumce, ‘Weik kel bikna deiyok ning ara, nun like. Ayupu ara, talye yupu ati, dauplye’ tenen, unyak ninye nirya ara, sik walwal arye unyaka deice arye, opdanamake. Sik malye wininyak ning dekna arye, sik bidamang nanguk, malye kililanamake.

³³ Bukni, narye pia weik kel bikna deiyok ning ati, laka nyasinye yupu moubuka kekece ninye nirya ara, pia kam unyakce, telebuk unamake. Ara, sikce, ‘Se, yatato ikin ning arye nun dam yaliba, imun kanye bobuka unamap do?’ tenena kumce, talye kanye bobuka, pia telebuk unamake. Aninye ara, ilil kanye bobuka, kum unamak bukni, kanye deibikirye darabuka unamake.