Amos 6 - Eipomek

Israel ninye arye, ‘Teleb ninye unyabe,’ tenelamik bukni, malye ulamika ati, nyabuk yupu

¹ Allah arye nyabukba, Amos birye kekebuka sekuk yupu. Se, Sion mutuku noutam umunce, ‘Nunda telebuk ubuka unyabe’ tenen, talye kanye bobuka ululum ninye ara, bicoe nyapsine. Tonda, sik Samaria mutuku deice ukirye, ‘Ikin ning nun dam kum yatue’ tenen, teleb kanye bobuka, umunye ninye babye, anggun bicoe. Anggun nirya ara, malye umunye bukni, ‘Nunda teleb unyabe,’ tenelulum ning ara, Allah arye wenepsilirye, anggun deice ikin ning deipnamsila ati, anggunda bicoe. Sik Samaria mutuku nang ara, talye nang kume. Israel ninye nirya arye, sik si akunum kel bikamik. Tonda, Israel ninye nirya arye, ‘Nun ni yapu arye, kalikuka melinamsiyak’ tenen, sikti, kanye deibuka dikirye, ‘Nun melipsilyame,’ nyabuka moronyake. Bukni, sik nirya ara, bicoe nyapne.

² Ayupu ara, urdem ati kum nyapsine. Anggunce, ‘Ikin ning nun dam kum yanamsile,’ tenelulum bukni, moubuka tenenamlulume. ‘Aminyan talak ara, yata ikin ning yanamsil do?’ tenebuka, kel bikna ati, anggun min pola mutuku si, Kalne mutuku dilbilulume. Amutuku dipdemunyopura, abisikuk banmamunya ani, bimunce, weik asik dolamik mutuku, el si ara, Hamat mutuku binuka eipnamlulume. Winipmunce, anirye Pilistin ninye unyak mutuku noutam ara, mutuku si Kat mutuku ton, dilbinamlulume. Amutuku-amutuku ulamik ninye nirya ara, Allah wenebukce, obuka sirya daklamuk. Winilamuk bukni, anggunce yata ning tenelulum do? Anggunce tenemumnya ara, ‘Kume, Kalne mutuku ap, weik kota mutuku el si ara, Hamat mutuku ap, Pilistin ninye sik weik kota mutuku, el si ara Kat mutuku ap ara, amutuku noutam ulamik ninye nirya ara, malye ninye ulamik bukni, nunuk ara, teleb ninye unyabe,’ tenelulume. Tonda, anggunce, ‘Kume, sik yuk mutuku ulamik nang ara, sik mutuku ara, mitik pala mutuku uk taleamik bukni, nun mutuku ara, pia lo weik pala mutuku talinyaba anya arye, nun mutuku ara, min kum kum dasutue,’ teneluluma arye, talye kanye bolulum do? Narye dipkoprob nyapsine. Allah arye kum daneiamuk ninye ara, malye winilamik touk, anggun Israel ninye babye, malyeuk winilulume. Allah arye amutuku-amutuku ulamik ninye nirya, kum daneiamuk ning ara, moubuka tenenamlulume. Anggun babye, atonun winipnamsile.

³ Se, anggun nirya arye tenemunce, nyaluluma ara, “Allah arye nun malye wininyap ning ati, nun nong deice ikin ning deipnamsil sum ara, kum tenenamabe. Atalak aryuk, kanye imun ning kum yanamsile. Aning kum bukni, pia ouku weikto daunamabe,” nyalulume. Bukni, anggun ayupu nyalulum ninye nirya arye, anggun malye-malye weik winilulum ning deice, Allah arye wenepnamsil talak ara, akunum dam uple. Weik arye wenepnamsil ning ara, anggunce, anggun bidamnye arye, batakaldalulume. Allah arye anggunti, wenebuka, ikin ning deipnamsil sum ara, akunum dam uple.

⁴ Se, anggun mana telebakuk, mabuka kanye teleb bobuka ululum nang ap, tonda pia teleb domba basam ap, sapi basam ap, obuka kwalibuka dipmunce, kanye deibuka ululum ninye, anggun nirya ara bicoe. Allah arye anggun nirya ati, wenebuka ikin ning deipnamsilca. Ati, imun kanye bobuka, unamlume.

⁵ Tonda, talye kanye bobuka, teleb ning kwalibuka dimunye talak ara, anggun kanye deipmunce, bung-bung nyana, el si kecapi deice arye, kanye teleb mot libuka nyalulume. Ara, Allah el pil donanye Raja Daud birye, Allah ati, kanye teleb mot dobuka selamuk touk, anggunce, ‘Nun ton wininamabe’ tenen, talye mot dobuka, bung-bung ana, kecapi do, kitar do, ayala-yala nirya bobuka, mot selulume.

⁶ Tonda aning atonun, anggun mek dina ati, anggur mek ara, mek makau arye kwepmunyeba, langdiplyopura, weik arye dilulume. Tonda, anggun nong bol deice, pia teleb una ati, nintong teleb mek likilalulume. Talye kanye bobuka, aning nirya winilulum bukni, Israel ninye nirya malye wininyak ning ati, mambul kanye bobuka ulamtum bukni, aning ara, pia kum tenelulume. Anggunce, ‘Se, nun apu koproba, Yusup birye deiamukba, dadeipdanin yangalamikce, nun dam unyak Israel ninye ara, yata ning deiyok ati, malye ulilanyak do?’ pia kum tenelulume.

⁷ Aning nirya ara, pia kum teneluluma ati, yuk mutuku yu nang yanuka opsikirye, anggun Samaria mutuku weik nang nirya ara, anggunuk minopce bobuka, yuk mutuku wenen aik delilbinamsiyake. Allah arye lo arepliba, bobisiceura, anggun Samaria mutuku ninye weik, kwalina kwalibuka dipmunce, kanye deibuka umunye nang ara, dipkoprob kum danamsile.

⁸ Allah el si Yahweh arye nyabuk. Nara, Allah Yahweh Pia Mikip Weik Deiyoknye unune. Narye aning-aning nirya talibuka, deice tam Weik Erenanye ununye birye, na si deice arye, pia dipkoprob nyapsine. Ara, anggun apu koprop Yakub birye, deiamukba, dadeipdanin yangalamikce, wini talak unyak Israel ninye arye utenenyake. ‘Nunda dipkoprob pia teleb ninye unyabe,’ tenekirye, sik talima erenyake. Wininyaka ati, na Allah arye pia yu weik unulule. Sik kanye erelanyaka ara, na like. Tonda sikce, ‘Nun mal olan nang wekuka, kum opnamsiyak’ tenen, weik cang keil poka ap, keil aik ap domik ning nirya babye, naryuk dinirye, yu unulule. Ati sik deiyok kibuka unyak mutuku ap, amutuku noutam unyak ning, ayala-yala nirya ap, amutuku noutam unyak ninye nirya ap ati, na Allah arye dopropnirye, sik mal olan nang taruk deiceuk deipnamne.

⁹ Winipnamne talak ara, ninye tagu barye nang ton, amutuku asik pum dungnupmaca babye, eibukapnirye, adiparyuk sik nirya opneba, dipnamake.

¹⁰ Tonda, yuk asik ara, ninye weik arye akunum dibicopura, anggun tamnye ton yalirye, sik adipmace nang weina ati, sik nong bobalye talak ara, winipnamle. ‘Anyasik pum tam, ninye tonok ton tuba kam unmal do, kum do?’ tenen, anye el balye tam arye nyabuka asipdenamle. “Anyaik pum tam ara, tonoknye ton kam unmalamce, dungnupmalam do?” nyabuka asipdenamle. Asipdelibuk, tonoknye birye, “Na tonok kam unmane,” nyaplyopura, dipmace nang weina deiyoknye birye, nyapnamle. “Yuk ninye ton, an kam unmalama atonun unmak do? An tonok do?” nyabuka asipdenamle. Ayupu nyapliba, anyaik kam unmalinye birye kekeplirye, “Kume, na tonoka. Tonda, Allah Yahweh, el si ton pia kum nyanalyame. Yupu mitik tonun arye nyapminba, Allah arye kekepkilyopura, tuba tamubuka yalirye, nun babye opsilyake. Ati tunim abuka unalyame,” nyapnamle.

¹¹ Na dipkoprob nyapsine. Allah Yahweh arye nyapliba, weik asik dobuka unyak sukum ap, mitik asik dobuka unyak sukum ap nirya ara, ulubuka bataknamake. Allah arye, ‘Winiplulume,’ nyaplyopura, anyasik-anyasik nirya, ulubuka atu buklopnamake.

¹² Anggun ton tenipdelulume. Winipmanto ara, kuda basam arye mutuku deice keil tace belyamtuak bikbik abuka bitu do? Tonda, weik laut mekwen deibuk noutam ara, ninye arye sapi basam bobuka, tapu kiriktingba, sapi basam batingce, pil dopting do? Kume, anggun kele, aning nirya ara, kum winipmanto ning anya arye, pia walwal nang aryuk, ato yupu nyaptinge. Bukni, anggunce diksukumuk umunye nang ara, tamubuka yu nang atonun ubuka delilyame. Winimunye deice arye, ninye weik dibinyake. Aning atonun, diksukumuk uptum toura, ninye weik kanye deibuka telebuk upting bukni, anggun malye weik ululuma deice arye, yuk ninye ati, malye kililuluma arye, mambul kanye bobuka, malye yupu nyabuka, engenyake. Teleb ning ara, anggunce tamubuka malye winililulume.

¹³ Se, anggun Israel yala ninye ara, deiyok ton kum upmalibuk, teleb kanye bobuka umunce, kanye teleb mot selulume. Tonda, anggunce, “Kume nun mikip aniryuk, mambul mutuku ap, mikip ninye ap, obuka sirya dakupurye, dalubuka doprobupu,” nyabuka, talima erebuka kwalilulume. Aning nirya nyalulum bukni, talye yupu uk nyalulume. Allah arye nyapdeibukba, Amos birye kekebuka sekuk.

¹⁴ Allah arye nyabuk. “Na Allah Yahweh, aning-aning nirya talibuka, deice tam erebuka unirye, pia mikip weiknye unune. Nara im deice yin talin nang nirya talinune. Awininunye bira, pia dipkoprob, anggun Israel yala ninye nirya ati, ayupu nyapsine. Dipkoprop na Allah Yahweh arye, yuk mutuku yin talin nang dopdeipniba, anggun Israel ninye ululum mutuku nirya yakirye, obuka sirya daknamsiyake. Winipsicopura, anggun ululum mutuku noutam nirya, weik ikin ning, anggun nong deice deilinamsiyake. Ara, opsikirye, ikin ning anggun deice deipnamsiyaka ara, mutuku si Hamat mutuku bisik lyu ak, utam arye dipdongobuka, balamunya ani, itam Araba mutuku noutam weik lyuak binuka deipnamsiyake.” Allah arye nyabuk.