Amos 4 - Eipomek

Samaria mutuku kilapu arye yu mek, ninye kanye wangalamak mek dilamikce, teleb kilapu atonun kibuka, maknya kintinibuka ulamik ning ati, nyabuk yupu

¹ Allah arye nyabuk. Se, Samaria mutuku noutam umunye kilapu, kwalina weik kilapu ara, anggun nong kalimna ara, weik sapi basam nelamle touk ululume. Anggun mutuku si Basan mutuku kilapu ara, sapi basam kalimna weik ubuka nelamle touk, anggun babye nelulume. Anggunda, anggun akanye yapu ati nyalulume. ‘Anggun bimunce, anggur mek kanye wangalamak mek, pia yu ning boyasumunyeura, dinamabe,’ nyabuka, anggun akanye yapu ak, tuba-tuba morolulume. Tonda, talye bona utotoa talina kum nang ap, mikip kumce, mitang nang ap ati, aning-aning nirya, kum uamlye nang ati, weik arye patalye ninye nirya ap, ikin ning weik, sik nong deice delilulume. Tonda, sik bona utotoa talina kum ninye taleamice ning ara, ubula dolomunce, ikin pil dilulume.

² Winibuka pia malye winiluluma ati, nara Allah Yahweh, aning-aning nirya talibuka, deice tam Pia Mikip Weik Deiyoknye unune. Na tenepnye touk, wininuna anya arye, na pia malye ton winina kum deice arye nyapsine. Dipkoprop, doyanamle talak ara, narye lo arepnyopura, anggun olan ninye yanuka, sirya opsikirye, anggun u pum bisik noutam, besi ning dongopsikirye, aning arye libuka, sik mutuku tamubuka bobinamsiake. Ara, winipmanto ara, mek pum ulamle bal ikan youn ning wepmakiba, mek pum ulamle bal ikan youplyopura, libuka dololamak atonun ubuka, dobuka bobinamsiake. Ara, anggun olan ninye arye, sirya opsikirye, bobinamsiyaka ati nyapsine.

³ ‘Nun olan ninye yanuka opsicak’ tenen, dolamlum cang keil poka ara, yanuka uluplopnamake. Uluplobicopura, adiparyuk anggun nirya tomopsikirye, tapu koubuka, akeil poka pum noutam arye bobuka, buru tam bobinamsiake. Keil poka ap, keil aik ap, dolamlum bukni, anggun mal olan nang arye, yanuka opsikirye, anggun nirya tomobuka, sirya opsikirye, anggun nong nirya tongobuka, Hermon mutuku tam bobinuka, dongopnamsiyake. Ara, tonoknye babye, pia kum bataknamsiyake. Dipkoprop winipnamsiyake. Nara, Allah Yahweh aning-aning nirya talibuka, deice tam unune. Nara anggun ni koprop Allah arye nyapsine. Allah arye nyabuk.

⁴ Allah Yahweh arye, sik Israel ninye ati nyabuk. Na mapu Israel nang, anggunda ilil una kumce, anggun nirya Betel mutuku bimunce, na si erena ati, kam ning obuka, arelyanganamlume. Aning atouk, Gilgal mutuku bimunce, na si erena ati, yuk ning ton arelyanganamlume. Anggunda, malye ninguk talibuka, tup-tupa wininmalumce, na si erenululume. Ati, kam ning obuka, arelyanganululum ning ara, nong bol deice atonun ning winilulume. Malyeuk winiluluma anya arye, na si ara, dipkoprob kum erenululume. Betel mutuku babye, Gilgal mutuku babye, lukunyan talak nirya, kam ning obuka yamunce, arelulume. Tonda, ining ninguk kum bukni, anggun wa wibuka koulalum ning bokuka, ton tam ning ara, like winilye sum ton, akunum uplyopura, tup-tupa nati, aning arelyanganululume. Bukni, anggunce malye wininmamunye diparyuk, aning-aning nirya arenululuma anya arye, dipkoprob ara, anggunce kam ning ap, wa wibuka koulalum ning ap, arenululuma deice arye, malye ning weik tonap, tabakuka wininmalume.

⁵ Tonda anggun roti kwaning dabuka kintinipmunce, na si erena ati, arelyanganululume. Tonda, ‘Yuk ninye ton kekebikirye, nunti teleb nang tenenamsiyak’ tenen, talye kanye deibuka, arelulum ning ton, bokuka arelyanganululume. Winibuka arelbalulum ning ara, dipkoprob na si ati, kum erenululume. Yuk nang arye, ‘Teleb nang tenenamsiyak’ tenen, kanye deipmunce, aning ara talyeuk arelulume. Anggun malye weik tuba-tuba wininmalum diparyuk, aning arelyanganmanulum ati nyapsine. Se, anggun Israel ninyo, aning ara, na like. Nara Allah Yahweh, aning-aning nirya talibuka, deice tam PIa Mikip Weik Deiyoknye unune. Nara, anggun ni koprop Allah arye nyapsine.

⁶ Malye-malyeuk winilamlumba, narye anggun asik dobuka ulamlum noutam, din patan ning arelamsise buk, anggunce aning moubuka kum kel bikamlumce, anggun tamubuka, na dam kum yanulume.

⁷ Tonda atonun, anggun wa wibuka koulamlum noutam, mok ton kum arelamsisirye, mok pia cena kum li areamsise. Anggun wa koulamlum ning ara, wala winilye tonap, akunum uptopura, anggun wa wibuka kouamlum ning, yongobuka lilamtum bukni, mok kum arelamsisa ati, anggun wa wibuka kouamlum ning nirya ara, koululamuk. Tonda, anggun asik dobuka, ulamlum mutuku noutamak ara, ton ninye arye, wa wibuka kouamik wa win dam ara, mok arelamse. Bukni, ton aik ninye ara, wa wibuka kouamik wa win dam ara, mok kum arelamse. Winilamsiba, ton tam nang, sik wa wibuka koulamik ning ara, nong ulamuk bukni, ton tam ninye, sik wa wibuka koulamik ning nirya ara, koulunauk ulamuk.

⁸ Winibuka winilamse talak ara, ton mutuku ninye ara, mek pia patalamukce, sik nong ara, mitanguk ulamik. Winilamuka ati, ‘Se, mek diptibye’ tenen, ton mutuku nang arye, ton mutuku binuka dipdeyik bukni, pia kum boubuk. Sik mek pia tuba patanauk ulamuk. Aning nirya ara, narye anggun wenena ati, ikin ning arelamsise bukni, anggunda tuba tamubuka, na dam pia kum dobolyanganulume. Na Allah Yahweh arye nyapsine.

⁹ Aning atonun, narye anggun wa wibuka koulamlumba, bok siliklamuk ning deice nirya ara, wakaba amulamukba, lyulsaklamuk. Tonda, anggun wa wibuka koulamlum ning bok nirya ara, kouluna arelamsiba, koululamukce, kum danalamuk. Tonda, mikip weik buppu kumanya arelamsiba, akumanya arye, wa wibuka koulamlum ning nirya ara, malye kipdeiamse talak ara, koulupnaba dina ton kum ulamlume. Tonda, anggun anggur tapu duk ap, yo duk si ara, yo duk ap, zaitun yo duk ap nirya ara, narye sul kwising arelamsiba yangalamikce, aning nirya yanuka dipna arye, sirya kum danalilamik. Winibuka ikin ning arelamsiba, winilamsika babye, anggun adiparyuk, na dam ton, tamubuka kum yanamnulume. Na Allah Yahweh arye nyapsine.

¹⁰ Tonda, narye Mesir mutuku ninye ati, deiyok ning arelamse touk, anggun babye naryuk, uk dina deiyok ning arepnamsine. Tonda, kam nang nirya ara, mal oldanmaca noutam, narye sik obuka, bataknamne. Tonda, aning atonun sik kuda basam babye dopropnamne. Tonda, sik doltakne aik noutam nirya ara, opmace nang, sik tong aryuk weleplirye, tong welepnamle ning ara, anggun kam tuba unmace nang, sik u pum bisik weksiliba, atong kekepnalume. Winipsilya babye, anggunce tamubuka, na dam ton, kum yanamlume. Na Allah Yahweh arye nyapsine.

¹¹ Anggun kan-kan arye dopropsirye, ton tam nang ara, oplopse. Ara, Sodom mutuku ap, Gomora mutuku ap, malye weik winilamik ninye oplomse touk, anggun Israel yala ninye babye, weik arye opsise. Winibuka wenebuka olamsisirye, Israel ninye mitik anun bataksise. Winipmanto ara, uku yo dapmakiba, uku dinmalya ani, sirika batakliba, lukuka delilamak touk, narye anggun Israel yala nang ara, mitik anunuk lyepromsise. Winibuka lyepromsise bukni, anggunce tamubuka, na dam ton kum yangalamlume. Na Allah Yahweh arye nyapsine.

¹² ‘Na dam tamubuka yanamak’ tenen, bico tenelamsirye, lo weik arelamsise bukni, na dam tamubuka, kum yangalamluma ati, se anggun Israel ninye umunyak nirya ara, narye wenepnamsine. Ati, anggunce, ‘Se, awinipnamsil ning ara, aminyan nun ni bira, Allah arye weik wenepnamsil’ tenen, kintinibuka unamlulume. Tonda, anggun Israel ninye nirya ara, ‘Se, nun ni koproba Allah ap, epdanamabe’ tenen, kanye moupmunce, ikin kanye bobuka unamlulume.

¹³ Aning nirya ara, talye kum nyapsine. Mutuku-mutuku nirya ap, kumanya nirya ap ara, Allah elcuk kwepdeibuke. Tonda, na Allah Yahweh arye, ‘Winipnamne,’ teninun ning nirya ara, talye tukwak ninye ati, laka nyalisunune. Tonda keting noutam babye, lukunyan babye, na Allah aryuk kintinibuka delinune. Winibuka unirye, tukwak mutuku noutamak, weik mutuku deice yanipdongobuka, banune. Na si ara, Allah Yahweh unune. Nara, im deice yin talin ninye nirya talibuka unune. Nara aning-aning nirya talibuka deice tam Pia Mikip Weiknye unune. Allah arye, sik Israel ninye ati nyabuk.