2 Timotius 1 - Eipomek

Paulus arye, “Telebe” nyana ati, nyabuk yupu

¹ Telebe, na Paulus arye Timotius ati abuku sekeibkine. Anda, na kanye delikununye ulyama ati ara, anda na mi nyapkine. Allah arye nati, ‘Anye bira, Yesus Kristus el yupu dobuka peterelbana ati, deiyoknye, Rasulnye unamle,’ tenyamnukce, wipdeipnuka ati, apiluk donune. Allah arye, “Yesus Kristus ati, ninye mutuku-mutuku nirya dib tenebikcopura, pia kam una deiyok ning arenamsine,” nyabuka, nyalilamsuk yupu dobuka, na Paulus arye peterelbanune.

² Ura na mi Timotiuso, nun Ni Kopropa Allah ap, nun Deiyoknye Yesus Kristus ap, sik bitinye arye, an Timotius ati, bico tenekurudakce, sik kanye aryuk talya melikururak ning ap, nun malye winina ati, wenebuka talya oplopsitiring bukni, aning namin kisururakce, nun patasilye ning urdem aryuk arisirice ning ap, tonda, ‘Yuk nang ap yu ulana kumce kanye deibuka, telebuk neika unamle’ tenen, arikurak deiyok ning ap, arikururake. ‘Aning nirya ara, tuba-tuba weik arye tabakuka arenamkirak’ tenen, an Timotius ati, Allah morokunune.

Paulus arye Timotius ati, ‘Batakana kum arye, pia pi dobuka, pil teleb ubuka donamle’ tenen, nyabuk yupu

³ Na apu yapu arye, Allah el si erebuka, el piluk dolamik touk, na babye atonun, na kanye talima noutam ara, malye ning duknuna pia kum arye, Allah el pil ati pia diksukumuk unirye, pil donune. Atalak noutamak nirya ara, keting noutam babye, lukunyan babye nirya, Allah ati moronye talak noutamak, anti tenekinirye, kanye deibuka Allah ati, “Telebe,” nyakunune.

⁴ An ap, na ap, neiktoto pil dolamnumu bukni, yuk-yuk binumu talak ara, ance engeplum ning ara, ila tonap tenekunune. Ati, ‘Na kanye deibuka pin-pin arye unamne’ tenen, ‘Se, na mi Timotius ap, eipdatinimirye, neiktoto utinimnye’ tenen, pia patanulule.

⁵ Tonda, ila tonap, tenekunun ning ara, nyapnukine. Ara, an nu kopropa Lois ap, anin kopropa Eunike ap, sik bitinye arye, lik tenena pia kum aniryuk, weik arye dib tenyamrik touk, an babye, Yesus ati dib tenelyame. Na kanye bokoltona kum arye, anti, akunum kel bikamkise. ‘Anye Timotius bira, Yesus ati dipkoprop weik arye diba tenelule,’ tenekunune.

⁶ Aning akunum kel bikamkise ati, ayupu ton nyapnukine. Ara, minop talak na taruk an nong deice deibuka, Allah moropkisa deice arye, Allah el pil dona deiyok ning arepkuke. Ura, ninye arye, ‘Nun uku tangablyak’ tenena ati, ‘Uku buk weik arye dipnul’ tenen, si mikip arye uku pulamak touk, ance, ‘Allah el pil dona deiyok ning arepnuka deice arye, pil pia teleb ubuka donamne’ tenen, pia pi dobuka piripdenamlyame. Na Paulus arye nyapkine.

⁷ Mikip arye pil donamlyame nyapmakina deiyok ara, Allah El Dib Kanye mikip arisilye ning ara, ‘Ilil asa unamak’ tenen, kum arepsuke, aning kum bukni, mikip una ap, yuk ninye nirya ati bico tenena ap, ‘Talye luba kibuka kum unune’ tenen, kanye kalikildana ap, ‘Ateleb ning nirya wininamak’ tenen, El Dib Kanye mikip arisulula ati nyapkine. Allah arye, ilil una ap, teniltona ap, tenen ning ara, kum arisulule. Talima darapdongobuka, mikip arye talye luba kibuka un ning arisulule.

⁸ Aning ati ara, nun Deiyoknye Yesus, el yupu laka nyabuka peterena ati, ilil una ap, tonda, ‘Se, yuk nang arye akutunamniak do?’ tenen, alye una ap, pia kum unamlyame. Aning atonun, ‘Se, na peterenulula deiyoknye Paulus ara, tapu koubuka wenena aik dongobik ati, na alye dakuka unamne,’ tenena meme. Aning nirya kum bukni, narye ninye lyena ati, Yesus el laka teleb yupu peterepnibuk, malye nang arye, na nong deice ikin ning weik delininyak touk, an babye atonun, ‘Winipnica babye, telebe uka,’ tenenamlyame. Utenebuka an mikip yabuka unamlama ara, Allah el mikip melibuka arisilya deice arye unamlame.

⁹ Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.

¹⁰ Bukni wini talak ara, nun lyen ning nirya ara, Yesus Kristus nun Lyena Deiyoknye tukwak mutuku akunum yayuk deice arye, akunum lak kipsukura, kel kinyabe. Yesus Kristus el pil dopsuka deice arye, ninye dipna deiyok ning akunum, kum daneibuk. Winipsukce, ninye lyena ati, Yesus el lak teleb yupu peterenyaka deice arye, dipkoprop kam una deiyok ning ap, bola koplobuka, pia kam unamap ning ap ara, akunum lak kibuka ati, kel kinyabe.

¹¹ Ara, ninye lyena ati, Yesus el laka teleb yupu ara, Allah arye, ‘Paulus ara, ayupu bobuka peterelbana ati, deiyoknye, tonda Rasulnye ulirye, ayupu minop talak arye, kum kekelamik mutuku ninye minopce laka nyalbinamle. Tonda, Allah yupu peterena deiyoknye unamle,’ tenyamnukce, wibuka deipnuke.

¹² ‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne.

¹³ Ura, na mi Timotiuso, narye peterelamkise ning nirya ara, Allah el yupu nyasilye touk diksukumuk peterelamsa ati, aninguk talibuka, ance atonun peterenamlyame. Winibuka peterenamlam talak nirya ara, Yesus Kristus ap, kanye dukdongobuka umince, yuk ninye ati bico tenena ap, Allah ati dib tenenyak ning ap, anirya talibuka unamlame.

¹⁴ Tonda, nun deiyok nang ap, Allah El Dib Kanye ap, arye anti, ‘Elce ayupu bobuka peterenamle’ tenen, an deice deipkubu ning nirya, ance, ‘Malye upnilyak’ tenen, pia kanye moubuka kalikimince, dildanamlyame. Winibuka unamlama ara, Allah El Dib Kanye arye, el mikip arisilya deice arye kalikildanamlyame. Allah El Dib Kanye ara, nun kanye noutamak usulule.

¹⁵ Timotius, an kele. Asia tam diba tenyamik nang nirya arye, nati akunum bataknike. Aninye kan-kan, sik Pigelus ap, Hermegenes ap, sik bitinye nang babye, bataknirike.

¹⁶ Bukni, Onesiporus ap, el aik unyak ninye ap, nirya ati ara, ‘Allah arye aninye nirya ati, wenena kumce, sik patana atonun, mitang arye melibuka arenamle’ tenen, moronune. Deiyok ara, tonok talakuk kum bukni, Onesiporus ara, anirya talak nirya weik arye, na kanye kwa melilamnuke. Tonda elce nati, ‘Se, Paulus ara, tapu koubuka wenena aik dongobik ati, na alye upnilyak’ tenen, ‘El dam kum binune,’ pia kum tenelamnuk.

¹⁷ Aning kum bukni, na Roma mutuku noutamak ulamsi bukni, elce Roma mutuku yayukopura, ‘Paulus danaka ulul do?’ tenen, pia pi dobuka elamnuka ani, eipdanumurye melilamnuke.

¹⁸ Tonda Timotius, an akunum kel biklume. Minop talak Efesus mutuku noutamak pil dolamse talak ara, Onesiporus arye na patalamnuk ning, aning-aning nirya ati, weika arye melyamnuke. Winilamuka nirya ati ara, na patanilibuk utenenune. Ara, ‘Se, nun ni Allah arye Onesiporus ati kanye deipturye, Yesus tamubuka yanamle talak, yupu bokeipnamsil sum ara, Allah arye talye obuka bataktue bukni, anye birye el malye winilamuk ning nirya ati, namin kibuka, wenena kum arye, talye melibuka teleb updeipnamle’ tenen, moronune.