2 Tesalonika 3 - Eipomek

Paulus arye, “Allah moronamsululume,” nyabuka morobuk yupu

¹ Telebe nun kayapu, anggunce nunti, Allah moronamsululume. Ara, nunce Yesus el laka teleb yupu, ninye lyena yupu dobuka, anggun dam peterelamsupubuk, dib tenebuka teleb ululuma atonun, ‘Yuk mutuku ninye babye atonun unamak’ tenen, Allah moronamsululume. Ara yuk ninye weik tonap kekebikirye, dib tenebuka, ‘Ayupu ara, weik mambul’ tenen, ‘Allah yupu ati, kanye deibikirye, dib tenen ninye pola-pola weik upnin banamak’ tenen, Allah moronamsululume.

² Tonda, ninye mutuku sirya, im sirya nirya arye, dib kum tenenyaka anya arye, sik pia malye winin nang arye, Paulus ap, el neika pil donyak nang ap ati, ‘Malye ubikirye, obicak’ tenen, Allah moronamsululume.

³ Sik anang ara, malye ulisinyak bukni, Allah elda, batakna kumce, el nyalul yupu nirya, dipkoprop sirya dakalulnye binya arye, ‘Isa Mutuku Dongonye arye, anggunti, malye kipsilyak’ tenen, anggun kanye talima, mikip kipdeipsilirye, moubuka kalikinamsile.

⁴ Nun Deiyoknye Yesus melisilya deice arye, nunce anggunti, ‘Malye unyak do, kum do?’ tenen, kanye teniltona kum usulule. Aning kum bukni, nun kele, nunce anggunti, “Wininamlulum, wininamlulum,” nyaldelisinyap ning nirya ara, anggun akunum atonun winilulume. Tonda, pia wininamlulume.

⁵ Ara, nun Deiyoknye Yesus arye, anggun melisilya deice ara, Allah arye anggunti, weik arye bicoe tenesilirye, melisilye ning nirya ara, ‘Weik bikmunce, el ap, kanye dukdongobuka unamlulum’ tenen, Allah morosenyabe. Tonda, el melisilya deice arye, Yesus Kristus ikin ning aulamuka babye, Yesus Kristus batakna pia kum aryuk, pia pi dobuka, pil mikip arye dolamuk touk, ‘Anggun babye atonun wininamlulum’ tenen, Allah morosenyabe.

“Pil talibuka una kum arye, talye winina ara malye,” nyabuk yupu

⁶ Ara nun kayapu, anggunda nun du weit atonun nang ululume. Nun Deiyoknye Yesus Kristus, el si deice arye, ayupu nyapdeipnusiyabe. Ara, yatanye do nirya, dib tenenyak bukni, dipkoprop pil talibuka dona kum bukni, talye-talye wininyakce, nunce peterelamsupu atonun winina kum bukni, yuk winibikirye, malye winikcopura, anang ap, neika kum unamlulume. Lokaren akuk unamlulume.

⁷ Aning ara talye ati kum nyapsiabe. Sik wininyak ning babye anggun kele. Nun peterelamsupurye, teleb ubuka winilamubu touk, anggun adiparyuk wininamlulume. Anggun ap, neika ulamubu talak nirya ara, dipkoprop pil batakuka, talye-talye kum winilamubu. Pil pia teleb ubuka dolamubu.

⁸ Tonda, yuk nang sik din ning dobuka, talye urdem aryuk kum dilamubu. Adin ning dekna ati, yo bok arepnaryuk dilamubu. Yuk nang sik din ning ara, talyeuk kum dilamubu bukni, sik nirya ati tenelamuburye, ‘Kume, anang ara, ikin ning sik nong deice kum deipnamabe’ tenen, keting noutam babye, lukunyan babye, pia pi dobuka, pil weik dolamuburye, dekna deice aryuk dina dilamubu.

⁹ Nunda deiyok nang unyaba anya arye, ‘Anggun din ning talye urdem aryuk arepsitinge’ tenen, morolamsitibye bukni, aning kum winilamubu. Aning kum winipmanto tenena ati kum winilamubu. Aning kum winibupu deiyok ara, ‘Nunce teleb ubuka winilamuba ani, aninye sik kel bikna ati, nun unyap ning eibuka kel kipsikirye, sik babye atonun wininamak’ tenen, winilamubu.

¹⁰ Anggun ap, neika ulamubu talak ara, nunce anggunti, “Kume, yatanye do, nirya, pil dipkoprop kum pil dolinye bira, dina kum diptue. Talyeuk unamle,” nyabuka peterelamsupubuk, akunum kekelamluma ati, aning ara, anggun akunum biklume.

¹¹ Ara, yuk nang arye, nun dam yanuka nyapsikibuk, kekenyap ara nyapnusiabe. Sikce, nyasinyake. “Tesalonika mutuku ninye kan-kan arye, ton nang ara pil dipkoprop talibuka kum donyake. Talye-talyeuk unyake. Sikce, yuk nang unyak ning ati, dipribana ap, yupu talye nyana ap, lululana ap, unyake,” nyabuka nyasinyake.

¹² Aning atonun wininyak ninye nirya ati ara, nun Deiyoknye Yesus Kristus si deice arye nyanyabe. “Winina meme. Talya-talya winina ap, talye bana ap, yuk nang winin ning ati yupu nyana ap, kum wininamlulume. Dipkoprop piluk talibuka wininamlulume. Anggunce dimunye ning nirya ara, pil dopmunyeura, dekna ning arepsikcopura, adeice aryuk dina dekuka dinamlulume. Talya morona meme.” Sik talye-talyeuk unyak ninye ati, ayupu nyanyabe.

¹³ Anggun teleb nang ati ara, nyasinyabe. “Atalak-atalak nirya ara, batakna pia kumce, diksukum winina ap, teleb winina ap, adiparyuk pia wininamlulume. Lik kanye bobuka dal-dal asa una meme,” nyabuka nyasinyabe.

¹⁴ Yatanye birye do, nunce asurat noutamak sekeipmap yupu kum kekeplirye, batakuka yaniplyopura, anye biti moubuka tenenamlulume. El ap, neika una kume. Leipropnamlulume. Ura, winipmunyopura, elce, ‘Se, na malye wininmanabuk, wininmaniake’ tenen, ‘Alye upnamle’ tenen, nyapmasiabe.

¹⁵ Wininamlulum bukni, anye biti ara, ‘E anye bira, nun oldananye atonun ulul’ tenen, yu uplibuk, ‘Pia lik,’ tenena kume. Elda, anggun weit atonun anya arye, ‘El malye winin ning bataknul’ tenen, nimalye arye wenebuka peterenamlulume.

Sirya dakana ati, nyabuk yupu

¹⁶ Ara, Allah ara ikin una ap, oldana ap, kum arye, pia telebuk ubuka, kanye deibuka una deiyoknye, elce anggunti, atalak-atalak nirya ap, anggun winin ning noutam nirya ap, ‘Kanye deibuka teleb una deiyok ning pia arenamsil’ tenen, Allah morosunune. Tonda, ‘Allah arye, anggun melipsilibuk, el ap, kanye talima dukdongobuka neika unamak’ tenen, Allah morosenyabe.

¹⁷ Paulus, na taruk aryuk asurat sekeipsene. Yuknye birye kume. Na surat seknyopura, surat sekna deice ning, urasin ulya ara, anggun kele. Na sekne surat nirya ara, urasin atonun ulula anya arye, anggun kele. Winibuka sekenune.

¹⁸ ‘Nun Deiyoknye Yesus Kristus arye, anggun nirya ati, bico tenepsilirye, el kanye aryuk melisilye ning pia arenamsil’ tenen, Allah morosunune. Telebe akunuma. Na Paulus arye asurat sekeipsene. Asukum anyuk deipne.