2 Tesalonika 2 - Eipomek

‘Allah na lik’ tenen, Yanina Deiyoknye ati, nyabuk yupu

¹ Ara, Yesus dib teneplum ati, nun weit yapu atonun ululum ninyeo, mambul yupu ton nyapnusiabe. Ara, nun Deiyoknye Yesus Kristus tukwak tamubuka yalirye, nun nirya dobuka bobinamsil talak noutam winipnamle ning nirya ati ara, anggunce, ‘Se, yata wiripnamap do?’ tenen, ‘Malye kanye bobuka, talima sukupsilyak’ tenen, yupu sekdongopnusiyabe.

² Ton nang ara, nyanyake, “Kume el Paulus ap, el neika unyak nang ap arye, Allah arye nyapdeibukura, aminyan upnamle ning laka nyabik ning ap, surat sekeibik ning ap, tonda sik peterebikba kekebupu ning ap, adeice arye, ‘Yesus dolyanamsil sum ara, akunum upsuke,’ nyabikura, kekebupe,” nyabuka nyanyake. Sik talye nyanyaka anya arye, nyabikcopura, adiparyuk, malye kanye bobuka, teniltonauk kum unamlulume.

³ Yata nang arye do nirya, sikce ayupu atonun, tilila yupu nyabuka, peterepsicopura, dib kum tenenamlulume. Talye kum nyapsiabe. Anyapnusin ning aminyan kum winipmalye talak ara, Yesus arye, tamubuka tukwak dolyanamsil talak ara, kum upmale. Min winipnamle ning ara, ani. Aminyan talak ara, ninye pia weik mutuku-mutuku nirya arye, Allah ap, Allah el winin ning nirya ap ati, sik lik uplya ati, pia batakuka yanipnamake. Winibice talak ara, ‘Allah ati, malye kipnamne’ tenen, Allah el winin ning nirya ati, Yanina Deiyoknye lakak erebuka tiknamle. Allah arye anye biti, ‘Weik arye wenebuka opnamne,’ akunum tenebuke.

⁴ Allah el winin ning Yanina Deiyoknye birye, ninye mutuku-mutuku nirya, ‘Nun deiyok ning’ tenen, Allah atonun si sisibuka, si erenyak ning nirya ati ara, elce yanilule. Elce, Allah winin ning nirya ati ara, ‘Na aryuk deice tam unirye, aning nirya ara, na amutamuk upnamle’ tenen, elce el bidamnye ati, erepdanamle. Aninguk kume, anggun Yahudi yala ninye arye, Allah el si erena ati, weik mambul deiyok aik dolulum ning ara, anye birye anyaik wekuka, ‘Ninye mutuku-mutuku nirya kekenamak’ tenen, “Nara, Allah unune,” nyabuka, elce el bidamnye siuk erelilanamle.

⁵ Na kayapu, winiryuk nyapmasin yupu ara, anggun akunum luba kiplum do? Na ap, ulamubu talak ara, ayupu nirya, atalak-atalak nirya, tonap, nyalamsise.

⁶ Bukni anggun kele, anye bira, ‘Allah arye tenyamuk talak aryuk lakak tikilyanamle’ tenen, wini talak ara, anye bira kabul talak, ‘Talya parapkabuka yalyak’ tenen, daralongolye ning ara, anggun kele.

⁷ Allah arye, ‘Yanina Deiyoknye birye, talye parapkabuka yalyak’ tenen, daralongolul bukni, wini talak akunuma, Allah el winin ning nirya batakuka, yanilya deiyok ning mikip ara, ninye kan-kan arye, akunum duknubuka pil dolule. Malye winina ati, mikip deiyok ning ara, akunum pil dolul bukni, Allah arye wibuka deibuknye birye, aning pia talibuka daralongolamlya ani, Allah teneplye talak akunum uplyopura, Allah arye amikipnye akunum dopdeiplyopura, amalye winina deiyok mikipnye bira, lak kipnamle.

⁸ Allah arye wipdeibuknye, amalye ning siknibuknye bira, dobuka yukak deiplyopura, atalak aryuk, duknulirye, Allah el winin ning nirya ati, Yaniltana Deiyoknye lak kipnamle. Winibuka daulamlye bukni, aminyan ara, nun Deiyoknye Yesus arye, el nyapnamle yupu deice arye, amalinye biti, malye kibuka opnamle bukni, Yesus elda erepdopnamle. Tonda, Yesus el pia teleb ubuka dirina weik yanamle deice arye, amalye winina deiyoknye biti, oplirye, kum daneipnamle.

⁹ Allah el winin ning nirya, Yanina Deiyoknye yanamle talak ara, talye ati kum yanamle. Kume, Isa Mutuku Dongonye el mikip weik ulye touk, amikip deice arye, yata mambul ning do nirya, pia teleb pil ap, ninye kum winipmanto ning ap, ‘Diba tenepnamniak’ tenen, weik mikip winin ning ap, pil weika arye dopnamle. Winipnamle bukni, anirya ara dipkoprop kume, ara Isa Mutuku Dongonye el tenepce arye winin ning, tilila ning pil dopnamle talak arye yanamle.

¹⁰ Tonda, Isa Mutuku Dongonye el pil ara, yata malye winin ning do, yala-yala nirya, tilila pil donmalye ani, sik Allah ati dib tenena kum ninye, aminyan dipmakibuk, tuba tamubuka tonap, kam pia kum unamak ninye ara, atilila ning nirya ati, dib tenenamake. Aninye ara, Allah el dipkoprop yupu ati, lik ubukura, “Nun lik, ayupu ara nun kanye kum deipnamabe,” nyabuka batakamika ati, Allah arye sikti, kum lyebuk. Aning ati ara, Allah arye anang ati, oplibuk pia dipnamake. Oplibuk dibicopura, uku dilamle mutuku pia donamake. Allah ap, neika pia kum unamake.

¹¹ Allah el yupu ati, “Nun like,” nyabuka batakamika ati, Allah arye sikti, ‘Aninye tilila ninguk dib tenepnamak’ tenen, kanye wangabikirye, sik kanye walwal ulamle atonun ning, weik mikip arilule.

¹² Tonda, yata nang do nirya, sikce, Allah el dipkoprop yupu ati, “Ayupu ara nun like,” nyabuka bataklamikce, malye winin ning yala-yala nirya ati, sik kanye deibuka, talye winilamice ninye nirya ati, Allah arye utenelule. Ara, ‘Na weik arye wenebuka, opnamne’ tenen, sikti, weik kanye kunukna ning arepnibuk, atilila ninguk diba tenebuka unyake.

‘Teniltona kum arye, dib tenebuka, pia kanye lamabuka unamak’ tenen, nyabuk yupu

¹³ Sik malye nang ati ara, winipnamle bukni, anggun Tesalonika ninye ati ara, nun adiparyuk, “Telebe,” nyabuka, Allah moronamsinyabe. Na weit yapu atonun nang, na Paulus arye nyapsine. Allah arye anggunti, el kanye deipsukce, aning-aning nirya kweipdeibuk talak danerye, ‘Aninye ara, na ning,’ tenyamsukce wipdeiamsuke. Wipdeiamsuk deiyok ara, talye ati kume. Ara, ‘Allah, na Dib Kanye arye, anggun talima noutamak pil dopsilirye, teleb kilisulul ning ap, sikce na dipkoprop yupu ati, dib tenenyak ning ap, deice arye, lyepnamne’ tenen, wipdeiamsuke.

¹⁴ Allah arye sikti, ‘Anang lyepnamne’ tenen, wipdeiamsuka ati, ara nunce anggun Tesalonika mutuku nang ati, Allah el laka teleb yupu, ninye lyena yupu peterelamsupu deice arye, Allah arye anggunti yukupsuke. ‘Wininamak’ tenen, yukupsuka deiyok ara, ani. Ara, nun Deiyoknye Yesus Kristus ap, el yanamle talak upnamle ning ap, urasin pia teleb kibuka yanamle. Atalak ara, ninye nirya arye elti, teleb nyabuka, el si weik arye erepnamak talak ara, ‘Anggun Tesalonika nang babye, neika atonun wininamak’ tenen, yukupsuke.

¹⁵ Aning ati ara, nun weit yapu atonun nango, surat sekeibupe ning babye, mening dam arye, yupu deice arye peterelamsupu ning babye, anirya ara pia moubuka talimunce, kanye teniltona kum aryuk, pia kanye lamabuka unamlulume.

¹⁶ Telebe na kayapu, nun ni Allah arye, nun nirya ati, bico tenenyamsukce, el kanye aryuk talye areamsuk ning ati nyapnusine. Ara, ‘Pia upnamsil ning, ilil una kum aryuk, kanye deibuka, dupsice arye una deiyok ning ap, aminyan teleb ning yanamsil’ tenen, kanye deibuka, dinauk un ning ap, areamsuke.

¹⁷ Nun Deiyoknye Yesus Kristus ap, nun ni Allah ap, sik bitinye arye, ‘Anggun Tesalonika nang ati, anggun talima melinamsirak’ tenen, Allah morosenyabe. Tonda, ‘Anggun teleb pil donamlum ning ap, teleb yupu nyanamlum ning ap ati, mikip kipsilirye, telebuk wininamlulum’ tenen, Allah morosenyabe.