2 Tesalonika 1 - Eipomek

Paulus arye, “Telebe,” nyana ati, nyabuk yupu

¹ Telebe nun kayapu. Na Paulus ap, Silas ap, Timotius ap, nun nirya arye, anggun Tesalonika mutuku ninye, Allah ati, dib akunum tenelulum ninye ati, asurat sekeipsiabe. Anggunda, nun ni Allah ap, nun Weik Deiyoknye Yesus Kristus ap, kanye talima dukdongobuka ululume.

² Nun ni Allah ap, nun Deiyoknye Yesus Kristus ap, sik bitinye arye, anggun Tesalonika ninye ati, ‘Pia teleb ning arenamsirak’ tenen, Allah morosunune. Aning ara, ani; sik bitinye bico tenesurudakce, sik kanye aniryuk talye melisirikce ning apura, ‘Kanye deibuka, teleb aryuk unamak’ tenen, arisirikce ning ap, aning nirya arisirikcebuk, ‘Pia teleb unamak’ tenen, Allah morosunune. Nun Ni Kopropa Allah arye, anggun Tesalonika mutuku dib tenelulum ninye ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba arenamsil’ tenen, anggun Tesalonika mutuku ululum kili sal ati, Allah morosunune. Na Paulus arye nyapsine.

Tesalonika ninye dib tenelamik ning ati, Paulus arye Allah ati, “Telebe,” nyabuk yupu

³ Allah moronyap talak nirya ara, anggunda, nun weit yapu atonun ululum nang ati, tenebibirye, Allah ati, “Telebe,” nyabuka, anggunti Allah morosenyabe. Winibuka, wininyaba ara, teleb aryuk wininyabe. Deiyok ara, anggunce Allah ati, diba tenemunyopura, anggun kanye talima wisisilye ning apura, anggun nirya arye, anggun ap, neika unyak nang nirya ati, bico tenebuka, melinauk winilulum ning ap ara, pia tabakuka weik upnin banmasile.

⁴ Aning ati ara, nunce yuk dib tenenyak nang dam bayibye talak nirya ara, nunce anggunti yupu laka nyabuka, kisinyabe. Sikti laka nyanyap yupu ara, ani. Ura, Allah ati dib teneluluma anya arye, yuk nang arye anggun nong deice ikin ning delisinyaka apura, yuk ikin ning usilibuk, kanye imun kanye bobuka umunya ap ara, anirya aupmalya babye, batakna pia kum aniryuk, pia pi dobuka pil dolulume. Tonda aikin ning nirya aupmalya babye, Allah ati, pia diba tenebuka, kanye lamabuka tuba ululume.

⁵ Ara, awinisilye ning nirya arye, nun kel bikinyabe. Allah arye, ninye nirya ati, sik winilamice ning auplye touk, diksukumuk ubuka yupu bokeipnamsile. Anggunti ara, kanye imun kanye bon ning aupmalya babye, anggunce diba tenebuka, batakna kumce, pi dobuka pil doluluma anya arye, aminyan talak ara, Allah arye anggunti, “Aninye ara, pia teleb un ninye kipnibuk, na dam wektinge,” nyapdeipnamsile. Ara, Allah arye ninye nirya ap, aning-aning ap, talibuka unamsil ning ati, diba tenemunyebuk, yuk nang arye ikin ning anggun nong deice akunum delisinyake. Ikin usilye ning nirya ara, deiyok aninguka.

⁶ Bukni, Allah elda yupu bokolina ati, pia diksukum ululnye binya arye, yuk nang arye anggunti, ikin ning delisinyak nang nirya ati ara, Allah arye kwang daklirye, sik nong deice weik ikin ning deilinamle.

⁷ Winiplyopura, sik kanye imun kanye bomice nang nirya ati ara, ikin usilye ning noutamak arye loplobuka, kanye deipnamsile. Anggunti buk kume, nun babye, kanye lopdeipnamsile. Anyapmasiap ning upnamle talak ara, Allah arye nun Deiyoknye Yesus ati, im deice duknubuka ulyak arye dobuka, lakak kiplibuk, tamubuka yangalye talak ara, weik uku buk dilyebuk, el im deice pil don nang, weik mikip unyak nang, el malaikat ap, neika yanamake. El ap, sik ap yanamak talak ara, ikin usilye ning nirya kum daneipsilirye, kanye lopdeipnamsile.

⁸ Tonda, ayanamle talak ara, yata ninye do nirya, ‘Allah ara nun like’ tenen, dib tenena kum arye, Allah el ap, nun Deiyoknye Yesus ati, el laka teleb yupu, ninye lyena yupu ap ati, batakuka yaninyak ninye nirya ara, weik arye wenebuka, sik nong deice weik ikin ning deipnamle.

⁹ Elce ikin ning, sik nong deice deipnamle ning ara, pia kum upnamle. Allah arye sikti, wenebuka, ikin ning sik nong deice deililibuk, kanye imun kanye bona ap, engena ap unmakirye, pia donamake. Tonda, sik ap, Allah ap, neika pia kum unamake. Yuk ak, pia karen akuk unamake. Sikda, el dam kum binmanto ninye anya arye, el pia teleb ubuka weik mikip ulula ara, sik ap pia kum unamake.

¹⁰ Ayupu laka nyapmap ning nirya winipnamle talak ara, nyapnusiabe. Ura, Yesus el tamubuka yanamle sum arye winipnamle. El yalyopura, elti, diba tenebuka, el mapu kibuka, diksukumuk ulamice ninye arye elti, “Se el pia telebnye,” nyabuka, el si weik arye erenamake. Tonda, elti, diba tenebuka, el ap, kanye dukdongobuka ulamice nang nirya arye, elti, eibikirye, ‘Se, elda pia telebe,’ tenebuka, elti, kanye deibuka si erenamake. Ara, sik wininamak sum ara, anggun Tesalonika mutuku ninye babye, atonun wininamlulume. Ara talye ati kume. Nunce Yesus ati, laka nyabuka peterelamsupu yupu nirya ara, diba teneluluma anya arye, anggun Tesalonika mutuku ninye babye, atonun wininamlulume.

¹¹ Anirya ara, tuba tenebirye, anggunti Allah morosenyabe. Allah morosinyaba ara, ani. Ara, Allah arye anggunti, ‘Wininamake, wininamake,’ tenyamsuk touk, pia diksukumuk winibicopura, Allah arye anggunti, nyapnamle. Ara, “Anang ati ara, na kanye deipsine. Yukuamse talak arye, ‘Wininamake,’ tenyamse touk, akunum wininyake,” nyabuka, ‘Teleb ulinamsil’ tenen, nunce anggunti, Allah morosenyabe. Tonda, Allah arye anggunti, melipsilyopura, anggunce, ‘Teleb pil donamap’ tenen, tenelulum ning ap, dib tenemunye deice arye, winilamlum ning ap, anirya ara, ‘Allah el mikip deice arye, anggun winin ning nirya nong updeipnamsil’ tenen, Allah anggunti morosenyabe. Na Paulus arye nyapsine.

¹² Aning nirya tenebuka, Allah morosenyabe. ‘Winipnamle’ tenen, Allah morosinyaba deiyok ara, anggun winilalum ning nirya arye, yuk ninye eipsikirye, ‘Nun Deiyoknye Yesus ati, el si erebuka, weik arye telebe nyanamak’ tenen, morosenyabe. Aning atonun, elda pia teleb ululnye binya arye, elti, si erebikirye, el ap, kanye dukdongobuka unyak nang ati ara, ‘E anang ara, pia telebe tenepnamsiyak’ tenen, Allah morosenyabe. Anirya ara, Allah ap, nun Deiyoknye Yesus Kristus ap, sik bitinye arye, sik kanye aryuk anggunti, bico tenebuka, talye melisirikce ning weik ulamle atonun, yuk nang eipsikirye, sik bitinye nang ap, anggun nirya ati, ‘Weika arye telebe nyabuka si erenamsiake’ tenen, Allah morosenyabe.