2 Tawarikh 9 - Eipomek

Syeba mutuku ninye deiyok kil, Raja Salomo dam Yerusalem mutuku berekelyayuk ati, sekik yupu

¹ Ninye arye, “Raja Salomo bira, Allah Yahweh siuk erelule. Salomo bira, mambul weik pil dolirye, Israel ninye unyak mutuku ara pia teleb ulule,” nyabuka lak nyalbalamikba, otam pera weik mutuku, si Syeba mutuku deiyok kil arye ayupu pia kekelamuka ati, akil arye, Ayupu kekepse ning ara, dip winibuka ulul do, kum do?’ tenebukce, ‘Na Raja Salomo un dam binirye na asing arye eipnirye biknamne,’ tenebuk. Utenebuk ati akunum biyukura, Syeba mutuku taleamuk kil arye, Raja Salomo biti ikin yupu deice arye, ‘Na asipnye yupu ara, moubuka nyapnamle do, kum do?’ tenen, asipdeyuk. Ura, Syeba mutuku ninye deiyok kil Yerusalem mutuku binuyuk talak ara, ‘Salomo arepnaman tenen, nyapdeibukba, el amu tam nang arye, dekna weik ning emas ap, urasin pia teleb keil ap, unta basam weik ap, nintong teleb ning si rempah-rempah ap, el neika balamik nang ap, aning-aning nirya nukmanto kum weik arye libuka bobiyuk. El talebuka ulamuk ning bobukce, aunta basam weik ning, sik balye deice deibikce, aning nirya Salomo dam bobiyik. Biyikura, Syeba mutuku deiyok kil arye yupu kekelamukce biklamuk ning nirya ara, Salomo ap yupu sirikinmarik.

² Syeba mutuku deiyok kil arye, aning-aning nirya ati asibuk bukni, abinuka asibuk ning nirya ara, tonok ning babye, ton kum batakuk. Aning nirya ara, Salomo birye akil nyanmok ning ati bikeipmokce, tamubuka deiyok ning lak nyanmokba, akil arye kekebuk.

^3-4 Aning nirya lak lebuk ati, akil arye Salomo weik arye kel bikamukce lak nyalamuk ning ap, winilamuk ning ap, eibuk ati, ‘Se, elda yata tonye do?’ tenebuk. Tonda, Salomo el babye ninye deiyoknye Raja nang ulamak aik domuk ning ap, anyaik dona ati mambul weik pil dolamuk ning ap, Salomo el din ning kintibikce, meja deice delilamik ning ap, el mambul pil dolamik nang, sik deice tam deiyok nang ap, sik anang neika lelebuka bulamik nang ap, Salomo el mek ap, din ning ap ati melibuka arelamik nang ap, el anggur mek memebuka melibuka arelamik nang ap, apil melina nang nirya arye kiniklamik baju ap, tonda Raja Salomo birye, Allah kina ati kam ning obuka, Allah Yahweh si eren aik dam yanuka uku dongolamik ning ap, aning nirya ara, Syeba mutuku deiyok kil el asing arye eibuk. Eibukura, Se, aning nirya ara pia telebe. Aning nirya ara pia mambul,’ tenebukce, ikin kanye bobukce, talima talipdanuka nyabuk.

⁵ “Se, Raja Salomo, na mutuku ulamsirye kekelamsiba, ‘Raja Salomo birye winibuka-winibuka pil dolamuk. Tonda, elda pia kele weiknye ulule ati, elce, winiplulume, nyalul ning ara, pia teleb aryuk nyalule nyabuka, yuk nang arye lak nyalamikba, kekelamse ning ara, dipkoprob ninguk nyalamnike.

⁶ Minop talak anyalamik ning ara, dipkoprob nyalamnik bukni, bita kum bikamsa ati, ‘Aning ara dib kum tenelamse bukni, wini talak ara na asing arye akunum yanuka eipne. Wini talak ara, na asing arye eipnarye akunum bikne. Ati ara, na kanye ara anda kel weik kiamlum deice arye, teleb kibuka pil dolamlum ning nirya ara, tukwak arye nyapmanto kum ulul ati, yuk nang arye mitik anun nyalamikba, kekelamse bukni, wini talak ara, aning nirya akunum yanuka eipmane. Aning weik tam ning nirya ara mambul teleb weik ulule,” nyabuk.

⁷ “Ati, na kanye ara, an domlum kilapu nirya ara, an kanye deibuka unyake. Aning atonun, an amu tam unyak mapu silip nirya ara, sik melibikirye, an amu tam ikin pil dokirye, an dam yakceba, an kel weik kiamluma deice arye, yupu nyalyam ning ara, kekebikirye, Teleb kanye bobuka unyake tenepne. Ati na kanye ara, An mapu silip nirya ara, pia kanye deibuka unyak tenepne,” nyabuk.

⁸ Nyabukce, aning ton nyabuk. “Ati ara, ani koprop, ance si erelyam Allah, Yahweh ara, pia telebnye ulul ati, ninye nirya arye, elti, telebe nyapting, tenepne. Ninye nirya arye, teleb yupu nyapmunyak arye, el siuk erenamlume. Allah arye anti, pia kanye deiamkukce anti, ‘Israel yala ninye nirya, sik ninye deiyoknye Raja kipnamle tenen, wipdeiamkukba, sik Israel mutuku ninye taliplume. Allah el si Yahweh arye winibuk ning ara, talye ati kum winibuk. Kume, ance si erelyam Allah Yahweh, sik Israel yala ninye ati, bico tenelamukce Sikda amutuku noutam pia ati unamak tenelamukce, wini talak babye tuba tenelul deice arye, an wibuka deipkukba, Israel ninye sik deiyoknye Raja akunum ulyame. Wipdeipkukce Anye bira, wininamle, Israel ninye sik melina ati, dipkoprob ning pil dobnin balyakarye, sik winilamikce touk, teleb kibuka yupu lipsisikuka bokolina ati, deiyoknye kipnamle. Tonda, diksukum ninguk talebuka, pil donamle,’ tenyamukce, wibuka deipkuke.” Ayupu nirya ara, Syeba mutuku ninye deiyok kil arye, Raja Salomo biti nyabuk.

⁹ Nyabukura, Syeba mutuku ninye deiyok kil arye, Raja Salomo biti, pia teleb ning boyanuka arebuk. Elce arebuk ning dekna weik ning, el si ara emas, el ikin ara yupa pia weik, empat ribu (4.000) kilogram ap, tonda urasin pia teleb dekna weik keil el si batu permata weik tonun ap, ton ning ara, nintong teleb ning el si rempah-rempah weik arye arebuk. Anintong teleb ning rempah-rempah ap, tonda, ‘Din ning to nyapnamleʼ tenen, taplakuka deililamaka ning ap boyayuk ning ara, pia kum nukmanto weik arebuk. Yuk talak nirya ara, yuk nang arye Salomo ati aweika arye arebuk atonun ton, pia kum arelamik. Aning nirya ara, Syeba mutuku ninye deiyok kil arye Salomo biti rempah-rempah weik arye, arebuk touk ton kum arelamik.

¹⁰ Tonda, Raja Huram el mapu ap, Raja Salomo el mapu ap nirya arye, laut kwen deice balamik ning, el si ara kapal laut, libuka dekna pia weik ning el si ara, emas teleb ning, Ofir mutuku arye boyanuka libikopura, akapal deice arye boyayik. Tonda, urasin pia teleb yo lakase, el si ara cendana yo (keipyal yok atonun) lakase ap, tonda urasin teleb, dekna pia weik keil ton pia weik arye boyayik.

¹¹ Bobuka yayik ning ara, Raja Salomo birye, urasin pia teleb yo el si ara, cendana yo dobukabukce, Allah Yahweh el si eren ati aik atolonga morona yo deibuka dobuk. Tonda, el un aik pum tam ton deibuk. Tonda, ayo cakuka teleb bung-bung an ning, el si ara kecapi ap, gambus ap, mot nyan nang bona ati puturubuka deibik. Atalak ara, urasin pia teleb yo ara kum nukmanto dobuka yayik. Atalak bukni, anoutam talak nirya babye, Yehuda mutuku noutam ara, aning atonun ton pia kum ulamukbuk, atalak arye aning nirya ubukba eibik.

¹² Tonda ninye deiyoknye Raja Salomo, el babye tenebuk ning ton, yuk menenga ning el dekna weik ning deiamukak arye dobuka Syeba mutuku kil ati, talye urdem arebuk. Tonda Syeba mutuku kil ninye deiyok kil arye el babye tenebuka moronmok ning ara, Raja Salomo birye akil ati arebuk. Aning nirya Raja Salomo birye dobuka, akil arebuk ning ara, el ap neika yamek nang nirya ap, tuba tamubuka, sik mutuku uk biyik.

Raja Salomo birye, bona weik talilamuk ati, nyabuk yupu

¹³ Keting tamun, aketing tamun nirya bukni, tonok keting tamun noutamak ara, yuk mutuku nang arye Raja Salomo biti, bulubuka arelyangalamik dekna weik ning emas ara, pia weike. Ara aketing tamun nirya ara, duapuluh tiga ribu (23.000) kilo gram dekna weik kat ning emas dobuka arerilyangalamikba, dololamukce ‘Naʼ tenen, delilamuk.

¹⁴ Tonda, yuk nang arye ton, aning atonun ton dobuka yan arelyangalamik ning ara, kum nukmanto. Ara, sik bona dekena aik deiyok nang ap, Arab mutuku deiyok nang ap, sik pala tam mutuku talebuka ulamik nang, Gubenur nang ap, sik adeiyok nang nirya boyangalamikce, arelamik ning ara, kum nukik bukni, adekna weik ning ara, pia weik arye arelamik.

¹⁵ Aemas ara Salomo dopromukce, dekna weik kat ning emas, urasin teleb ning ara dobuka, Mal olan talak ara, mal opsicak tenen, yin talin nang sik nong lelina ati talin ning, el si ara perisai dua ratus memebuka deiamuk. Tonda, aning kintinina ati ara, tonok ning, dekna weik ning emas ara, 3.5 kilogram dobuka, aning perisai memebuka deiamik.

¹⁶ Aning atonun, perisai mitik ning kintinina ati, dekna weik ning emas deice arye yupa weik, tiga ratus (300) perisai mitik ning ton kintinip deiamuk. Tonda tonok perisai kintinina ati ara, kat ning emas dopnarye, palibuka deiamuk ning ara, 1.7 kilogram deice arye memebuka deiamuk. Winibukura, ninye deiyoknye Raja Salomo birye, aning nirya dobuka, weik teleb un aik, el si ara, Istana Libanon Mutuku Yo Palpal Aik noutam binuka deibuk.

¹⁷ Aning nirya akunum dobukopura, ninye deiyoknye Raja Salomo birye, el Raja bun ning deice ara, dekna weik kat ning, el si emas, aning arye dobuka, taplakuka deiamukce, ninye deiyok nang bun kursi kintinibuk. Adeice ara, ‘Abun ning urasin teleb upnamleʼ tenen, Gaja basam el yang belelamle ning ap, ansinibuka dobuka deibuk.

¹⁸ Abun ning el cang ara, weik ati, aning welebuka buna ati ara, moron yo atonun ning, el si ara tangga nakub barye memebuka deibuk. Abunak el urasin tam ara, Ninye deiyoknye Raja el yan ereibuka dikdik sena ati, aning ton memebuka deibuk. Abun ning dana-dana tam ara, Raja el taruk bitinye deibuka dikdik sena ati, ton memepdeibuk. Abun ning dam bukni, dana-dana tam ara, kam ning el si singa kus urasin atonun ning ara, patung memepdeibuk.

¹⁹ Tonda, aninye deiyoknye Raja, el bun ning, moron yo atonun, tangga ara nakub barye (6) memepdeibuk. Diksukum tam ap, lilun tamak, singa kus urasin atonun ning puturubuka deiamuk. Asinga kus urasin atonun ning ara, el kong nirya ara, obarye (12) memepdeiamuk. Asinga kus ato ning ara, atangga dana-dana tam nirya memebuka tekeibik. Abun ning ara, yuk mutuku ninye deiyok nang babye, memebuka ton kum delilamik buk, el tonok memamuk. Abun ning ara, aning tonok kipdeibukce, domuk. Aning atonun, yuk mutuku nirya ara, ton pia kum uamuk.

²⁰ Ninye deiyoknye Raja Salomo, el mek makau ara, dekna weik ning emas aryuk memepdeiamuk. Atonun, Istana Libanon Mutuku Yo Kan-kan Aik pum tam domik ning nirya ara, dekna weik ning, urasin pia teleb ning, emas aryuk memepdeiamuk. Tonda, urasin teleb kat ning el si perak, aning memebuka anyaik pum tam delilamik ning ati bita merekuka kum deiamuk. Deiyok ara, Raja Salomo birye ninye deiyoknye kiamukce, ulamuk talak ara, urasin teleb ning, perak, amutuku-amutuku noutam ulamik nang arye, ‘Akat ning ara, mambul kume,’ tenelamik ati, elce emas aryuk dobuka memepdeiamuk.

²¹ Tonda, Salomo birye, ‘Nara yuk pera mutuku binuka, teleb ning deknamne. Opera mutuku ninye ap, na ap, dekelanamapʼ tenen, el mekwen deice bana ati kapal ara, kapal laut, weik memelamik. Akapal laut ara, mikip weik arye pera Tarsis mutuku binmanto kapal laut uk memamuk. Huram mutuku deiyoknye, Raja arye nyapdeibukba, el mutuku kel nang arye, mekwen deice ban ning, kapal laut memebuka domik. Memebuka deiamika ara, keting tamun winilye akunum upneura, akapal arye like tonok karin aryuk pera mutuku arye, Salomo un dam berekelyangalamik. Akapal pum tam ara, teleb ning emas ap, kat ning urasin pia teleb ning, kat ning perak ap, weik gaja basam yang belyamuk ning ap, tonda maka si merak maka ap, dopnarye, Salomo biti arelyangalamik.

²² Ninye deiyoknye Raja Salomo bira, yuk mutuku ninye ati, sik ninye deiyok kilamik nang ara, bona mitik tonunuk talilamik bukni, Salomo bira, bona weik talinanye ulamuk. Aning atonun, yuk mutuku ninye deiyok nang Raja daulamik bukni, sik kel bikin ning ara mitik tonun biklamik. Bukni, Raja Salomo bira, kel weik bikna ap, teleb kanye tenina ap yuk-yuk bona weik talina ap deiyoknye ulamuk. Ati atalak ara, el ulamuk atonye ton kum ulamik.

²³ Amutuku-amutuku talibuka, deiyok kibuka ulamik nang, Raja-Raja nang nirya arye utenelamik. Se, ninye deiyoknye Raja Salomo bira ton, epdabirye, Allah arye nyapdeiamukba kel bikamuk ning ap, Allah arye Salomo el kanye noutam deiamuk ning nirya ap ati, elce nyapsiliba, biknamap tenen, yanuka kekelamik.

²⁴ Aketing tamun, aketing tamun nirya ara, yuk mutuku nang arye, Se, nun ton kel biktibye tenen, Salomo un dam yangalamik talak nirya ara, el arena ati yuk-yuka bona bobuka yangalamik ning ara ani. Urasin pia teleb ning bukni, dengna weik ning, el si ara emas ap, perak ap, tonda cang baju bol teleb ning ap, ninye olan talak ninye on ning mal ap, yin ap, ninye on ning yala-yala nirya ap, ‘Din ning to weik nyapnamsilʼ tenen, din ning likuka deiamik ning, to nyana teleb ning, el si rempah-rempah ap, kuda basam ap, keledai basam ap, aketing tamun nirya bobuka yanuka, ninye deiyoknye Raja Salomo biti arelamik. Boyangalamik deice arye, Raja Salomo bira, bona weik talinanye ulamuk.

²⁵ Ninye deiyoknye Raja Salomo bira, el kuda basam yupa ap, ninye olban talak, kuda basam arye libuka ban ning, kereta kuda ap, aning aik pum tam delina ati, mitik aik yupa weik, empat ribu (4.000) aik ton domuk. Domukce el ninye olbana ati, balye tam bukuka bisik ban, kuda basam ara, dua belas ribu (12.000) arye kintinip deiamuk. Kintinibukaura, ton tam nang ara bokuka, Yerusalem mutuku noutam deibuk. Ton weik tam nang ara bokuka, mutuku-mutuku ninye olban ning ati, kereta perang ara, Asukum wekenamak tenen, memepdeiamukak uk deibuk.

²⁶ Tonda, ninye deiyoknye Raja Salomo, elcuk Efrat mek lilun tam arye dipdongobuka, otam Pilistin ninye ulamik mutuku ninye deiyok nang nirya ap, anoutam nirya ara, Salomo birye taleamuk. Weik mek, Efrat mek arye dipdongobuka, otam Mesir mutuku wililonak noutam talebuka ulamik ninye deiyok nang babye el Salomo biryuk talebuka ulamukce, yupu nyalamuk.

²⁷ Raja Salomo birye talebuka ulamuk talak ara, dana-dana tam mutuku nirya ara bona weik dekelalamik deiyok arye teleb ning el si perak ara, Yerusalem mutuku noutam binuka delilamik ning ara, talye keil sirika atonun pia weik uamuk. Tonda, Libanon mutuku palamuk urasin teleb kat yo, el si ara cemara yo ara, pia weik tiklamuka ati, talye Ara yo weik palamle atonun ulamuk. Ayo dekna weik, urasin teleb yo kum bukni, mutuku kon deice arye, ayala yo mitik weik arye, talye uamuk.

²⁸ Tonda, Raja Salomo el pil dona ati deiyok kibuka taleamik nang arye, Mesir mutuku ap, tonda yuk mutuku ap, binuka kuda basam deknarye, Salomo un dam boyangalamik.

Ninye deiyoknye Raja Salomo talebuka ulamuk talak, yupu nirya bumang kibuka sekeibuk yupu

²⁹ Ura, ninye deiyoknye Raja Salomo, el kam ulamuk talak ulamukce, pil dolamuk ning ap, weik arye biklamuk ning ap nirya ara, Allah el yupu lak nyalamuk nye, nabi Natan winilamuk ning ati, sekeiamik buku noutam ap, Silo mutukunye nabi Ahia winilamuk ning sekuka deiamik buku noutam ap, tonda, aminyan winipnamuk ning ati, yupu lak nyalamuk nye, nabi Ido ap, el ulamuk ning ati sekeiamik buku noutam ton, Salomo ulamuk ning ton bulubuka tonok sukum sekeibik. Aminyan talak winipnamuk ning ati lak nyalamuk nye, el si nabi Ido, elce, ninye si Nebat birye deiamuknye, Raja Yerobeam birye el ton ulamukce, sekeiamuk.

³⁰ Keting tamun weik, empat puluh (40) tahun noutam arye, ninye deiyoknye Raja Salomo birye, Israel mutuku noutamak daulamik nang nirya taleamukce, ninye deiyoknye kibuka Raja ulamuk.

³¹ Winilamuka ani, akunum sirya dakukce el Raja Salomo akunum dibukura, el apu yapu dipneura, sik nong weilamik mutuku uk, el nong ton bobuka tuku lukuka weibik. Amutuku si ara, el li koprop, el si Raja Daud birye, talebuka ulamuk mutuku uk binuka weibik. Binuka weibikura, Raja Salomo el mi Rehabeam birye, el li pununa ati, ninye deiyoknye Raja kibuka tikuk.