2 Tawarikh 8 - Eipomek

Ninye deiyoknye Raja Salomo birye, talebuka ulamuk ning ati, nyabuk yupu

¹ Raja Salomo birye, Allah el si eren aik ap, tonda el bidamnye ninye deiyoknye Raja una aik ap ati ara, anyaik bitinye dolamuk keting tamun ara, dua puluh (20) tahun deice arye anyaik pil dolamuka ani, dakdongobuk.

² Akunum winibukopura, ninye deiyoknye Raja Huram birye, minop talak Raja Salomo biti areamuk mutuku noutam ara, weik asik uamuk bukni, akunum malye ubuk ati, Salomo birye nyapdeibukba, el pil don nang arye, anyasik lipsisikuka dopdeiamikba, Israel ninye deiyoknye Raja Salomo birye, sik Israel ninye ati, Tamubuka amutuku-amutuku noutam binuka unamlume,” nyabukba, sik Israel ninye noutam arye, ninye weik arye amutuku noutam binuka ulamik.

³ Tonda, ninye deiyoknye Raja Salomo birye nyabukba, el yin talin nang arye binuka Hamat-Zoba mutuku opyakikce, amutuku nirya dalubuka binuka doprobikce, anang ara Salomo el amu tam ulamik.

⁴ Winibikopura, weik buta mutuku noutam bukni, amutuku si ara, Tadmor mutuku, el yin talin nang arye mikip kibuka olamikce, amutuku noutam uamuk weik asik ara, el pil don nang arye lipsisikuka domik. Winibikura, anyaik cang weik keil poka dobuka antanapdongobikce, pala weik keil taplakuka yangabuka deibikce, cang keil poka domik. Aning atonun, weik keil poka ton, bona ning ati kintinibuka delina ati, Hamat mutuku noutam uamuk asik dana-dana tam nirya ara cang weik keil poka dobuka antanapdongamik. Tonda, Salomo birye nyapdeibukba, el pil don nang arye, Hamat tam noutam, ninye arye wa wibuka kouamna ani libuka dilamik, ning nirya dobuka, aning-aning nirya dokola delinak ati, deiyok mutuku kiamik.

⁵ Ati ara, sik anang aryuk, Bet-Horon mutuku eitam ap, tonda Bet-Horon mutuku utam ap, mikip weik arye, cang weik keil poka dobuka antanapdongobikce, akeil poka noutam wekelban bisik bublan ton, poka dobuka tirikdongamik. Tonda, ‘Anyasik ara, malye nang arye talye lukdanuka kum weknamtingeʼ tenen, abublan mikip arye tirikilongona ati, kat ning el si besi arye, cang yo urasin atonun memebuka, abublan-abublan deice domik.

⁶ Aning atonun ton, ninye deiyoknye Raja Salomo birye nyapdeibukba, Bahalat mutuku noutam babye, anyaik ulublomik ning lipsisikuka domik. Tonda atam ara, Salomo birye nyapdeibukba, amutuku noutam wa wibuka koulamik ning, dobuka delina ati aik domik. Atonun tonda, kuda basam arye libuka, tuku deice ban ning, ninye arye aning deice bukuka, yuk nang olbana ati el si kereta kuda dobuka delina ap, tonda yin talin nang bana ati kuda basam delinak babye, amutuku noutam memebuka deiamik. Aning atonun, Yerusalem mutuku noutam babye, Libanon mutuku noutam babye, Raja Salomo birye, Aning dopnamne tenyamuk ning nirya ara, amutuku noutam ap, el Raja Salomo birye taleamuk mutuku noutam nirya ap, elce nyapdeibukba, el pil dona deiyok nang arye, apil dolamik.

^7-8 Tonda, Salomo birye dan mutuku do nirya, amutuku-amutuku noutam ulamik ninye ati, “Narye arena kumce, na pil talye dopnululume, nyapnyeura, apiluk donamlume,” nyabuka nyalamukba, el patalamuk touk, weik ikin pil dilamukak, apil dolamik mutuku ninye ara ani. Ara, Amori tam ulamik ninye ap, Het tam ulamik ninye ap, Feris tam ulamik ninye ap, Hewi tam ulamik ninye ap, Yebus tam ulamik ninye ap, anang-anang nirya ara, Salomo el pil ati, talye pil dolamik. Ara, minop talak Israel mutuku noutam, aninye yala yuk-yuk daulamik bukni, sik Israel nang arye, Kanaan tam nirya malye kibuka obik talak ara, aninye obuka sirya kum dakik. Sik aninye ara, ton tam nang ara tuba kam ulamik ati ara, Raja Salomo aryuk pil dilamuk ak, aninye ara dengna ton dolona kumce, el pil talyeuk dolamik. Sik ayala ninye ara, Kanaan arye deiamukak deipdanin yangalamik ninye ulamikbuk, sik Israel ninye, amutuku biyikce, amutuku ulamik ninye nirya binuka obikce, ton tuba batakamik nang kam ulamik ninye ati, weik ikin pil dilamukak dolamik. Sik aninye ara wini talak babye, sik Israel ninye sik pil melibuka don nang unyake.

⁹ Bukni, Raja Salomo birye Israel yala ninye ati ara, ikin pil ton dipneura, kum dolamik. Aning kum bukni, Raja Salomo birye sik Israel nang ati, yin talin nang kilina ap, yin nang yupa yuk-yuk ati deiyok kin nang ap, sik ayin talin nang nirya ninye deiyoknye kin nang ap, tonda kereta perang ning deice tikuka ban nang, sik deiyok kin nang ap, tonda kuda basam balye deice bukuka, ninye olban nang ap, apil don nang uk, Israel yala nang webuka delilamukce, apil arelamukba, talebuka dolamik.

¹⁰ Tonda, Raja Salomo el pil anirya dolamik nang, yupa pia weik ulamik ati ara, anang sik deiyok nang ara, yupa weik dua ratus lima puluh (250) nang ton webuka deiamukak, sik anang arye, Salomo el pil yala-yala nirya dona ati wibuka deiamukak dolamik nang ati kaliklamikce pia ikin pil dilamikba dolamik.

¹¹ Ninye deiyoknye Raja Salomo, Mesir mutuku arye taleamuk deiyoknye birye deiamuk kil, Salomo birye domuk. Domokba, akil ara, minop talak Salomo el li Daud, elce domuk pia teleb aik pum tam ulamuk bukni, Salomo birye, Kume akil ara, Daud el weik aik pum ulamuk bukni, Allah arye nyapdeiamuk yupu dobuka teleb yo deice pum tam dongobik ning, el si Peti Perjanjian, aning ara Daud el aik tia talak ati, deiamik ati ara, anyaik akunum pia lek atonun ulule. Ati ara, narye Mesir mutuku arye domse kil ara, tuba Daud aik kum unamle tenebukce nyabuk. Ati akil dobuka, yukak deibuk. Ara, Salomo birye akil ati, yukak, aik dobuka kintibukura, akil asukumuk ulamuk.

¹² Ura, atalak-atalak noutam nirya ara, ninye deiyoknye Raja Salomo birye,kambing ato ning obuka, Allah Yahweh el si eren ap, el si kina ap ati, keil pala deice arye yangabuka deiamuk ning, el si mesba deice arye, uku dongolamukba, uku arye aning nirya dilamuk. Amesba ara, Allah Yahweh el si eren aik damuk bukni, urasin tam domikak, adeice arye uku sekalamikak, kam ning obuka yanarye, aning deice dongolamuk.

¹³ Akam ning obuka yana uku dongolamuk ning nirya ara, minop talak Musa birye mambul yupu deice arye, “Winipnamlume, aning ara winibuka aremunyakarye, Allah ati si erenamlume,” nyapdeiamuk touk, winilamuk. Tonda, Musa birye, “Pia weik sum ara awala ap, atanggal ap unamle,” nyamuk touk Salomo birye winilamuk. Ara, weik sum, pil dona kumce, didik sen sum, Sabat sum ap, winiryuk wala tikin talak ap, tonda yuk weik sum ara, keting tamun nirya noutam, weik sum winilye ning ton awamuk. Ara, Nena Kum Roti kwaning kwalina sum ap, ninye Koulamik Ning weik tonun Lin Sum kwalina ap, tonda Mitik Bar Asik doltakna aik don sum ap, aning nirya ara Musa birye nyapdeiamuk touk, Salomo birye aninguk talebuka winilamuk.

¹⁴ Tonda, Salomo birye, el li koprop Daud birye, “Winibuka unamlyame,” nyapdeiamuk touk, Raja Salomo birye sik imam-imam nang ati, bulubuka yuk-yuk wibuka deibukce, “Sik aninye kong ara, atalak aryuk Allah el si eren aik pum tam pil donamlume. Ton ninye kong ara, yuk talak noutam arye punubuka apiluk donamlume,” nyapdeibukba, aninguk winilamik. Tonda, Allah Yahweh el si eren ati, mot sena ap, imam-imam nang pil dolamik ning melina ati ara, Salomo birye, sik Lewi yala nang arye deiamikak, deipdanin yangalamik nang, wibuka deiamukce, “Aninye kong ara, atalak pil donamlume, sik yuk bulubikura, anang punupmunyak arye, apiluk donamlume,” nyapdeibuk. Ati, sik imam nang aryuk, Allah si eren ati weklamik talak nirya ara, aLewi yala nanguk melilamik. Atonun ton, Allah Yahweh el aik bublan dam nirya melibuka Kalikna nang babye, sik kong yuk-yuk bokuka delilamuk touk, apiluk dolamik. Aning-aning nirya ara, Allah el amu tam ulamuk ninye deiyoknye, Raja Daud birye, “Winibuka unamlame,” nyapdeiamuk touk, Raja Salomo birye aninguk winilamuk.

¹⁵ Ura, Raja Daud birye sik imam-imam nang ap, sik Lewi yala nang ap, Allah el aik pum tam pil don nang ati, “Wininamlume,” nyapdeiamuk ning nirya ara, aninguk talebuka pil dolamik. Tonda sik Lewi yala nang ati, ‘Allah arena ati, dekna weik bon ning yala-yala nirya deilin aik, winibuka pil donamlume,” nyapdeiamuk ning ap, tonda yuk-yuk pil don nang ap ati, nyalamuk ning nirya ara moubuka talilamikce, aninguk pil dolamik.

¹⁶ Ati ara, ninye deiyoknye Raja Salomo birye, ‘Allah el si eren aik dopnamneʼ tenen, kintinyamuk aik don ning ap, pil don nang ap nirya ara, el pil dona deiyok nang arye akunum dobuka sirya dakik. Ara, anyaik pil dona ati deiyok kouamuk talak arye dipdongobuka, ayukumna yo arye dipdongobuka, Allah Yahweh el aik nirya dobuka sirya dakik. Ara pia teleb kibuka adiparyuk dobuka sirya dakik.

¹⁷ Ura, aning nirya akunum winibukura, ninye deiyoknye Raja Salomo Ezion-Geber mutuku ap, Eliot mutuku ap biyuk. Amutuku bitinye ara, weik laut mek kwen dam tam, el si Akaba, amutuku ara Edom mutuku noutam uamukak biyuk.

¹⁸ Tirus mutuku taleamuk ninye deiyoknye, el si Raja Huram birye, el amu tam pil don nang, laut kwen deice weik mek bukna yo, el si kapal bukuka bana ati, pia weik kel bikamik nang el Huram mapu ton wibuka doprobuk. Winibuka ura, Raja Salomo el mapu ap, sik neika amek bukna yo, el si kapal uk dobuka balamik ani, otam pera omutuku si ara Ofir mutuku biyik. Ofir mutuku akunum binuka, sik anang arye dekna weik kat ning, el si emas, el ikin ara, lima belas ribu (15.000) kilo gram, bobiyikce dobuka ninye deiyoknye Raja Salomo el un dam tamubuka boyayik.