2 Tawarikh 7 - Eipomek

Allah Yahweh el si eren aik ara, Raja Salomo ap, Israel nang ap arye, bisik bublan kukna ati, ‘Anyaik ara, teleb kipdeibibirye, sah kipnuyapʼ tenen, pil dobik yupu

¹ Ninye deiyoknye Raja Salomo birye, Allah ati akunum morobukopura, adiparyuk, uku buk im deice arye sakukce, Allah Yahweh kina ati, kam ning boyanuka deibik ning nirya ara, uku arye dibuka kum danaibuk. Winibukura, Allah si eren aik noutam nirya, Allah Yahweh ara, pia telebnye ulule ati, el damnye pia weik dirina, Allah el si eren aik wekuka langdibuk.

² Anya arye, anyaik pum pil dona deiyok nang, sik imam-imam nang ara, Allah Yahweh el aik noutam pia wekmanto kum ubik. Ara, Allah Yahweh el damnye weik dirina ara, Yahweh el si eren aik noutam nirya yanuka wekukce langdibuk.

³ Anyaik dam bulubuka wekmek ninye, sik Israel yala ninye nirya arye dinmekce, im deice arye auku buk saka yanganmok ning ap, Allah Yahweh el damnye weik dirina ara, Allah Yahweh el si eren aik noutam langdibuk ning ara, sik nirya arye gutam tuku dinikdongopmekce, sik asok ara tukwak kanupdongobik. Sik asok ara, tuku deice dinikdongopmekce, Allah ati si erenmek. Tonda, sik Israel ninye nirya arye, Allah ati si erena ap, mot nyana ap, unmekce, el si erenmek. Sikce tanmek yupu ara ani. “Se, nun ni koprop Allah ara, pia teleb ulirye, nunti weik tonun teleb kilisulule. Elce nunti, weik tonun bico tenesilirye, elce Wininamlulume, winipmunyopura, narye pia teleb kipdeipsinirye, kalekuka melinamsine nyabuka nyalin yupu deice arye nyapdeiamsuknye bira, luba kina kumce, pia kum bataknamsile. Tuba melinamsile nyabuka, si erenmek.

⁴ Allah Si erenmek talak ara, Raja Salomo ap, sik Israel ninye nirya ap arye, Allah Yahweh adinmok sukum arye, el si eren ap, elti, kina ap ati, kam ning obuka arenmek.

⁵ Winibikura, ninye deiyoknye Raja Salomo birye, Allah Yahweh si erena ati, ninye arye weilamik kam ning sapi basam, yupa pia weik, dua puluh dua ribu (22.000) ap, domba basam seratus dua puluh (120.000) ap arye obuka arebuk. Ara, ‘Nun ni koprop Allah Yahweh ap, nun Israel ninye ap, teleb ubuka neika unamapʼ tenen, aning arebuk. El ap, sik Israel ninye nirya ap, wininmek deice arye, Allah Yahweh el si eren aik ara, ‘Akunum teleb kipdeipmabeʼ tenen, sah kina ati nyalamakto, aning tenena ati, akunum winibik.

⁶ Sik imam-imam nang una ati memepdeiamikak tikik. Tikikce, sik Lewi yala nang babye, mot nyan ati ulamik ning, alat-alat musik ap nyebuka mot nyan ton yuk nang arye mot nyanmekce Pia telebe nyabuka, Allah Yahweh ati si erenmek. Sik Allah si eren mot nyanmek ning ara, min talak ninye deiyoknye Raja Daud birye memepdeiamuk ning nirya bopmekce, mot nirya nyenmek. Mot nyanmeka deiyok ara ani. Allah Yahweh arye, nunti teleb, weik arye bico tenesilirye, elce “Wininamlulume, winibuka unamlume, winipmunyopura, narye pia teleb kipdeipsinirye, kalekuka melinamsine,” nyabuka, nyalin yupu deice arye nyapdeiamsuknye bira, ‘Luba kina kumce, pia kum bataknamsile. Tuba melinamsile,’ tenena ati, si erenmek. Ura, minop talak, Raja Daud birye, mot deice arye Allah ati, ‘Anda pia telebnye,’ nyapdeiamuk talak ara, sik imam nang arye, lelim len ning, el si ara terompet lelim ponganmek sukum ara, sik Israel ninye nirya ara, tikmekce, mot nyanmek.

⁷ Aning nirya akunum winibikopura, Allah Yahweh el si eren aik bai tam bukni, anyaik dam keting yangan tam ara, imam-iman nang nirya wekmantoak ara, ninye deiyoknye Raja Salomo birye, ‘Asum ara, yuk una ati kum bukni, Allah Yahweh el si erena ati, arenuyab ning nirya ara, asukumuk arenuyabʼ tenen, anyaik dam lo teleb kipdeibukce, aning-aning nirya Allah ati arebuk. Asukum arebuk ning deiyok ara, Allah Yahweh si eren ati, kam ning obuka uku dabuk. Tonda, ninye arye wa wibuka koulamak din ning gandum ap, basam kop ap teleb ning ap, ‘Allah ap, ninye ap, teleb kibuka neika unamap tenen, elanak ati, aning nirya boyanuka, uku dabuka si erebuk. Ara, keil arye taplakuka yangalin ning mesba ap, teleb kat ning el si tembaka deice, Raja Salomo birye domuk ning ara, aning uku dana ak ara, weik arye kum domuk. Anyak dam lo noutam arebuka deiyok ara, min talak ara, Salomo birye tembaga mesba memepdeibuka deice arye, aning nirya ara, neikop arye arepman kum ati, anyaik dam lo noutamuk arebuk.

⁸ Ura, atalak adiparyuk ninye deiyoknye Raja Salomo ap, sik Israel ninye nirya ap arye, like tekbarye sum noutam nirya ara, weik kwalina kwalilamik. Akwalina kwalilamika ati, bukuka yanamikak arye ulamik Israel nang ara, yupa pia weik arye ulamik. Sik abulubuka yanamek mutuku ara, dapu tam mutuku, (arah utara) mutuku si tonok Hamat mutuku bisik ban tam arye dipdongobuka, iknapye (arah selatan), anirye ubuka Mesir mutuku bisik bana ati wililonak, (arah selatan) sirya tam ara, Israel ninye ulamik mutuku nirya bulubuka weik kwalina kwalilamik.

⁹ Tek barye sum arye, sik Israel mutuku ninye nirya bulubuka yanamikce, sirya sum akunum ubuka ati, sirya kwalibuka deibikopura, ‘Allah arye, nun malye un ning lyepsilirye, kilipnamsil tenen, kam ning opnarye, mesba deice arye uku dalamika ara, like tek sum arye din yulamik. Aning akunum winibikopura, tuba tonap like tekbarye sum tonap, atalak arye, ‘Minop talak tia ati, bara asik dobuka ulamupu ning ara, tuba tenenamap tenen, weik kwalina ton kwlilamik. Akwalina bitinye ning akunum yubikura, sirya sum, pin sum ati, Yahweh si eren ati bulubuka si erenmek.

¹⁰ Winibuka daunmeka ani, wala tekbarye sum, ara tanggal 23 deice arye, ninye deiyoknye Raja Salomo birye, sik amutuku bulubuka yanamek ninye nirya ati, anggun mutuku tamubuka binnamalume nyabukba tamubuka bindobik. Tamubuka biyikce, sik kanye pia deibik ning ara, sik ni koproba Allah Yahweh arye, sik apu koproba Raja Daud ap, el punubuknye Raja Salomo ap, Allah arye ‘Na mapuʼ tenen, wiamuk ninye, sik Israel ninye ati, pia teleb kipdeiamuk ning atibuk, sik kanye deibikce, sik nirya teleb tenebuka, kil-kil ubuk.

Allah Yahweh arye ninye deiyoknye, Raja Salomo dam, tonap tikilyayuk yupu

¹¹ Ninye deiyoknye Raja Salomo birye deiyok koubuka, apil-apil nirya dolamik deice arye, Allah Yahweh si eren aik akunum dolamuka ani, akunum dobuka sirya dakukce, bublan kukukce sah kibuk. Tonda ninye deiyoknye Raja Salomo birye el man aik ara, pia teleb weik aik ton, el si ara istana, dolamuka ani, dakdongobuk. Anyaik bitinye akunum sirya dakdongobuka dobuk ara, el kanye noutam arye, ‘Aik winibuka dopnamne,’ tenyamuk touk, nirya winibuka dobuk.

¹² Winibuka, aik sirya dobuk talak ara, Allah si Yahweh arye asum lukunyan noutam arye, Salomo damak yayukce lak nyabuk. Allah Yahweh arye nyabuk yupu ara ani. “Salomo ance nati moronilyam ning ara, akunum kekepkisirye, ance moropnulum touk, akunum melipmakine. Milipmakin ati, ance doplum aik ara, yuk wibuka kentinepdeipnirye, asukum ara, nati kam ning obuka, uku dalyangan sukum akunum kipdeipmane.

¹³ Ura, winipmanto ara, aminyan talak sik Israel nang arye, malye ubice ati, sik wenena ati, narye im noutam ulamle dua sekdongopniba, mok kum cepmanto do, sul kwising dopdeipniba, sul kwising arye ninye koulamak ning nirya dibikirye kum kipdeipnamak do, aning kumura, kanye imun weik uk do, mutmuta nirya kum danalina ati, deiyok ning dopdeipnyopura, na mapu koprop sik Israel yala ninye nirya arye, aning ebicopura, nati moropnamniyake.

¹⁴ Akanye imun ning areptinyeura, yuk nang arye, ‘E, aninye ara, Allah Yahweh, el mapu unyake nyabuka, na mapu koprop sik Israel ninye, na si deice sinyak nang ara, sik kanye amu tam kebuka uptingura, nati, ‘Naio melibuka lyepsutume,’ nyabuka, pia moropnamnitinge. Tonda winiptingce, sikce malye unyak ning nirya dipkoprob bataknamake. Winiptingopura, na im deice ununak arye, sikce nati moronamniyak ning ara kekenamne. Akekelamnirye, sik malye unyak ning ati ara, narye namin kipnirye kilipnamne. Tonda, sik unamak mutuku nirya ara, pia tamubuka teleb kipdeipnamne.

¹⁵ Wini talak ara, narye na mapu koprop unyakce, aik donyak mutuku nang ati, moubuka dilamnirye sik nirya arye moronamniyak ning ati, moubuka kekelamnirye, melinamne ning ati teninamne. Ara asukum unyakce, anyaik damak arye nati si erepnikirye, moronamniyak ninguk kekelamnirye melinamne.

¹⁶ Ati aning nirya ara, dipkoprob narye wininamne. Deiyok ara, asukum mutuku, anyaik noutamak ara, narye akunum wipdeiamsirye, akunum kintinibuka deiamse. Ara, nati pia tuba-tuba si erenamniyak sukum ara, asukum tenen, akunum wipdeiamse. Anyaik ara, narye moubuka dilamnirye dor upnin banamak talak nirya ara, naryuk ‘Naʼ tenen, ninye, Israel nang ati pia melinamne.

¹⁷ Winipnamna ati ara, Salomo anda, an ni koproba Raja Daud birye, dungnubuka una kumce dipkoprob uk, narye tenebuka nyapdeipne touk winilamuk atonun, tonda narye, ‘Aning ara winipnamlyame, aning ara pia kum winipnamlyame nyapdeiamse yupu moubuka taleamuk touk, aning babye narye dobuka, an deice uk deipkine. Ati an babye, narye nyalamse yupu nirya ap, anti nyabkise yupu ap, aninguk moubuka talepmince, pia dobolbiminyopura, teleb kipdeipnamkine.

¹⁸ Narye nyapkise touk, uminyeura, narye an ni koproba Daud ati, Winipnamne nyapdeiamse touk melipkiniba, ance Israel ninye talimince sik weik deiyoknye Raja pia unalame. Ara, sik Israel ninye nirya ati, sik deiyoknye kipdeipkinyeura, pia talebuka unalame. Yuknye tonok babye, Israel ninye sik deiyoknye kum kipnamle.

¹⁹ Bukni, an ap, ance deipminba, deipdanin banamak ninye nirya arye, na si bataknumunce, yuk isa siuk erepnin bamunyopura, wenepnamsine. Aning atonun, narye, ‘Aning ara wininamlume, aning ara pia kum winipnamlume nyapdeiamse yupu ap, ‘Aning ara mem ning nyapdeiamse yupu ap nirya, yanipmunce eibuka batakmunyopura, wenenamsine.

²⁰ Anggunce na nyalamsise yupu yaniptapmunyeura, anggun wenena ati wininamne ning ara ani. Ara, na mapu sik Israel ninye ati, ‘Ateleb mutuku uk pia aunamake nyalamsirye areyamse mutuku ara, tonap tuba tamubuka dopropnamsine. Tonda, ance dopdeipnulum aik na mambul aik unamle. Bukni, anggunce malyeuk kipdeipmunyopura, anyaik pum tam ara, ‘Na siuk erepnamniake tenen, na si anyaik deice deipman bukni, anggunce na bataknumunyopura, na babye anyaik arye kisikuka bindopnamne. Bindopniba, ninye yuk mutuku nang nirya arye, anggun Israel ninye ati, malye-malye nyabikirye, nalibuka akutunamake. Tonda, anggun Israel ninye ati, Sikda talye asik nang anya,’ nyanamsiake.

²¹ Wini talak ance pia urasin teleb aik dopdeipnulum ning ara, urasin pia teleb aik ulule. Anyaik atonun ton kum ulul bukni, sik Israel nang arye malye-malye ubikirye, na bataknicopura, narye anyaik batakdongopniba, anyaik pia malye upnin banamle. Malye uplye ati, yu nang arye ulubuka bataknamake. Uluplomica ning ara, aminyan talak anyaik dam bace nang eibikirye, Se, anyaik malye ubuk ara, yata deiyok ati ubuk do?’ tenen lukuldanamake. Lukdakirye nyanamake, Se, yata deiyok ati, Allah el si Yahweh arye anyaik ap, amutuku ap, aninye ap ati, malye kipdeibuk do?’ nyanamake.

²² Ayupu nirya nyabiki bukni, sik yuk nang arye nyanamake. ‘Kume, sik Israel ninye ara, sik ni koproba Allah el si Yahweh arye, sik deipkirikdop nang, Mesir mutuku arye dobuka boyanamuknye, el si yanibikce talye isa siuk erebikce, isa amu tam ulamik ati, Allah el si Yahweh arye aninye nirya, sik wenena ati anyaik malye kipdeibukce imun kanye bon ning weik tonun anang ati arebukeʼ tenen, nyanamake. Ara el yu ning, sik anang nong deice deibukce, weik tonun winilamukba, sik ikin weik asa unyake nyanamake.” Allah arye Raja Salomo biti nyabuk.