2 Tawarikh 6 - Eipomek

Ninye deiyoknye Raja Salomo birye, el taleamuk mutuku nang ati, nyabuk yupu

¹ Ninye deiyoknye Raja Salomo birye, Allah ati morobukce ayupu nyabuk. “Diba, Allah Yahweh minop talak arye, anda akunum nyapdeiamsulume. Ara, ‘Nara, pia mirin dua kan-kan kunukulul noutamuk unamne,’ nyapdeiamsulume.

² Bukni na ni koproba Allah, wini talak ara, ‘Allah ara anyaik noutam unamleʼ tenen, narye anti, pia teleb aik akunum kintinibuka dopmakine. Anyaik dopsa deiyok ara, ‘Ance anyaik wekmince, asukumuk pia unamlamʼ tenen, dopkise,” Raja Salomo birye nyabuk.

³ Atalak aryuk, sik Israel nang nirya anyaik dam atikmeka ati, atalak aryuk, ninye deiyoknye Raja Salomo birye, ‘Sik Israel nang pia teleb unamakʼ tenen, sik timekak eibukce, sik deice teleb yupu nyapdeibuk. Ninye deiyoknye Raja Salomo birye nyabuk yupu ara ani.

⁴ “Nun ni koproba Allah Yahweh, ancuk nun Israel nang ati, pia kalekuka melisilyam touk, tuba melinamsilame. ‘An si ati pia telebe,’ nyabkiyabe. Anda, nun ni koproba Allah tonok ulyame. Na ni koproba ance, na ni koproba Raja Daud biti nyamlum yupu ara, anyapdeiamlum touk wini talak an taruk aryuk akunum winipmasilame. Ara, nong akunum upmasile. Nun ni Allah ance nyapdeiamsulum yupu ara ani. Allah arye nyapdeiamuk.”

^5-6 “Na tenen nang, na mapu sik Israel nang ara, Mesir mutuku noutam ikin kanye bobuka ulamikbuk, narye lyebuka anang bobise. Anang bobalamse talak arye dipdongobuka, atalak nirya ara, ‘Nara amutuku noutam unamneʼ tenen, yuk mutuku si ton kum wipse. Tonda, ‘Na si eren aik dopnamniakak ara, ton asukum-asukum,’ kum nyalamse. Israel yala nang, sik yala-yala nirya ap, sik asik si Yerusalem ap ara, narye akunum wibuka deipse. Amutuku noutam ara, yuk asik ton pia weik aupmal bukni, aning nirya ara, na ton kum wipse. Deiyok ara, na mapu Israel nang ati, akunum wipsirye, sik weik deiyoknye uplirye, na ning tenelamse nang talinamle,’ tenyamsinye Raja Daud el uka. Ati ara, yuk mutuku noutam ton, na si eren aik ara, kum dopnitinge. ‘Yerusalem mutuku noutamuk dobikiba, anyaik pum noutamuk na si dongopnamneʼ tenen, akunum wipdeipse.” Allah arye nyabuk. “Ati el si eren aik ara amutuku unamle,” Salomo birye nyabuk.

⁷ Raja Salomo birye nyabuk ning ara, ayupu ton dukgobuka nyabuk, “Ura, na ni koproba Raja Daud bira, el kanye pum tam arye utenelamuk. ‘Se, nun ni koproba Allah, nun Israel nang ati pia kalekuka melisulula ati, el siuk erenyabe. Ati, Allah Yahweh el si eren aik ton doptinyeʼ tenen, pia patalamukba tenilamuk.

⁸ Utenelamuk bukni, Allah Yahweh arye, na ni koproba Daud biti nyabuk. “An kanye pum tam ara, ‘Se, na ni koproba Allah Yahweh, si eren aik doptinye,’ tenelalum ning ara, pia teleb ulamlume.

⁹ Bukni, na si eren aik dopnamnalanye bira, an kume. Ance anyasik ara kum dopnamnilam bukni, ance deipminye mi arye neplyopura, elce dopnamnile. Ara, ance deipnalam mi, an nong ap, an ining ap, ance deipminye mi koproba arye, na si eren aik dopnamnile. Anyaik doplyopura, ninye weik tonun arye na si erenamake.” Allah arye na ni koproba Daud biti nyapdeiamuk.

¹⁰ “Ati ara, narye nyapsine, nun ni koproba Allah Yahweh arye, na ni koproba Daud biti, ‘Winipnamne,’ nyalamuk yupu ara, nong akunum uple. Allah el si Yahweh arye, ‘Winipnamne,’ nyapdeiamuk yupu deice arye nyalilamuk atonun, na ni koproba Daud, el akunum punupsirye, Israel nang nirya talina ati, anggun deiyoknye Raja akunum unune. Tonda, Allah arye nyamuk touk, narye Allah Yahweh si eren aik akunum dopse. Anyaik dam ap, anoutam ap ara, ninye pia weik tonun Allah el si erenamake. Nun ni Allah elcuk el mapu, nun Israel nang ati, tuba kalekuka melilamsuk touk, tuba melisulule.

¹¹ Allah Yahweh arye nun apu yapu, sik Israel yala nang ati, lyebukabukce Mesir mutuku noutam arye bobiyuk talak ara, nun apu yapu ati nyabuk. ‘Aning ara wininamlume, aning ara pia kum wininamlume,’ nyapdeiamuk nyalin yupu deice arye, nyapdeipsin yupu dipkoprob winipmunyopura, narye kalekuka melisinirye, teleb kipdeipnamsine,’ nyapdeiamuk. Ayupu ara, Allah arye Musa biti nyapdeibukce, keil pala deice sekuka arebukba, Musa birye dobukabukce, marikna pum memamik bisik dongobuk. Amarikna, el si Peti Perjanjian dobuka, anyaik pum akunum deipmane,” Raja Salomo birye nyabuk.

Salomo birye, Allah morobuk yupu

^12-13 Ninye deiyoknye Raja Salomo birye, Allah Yahweh si eren aik damak tiknirye, ‘Yupu nyapniba, ninye nirya eipnitinge,’ tenen ati, ninye tikinak memepdeibuk ning ara, panggung, aning deice welebuka tikuk. Apanggung ara, kat teleb ning perunggu deice arye taplakuka memebukce boyanuka deibuk. Apanggung atam arye otam el cang ara, 2.25 meter memebuk. Apanggung el pala ara atouk, 2.25 meter memebuk. Tonda, el tikilin cang ara, 1.35 meter memebuk. Salomo arye, aning memebukce, Allah el si eren aik bai tam bukni, anyaik dam deibukce, aning deice welebuka tikuk. Raja Salomo ayo lana, el si panggung deice welebuka tikukce, el urasin tam ara, Allah arena ati memepdeiamik ning, mesba tam tikuk. Awekmek Israel nang nirya arye sik deiyoknye binyuk dinmek. Dinmekba, Salomo el kutam tuku apanggung deice dipdongobukce, el taruk bitinye ara erebuka, im deice tam dinmokce, Allah morobuk.

¹⁴ Raja Salomo birye morobuk ning ara, ani. “Na ni Allah Yahweh, an si erepkine. Na nio anda nun Israel yala nang nirya ati, kalekuka melisilyam touk, tuba melisilyame. Nun deiyoknye, an tonok ulyame. Im deice ap, tukwak mutuku noutam ap ara, an atonun pia ton kum unyake. An Allah tonok ulyamak, ninye nirya arye antibuk diba tenekinyake. Yuk talye ning ton patana kumcuk, an nyasilyam yupu uk moubuka talibikirye, sik kanye talima nirya ara, teilintona kumce, an yupu dobolbanyak nang ati, ance pia bico tenesilyame. An amu tam unyak nang ati, ‘Weik tonun bico tenesiminya ati, wininamlume, aning ara pia kum wininamlume. Winipmunyopura, narye kalekuka melisinirye, pia teleb kipdeipnamsine,’ nyabuka nyalin yupu deice arye nyapdeiamsulum yupu ara, dipkoprob tuba usulule. Anda, aning pia batakna kumce, tuba kalekuka melisilyame.

¹⁵ Aning atonun, ancuk na ni koproba Daud biti, ‘Wininamkine,’ nyapdeialum yupu deice arye aning ara, akunum winipmasilba, nong upmale. An si bambol deice arye nyapdeiamlum yupu ara, an taruk aryuk akunum winipmasilame. Ati, asum arye nong akunum upmasilba, akunum eipmabe.

¹⁶ Ati ara, na ni koproba anda Allah Yahweh, an si erepkine. Na nio anda nun Israel yala nang nirya ati, kalekuka melisilyam touk, tuba melinamsilame. Na ni koproba Daud bira, an amu tam ulamukce, an piluk dolamuk. Ati, ance elti, nyalin yupu deice arye nyapdeiamlum ning ara, Dipkoprop pia wininamsilamʼ tenen, moropkine. Daud biti nyalin yupu deice arye nyalamlum yupu ara ani. ‘Daud anda, narye, ‘Aning wininamlame, aning ara pia kum wininamlame,’ nyabuka, nyalamse yupu nirya, moubuka taleplumce, dobolbaminye touk, ance deipmin buk, dadeipdanin banamak nang nirya babye, na yupu moubuka kekebikirye, aninguk winibikceura, na dam unamake. Ara, ance Israel nang, sik deiyoknye Raja ulamlum touk, aminyan yanamle talak noutam babye, an mapu babye, sik kan-kan arye Raja nang wibuka deipnyopura, sikce ninye deiyok talebuka, Raja nang pia unamake. Na dam ton pia kum unamake,’ nyapdeiamlume.

¹⁷ Ati ara, na ni koproba Allah Yahweh ulyama ati, nun Israel nang nirya ati kalekuka disilyamce melisilyame. Na ni koproba Daud bira, an amu tam ulamukce, an pil dolamuk. Ati ance elti, nyalin yupu nyapdeiamlum ning ara, dipkoprob tuba wininamsilamʼ tenen, moropkine,” nyabuka, Raja Salomo birye, Allah ati nyabuka morobuk.

¹⁸ Morobukce ayupu ton dukgobuka nyabuk. “Bukni, Allah anda atukwak mutuku noutamuk ninye ap neika uptum do? Kume, im ap, im deice bukni, pia eitam im alip tam bukni, eitam deice tam babye, pala weik mutuku ulul bukni, aning noutam babye, kum uptume. Anda pia weik mambulnye ulyama ati im tam babye, tukwak tam babye, dipkoprob suktaleptue. Ati ara, atonun narye dopkise aik babye, pia mitik aikuk dopsa ati, anyaik noutam babye, dipkoprob suktaleptuba, asukum pia kum uptume. Ara an tonok kum ulyamnye biti nyapkine.

¹⁹ Aning nirya ara, dipkoprob ninguk nyapman bukni, nara an amu tam pia ununa ati, narye, ‘Se winipnutueʼ tenen, moropnukin yupu ara, ‘Kekepnutumʼ tenen, moropkine. Ara, na pia amu tam utonye ununa ati, adiparyuk wenepnutum bukni, ‘An kanye aryuk, bico tenepnimince, melipnamnilamʼ tenen, moropkine. Na nio, anda narye si erekunun Allah ulyame. Ati, arup arye ‘Na moropmakin yupu ara, kekepnamnilamʼ tenen, moropkine.

²⁰ Moropkin ning ara, ani. Ara, Allah ance, “Anyaik ara asukum dopminba, na si ara asukum deipnamne,’ nyabuka nyalin yupu deice arye nyapdeipmanuluma ati, ‘Keting noutam babye, lukunyan babye, an asing labuka anyaik pia dinmamin buk, narye anyaik dam binirye moronamkin ning nirya kekenamnilamʼ tenen, an melinanye erepdeipna ati moropkine.

²¹ Tonda, aning atonun, na ap, an mapu Israel nang nirya ap, anyaik dam tuba kum yanganamap bukni, an si eren aik eibibirye, an si tuba tenebibirye, anti tenibuka moropkipyopura, ‘Kekenamsilamʼ tenen, moropkine. Ara an unak im deice arye kekepsiminye talak aryuk, ‘Nun malye unyap ning nirya ati, namin kipsimince, lyelonamsilamʼ tenen, moropkine.

²² Winipmanto ara, yata barye nang arye, yuknye biti, “Anye bira, malye ubuka ati, weneplulume,” nyabice babye, anang arye, anye biti tapu koubikirye, ninye yupu lipsisikuka wenena deiyok nang dam, anye boyanuka an si eren aik dam bukni, an arena ati, pala keil arye lelebuka yangapdeiamipyak, amesba dam boyakceura, anye el tonok arye, ikin yupu deice arye, ‘Kume, na dipkoprob nyapmane, malye uning ara, na ton pia kum winipmane. Ati ara, tilila yupu nyapnyopura, Allah arye wenebuka opnamnile,’ nyaplyopura, ance kekenamlamʼ tenen, na ni anti moropkine.

²³ Sik anang atonun yuk nang ton, an aik dam yakirye, yupu nyabikirye morobikcopura, an im deice arye kekenamsilame. ‘Kekepsimince, yupu bokeipnamsilamʼ tenen, nyabuka moropkine. Allah im deice arye bikuka kekepsimince, ‘Anye bira, dipkoprob malye upmale. Anye bira, malye kum upmale,’ tenepsiminyopura, amalye upmalinye bira, amalye winipmalye touk, el wenena ati arenamlame. Tonda, malye kum upmalinye bira, el teleb ninguk winipmalye touk, ‘Teleb kipdeipnamlamʼ tenen, moropkine. Talya kum batakanamlyame.” Raja Salomo birye nyabuka, Allah ati morobuk.

²⁴ Tonda ayupu nyabuka, Allah ati morobuk. “Winipmanto ning ton, Allah an mapu sik Israel nang arye, an dam malye ubikcopura, ance wenen ning arepsiminyeba, nun mal olan nang arye obuka sirya daksikceba, ilil kanye bobibyakarye, an dam anyaik ton tamubuka yabirye, ‘Se na nio, nun malye unyap ning ara, batakmab ati, anda nun ni koproba Allah, tonok ulyama ati, ancuk lyepdopsutume,’ nyabuka moropkipyeura, ance kekenamsilamʼ tenen, moropkine.

²⁵ Ati ara, na ni koproba, anda im deice tam unamlam talak ara, sikce moronamkiak ning ara, moubuka kekenamlyame. Kekepmince, ance wipdeiamlum nang, sik malye unamak ning nirya ara, ance namin kibuka lyenamsilame. Winipminyakarye sik anang nirya ati, ance nyalin yupu deice arye, ‘Amutuku pia ati arepnamsine,’ nyapdeiamlum mutuku uk tamubuka bobinuka deipminbuk, asukumuk unamake. Tonda, Israel nang nun apu yapu ati ara, amutuku akunum areamlume.

²⁶ Tonda, winipmanto ning ton, Israel nang arye malye ubikcopura, sik wenena ati, mok ceplirye dua uk mapliba, sik mek cepropnin balyopura, sik malye winilamikce ning batakuka, anyaik ulamlye tam eibikirye, an si eren aik tuba tenebikirye, antibuk tenibuka moropkikirye, ‘Se anda nun ni koproba Allah Yahweh tonok ulyama ati, an siuk erekinyabe,’ nyanamake. Nyanamak talak ara, sik anang urasin, an aik tam deibikcak arye, an Allah atibuk moronamkiake.

²⁷ Sik aninye, ‘Allah arye lyepdopnamsilʼ tenen, anti morobikcopura, nun ni Allah, an im deice ulyamnye kekepminyeura, an amu tam unamap nang, nun Israel nang nirya ati, nun malye unyap ning nirya ati, namin kipsimince, lyelonamsilame. Tonda, an amu tam unyap nang, nun malye un ning ap, ance wibuka deiplum nang, nun Israel nang nun malye unyap ning ap ara, namin kibuka lyenamsilyame. Wininamak talak ara, ance, ‘Teleb bisik ara ani, teleb unamlum ning ara ani,’ nyapminyeba, kekebibyak arye, nun abisikuk dukdongobuka banamabe. Ance nunti teleb yupu nyamsulumce, ‘Amutuku talebuka unamakʼ tenen, areamsulum mutuku, amutuku deice arye weik mok arepsiminyeba, mok pia celamlyebuk, nunce amutuku talebuka pia unamapʼ tenen, moropkine.

²⁸ Ton winipmanto ning ara, amutuku noutam, kwaning patana weik patanamsil talak do, kanye imun weik uk dilamsiliba, ninye weik dibinamap talak do, tonda sik kounyak ning kouamikibuk, lyunamle ning ap, kolunamle ning do, danoutam arye, sul kwising weik tonun yanuka, nun koulamap ning dibuka kum kilinamak talak do, tonda nun mal olan nang arye yanuka olyangasice talak do, ura yuk ton kanye imun weik ning yanamle talak do nirya, nun Israel yala nang arye, anti morobibyeura, ‘Ance kekenamsilamʼ tenen, moropkine na nio.

²⁹ Kanye imun ning yalyopura, nun Israel nang nirya arye yuk-yuk bukni, ‘Se, na malye unye ning ara, ani,’ tenebibirye moronamkiabe. Malye winipmapya ati, an si eren aik dam yanmanto kum upnamap bukni, an si eren aik tenebibirye, antibuk tenibuka, nun taruk erebuka an aik tam dinmabirye, ‘Nun ni melibuka lyepsilyame,’ nyabuka, moropnamkiyap talak ara, ‘Ance kekenamsilamʼ tenen, moropkine na nie.

³⁰ Moropkipyopura, nun ni anda im deice mutuku unmamince kekenamsilyame. Kekepsimince, nun malye un ning ati namin kipsimince, lyelonamsilyame. Na ni ance tukwak mutuku noutam unyak nang nirya ati, nun talima noutam ulye ning ara, an kel ati, teleb do, malye do, ninye arye sik yuk-yuk malye winilamice touk, tonda teleb ulamikce touk, ance yupu bokeipnamsilame. Na ni ancuk ninye ap, sikce deibikce nang ap, tukwak nang nirya, sik talima noutam ulye ning nirya diminyakarye, bikisilyame. Aning ara, ninye yuk nang arye ton kum winiptinge. Aning ara, ancuk winiptume, ati moropkine.

³¹ Ninye kanye noutam tenipmace ning ati, yupu bokeipsiminyopura, Israel nang babye, yuk mutuku nang babye, sik nirya arye biknamake. Ara, ‘Se Allah ara, pia mambul weiknye biti, malye ubipyeura, wenepsilyakʼ tenen, ilil pia weik unamake. Ilil arye ulamice ati, ance sikti, lo una ton ap arepminyeura, unamak talak ara, An ap, an si ap ati, pia si erenamake. An siuk erebikirye, ance, Wininamlume, aning ara pia kum wininamlume,’ nyapdeiamsulum yupu ara, pia talebuka dobolbanamakʼ tenen, moropkine. Tonda, ance nun apu yapu nang ati areamlum mutuku uk, ‘Asukumuk unamakʼ tenen, moropkine.

³² Tonda, sik yuk mutuku anerye tikilyangan nang, sik Israel nang kum bukni, ‘Allah si erepnuyapʼ tenen ati, sik yuk pera mutuku arye, asukum unyap mutuku noutam yanganamak nang ati nyapnune. Anang ara, yuk mutuku unyak bukni, yuk nang arye nyalamicak, an si ap, an uminye ning ap, an mikip weik deice arye pil dominye ning ap ati, ton kekenamake. Kekebikirye, ‘Nun ton, Israel nang unyak mutuku dilbinuyabʼ tenebikirye, yanganamak talak ara, an yupu kekena ati, an aik dam yakirye, anti pia morolamkikirye, an siuk erenamake. An si erenamkiyak talak ara, ‘Ance aninye asik nang babye, sik moropnamkiak ning babye, kekenamlamʼ tenen, moropkine na nie.

³³ Ati an unamlam aik dam arye, im deice arye, sik aninye asik nang arye moronamkiak ning ap, tonda sikce nyanamak ning ap ara, kekepmince arenamlyame. Aning atonun, winipminyopura, sik amutuku dana-dana unyak nang ap, tukwak mutuku im sirya, mutuku sirya unyak nang nirya ap arye, an yupu kekebikirye, anti bikiceura, ‘Se, Allah Yahweh ara, dipkoprob mambule weike,’ tenen, anti ilil uplyeura, si erebuka kinamkiyake. Ara, an mapu koproba, nun Israel nang arye, anti teninyap atouk, sik yuk-yuk mutuku nang babye atouk tenenamake. Tonda, narye moubuka dopmakin aik ara, sik mutuku-mutuku nirya unyak nang nirya arye, ‘E, Raja Salomo birye, anyaik dobuka ara, Allah si erena ap, el yupu kekena ap, ulul sukum ara, ani,’ tenenamake.” Raja Salomo birye, Allah ati morobuk.

³⁴ Salomo birye Allah ati nyabuka morobukce, ayupu ton dukdongobuka morobuk. “Tonda winipmanto, ance an mapu sik Israel nang ati, dan mutuku do nirya, ‘Amutuku noutamak ara, anggun mal olan nang unyak ati, sik dam bimunce, obuka sirya daknamabe,’ nyabuka, sik Israel nang dopdeipnalamak ara, sik binukce talak ara, sikce anti, ‘Se nun nie, melipsiminyeba, nun mal olan nang ati opnamabe,’ nyabuka moronamkiyake. Sik, moronamkiyak talak ara, an si erena ati, anyaik dopsa ara atuba upmalye tamak sikce balye tamubuka dinamake. Tonda, ance, anyasik Yerusalem mutuku, an si deilinak ati wiplumak, atalak uk tenebikirye, eipnamake. Aenamkiyak talak nirya ara, moronamkiake.

³⁵ Sikce, ‘Nun ni Allah arye melipsutueʼ tenen, moropnamkiyak ning ap, ‘Nun kayapu nang ton meliptueʼ tenen, moronamkiyak ning ap, moropkikcopura, anda im deice ulyamak arye, an ‘Naʼ tenen nang ati kekepminyakarye, ‘Sik morobikce touk, arenamlamʼ tenen, moropkine na nie. Ara, an mapu Israel nang arye, sik mal olan dam binukirye, anti moropkiceura, an adiparyuk kekenamlyame. Kekepmince, sik moronamkiyak ning ap, sikce nyalbanamak ning ap ati, melinamlyame.

³⁶ Bukni, an mapu sik Israel nang arye, aminyan talak an dam malye winipnamake. Nun kele, dan tam nang do nirya, ninye deiyok nang babye, teleb nang ton kum unyabe. Ati malye ubicopura, yu upliba, ance anang dobuka, sik mal olan nang deice deipmin buk, ayu nang arye an mapu malye kibicak arye, Israel nang tomobikirye, sik babye yuk mutuku bobicak arye, wenen aik dongobiceura, amutuku ara pera mutuku do, dam mutuku uk do, delilbinamake.

³⁷ Winibikiba, an mapu sik Israel nang arye, apera mutuku noutam arye, malye kanye bobikirye, ‘Se, nun dipkoprob malye ubupa deice arye, awenepmasilba, wenen aik bukmabeʼ tenen, sik babye tenibuka, talima noutam arye tenebikirye, wenen aik binuka deiamikcak aryuk, ‘Se nun dipkoprob malye weik ning winibupe. Pia malye bisik biburye, malye-malye weik ulampu deice arye, nun ni Allah ati yanibupkarye, pia malye winibupu atia,’ tenebikirye, sikce, ‘Nun ni koproba Allah lyepsilyame,’ nyabuka morobiceura, ance kekenamlyame, na nie.

³⁸ Ara, talye sik si bambol deice aryuk nyaltakna kum bukni, sik Israel nang arye, sik mal olan nang ati, obukapsikirye, wenen aik bobinuka deipsikcopura, amutuku noutam arye sik talima noutam arye, malye ubik ning ara batakicak arye, anti sik talima ap, kanye ap, an deice deipkikcopura, ‘Aning ton kekenamlamʼ tenen, moropkine. Sikce moropkikirye, ance sik ap, sik apu yapu ati areamlum mutuku ap, ance wiplum mutuku Yerusalem ap, an si eren aik dopse ning nirya ap, aning ara tonap tuba tenebikirye, moropkikceura, kekenamlyame na nie.

³⁹ Dipkoprop Sik adiparyuk, ‘Nun ni Allah arye melipsutueʼ tenen, antibuk moropnamkiak ning ap, ‘Nun kayapu nang ton melipsitingʼ tenen, moronamkiak ning ap, moropkicopura, anda im deice ulyamak arye an tenen nang yupu kekepminyak arye, ‘Sik morobikce touk, arenalamʼ tenen, moropkine na nie. Ara, An mapu Israel nang arye, sik mal olan dam binukcakarye, anti moropkicopura, an adiparyuk kekenamlyame. ‘Kekepmince, sik morobice touk melinamlyameʼ tenen, moropkine na nie.” Salomo birye nyabuka morobuk.

⁴⁰ Nyabuka morobukopura, Raja Salomo birye, ayupu ton dukgobuka nyabuk. “Ati ara, ance moubuka eipminyak arye, bico tenepsiminyopura, narye anti moropkin ning ara, dan talak do nirya, an mapu nun Israel nang arye moronamkiap ning nirya ara, ‘Kekepmince melinamsilamʼ tenen, moropkine.

⁴¹ Ati ara, “Diba nun ni koproba Allah Yahweh, an wini talak adiparyuk bukmince, Allah an si eren aik biminyak arye, asukumuk pia unamlame. Ara, an mikip weik laka kina ati deilin ning, teleb marikna dobuka deibik ning, el si ara, Peti Perjanjian deipmap aik damuk, anyaik bimince, pia ati anyaik noutam daunamlyame. Ulamince, an si eren pil dona deiyok nang, ance wipdeiplum nang, sik imam-imam nang nirya ati, tuba-tuba melibuka lyelonalame. Tonda, ance, ‘Na tenen nang unamakʼ tenen, wipdeipsulum Israel yala nang, nunce, ‘Se, Allah arye pia teleb kibuka melisululeʼ tenen, teleb kanye deibipyeura, an si pia ati erenamkiyape. ‘Wininamabʼ tenen ati moropkine na nie.

⁴² Nun deiyoknye Allah Yahweh, ance wipdeipnulum ninye deiyoknye, na Salomo biti, ‘Lik upkiliba, nati pia kum bataknamnilamʼ tenen, moropkine na nie. Ara, an adiparyuk nati, ‘Elda Israel nang taliplirye, Raja unamleʼ tenen, wipnulumce, erepdeipnuluma ati nyapkine. Tonda, an amu tam ulamukce, pil teleb kibuka dolamkuknye, na ni koproba Raja Daud bira, elti, weik tonun bico tenelamlumce, ‘Winipnamkine,’ nyalin yupu deice arye nyalamlum ning nirya ara, ‘Lubakina kumce, aning nirya tuba-tuba wininamlamʼ tenen, moropkine na nio.” Salomo birye Allah Yahweh ati morobuk.