2 Tawarikh 5 - Eipomek

Raja Salomo birye, Allah el si eren aik noutam bona deibuk ati, nyabuk yupu

¹ Apil-apil nirya, Salomo birye winiplyame nyabukba, Harum-Abi birye akunum pil dobukce, akunum sirya dakukopura, ninye deiyoknye Raja Salomo birye, ‘Winipnamne,’ tenyamukce, Allah Yahweh el si eren aik nirya akunum dobuka sirya dakdongobuk. Winibukopura, el adiparyuk anyaik noutam bona delina ati, memebuka aik noutam moubuka deibuk. Ara, dekna weik ning emas ap, perak ap, tonda el li koproba Raja Daud birye, ‘Aning nirya ara, Allah atibuk arepne,’ tenyamukce, akunum dobuka Allah Yahweh ati, areamuk bona nirya ara, Raja Salomo birye dobukce, Allah el aik pum tam dongobuk.

Allah arye nyalamukba sekuka deiamik yupu marikna pum, el si Peti Perjanjian dongamik ning ara, aning dobuka, Allah el si eren aik bobiyikce, anyaik pum dongobik yupu

² Raja Salomo birye, Allah si eren aik akunum dobuka sirya dakdongobukopura, yupu nyapdeibukba, Israel nang sik deiyok-deiyok nang dam ap, Israel yala-yala nang, yuk-yuk aulamik touk bukni, sik deiyok nang nirya ap ati nyalbiyik. Ara, Israel nang yala-yala nirya, sik apu yapu ap, sik ni yapu ap ati, “Yerusalem mutuku dem bulubuka yanamlume. Yamunyeura, minop talak Raja Daud ulamukak, amutuku si ara Sion mutuku, anoutam arye mambul weik ning doprobibyakarye, Yerusalem mutuku boyanuka deipnamabe. Ara, Allah el si Yahweh arye, ‘Aning ara wininamlume, aning ara, pia kum wininamlume. Winipmunyeba, narye anggunti winibuka-winibuka melinamsine,” nyabuka, nyalin yupu deice arye nyapdeiamukce, keil pala deice sekuka areamukba, ninye arye aning dobuka, marikna pum dongobuka deibik. Amarikna si ara, Peti Perjanjian dobuka, boyanuka Yerusalem mutuku deipnamabe. Ayo lakase arye dobik marikna, Peti Perjanjian ara, Daud ulamukak Sion mutuku arye dobibirye, Yerusalem mutuku Allah Yahweh si eren aik boyanuka deipnamabe,” Raja Salomo birye, Israel yala nang, sik wisi nang ap, deiyok-deiyok nang ap ati, nyabuk.

³ Ayupu bobinuka laka nyalbiyikba, kekebikopura, tekbarye wala deice arye, Kwalya kwalipnamabʼ tenen, bulubuka yangalamik talak aryuk, yayik. Sik Israel yala-yala nang nirya yanganmikce, Raja Salomo dam bulubuka wekik.

⁴ Atalak ara, sik Israel yala-yala deiyok nang nirya akunum yayikopura, Allah el aik pum pil talebuka dona deiyok nang, sik Imam arye, Allah Yahweh arye, ‘Winipnamlume nyapdeiamukce, sekeiamukak, apala keil dobuka dongolamik marikna bisik dongamik. Ara, Musa birye akeil pala dongamuk marikna, Peti Perjanjian tomobuka bobiyik.

⁵ Peti Perjanjian erebukabikce bobinuka, Allah Yahweh si eren aik akunum domika dam welebuka bobiyik. Tonda, minop talak Musa birye tiaya ati, Allah ap, ninye ap, elana ati tenda arye dolamik aik kintinip deiamuk ning, dadeiamikce, ulubuka, sik Lewi yala nang arye aning dobuka, aning babye, welebuka bobiyik. Tonda, anyaik pum tam pil don ning yuk-yuk ning nirya babye, dadeiamikak arye dobukabikce, sik Lewi yala nang ap, sik imam-iman nang ap arye, aning nirya dobuka, Raja Salomo birye domuk aik, Allah si eren aik dam bobiyik.

⁶ Aning bobinuka banmikce, deipmek talak ara, ninye deiyoknye Raja Salomo, anyaik dam tikmokba, sik Israel nang nirya, el urasin dam bulubuka, asukumuk wekelyayik. Allah Yahweh arye nyabuk yupu, keil pala deice sekeibukba, Musa birye marikna el si ara, Peti Perjanjian noutam dongamuk ning ara, sik imam nang arye, aning tomubuka bobanmeka ani, akunum binuka deibikopura, el Raja Salomo ap, el mapu Israel nang nirya ap arye, kam ning domba basam ap, sapi basam ap, pia nukman kumto obukabikce, Allah el si erebuka kina ati wininmekce si erenmek. Aopmik ning nirya ara, imam-imam nang ati arebikba, sik imam nang arye, Allah ati arebik.

⁷ Winibuka unmek deice arye, Allah si Yahweh arye, “Aning ara wininamlume. Winipmunyopura, narye anggunti, winibuka melinamsine,” nyabuka, nyalin yupu deice sekeiamuk yupu, yo lakase arye domik marikna pum tam dongomik ning ara, sik imam nang arye, Peti Perjanjian dobukabikce, Raja Salomo birye Allah si eren aik pum tam bukni, Pia Teleb Lek Aik pum tam binuka deibik. Ara, im deice pil don nang malaikat urasin ato ning, Kerub memebuka bitinye deiamikak, amu tam ara, amarikna bobinuka deibik.

⁸ Amarikna, Peti Perjanjian deibikak ara, malaikat urasin ato ning, Kerub bitinye dana-dana tam arye, anuotam deiamikba, aKerub pol bitinye arye, amarikna deice tam siknipdongopdik. Tonda, amarikna talibuka bana ati ara, cang yo dana-dana tam amarikna kup-kup ak kin-kin potokdongobik ning ton, adeice tam sik Kerub bitinye tikdikce, sik pol ara aning deice tam uprik.

⁹ Peti Perjanjian dobik marikna talibuka bana ati, cang yo bitinye ara, asukum ubuk. Amarikna deibik aik si ara, Pia Teleb Lek Aik nyalamik. Anyaik dam bukni, mitik tonun otam aik, si ara, Teleb Lek Aik nyalamik. Ura, amarikna bobana ati yo cang dana-dana tam amarikna kup-kup ak kin-kin potokdongobik cang yo ara, cang weik ubuka ati, Teleb Lek Aik pum tam tikibikce, ayo el mouse tam laka belepdeibik, Teleb Lek Aik bai tam arye dildenopura, acang yo mouse ara, kum elilamik. Abuku sekupu talak ara, acang yo bitinye ara, anyaik noutam wini talak babye, tuba aupmale.

¹⁰ Ayo lakase dobik arye marikna pum tam ara, tonok ning dongamika ara ani. “Aning ara wininamlume, aning ara pia kum wininamlume,” nyapdeiamukce sekeiamuk keil bitinye deice sekuka, Musa biti arebukba, Musa birye akeil boyanuka amarikna, si Peti Perjanjian dongobuk. Yuk ning ton amarikna noutam kum dongamik, akeil bitinye uk awamuk. Tonda, Musa birye akeil dobuka, boyanamuk mutuku si ara, Horeb mutuku ulamik talak arye domuk. Atalak ara, Allah arye sik Israel nang nirya ara, Mesir mutuku noutam ulamik talak ikin kanye bobuka ulamikba, Allah arye sikti, lyebuka bobiyuk. Ara, ‘Kanaan mutuku tam arepnamne,’ tenelamukce bobiyuk. Horeb mutuku ulamik talak ara, Allah si Yahweh arye, “Aning ara wininamlume. Aning ara pia kum wininamlume,” nyapsinye touk umunyopura, narye kalekuka dilamsinirye, pia teleb ubuka melinamsine,” nyabuk.

¹¹ Ura sik imam nang, Teleb Lek Aik pum tam ulamik nang nirya ara, sik pil akunum dobikopura, ayupa tonok nirya arye, Allah Teleb Lek Aik noutam arye kutukuka, bai tam yayik. Tonda, sik kayapu nang nirya, sik imam-imam nang yala-yala nirya arye, ‘Allah dam yanuka uptibyeʼ tenen, Allah arye nyamuk touk, pil akunum winibika ati, Allah arye, Sikda malye winin ning pia ton kumce akunum teleb nang kipmake,’ tenebuk. Ati, sik babye anyaik dam unmik.

¹² Atalak ara, sik Lewi yala nang arye deipdanin yanamik nang, sik mot nyana kel bikamik nang nirya ara, anyaik dam unmek. Sik anang yala ara, Asaf ap Heman ap Yedutun ap, tonda sikce deiamikak, dadeipdanin yangalamik nang ap, sikda anyaik dam bukni, keting panalyangan tam unmekce dinmek. Sik tikmekak ara, kam ning opnarye, uku dalamikak, mesba dam tikuka dinmek. Sik ayala nang nirya ara, apil don nang ati, sik baju pia teleb namin ning, kain lenan ongolamik. Tonda imam-imam nang nirya arye, lelim len ning, kitar ap, simbal ap, kecapi ap, bopmekce onmekak, lelim weik arye lenmek. Tonda, imam-imam nang yuk kong ara, 120 nang arye, lelim len ning, terompet bopmekce pong-ponganmek.

¹³ Sik nirya ara Lewi yala nang arye, amesba dam tikmekce, lelim len ning simbal ap, kecapi ap, terompet ap bopmekce, ona ap, nyena ap kinmekce, sik kayapu nang arye, ‘Asukum dam unmak nang nirya ati, teleb arye kekepnuyakʼ tenen, weik yupu deice arye, ninye tonoknye elce nyalamuk touk nyanmekce, mot arye Allah Yahweh ati, si erenmikce, nyanmek. Sik ap neika tikmek nang arye nyanmek mot ara ani. Nun ni Allah Yahweh ara, weik tonun melisulule. Elda pia teleb ulirye, nunti weik tonun bico tenesulule,’ nyabuka nyanmekce, amot ara neiktoto nyanmek. Mot nyanmek talak ara, Allah Yahweh si eren aik noutam ara, dua sakukce, anyaik noutam nirya wekuka langdibuk.

¹⁴ Weik dua arye, anyaik pum tam nirya langdibukopura, atalak ara sik imam-imam nang asukumuk tikmek nang nirya ara, ‘Allah si erebuka kipnuyapʼ tenen, kintinipmek bukni, aning nirya ara kum winipmanto ubuk. Ara, anyaik noutam nirya ara, dua arye lelibukba, pil dopmanto kum ubuk. Awinibikopura, anyaik nirya ara, Allah Yahweh el pia teleb-teleb ulula ati, el weik dirina uk anyaik langdibuk.