2 Tawarikh 4 - Eipomek

Allah Yahweh si eren aik ati, nyabuk yupu

¹ Ninye deiyoknye Raja Salomo birye, el pil don nang ati, ‘Winipnamlume,’ nyapdeibukura, sikce kat ning perunggu deice arye, mesba kintinip deibik. Amesba el cang ap, el pala ap ara, yuk-yuk toupne barye (9) meter ubuk. Tonda, utam arye eitam, el cang ara empat setengah (4.5) meter ubuk.

² Aning ‘Winipnamlume,’ nyapdeibukura, el melin nang arye mekwen deilin ning, weik mek makau aton ning tonok, kat ning perunggu deice arye memebik. Aning el urasin ara, antanap dongobuka, kisok bukuka bisik botolilamikce, kintinilamikba, memebuka dobik. El kiklina ara, atam arye otam uamuk ning ati, dua poin dua (2.2) meter kibuk. Tukwak tam utam arye eitam cang ara, empat poin empat (4.4) meter kibuk. Tonda, weik mek makau kup-kup tam antalongona ara, tiga belas ap, mitik tonun ton ap, poin dua (13.2) meter kibuk.

³ Awinibukopura, amek makau antanap dongobuka memebik ning, bai tam nirya ara, sapi basam urasin ato ning, neiktoto bukni, bitinye-bitinye kibuka, urasin pia teleb una ati, kweirya dopdeibik. Asapi basam urasin ato ning ara, yupa weik 300 memebuka deibik. Winibikce, mitik mek makau urasin atonun neika taplak deibikce, urasin teleb kipdeibik.

⁴ Akat ning perunggu arye kintinip deibukce, weik mek makau, el amu tam ara, sapi basam urasin ato ning memepdeibik. Aning nirya ara, obarye (12) kintinip deibik. Winibikopura, ton sapi basam urasin atonun ara, winilye kibuka iknapye tam, arah utara deibik. Ton winilye ara, dabu tam arah selatan kibuka deibik. Atonun ton, winilye sapi basam urasin atonun ara, keting komulban tam urasin kibuka deibik. Ton winilye sapi basam ara, keting panalyangan tam, urasin kibuka deibik. Asapi basam atonun ning ara, sik amu ara, amek makau deibik ning noutam tam kibuk bukni, sik kisok ara, bai tam urasin kipdeibik. Aning nirya akunum kintinip deibikopura, weik mek makau pum tam ara, mek kwebuka dikdongobik.

⁵ Weik mek makau ato ning, el si bak nyanyak ning, bol bukam ara, 75 milimeter, ninye taruk tatang atonun ubuk. Amek makau bak kup-kup tam ara, ninye arye mitik mek dilamak makau kup-kup tam ulamle touk kibuk. Tonda, el kup-kup tam ara, teleb keit ning, kisok bukuka bisik botolilamikce, kintinilamikba, uamuk. Amek makau pum noutam ara, mek lina el ikin ara, winipmanto enam puluh (60.000) liter mek dikdongobik.

⁶ Ninye deiyoknye Raja Salomo birye nyabukura, el pil dona ati melin nang arye, yangalin ning, el si baskom weik ning ara, takubarye (10) kintinip deibik. Winibikura, apamubarye ara dobuka, iknapnye tam, (arah selatan) deibik. Aning atonun ton apamubarye ara, dabu tam (arah utara) tam, Allah Yahweh si eren aik deibik. Weik baskom pum ara, mek dikdongobik. Ara, aminyan talak nirya, sik Israel nang arye, ‘Allah arena ati, kam ning opnuyik talak ara, akam ning boyayikce, aning takubarye mek makau pum tam mek deiamuk deice arye mek liklamik. Winibikopura, aning opnopura, sekuka deipnarye, uku dongolamik. Sik imam-imam nang aryuk, sik taruk mek likna ati, weik bak mek makau pum arye, mek kwebuka, dikildongolamikak, sik taruk mek liklamik.

⁷ Tonda, Allah arye, “Winipnamlume,” nyapdeiamuk touk, Salomo birye nyapdeibukura, el pil melin nang arye, dekna weik ning emas arye, weisa lana ati, takubarye, (10) weisa ton kintinip deibik. Alampu weisa nirya ara, Allah si eren aik pum tam bukni, weik lo aik noutam arye deibik. Weik aik lo noutam deibik bukni, lampu 10 bobukabikce, pamubarye dobuka dabu tam, arah utara deibik. Atonun ton, yuk pamubarye ara dobuka, iknapnye tam, arah selatan deibik.

⁸ Winibikopura, Salomo birye tenyamuk touk laka nyabukura, el pil melin nang arye, emas arye takubarye meja ton kintinip deibik. Ameja nirya delina ati, meja takubarye dobuka, Allah si eren aik pum tam deibik. Ameja deibik ning ara yuk-yuk bokuka, pamubarye ara, iknapye tam, arah selatan deibik. Ton pamubarye meja ara, dabu tam, arah utara deibik. Tonda mitik mek makau el si mangkok ara, yupa weik seratus (100) kintinip deibik. Aning ara, emas arye kintinip deibik.

⁹ Tonda, ninye deiyoknye Raja Salomo birye nyapdeibukura, el pil don nang arye, sik imam nang bulubuka weken asik dam mitik ning ati, Allah el si eren aik dam bukni, mening damuk kintinibik. Tonda, aik pum tam arye, aik dam wekelbanak bisik bublan ara, bitinye kintinip deibik. Abublan bitinye ara, dana-dana tam nirya botopdeibikce, dekena teleb kat ning, el si perunggu arye, abublan deice taplak deiamikba, urasin teleb kibuk.

¹⁰ Weik mek, perunggu arye memebik ning ara, el si bak, aning dobuka, Allah Yahweh el si eren aik dam bukni, bai tam arye, dabu tam (arah utara) deibik. Arah utara deibik bukni, ton mitik tonun, keting panalyangan tam deibik.

¹¹ Aning-aning nirya memen, pil dona ap, kel weiknye el si Huram, elce yun makau ato ning, si panci bukni, aning ara, uku kalum lun ning ton memebuk. Tonda uku kalum yangabuka luna ati, sikop-sikop ap, tonda mek makau mitikto ning, mitik cangkir-cangkir ap kintinip deibuk. Aning nirya akunum memepdeibuk ning ara, Allah Yahweh el si eren aik pum deilin ning nirya ap, bai tam pil don ning ap akunum sirya dakuk. Ara, Huram birye ninye deiyoknye Raja Salomo birye, “winipnamlume, winipnamlume,” nyapdeiamuk touk, akunum memebuka sirya dakdongobuk.

¹² Ati ara, Huram birye Allah Yahweh si eren aik pil don ning memebuka deibukce, pil dobuk ning ara ani. Ara, anyaik bisik tam ara, cang weik ayukumna bitinye ap, aning kisok tam deiamik ning ara, weik mek makau urasin atonun ning memepdeibukce, anya ayukumna bitinye deice tam erepdeibuk. Tonda, anya ayukumna kup-kup kisok tam ara, urasin teleb una ati, rantai tapu ato ning memebukce, wibuka deibuk.

¹³ Tonda, pia teleb yo duk el si ara delima, memebuka puturubuk. Adelima el yupa ara, empat ratus (400) arye, dekena weik kat ning perunggu arye memebuka deibukce, wibuka kintinibuk. Aning ara, yakna bitinye, ton ning ara deice tam, ton ning ara minop ning amu tam kibuka, anya ayukumna kisok deice tam bukni, weik mek makau urasin atonun ning deice taplakuka antapdongobuk.

¹⁴ Tonda, anyaik pum tam aning-aning bobana ati ara, mitik meja atonun ning memebukce, bana ati ara, ameja el yan tukwak bol pina ara, mitik roda dumbarye ton takubarye (10) memepdeibuk. Tonda, aning atonun, imam-imam nang, sik taruk tatang mek lilikin ning ati, mek yangalin ning mitik yangana (baskom) babye, kat ning perunggu arye memepdeibuk.

¹⁵ Tonda, Huram biryuk, weik mek makau el si bak ara, dekena weik kat ning el si perunggu arye, memepdeibuk ning ara, el urasin ara, mek makau kuali atonun ubuk. Weik mek makau atonun winibuka memebuk ning ara, aning amu tam ara, sapi basam urasin atonun ton, obarye (12) kat ning perunggu arye memepdeibukce, weik mek makau bak ara, asapi basam balye deice baribuk.

¹⁶ Tonda, anyaik pum tam pil dona ap, bai tam pil don, ning ati memebuk. Ara, kam ning opnarye, uku diplyeba, uku kalum tuba aupmalye ning dolona ati, aning el si mitik kuali ap, tonda kam ning opnarye, uku dongobikiba, uku arye aning nirya diplyopura, uku kalum ton tuba aubuk ning ara, lubuka yangan ning, el si sikop weik ap, tonda kam ning tup seken ning lukun ning el si karpu ap, aning-aning nirya ara, Huram-Abi birye, Allah Yahweh el aik pum tam pil don ning nirya ara memepdeibuk. Ara, Raja Salomo birye, “Winipnamlume,” nyamuk touk Huram-Abi birye aning memebuka deibuk. Amemebuka deibuk ning nirya, urasin kat teleb ning, el si perunggu arye memebukce, urasin teleb una ati ulum-ulum abuka amemepmok ning nirya wininmok.

¹⁷ Ninye deiyoknye Raja Salomo birye, “Winipnuamlume,” nyabukba, el pil dona deiyok nang nirya arye, amemebuka deipmek pil don ning nirya ati, urasin kat teleb ning, el si perunggu arye memebik. Apil dolamik talak ara, Huram-Abi birye deiyok kibuka, sikce Yordan mekin bukni, weik mutuku luh si Sukot mutuku atam ubukak, otam ara Zereda mutuku ubukak bukni, danuotam arye kira tuku palibukabikce, atuku pum tam arye agat ning memepdeibik.

¹⁸ Ninye deiyoknye Raja Salomo birye, apil don nang ati, “Kat ning perunggu arye memebuka deipnamnulum pil don ning ara, pia weik tonun donamlume,” nyabukura, aninye arye memepmek ning nirya ara pia weik memebuka deibik. Ati ara, kat teleb ning el si perunggu, el ikin yupa ara, nukmanto kum ubuka ati, ninye arye ton kum nukik.

¹⁹ Ninye deiyoknye Raja Salomo birye, elcuk, “Ura yuk ning yala-yala nirya emas arye, Allah Yahweh el aik pum noutam deilin ning yala-yala nirya ton memepnamalume,” nyapdeibukba, el pil don nang arye aning yala-yala nirya weik arye memepdeiamik. Ara, siltong teleb ning uku dongona ara, el si ara siltong mesba ap, tonda Allah ati, Sabat sum nirya yanuka arenamak roti kwaning deilinak ning, el si ara roti meja ap dobik.

²⁰ Tonda, Salomo birye, “Winipnamlume,” nyabuk touk, sikce weisa deilinak ap, aweisa amu tam el yan dam moron ning ap, dekena weik kat ning, el si emas pia talin ning arye memebik. Aweisa ara, Allah Yahweh el Pia Teleb Lek Aik dam bukni, bisik dam binuka deibik.

^21-22 Tonda, keit ning bunga-bunga ap, yuk weisa-weisa upna lampu ap, tonda aweisa upna arye, ‘Uku buk teleb lapnamleʼ tenen, seken ning el si sumbu ap, mek din makau cangkir ap, weisa upna tangan ning ap, mek makau mangkok ap, nintong teleb len ning deilin piring ap, uku kalum deilin piring ap, Allah el Pia Teleb Lek Aik pum noutam bisik bublan trikilongon ning ap, Allah Yahweh el aik bai tam arye, aik bisik bublan wekenak ati, abisik bublan trikilongon ning ap nirya memepdeibikura, dekna weik ning emas arye taplak deibikce, memebuka deibik.