2 Tawarikh 36 - Eipomek

Yoahas bira, Raja Yehuda kibuka ati, sekik yupu

¹ Yehuda mutuku nang arye, Yosia el pununa ati ara, el mi Yoahas binyuk, ‘Nun deiyoknye kipsilirye, Yerusalem mutuku weik asik talipnamsilʼ tenen, weipdeibik.

² Yoahas el keting tamun duapuluh tiga (23) tahun akunum kibuk talak ara, deiyok koubuka Raja Yehuda kibuk. Winibukopura, wala winilye deice arye, Yerusalem mutuku weik asik talebuka, ninye deiyoknye ulamuk.

³ Bukni, wala winilye akunum kibukba, Mesir mutuku taleamuk deiyoknye, Raja Nekho birye, ‘Anye Yoahas bira, na amu tam deipnamneʼ tenen, Yoahas Raja Yerusalem mutuku ati pil dolamuk ning dopkwetebuka, el amu tam kibukce, Yehuda tam mutuku noutam ulamik ninye ati, sik nong deice ikin ning deibukce, sikce elti, pajak yo bok arin ning ati, elce, “Dekna weik ning el si perak, el ikin ara, tiga ribu, empat ratus kilo (3,400 kg) ap, dekna weik ning, el si emas, el ikin ara, tiga puluh empat (34) kilo ap nirya, bulubuka arepnamnilame,” nyabuka morobuk.

⁴ Nyabukopura, Mesir mutuku deiyoknye birye, Yoahas el mi Elyakim, binyak erebuka, Raja kipdeibuk. Winibukopura, el si Elyakim nyamuk ning ara batakuka, Yoyakim nyabuk. Winibuk bukni, Raja Yoahas bobuka, el amu tam kibukce, Mesir mutuku tamubuka bobiyuk.

Yoyakim bira, Yehuda mutuku nang, sik deiyoknye kibuk yupu

⁵ Yoyakim bira, el umur duapuluh lima (25) tahun akunum kibuk talak ara, Yehuda mutuku nang, sik deiyoknye kibuk. Winibukce, Yerusalem mutuku weik asik noutam talebuka ulamuk talak ara, keting tamun koklombarye (11) tahun deice mabuk. Wininyamukce, el li koproba Allah ati, dipkoprob el si kum erelamukce, el dam pia malye winilamuk.

⁶ Winilamuka ati, Allah arye lo arebukba, Babel mutuku deiyoknye, el si Nebukadnesar, Babel tam Raja arye, Yehuda mutuku noutam ulamik nang yanuka, alabuka doprobukce, Yoyakim dam yayukce tomobuka, tapu koubukce, Babel mutuku bobiyuk.

⁷ Tonda, Allah Yahweh el si eren aik delilamik ning, weik mambul dekna weik ning ton, Nebukadnesar birye aning weik alubuka dobuka, Babel mutuku nang, sik ninye deiyoknye unak binuka deibuk.

⁸ Raja Yoyakim bira, pil dolamuk ning nirya ap, Allah dam pia malye un ning winilamuk ning ap, tonda Allah arye, ‘Aning ara winina kume,’ nyalamuk bukni, anye birye, ‘Allah dam na likeʼ tenena arye, malye ning weik winilamuk ning ap nirya ara, Yehuda tam noutam ulamik nang ap, Israel tam ulamik nang ap, yuk-yuk bukni, sik deiyok nang, Raja-Raja nang arye ulamik ning ati, laka nyabuka nukna buku deice seklamik. Abuku noutam aryuk nukeibirye, kel kiptibye. Aminyan talak ara, Raja Yoyakim dibukba, el mi Yoyakin birye, Yehuda tam talebuka, Raja kibukce punubuk.

Yoyakhin birye, Yehuda tam ulamik nang ati, ninye deiyoknye, Raja kibuk yupu

⁹ Yoyakhin el keting tamun, umur delapan belas (18) tahun akunum kibuk talak ara, Yehuda mutuku nang ati, sik deiyoknye Raja kibukce, atam arye deiyok koubuka, amutuku nirya talebuk. Winibukce, weik asik Yerusalem mutuku noutam ulamukce, amutuku taleamuk talak ara, ouku mitik tonun wala winilye deice aryuk ap, tonda takubarye (10) sum ap taleamuk. El babye, Allah Yahweh arye, ‘Aning ara, na like,’ tenyamuk ninguk, Allah el dam malye pia weik winilamuk.

¹⁰ Keting tamun noutam bukni, ninye arye koulamik ning winiryuk deiyok koubuka, palamuk talak akunum kibukopura, Babel mutuku ninye deiyoknye, Raja Nebukadnesar birye nyabukura, el amu tam melin nang arye, Yoyakhin dam binuka, Yoyakhin tomobuka, Babel mutuku tamubuka boyayik. Tonda, atalak aryuk, Allah Yahweh el si eren aik pum tam deiamik mambul dekna weik ning bobuka, Babel mutuku bobiyik. Tonda, Raja Nebukadnesar birye, Yoyakhin el kwit Zedekia binyak, erepdeibukce, Yehuda nang ulamik tam ap, Yerusalem mutuku weik asik ap ati, Raja kipdeibukba, amutuku-amutuku nirya taleamuk.

Yehuda mutuku ninye deiyoknye kina ati, Zedekia wipdeibik yupu

¹¹ Zedekia, el umur 21 tahun akunum kibuk talak ara, Raja Nebukadnesar birye erepdeibukba, Zedekia bira Yehuda mutuku ninye deiyoknye Raja kibuk. Winibukce, amutuku nirya taleamukce, Yerusalem mutuku weik asik noutam ulamukce, amutuku talebuka ulamuk keting tamun nirya ara, koklombarye (11) tahun kiamuk.

¹² El babye, el li koproba Allah dam pia malye weik ulamuk. Kanye namin deice Allah Yahweh arye, “Wininamlyame, wininamlyame,” nyapdeibukura, el yupu laka nyana deiyoknye, nabi Yesaya kekebukce, elce Zedekia dam binuka, laka nyalamuk bukni, Raja Zedekia birye kanye namin deice arye kum kekelamuka ati, aning kum winilamukce, malye ninguk winilamuk.

¹³ Aning diamuk kum bukni, Raja Nebukadnesar birye nyapdeiamuk yupu babye yanibuk. Ara, Raja Nebukadnesar birye Zedekia ati, “Allah dam, ‘Na winibuka unamne,’ nyapmince, anda na nyapdeipkin yupu uk kekebuka unalyame,” nyabuk. Nyabuk bukni, Zedekia birye, “Yo, winipnamnarya,” nyaplokbukce, anyalin yupu deice arye nyabuk bukni, dipkoprob aning nirya kum winilamuk. Elce, ‘Aning nirya ara, na kum winipnamne,’ tenelamukce batakuk. Tonda, Israel nang arye, si erelamik Allah, el si Yahweh ati, Zedekia birye, ‘Kume, Allah Yahweh arye nyalul yupu nirya ara, na kum kekebuka unamneʼ tenen, kanye pum tam kat kibuka, mandipna weik ulamukce, ayupu yaniltaknauk ulamuk. Zedekia el malye ulamuk ning ati ara, ‘Bataknirye, Allah dam tamubuka binune,’ pia kum tenelamuk.

¹⁴ Aninguk kum bukni, Allah Yahweh arye, “Anyaik ara, na Allah, na si eren aik ulule. Yerusalem mutuku noutam pia anunamla ati, anyaik ara, mambul weik ulule. Na ninguk ulule,” nyapdeiamukce, teleb yupu nyabuka deice arye, anyaik teleb kipdeibuk. Nyapdeiamuk bukni, sik Yehuda tam ulamik nang, sik imam-imam nang, sik deiyok-deiyok nanguk, amutuku noutam talye daulamik Yehuda yala nang nirya ap, sik nirya aryuk, Allah arye, ‘Wininamlume, aning ara kum wininamlume,’ nyapdeiamuk yupu yaniltaknauk ulamikce, Allah ati kum talebuka dobolbalamik. Tonda, sik Israel nang ulamik mutuku dana-dana tam ulamikce, Allah kum bikamik nang arye, pia malye weik ulamik ning ara, Israel nang arye, ‘Nun babye, aning talebuka unamabe,’ tenelamikce, malye ning pia weik ulamik. Ara, sik imam-imam nang arye, malye ulamik atouk, amutuku ulamik nang nirya babye, sik deiyok nang arye ulamik touk kibuka, talye isa siuk erebuka ulamik. Aning nirya winilamika deice arye, Allah Yahweh, el si eren aik malye kipdeiamik.

¹⁵ Sik Israel yala nang, sik deipkirikdop nang arye, si erelamiknye, Allah el si Yahweh, el si eren aik ap, minop talak elce wipdeiamuk nang ati, weik arye bico tenelamuk ati ara, ‘Anang ap, anyaik ap, adiparyuk oplopnamne,’ kum tenelamuk. Aning kum bukni, el yupu laka nyana deiyok nang ati, yupu nyapdeiamukce, dopdeipnyeba, anang arye, asum-asum ton, sik Israel yala nang ati, laka nyalangalamik bukni, atalak nirya, sik anang arye kum kekelamik. Sikce, ‘Ayupu ara, kum kekebuka unamabe,’ tenelamik.

¹⁶ Winilamikbuk, sik Israel yala nang arye, ‘Kume dipkoprob nyasinyake,’ kum tenelamik. Aning kum bukni, sikce, ‘Talye yupu nyalyangasinyake,’ tenelamik. Utenelamik ati, sikce, sik nabi-nabi nang ati, nalibuka akutulamek. Tonda, ‘Allah arye nyalamsuk yupu nirya ara, nun kum kekenamabe,’ tenelamik. Winibuka ulamika ani, sirya talak ara, Allah arye sik anang ati, tulum kibukba, sik dam pia ikin ning deibuk. Winibukura, sik anang arye ton, ‘Se, winipmasila ati, Allah arye ton lyepnamsilaryaʼ tenen, binmanto bisik babye, ton kum bikik. Allah arye, kanye imun weik ning arebuk.

¹⁷ Ara Allah arye, Raja Babel el kanye noutam pil dobuk ati, anye birye, ‘Israel ninye ara, optinye,’ tenelamukba, Allah arye anye ati, lo arebukba, Raja Babel birye, Yehuda yala wel nang nirya ara, Allah el si eren aik dam arye, anang nirya obuka, sirya dakuk. Ara, wel nang ap, kilapu ap, wisi nang nirya ara, Allah arye bobuka, Raja Babel ati, lo arebukba, anye birye anang weik arye, parang ya arye oplobuk. Ara, Allah arye, anang nirya bobuka, Babel mutuku taleamuk deiyoknye, Raja Nabopolasar biti arebuk.

¹⁸ Winibukura, Raja Nebukadnesar birye, Allah Yahweh el si eren aik koproba delilamik dekna weik mambul ning nirya ap, tonda weik mambul ning, yuk ning deililamik ning ap, amutuku nang, sik deiyok nang ap, sik pil don nang, sik bona ap, anirya alabuka, Raja Babel birye bobuka, Babel mutuku tamubuka bobiyuk.

¹⁹ Aninguk kum bukni, sik Babel mutuku yin talin nang, winibik ning ara, Yerusalem weik asik keil poka dobuka aknapdongomik ning ara, uluplobik. Tonda, Allah Yahweh, el si eren ati domik aik ap, tonda, amutuku ninye deiyok nang nirya, sik un aik nirya ap, tonda weik mambul ning, ninye deiyok nang, sik ulamik aik nirya ap, tonda amutuku noutam tuba awamuk dekna teleb ning nirya ap ara, dakuka batakik.

²⁰ Raja Babel Nebukadnesar birye, Yehuda tam ulamik nang obukce, ton batakukba, tuba aunmek nang ara, tapu koubuka talibukce, Babel mutuku tamubuka biyuk. Abobiyuk nang ara, Babel mutuku ninye deiyoknye ap, elce deiamukak, deipdanin, yangalamika ani, deiamuk nang, sik pil melibuka dona ap, sikce deiamikba, dadeipdanin balamik nang nirya ati, sik pil melibuka talye dona ap ati, kiamukba daulamik. Winibuka daulamika ani, aminyan talakuk, okaren mutuku Raja Persia welebukce, Babel mutuku malye kibukce, elce taleamuk.

²¹ Aning ara, Allah arye nabi Yeremia dam, “Amutuku ara aminyan talak opnamle. Talya lo uk unamlarya,” nyamukak, kekebuka laka nyalamuk ninguk, dipkoprob nong winibuka, dukdongobuk. Winibukura, keting tamun ara, tujuhpuluh (70) tahun noutam nirya ara, Yehuda mutuku ninye ton pia kum ulamikba, amutuku ara, talye lo uk uamuk. Ara, Sabat sum nirya ati, Israel nang arye, ‘Asum ara, weik mambul sum ati, pil kum dopnamabe,’ tenelamik atouk, amutuku-amutuku nirya ara, Allah arye, “Aning ara, winipnamle,” tenyamuk touk winibuk.

Raja Kores birye, Yehuda yala nang ati, ‘Anggun mutuku tamubuka bilulume,’ nyabuk yupu

²² Ura, Persia mutuku deiyoknye, Raja Kores birye amutuku talebuka, minop ulamuk keting tamun ara, elcuk amutuku nirya taleamuk. Winibuk talak ara, Allah arye, ‘Na yupu laka nyana deiyoknye, nabi Yeremia dam ati, “Winipnamne,” nyalamse ning nirya ara, nong upnamle,’ tenen, winibuk. Ara, Allah arye Kores biti, ‘Winiptue,’ tenebukba, Kores birye, el taleamuk mutuku nirya noutam arye, “Winipnamlume,” nyabuka nukuk. Apala weik mutuku aulamik nang dam ati, ‘Winipnulume,” nyabuka nukuk. Ayupu ara ani.

²³ Nara Raja Kores, Persia mutuku ninye deiyoknye birye, “Winipnamlume,” nyapsine. Ara, aning-aning ap, im noutam ap, im alip deice tam ap, aning nirya deiyoknye, im deice ululnye Allah Yahweh arye, nati, amutuku tukwak nang, sik deiyoknye kina ati, wipdeipnukce, nara Allah el pil dona ati, “Yerusalem mutuku bukni, Yehuda tam talipnalame,” nyapnuke. Nyapnukce, “Aning ati ara, Yehuda tam noutam bukni, weik asik, el si Yerusalem mutuku noutam arye, nara Allah, na si eren aik ara, asukumuk dopnamnilyame,” nyapdeipne. Tonda, Allah arye nati, “Aning ati ara, Allah Yahweh arye, ‘Anang ara, na nang unyake,’ tenyamuk touk, an mutuku noutam akunum unyak nang ara, adiparyuk Yerusalem mutuku uk, tamubuka binamake. Winibikceba, sik ni koproba Allah, el si Yahweh arye, Yerusalem mutuku tamubuka binamak nang nirya ati, pia tuba kalikinamsile. Elcuk sik ap tonpa binamake,” nyapdeipnuka ati, anggun Israel ninye nirya ara, adiparyuk dabinamlume. Raja Kores birye nyapdeibukce, surat sekeibuk.