2 Tawarikh 35 - Eipomek

Yosia birye Allah ati, “Telebe,” nyabukce, Kaplina Kwalina kwalibuk yupu

¹ Allah telebe nyana ati, Raja Yosia birye Yerusalem mutuku weik asik noutam, Kaplina Kwalina kwalibuk. Akaplimna Kwalina ati on domba basam ara, wala tonok ning deice, tanggal empat belas (14) sum arye, obuka kwalibik.

² Winibikura, Yosia birye, Allah Yahweh el si eren aik pum tam pil dona ati, imam-imam nang, sik pil donamik nang ara, yuk-yuk bokuka arebuk. Winibukopura, anang ati nyabuk, “Anggun pil doluluma ara, mambul weik pil ati, anggunce diksukum teleb piluk donamlume,” nyabukce, ‘Sik ti pil moubuka donamakʼ tenen kanye delin yupu nyabuk.

³ Tonda, Yosia birye Lewi yala nang ati, nyabuk yupu ara ani. Sik Lewi yala nang ara, minop talak Allah Yahweh arye, ‘Ayala nang arye, na si eren aik pum tam pil dona deiyok nang, imam nang ara, melin nang unamakʼ tenen, wipdeiamuk. Tonda, Anang arye, “Na yupu bobuka, sik Israel yala nang nirya ati, ‘Aning ara, wininamlume, aning ara pia kum wininamlume,’ nyapsine,” Allah arye nyabukura, Musa kekebukce, seksuk yupu deice arye, nyapsuka ati, ‘Winibuka unamlume,’ nyabuka, ‘Peterena deiyok nang ton unamakʼ tenen, sik Lewi yala nang wipdeiamuk. Tonda Yosia birye, sik Lewi nang ati ayupu nyabuk. “Nun apu koproba Raja Daud birye, Israel tam nirya taleamuknye, elce deiamuknye Salomo birye, Allah si erena ati domuk aik ara, Allah arye nyabuk yupu dobuka, mambul marikna, el si Peti Perjanjian, amarikna pum tam dongobukabikce, pia teleb deiamik ning ara, Allah el si eren aik pum tamuk deipnamlume. Winipmunyeura, aning dobuka, sik takunya deice arye bobuka, amutuku deipmana, kisikdakuka omutuku deipmana kina ara, pia meme. Atalak arye dipdongobuka, upnamle talak nirya ara, anggun ni koproba Allah Yahweh ati, kanye teleb deice aryuk, pil donamlume. Tonda, Allah el tenen nang, el mapu Israel nang yala-yala nirya melina ati, talima lamabuka, tuba teleb kibuka pil donamlume.

⁴ Anggun nirya ara, Lewi yala nang ululum bukni, anggun ni yapu yuk-yuk aulamik touk, bokukapmunce, kong yuk-yuk kibuka deiamukce, pil yuk-yuk Raja Daud ap, el mi Raja Salomo ap, sikce, ‘Winamlume,’ nyabuka, ayupu sekuka areamsirik touk, kong yuk-yuk kibuka, pil donamlume.

⁵ Anggun kong yuk-yuk kibuka deiplum ning ara, Allah el si eren aik dam binuka kintinipmumnyeba, sikce talye Israel nang nirya ara, sik yala-yala aulamikce touk, kong yuk-yuk kibuka yakirye, ‘Allah ati, teleb aren ning arepnuyapʼ tenen, yanganamak talak ara, anggun Lewi yala deiyok nang bokdokmunce, Israel nang kong yuk-yuk ati melinamlume.

⁶ Kaplina Kwalya kwalin sum akunum uplyopura, ‘Allah dam yapyeba, kanye deipsutueʼ tenen, elce, ‘Winipnamlume,’ nyapdeipsuk touk, anggun adiparyuk kentilinamlume. Apil akunum dobuka sirya wipmunyeura, sik Israel nang arye, Allah el arena ati, adiparyuk domba basam yanuka arepsikceura, adomba basam obuka kwalinamlume. Apil nirya dolamunya deice arye, nun ni Allah Yahweh arye, Musa biti, ‘Winibuka kam ning opmunce, na si erena ati, arenamlume,’ nyapdeiamukba, Musa birye nyapdeiamsuk touk wininamlume.” Raja Yosia birye, sik Lewi yala nang ati nyabuk.

⁷ Ura, Kaplina Kwalina dam akunum kibuk talak ara, Yosia birye, ‘Kume, deiyok nang kum bukni, talye dayanganamak nang nirya ara, sik ton Kaplina Kwalya kwalina ati aren ning areptingʼ tenen, Raja Yosia el domba basam ap, domba basam mi ap, arepmanto ning ara, tonda kambing basam arepmanto ning ap nirya, yupa ara pia weik, tiga puluh ribu (30.000) ekor basam arebuk. Tonda, el weilamuk sapi basam yim ning babye, yupa ara, tiga ribu (3.000) ekor arebuk.

⁸ Raja Yosia el amu tam pil dona deiyok-deiyok nang nirya arye, sik talye Israel nang ap, sik imam-imam nang ap, tonda Lewi yala nang ap ati, kam ning weik arye kintinibuka talye arelamik. Aning laka nyana ara ani. Imam nang sik deice tam deiyoknye Hilkia ap, Zakaria ap, Yehiel ap, sik awinilye nang arye, Allah el si eren aik pil dona ati kalikin nang ulamik. Anang winilye, yuk nang ati, yupa weik dua ribu enam ratus ribu (2.600) ekor domba basam yim ap, tonda sapi basam tiga ratus (300) ekor ap, arebik. Aning nirya ara, Kaplina Kwalina sum kwalina ati boyanuka arelyayik.

⁹ Aning akunum winibikopura, Lewi yala nang, sik deiyok kina deiyok nang, tonoknye el si Konanya, el ap, el kayapu nang Semaya ap, Hasabia ap, tonda Netanel ap, Hasabya ap, Yeiel ap, Yosabat ap, sikce yuk Lewi yala nang ati, domba basam yim mitik weik ning, lima ribu (5.000) ekor ap, tonda sapi basam lima ratus (500) ekor ap nirya ara, Kaplina Kwalina sum kwalina ati yanuka arebik.

¹⁰ Kaplina Kwalina sum pil donamik ning ap, winipnamik ning nirya ap, akunum kintinibuka deibikopura, imam nang, Lewi yala nang ap, kong yuk-yuk kibuka, sik deiyoknye Raja arye wibuka deiamukce, “Wininamlume,” nyapdeiamuk touk, yuk-yuk kintinibuka delilamik.

¹¹ Winibika ati ara, sik Lewi yala nang arye, Kaplina Kwalina sum ona ati arebik domba basam ara, obuka bola kolamik. Tonda, imam-imam nang arye, aopmek basam sik ining ara, Lewi yala nang arye arebikba, dobukabikce, Allah arenak, el si mesba, akeil deice ap, kup-kup tam ap, ining dobuka dikildonoklamik.

¹² Bukni, imam-imam nang ap, Lewi yala nang ap, sikce sapi basam ap, domba basam ap, opman ning ara, kwalina bokukapnarye, Yehuda mutuku talye kankan ulamik nang ati, sik mapu silip yuk-yuk aulamik touk arelamik. Ara, ‘Anang arye, aminyan talak Allah arye, sik malye winin ning kum daneipnamleʼ tenen, sik imam-imam nang arye aning winina deice arye, sik mapu silip aryuk, aning dobuka, Allah ati arelbalamik. Ara, Allah arye nyapdeibukura, Musa birye sekamuk buku noutam awamuk ning atonun dukdongobuka winilamik.

¹³ Winipnopura, sik imam nang ap, Lewi yala nang ap arye, Kaplina Kwalina, tonda el si Paskah sum dina ati, basam tup bobuka, uku buk deice arye dalamik. Bukni, Allah el si erena ati, pia teleb lek ning ara, yuk kintinibuka dalamik. Ara, yangalin ning, el si kuali deice ap, belanga deice ap arye yulamik. Winipnopura, abasam tup yupman ning ap, dapman ning ap ara, minop amutuku bulubuka wekman nang ati bokolilamik.

¹⁴ Winibuka atup ning akunum bokuka deipnopura, sik Lewi yala nang arye, sik ap, tonda sik imam-imam nang ap ati, Kaplina Kwalina dinamik ning, yuk ning ton kintinililamik. Deiyok ara, minop talak ulamuknye, imam Harun birye deiamuk nang ara, sik atalak pil donman imam-imam nang, Israel nang nirya arye, Kaplina Kwalina sum aren ning, basam tup ap, meta ap, kintinibuka delinmance, pil donmana ani lukunyan kilamuk. Aning ara, ‘Allah arye kanye deipnamsilʼ tenen, arelamik ning, uku dongolamikce, pil weik dolamik ati, sik bidamang, sik dipnaman ning ati, kintinipmanto kum ulamik.

¹⁵ Lewi yala nang bukni, ninye si Asaf birye deibukba, dadeipdanin yanamik nang, sikda mot nyana ati, alat musik, kitar ayala-yala nirya ara, kel weik nang ulamik. Anang ara, minop talak ulamuknye, Raja Daud birye wipdeibukce, nyabuk. “Anggunda asukum tikuka umunce, pil donamlume,” nyapdeiamukakuk ulamikce, pil dolamik. Anang ara ani. Ara, Asaf ap, Heman ap, tonda Yedutun, elda nabi kibuka, Raja dam ulamukce, Allah arye nyapdeiamuk yupu laka nyalamukba, Raja kekelamuk. Tonda, Allah el si eren aik, bublan dam pia kalikin nang ulamik. Sikda, Kaplina Kwalina sum ati, ‘Asukumuk unmamunce, bublan kalekuka, pil donamlume,’ nyapdeiamuk mutuku anyuk ulamikce, pil dolamik. Bukni, sik Lewi yala nanguk bukni, ton tam nang melipnaba, sik dipnamik ning ati kintinililamik.

¹⁶ Atalak kipnopura, Raja Yosia birye, “Aning nirya winibuka pil donamlume,” nyamuk touk ubuka, Allah Yahweh el si erebuka kina ap, telebe nyana ap ati, Kaplina Kwalina pil nirya dolamik. Tonda, ‘Allah arye, nun malye winin ning kilibuka, kum kipdeipnamsilʼ tenen, imam nang arye kam ning obuka, Allah Yahweh, el arena ati, memepdeiamik mesba deice uku dongolamik.

¹⁷ Israel nang yala nirya ara, amutuku bulubuka yanganmik nang nirya, atalak aryuk Paskah sum deice arye, Kaplina Kwalina kwalibuka dibik. Aning akunum winipnopura, sik nirya arye, atalak arye dukdongobuka, Nena Kum Roti Kwaning dan talak ati, like tekbarye sum noutam ara, amutuku ulamikce, Allah si erelamikce, Nena Kum Roti Kwaning dilamik.

¹⁸ Ura, minop talak, nabi Samuel kam tuba ulamuk talak arye dipdongobuka, anoutam talak nirya ara, Yehuda mutuku nang ap, Israel mutuku nang ap, Kaplina Kwalina ton pia kum kwalilamik. Tonda, Israel mutuku noutam talilamik ninye deiyok Raja kilamik nang babye, sik ton akwalya kum kwalilamik. Ara, Raja Yosia ap, atalak ulamik imam-imam nang ap, Lewi yala nang ap, sik Yerusalem mutuku ulamik nang ap, sik nirya neika arye Kaplin Kwalina, Paskah sum deice arye kwalibuka, Allah el si erelamik touk, pia kum kwalilamik. Raja Yosia birye, amutuku min kum taleamuk talak ara, sik Yehuda mutuku ulamik nang ap, Israel mutuku ulamik nang ap, tonda Yerusalem weik asik noutam ulamik nang ap nirya ara, Kaplina Kwalina kwalibuka Allah ati, bulubuka, Allah el si eren ning ati arebik ning ara, Raja Yosia birye, atalak winibuk touk, minop talak ton kum winilamik. Atalak Allah ati arebik ning ara, pia weik ubuk.

¹⁹ Raja Yosia birye, Yehuda tam mutuku taleamuk talak bukni, keting tamun delapan belas (18) akunum kibuk tahun deice aryuk, aKaplina Kwalina, pia teleb kibuka kwalibik.

Mesir mutuku ninye deiyoknye Raja Nekho birye, Raja Yosia obuka ati, sekik yupu

²⁰ Yosia birye deiyok kiamukba, Allah el si eren aik dolamika ani, pil akunum sirya dakdongobikopura, Mesir mutuku nang, sik deiyoknye Nekho birye deiyok kibukba, ‘Babel mutuku nang ap, nun ap opdatibirye, obuka sirya daktinyeʼ tenen, yuk mutuku keting komulban tam, Efrat mek dam bukni, mutuku si Karkemis mutuku biyik. Winibukba, Raja Yosia kekebukce, ‘Aning ara, kum winipnamle. Ati, anang ap epdabirye, opdanamabe,’ tenebukce, el ap, el yin talin nang ap arye, neika amutuku welebiyik.

²¹ Bukni, Raja Mesir, el si Nekho birye, Yosia dam yupu nyapdeibukce, nyabuk. “Kume, nunce, ‘Babel nang opdatibye,’ tenepmap ning ara, Yehuda tam nang, sik deiyoknye anti kuma. Na amutuku yanmana ara, an tenepmalam ning ara, mikip ubuka, yu upniliba, an ona ati kum yanmane. Bukni, na yanmana ara, ‘Na kayapu nang, mal olan nang ap, melibuka opdatibyeʼ tenen, yanmane. An tam nang ati kume. Tonda, anggunce si erelulum Allah arye nati, ‘Anang ara, minpola opnamlyame. Babel tam nang olbilyame,’ nyapmanila ati, minpola yanmane. Ati ara, Allah ara, na tam kiplirye, melipnamnile. Ati ara, Allah arye nati tenepmanilarye, nyapmanil ning ara, anda yata deiyok ati, el yanibuka malye kipmalam do? An tenipmalam ning ara, bataklyame. Ance tenipmalam touk winipminyeura, Allah arye an deice ikin ning deipnamakil ati, nyapkine.” Raja Nekho birye, Raja Yosia biti nyabuk.

²² Nyabuk bukni, Yosia birye, ‘Kume, Raja Nekho optinyeʼ tenen, mandipna kanye bobuk. Winibuka ati, Yosia birye, ‘Anye bira, na urasin kum biknamnilʼ tenen, yuk nang ongolamik baju atonun ongobukce, el urasin mitik yuk kipdobukce, Raja Nekho, ninye olanak ara, Megido mutuku lu tam olanmekak wekelbiyuk. Tonda, minop talak Allah arye Raja Nekho, el talima noutam arye, ‘Winipnamlame,’ nyabuk ning ara, Raja Nekho laka nyapmok bukni, Yosia kum kekebukce, diba kum tenebuk. Diba kum tenebuka ati, ‘Raja Nekho opnunʼ tenen, Megido mutuku olbiyuk.

²³ Winibukura, aolanmekak arye, Raja Yosia marabik. Winibikba, Yosia birye, el melin nang ati, “Se, akunum marapniaka anya arye, asukum arye bobinuka, yuk sukum bobinamanulume. Aning ara pia imun kanye bopne,” nyabuk.

²⁴ Nyabukopura, el ap neika olanmek nang arye, el nong boyanuka, tuku deice ban ning, el si ara kereta perang, aning deice arye banmok ning pum tam arye bobinuka, aning batakuka yuk kereta perang ning deice arye deibuka bobanmika ani, Yerusalem mutuku tamubuka bobiyik. Winibikba, Yerusalem mutuku arye Yosia dibuk. Winibukura, el apu yapu, sik ninye deiyok nang nirya weilamikakuk weibik. Winibikba, Yosia dipmok ning ati, Yehuda tam mutuku noutam ulamik nang ap, Yerusalem weik asik noutam ulamik nang ap nirya ara, bulubuka malye nyabuka ngalukikce, engebik.

²⁵ Nabi Yeremia birye, Yosia dipmok ning ati, ‘Anye telebe anya arye, si erebuka kipnuyapʼ tenen, mot tonok libuka nyanmok. Anyanmok mot ara, wini talak babye, Israel mutuku nang ara, Yosia el teneni talak ara, tuba amot nyanyake. Ara, mot teleb ubuka nyanyak nang ap, kilapu ap, sikce deiyok koubikiba, nyanyake. Amot nyanyak ning ara, mot buku sekenyak deice akunum sekik. Abuku si ati ara, ‘Ratapan Buku,’ nyanyake. Abuku noutam arye sekdeibuka anya arye, asukum arye nyanyake.

²⁶ Yosia pil dopnin yangalamuk ning ati, ton ning ara ani, ara Allah ati, weik tonun kanye deibuka ulamuk, tonda Allah Yahweh arye, “Wininamlume,” nyapdeiamuk touk, sekdeiamikak, aning kekepnarye dukgobuka, namin arye ulamuk.

²⁷ Yosia birye deiyok koubuka, pil dopnin yangalamukak arye dukdongobuka, ‘Allah ati kipnarye, el si erebuka kina ati, pil dopnamne,’ tenebukce, sirya dakuk talak ati nukuna ara, mitik tonun ton ani. “Aning nirya ara, Raja Israel nang ap, Raja Yehuda nang ap ati, nukun buku el si ara, Buku Sejarah Raja-Raja Israel, adeice arye akunum sekik.