2 Tawarikh 34 - Eipomek

Yosia birye, Yehuda mutuku ninye deiyoknye, Raja kibuk yupu

¹ Yosia el umur delapan (8) tahun kibuk talak ara, Yehuda mutuku ninye deiyoknye Raja kibuk. El ninye deiyoknye, Raja kibuka Yerusalem mutuku weik asik noutam ulamukce, keting tamun tiga puluh satu (31) tahun deice arye, amutuku nirya taleamuk.

² El winilamuk ning ap, pil dolamuk ning ap nirya ara, diksukumuk ulamuk ati, Allah arye elti, teleb kanye deibuka ulamuk. Tonda, el apu koproba winilamuk ning atouk, el babye aninguk ulamukce, diksukumuk dukdongobuka pil dolamuk. Winilamukce, Allah elce nyapdeiamuk yupu, moubuka taleamukce, teleb winibuka, aning batakna kumce, ‘Yuk ning ton winipnun do, kum do?’ pia kum tenelamukce, pia teleb piluk dolamuk.

Yosia birye, talye isa si erena ati memepdeiamik ning nirya, ulubuka daklobuk yupu

³ Yosia el wel winiryuk nepmok talak aryuk, ninye deiyoknye Raja tikamukce, el umur keting tamun delapan (8) tahun kibuk talak ara, el apu koproba Raja Daud si erelamuk Allah ati, el babye atonun, ‘Allah arye yata nyapnunil do?’ tenen, Allah ati si erena deiyok koubukce, moubuka kekelamuk. Winibuka ulamuka ani, keting tamun dumbarye ton mabukopura, sik Israel nang arye, minop talak isa si erena ati, kintinibuka delilamik ning nirya ara, ‘Amalye ning kum kipdeipnamne,’ tenebukce, deiyok koubuk. Ara, isa si erena ati, mutuku kon deice kintinibuka dolamikak ap, isa Asyera nyabuka, el si erena ati, cang yo iklamik ning ap, yuk-yuk talye ning ati, si erelamik ning, ninye urasin atonun ubuka memebuka, deiamik ning nirya ara, ulubuka dakukce, kum kipdeibuk.

⁴ Yosia birye, ‘Winiplulume,’ nyapdeibukba, el pil melibuka don nang arye, Bahal si erena ati, kam ning opnarye, uku dongolamikak nirya ap, aning deice tam deiamik siltong teleb ning danak ati, kintinibuka delilamik ning ap nirya ara, ulubuka batakikce, mitik tonun kapak ya arye, sekuka batakik. Tonda, isa si Asyera nyabuka, el si erena ati, cang yo iklamik ning nirya ap ara, lokuka batakukce, teikuka kum kipdeibik. Aning atonun, aisa mer nirya ati, “Nun ni,” nyabuka, si erelamik ning nirya babye, ninye urasin atonun kibuka memebuka deipnarye, si erelamik ning nirya babye, Raja Yosia birye nyapdeibukura, el mapu ap, sik nirya arye, aning ulubukabikce, kum kipdeibik. Winibikba, aning sakuk ning ara dobuka, aning ati si erelamik nang bukni, akunum diamik nang, sik nong weilamik tuku deiceuk yamupdeibik.

⁵ Winibikopura, Yosia birye, isa si erena ati, deiyok kibuka ulamik nang, sik imam nang bukni, akunum diamikba weiamik nang, sik yok nirya ara, dobuka kam ning opnarye, uku dongolamikak deice arye, uku dongobukba, uku buk arye, sik yok dibuk. Aning nirya winibuk deice arye, Yehuda tam mutuku-mutuku ap, tonda Israel nang ulamik mutuku, Yerusalem mutuku weik asik dolamik noutam ulamik nang nirya ap ara, sik malye-malye ulamik ning, nirya kum kipdeibukba, teleb deice arye, sik ni koproba Allah si erena ati, ila tamubuka tonap dip tenebik.

⁶ Tonda, yuk mutuku bukni, weik asik dolamik mutuku ara, Manasye mutuku ap, Efraim mutuku ap, tonda Simeon mutuku ap, asukum arye dipdongobuka, Naftali mutuku ara, weik asik dolamik mutuku babye, Raja Yosia birye atonun, sik malye winilamik ning nirya ati, kum kipdeibukce, teleb kipdeibuk. Winibukce, amutuku-amutuku weik asik dolamikak, mening dam mitik asik diamuk dolamik bukni, ulubuka batakamik mutuku nirya ara, tonap teleb kipdeibukce, malye ning nirya kum kipdeibuk.

⁷ Ara, amutuku-amutuku noutam nirya babye, Raja Yosia birye, isa si erena ati, kam ning opnarye, uku dongolamikak mesba nirya ap uluplobuk. Tonda, isa si Asyera nyabuka, el si erena ati, cang yo iklamik ning nirya ap ara, lokuka batakukce, kum kipdeibuk. Aning atonun, aisa mer nirya ati, Nun ni,” nyabuka, si erelamik ning nirya babye, ninye urasin atonun ubuka memebuka deipnarye, si erelamik ning, gambar Nirya babye, dobukabukce, aning teikuka kum kipdeibuk. Tonda, isa morona ati, siltong teleb nyan ning uku dongolamik ning ap, kintinibuka deililamik ning nirya ara, kapak ya arye mitik-mitik kibuka sekuka, batakuk deice arye, kum kipdeibuk. Raja Yosia birye apil-apil nirya akunum winibuka, sirya dakdongobukura, tamubuka Yerusalem mutuku biyuk.

Allah el si eren aik lipsisikuka pil dona ati, kintinibuka dolamik ning ati, sekik yupu

⁸ Raja Yosia birye, Israel nang talebuka ninye deiyok Raja ulamuka ani, keting tamun delapan belas (18) tahun akunum kibukopura, elce, ‘Na talinun mutuku ap, na si erenun Allah, el si Yahweh, el si eren aik ap nirya ara, malye ning kum kipdeipnirye, tamubuka teleb kilinamne,’ tenebuk. Winibuka tenebuk talak ara, ninye winilye nang ton, Allah el si erelamik aik pum tam akunum punubuk ning ap, malye uamuk ning ap ati, teleb ubuka dona ati dopdeibuk. Anang sik si ara ani. Ara, Asalya el mi Safan, elda sekretaris Raja Yosia, anye ap, Yerusalem mutuku asik talebuka ulamuknye, Gubenur Maaseya ap, tonda Yoahas el mi Yoah ap wipdeibuk. Yahas bira, elce, amutuku ikin ning pil dolamik ning ap, ulamik ning ap, negara pil nirya sekuka, sejarah buku deiamuknye ulamuk. Ara, ‘Sik anang arye, Allah el si eren aik pia teleb kibuka, lipsisikuka donamak,’ tenen ati, anang wipdeibuk.

⁹ Ura, Lewi yala nang, Allah Yahweh el si eren aik bublan dam, kalikna deiyok nang arye, Allah aik dona ati, amutuku dana-dana tam ulamik nang arye, yo bok bululamikce, Lewi yala nang ati arelamik ning ara, winilye nang ati, Yosia birye wipdeibuk nang ara, aning boyanuka imam Hilkia dam binuka arebik. Ayo bok ara, Efraim mutuku ulamik nang ap, tonda Manasye mutuku ulamik nang ap, tonda yuk tam ulamik nang ap, tonda Yehuda yala nang ap, Benyamin yala nang ap, Yerusalem mutuku weik asik noutam ulamik nang ap, sik nirya arye Lewi yala nang ati arelamikak, awinilye nang arye, ayo bok boyanuka, imam Hilkia biti arebik.

¹⁰ Arebikba, Hilkia birye dobukabukce, ayo bok ara, Allah Yahweh el si eren aik lipsisikuka dona ati, deiyok kibuka, apil kaliklamik nang, sik winilye nang deice arebuk. Arebukba, awinilye deiyok nang arye, ‘Anyaik teleb kibuka, moubuka dopnamakʼ tenen, wipdeiamuk pil don nang ati arebik. Sik pil yuk-yuk bukni, ‘Anyaik lipsisikuka dona ap, teleb kilina ap ati, pil donamak nangʼ tenen, arebik.

¹¹ Aning atonun, winibik ning ara, sik yo cakne kel nang, ap aik dona kel bikamik nang ap, urasin teleb keil kintinibuka dona kel nang ap ati, arebik. Tonda, aik ayukumna yo ap, aik aruma deice deipnamak yo ap, dekuka kintinipnamik nang ati, ayo bok ton bokuka arebik. Anyaik lipsisikuka dopnamika deiyok ara, minop talak Yehuda mutuku taleamika deiyok nang, Raja-Raja nang arye, ‘Anyaik ara, mambule kume,’ tenelamikce, bataklamikba, anyaik malye kibukce, yo pun deiamuk ati, atalak ara, ‘Anyaik nirya ara, teleb ubuka, lipsisikuka dopnamapʼ tenen, winibik.

¹² Aning nirya akunum kintibikce, yupu deibikba, anyaik lipsisikuka don pil deiyok nang ara, ‘Anyaik teleb lipsisikuka dopnamakʼ tenen, wipdeiamik nang ara, pia teleb diksukumuk ulamikce, pil teleb kibuka dolamik. Tonda, sik anang ati kalikna deiyok nang ara, Lewi yala nang, dumbarye nang wipdeiamik. Sik anang si ara ani. Ara, Yahat ap, Obaja ap, sik anang ara, Merari birye deibukba, dadeipdanin yayik nang ati, Lewi yala nang ulamik. Tonda, Zakaria ap, Mesulam ap, sik anang ara Kehat yala nang arye diamik nang ulamik anya arye, sik babye Lewi yala nang ulamik.

¹³ Ura, Lewi yala nang nirya ara, mot sena ati ara, mot nyan talak ara, bung-bung ana kitar ayala-yala nirya deice arye, weik kel biklamik nang arye mot nyalamik. Sik aLewi yala nang ara, Allah el si eren aik don ning, alat yala-yala nirya boyanaba, tomubuka boyangana ap, anyaik pil don nang ap ati, kalikna deiyok nang ulamik. Tonda, Lewi yala nang bukni, atalak pil donmana ani, yuk talak yuk pil donmana ani, sik pil dona ati, kalikin nang ulamik. Tonda, apil donman ning sekena ap, tonda anyaik bublan dam kalikin nang ap, tonda yuk pil dona deiyok nang ap ati, wipdeiamikba, apil dobuka ulamik.

Allah arye, “Aning ara wininamlume, aning ara pia kum wininamlume,” nyapdeibukba, Musa birye sekamuk yupu, deiamikak kum elilamik bukni, aminyan arye tamubuka eibuka ati, sekik yupu

¹⁴ Allah Yahweh el si eren aik dona ati, bulubuka deiamik yo bok, tuba dobuka bokeibik talak ara, anyaik pum tam pil dona deiyoknye imam Hilkia bira, minop talak Allah arye nyapdeiamuk yupu sekuka deiamik ning eibuk. Ara, Allah Yahweh arye Musa biti, “Aning ara wininamlume, aning ara pia kum wininamlume,” nyamukba, Musa birye dobuka, anyaik deiamuk ning, ayupu sekamuk buku ara, imam Hilkia birye akunum eibuk. Abuku ara, Raja kilamik nang arye, Allah Yahweh el si eren aik, malye kilamik deice arye, Musa sekamuk buku ara, keting tamun ouku weik tonun, luba kiamikba, abuku kum eililamik bukni, imam Hilkia birye, tamubuka abuku ara, Allah el si eren aik pum tam arye eibuk.

¹⁵ Eibukopura, Hilkia birye, aning-aning sekena deiyoknye, sekertaris Safan ati nyabuk. “Allah arye, ‘Wininamlume,’ nyapdeiamsuk mem yupu ara, Allah Yahweh, el si eren aik pum tam arye eipmane,” nyabuk. Nyabukopura, Hilkia birye abuku dobuka, sekertaris Safan biti arebuk.

¹⁶ Safan birye, abuku akunum doprobukopura, Raja Yosia dam biyukce nyabuk. “Nun deiyoknye, ance, an amu tam pil dona deiyok nang ati, ‘Winipnamlume,’ nyapdeipsulum ning nirya ara, akunum pil dobupu,” nyabuk.

¹⁷ Amutuku nang arye arelamikba, Allah el si eren aik pum deiamik yo bok ara, akunum doprobupu. Winibuburye, sik anyaik dona ati kaliklamik nang ap, tonda aik lipsisikuka dona deiyok nang ap, sikce pil dolamik ning ati ara, nirya arebupu,” nyabuk.

¹⁸ Nyabukopura, Safan birye yupu tonap tabakuka nyabuk. “Imam deiyoknye, Hilkia birye Allah yupu sekamik buku ton arepnuke,” nyabuk. Nyabukce, Safan birye abuku ara, Raja el kekenak yinibukba kekebuk.

¹⁹ Nyabukura, Raja arye kekebukura, ‘Se, aning nirya ara, kum bikinyabe. Abuku ara, wangamik anya arye, aning kum talebuka unyabe,’ tenebukce, ‘Se,’ tenen, ikin kanye bobukce, sik Yahudi nang winilamik touk, el ongopmok baju kwiliklobukce, engebuk.

²⁰ Winibukopura, Raja Yosia birye, el amu tam deiyok nang ati, ayupu nyapdeibuk. “Anggun nirya imam Hilkia ap, tonda Safan el mi Ahikam ap, Mikha el mi Abon ap, Safan sekertaris negara pil dolinye ap, tonda Raja el melinanye Asaya ap ati, nyapsine.

²¹ Anggun anang ara, adiparyuk bimunce, na ap, Israel yala nang ton tuba aunyak nang nirya ap, tonda Yehuda tam mutuku noutam unyak nang ap ati, ‘Abuku wangamik bukni, winiryuk eipmap buku, Allah arye nyapdeiamukba, abuku noutam sekamuk ning ati, yata wiripnamap do?’ tenen, Allah dam ati binuka asipdenamlume. Ara, Allah arye nunti akunum yu uplirye, ikin ning nun nong deice akunum deipnamsile. Deiyok ara, Allah arye, ‘Winamlume,’ nyamuk ning ara, nun apu yapu arye ton, abuku noutam sekamuk touk, pia kum winilamik touk, nun wini talak unyap nang babye, kum wininyabe. Ati ara, yata wiripnamap do?” nyabuk.

²² Raja Yosia birye nyabuka ati, anang ara, imam Hilkia ap, Akiham ap, Abdon ap, sekertaris Sefan ap, tonda Asaya ap, sik nirya ara, Allah el yupu laka nyalamuk kil tonok, el si Hulda dam biyik. Ara, ‘Allah yupu nyalamuk ning ara, akil Hulda, elce aning ara, laka nyapsutuʼ tenen, binuka morobik. Akil ara, Allah arye nyapdeipnaba, kekepnarye, laka nyalamuk kil, akil ara nabi ulamuk. Elda, Yerusalem mutuku dam bukni, winiryuk mitik asik dobuka ulamikakuk, el babye asukum ulamuk. Hulda bira, ninye si Tikwa, el mi Salum domuk. Salum bira, Allah yupu sum ati, imam-imam arye ongolamik baju Wina deiyoknye ulamuk. Ati, Raja arye dopdeibuk nang nirya, neika anabi kil Hulda, el dam binuka, Raja arye nyapdeipmok yupu nirya ara, laka nyabikba, akil kekebuk.

²³ Akil Hulda birye, ayupu kekebukopura, nyabuk. “Anggunda, Raja arye dopdeipsukba, na dam yanmaluma anya arye, Raja damuk tamubuka bimunce, anyapnusin yupu ara, Raja biti laka nyapnamlume.

²⁴ Ara ani, Allah Yahweh arye nyapsile. ‘Israel nang, sik apu yapu nang arye, si erelyangalamiknye, nara Allah arye winipnamne. Yerusalem mutuku ap, amutuku noutam tuba unyak nang ap, ati supnirye, sik nirya ara, weik imun kanye bon ning, sik dam deipnamne. Ara, narye minop talak nyamsiba, abuku sekeiamik noutam arye, ‘Allah nyalye yupu kum talebuka ubicopura, supniba, weik imun kanye bon ning, ayala-yala nirya, sik deice yanamlarya,’ nyamse. Ayupu nirya ara, anggunce abuku dobuka, sik Yehuda tam talibuka deiyoknye dam nyapdeipmalumba, anggun Raja Yosia akunum kekemoke.

²⁵ Sik Yahudi yala nang nirya, Yehuda tam babye, Israel tam babye, na Allah ati dipkoprob diba kum tenelamikce, na ap, na yupu ap batakuka, isa si erena atibuk ulamik. Sikce amalye wininuk, winilamik ning nirya ati ara, nati yu kililamnike. Winilamnikba, Yerusalem mutuku unyak nang ati, yu upnukba, derepse. Atenepse ning ara, min kum winipmanto,” Allah arye nyabuk.

²⁶ Akil Hulda birye, ayupu nyabukce, dukgobuka ayupu ton tabakuka nyabuk. “Bukni, Yehuda mutuku talibuk Raja birye, ‘Allah arye, aning ara tonap laka nyapnamasile,’ nyabuka, nyapdeiamsuknye biti ara, adiparyuk ayupu el dam laka nyalbilulume. Ara ani. “Na Allah Yahweh arye nyapsine. Anggun Israel nang yala-yala nirya ara, anggun ni koproba Allah Yahweh arye nyapmasine. Abuku noutam sekdeibuk ning ara, Yosia ance akunum kekepmalam ning ati nyapkine.

²⁷ Anda, ayupu kekepmalamce, ‘Se, Allah arye nun mutuku ap, nun malye ulamupu ning ap ati, yu ubuka anya arye, weik arye wenepnamsile. Ati, yata malye ning nirya mangkau arye malye weik ulamupu do?’ tenepmalamce, an talima amu tam kipmalamce, ‘Malye ning nirya bataknirye, Allah dam tamubuka yanirye, diksukumuk unamne,’ tenepmalame. ‘Allah arye nun Yerusalem mutuku nang ati, obuka wenepnamsile,’ tenepmalamce, aning ara akunum biklumce, talima lamabuka, an ongolyam baju kwilikuka bataklumce, na Allah dam engeplume. Awiniplum ning ara, narye akunum kekepkisirye, eipkise.

²⁸ Ati ara, an tuba kam ulaminye talak nirya ara, Israel mutuku ikin ning ton kum deipnamne. Tonda, an dipnamlama ara, ikin kanye bona kumce, talye namin asa mangkau ulaminya dipnamlame. Na Allah arye, ‘Anye bira teleb aryuk dipnamle,’ nyapkiniba, teleb ubuka, talye kanye bopmince dipnamlame. Tonda, akunum dipminyopura, aminyan talakuk, amutuku ap, amutuku noutam unyak nang ap ati, weik kanye imun ning arepninyeba, ikin weik unamak ning ara, an asing arye kum eipnalame,” Allah arye nyapmakile. Akil nabi kibuka, ulamuk kil el si Hulda birye nyabuk. Nyabukopura, akil dam binmek nang nirya ara, tamubuka Raja damuk yayikce, akil nyapmok yupu nirya, Raja kekenak ati, yanuka laka nyabikba, Raja Yosia birye kekebuk.

Yosia birye, “Allah dam, pia dipkoprob tenebuka, diksukumuk unamabe,” nyabuk yupu

²⁹ Raja Yosia birye, sik laka nyanmek yupu akunum kekebukopura, ninye yuk nang ati, yukubukce, ‘Allah el yupu kekepnuyapʼ tenen, “Yerusalem mutuku weik asik talebuka deiyok nang nirya ap, Yehuda tam mutuku deiyok nang ap ati, anggun deiyok-deiyok nang nirya bulupdeiplulume,” nyabukba, bulupik.

^30-31 Yukubukba, bulubuka yayikopura, el ap, Yudea tam deiyok nang ap, Yerusalem mutuku ulamik deiyok nang ap, sik nirya Allah Yahweh, el si eren aik dam biyik. Imam-imam nang babye, Lewi yala nang babye, sik ap amutuku ulamik nang ap, tonda bona kum ati, talye kankan daulamik nang ap, bona weik talen nang ap, sik nirya neika biyik. Sik nirya kekenak arye, Raja el cang ayukumna yo dam tikukce, Allah arye nyapdeiamuk yupu dobuka, kintinibuka delilamikak ara, Allah Yahweh el si eren aik pum tam arye dolamik buku noutam sekamuk ning nirya ara yinibuk. Winibukopura, Raja arye, Allah Yahweh kekenmokak arye nyabuk, “Ura, na Allah ati diba tenepnirye, yuk talye ning ati, si erena kumce, Allah Yahweh el dam pia unirye, na kanye ap, talima ap, Allah el dam deipnamne. Winipnyopura, Allah arye, ‘Aning wininamlume, aning ara, pia kum wininamlume,’ nyapdeibuk touk, narye moubuka talepnirye, aning pia wininamne. Tonda, Allah arye, ‘Na si erebuka, na si kina ati ara, ‘Aning ara wininamlame, aning ara arepnamnulume, awala, atanggal akunum uplyopura, akwalya kwalibuka, si erenamnulume,’ nyapdeiamukba, abuku noutam sekik ning nirya ara, dipkoprob aninguk talebuka unamne,” nyabuka, ninye deiyoknye Raja Yosia birye, Allah dam lak nyabuk.

³² Raja Yosia birye aning nirya akunum nyabuk ning ara, elce sik Yerusalem mutuku ulamik nang ap, Benyamin mutuku ulamik nang ap nirya ati nyabuk. “Ura, ayupu kekebuka dinmalum nang anggun nirya ara, Allah yupu buku noutam sekuk ning nirya eipmunce, diba tenepmunyopura, ‘Nunda dipkoprob Allah dam unamabe,’ nyapnamlume. Winipmunya deice arye, Yerusalem mutuku ululum nang nirya ara, ‘Allah arye nyapdeibuk ning ara, dipkoprob nyapdeipsuke,’ tenemunce, Allah el nyabuka atonun unamlume,” nyabuk. Nyabukopura, sik abulubuka wekmek nang nirya arye, sik apu yapu nang arye si erelamik Allah ati, “Yo, nun babye dipkoprob aning ara, wininamabe,” nyabuka, nyalin yupu deice arye, nyapdeibik.

³³ Aning nirya akunum sirya nyabikopura, Raja Yosia birye, amutuku nang arye, talye nong kum ning bukni, sikce, ‘Nun ni melipsilyame,’ nyabuka, si erelamik ning, Israel nang arye talilamik mutuku nirya uamuk ning nirya ara, ulubuka batakikce, kum kipdeibuk. Winibikce, amutuku nang nirya ati, “Nun ni koproba Allah, el si Yahweh, el tibuk si erenamlume,” nyabuk. Nyabukura, ‘Diba, wininamabe,’ tenebikce, Yosia tuba kam ulamuk talak noutam nirya ara, amutuku nang nirya arye, sik apu yapu nang arye si erelamik Allah, el si Yahweh, el tibuk diba tenebuka, diksukumuk ulamik.