2 Tawarikh 33 - Eipomek

Manasye bira, Yehuda mutuku ninye deiyoknye, Raja kibuk yupu

¹ Manasye el umur ara dua belas (12) tahun kibuk talak arye, Yehuda mutuku ninye deiyoknye Raja kibuk. Winibukce, Yerusalem mutuku talebuka ulamuk keting tamun nirya ara, lima puluh lima (55) keting tamun deice arye, talebuka ulamuk.

² Raja Manasye el winilamuk ning ap, pil dolamuk ning ap nirya ara, Allah Yahweh el dam malye weik ulamukba, Allah arye, ‘Aning ara, na like,’ tenelamuk. Ara, Israel nang Mesir mutuku arye batakuka, Kanaan mutuku weknuyik ati, Kanaan mutuku ulamik nang ati, Allah Yahweh arye, ‘Yuk mutuku binamak,’ tenebuka ati, yakuka dopkwetebukba biyik bukni, sik amutuku nang arye, malye ulamik ninguk, binuka dukdongobuka, aninguk talebuka ulamuk.

³ Ara, talye ning bukni, isa si erena ati delilamikak nirya ara, Raja Hizkia birye ulubuka uku dongamuka ani, el mi Manasye bira aning tamubuka lipsisikuka dobuk. Atalak ara, Bahal nyanyak ning, isa si erena ati, kam ning obuka uku dongonak, el si mesba weik dobuk. Tonda, isa si Asyera nyabuka, ‘Aisa si erenamabʼ tenen, cang yo iklamik ning ton, tamubuka ikuka deibuk. Tonda, ninye urasin atouk ning, memebuka ton dobuka deibukura, ‘Nun ni koproba aniʼ tenen, si erelamik. Tonda, im deice ulamle ning, urasin atouk ning ati, weik arye dobuka deibukura, aning ton si erelamik.

⁴ Allah Yahweh arye, “Yerusalem mutuku weik asik noutam ara, na siuk pia erenamniaka ati, anyaik noutam ara, na si akunum deipsa ati, na si eren aik tuba aupnamle,” nyabuk. Winibuka nyapdeiamuk bukni, Manasye birye, amutuku taleamuk talak ara, Allah el si eren aik noutam ara, talye isa si erena ati, kam ning obuka, aning el si mesba ton dobuk.

⁵ Aning atouk ton, Allah si eren aik, bai tam bukni anyaik dam ara, lo weik uamukak ap, lo mitik tonun uamukak ap, ninye weik bulubuka weklamik sukum bitinye ara, Manasye birye, ‘Im deice tam ulul ning ap, kurya ap, wala ap, keting ap, si erenamaba ati, kam ning obuka uku dongonamap,’ tenena ati, mesba ton dobuk.

⁶ Aninguk kum bukni, sik dana-dana tam, Allah pia kum bikamik nang arye winilamik touk, Manasye babye, el mapu babye, isa si erena ati, kintinilamikak Ben-Hinom mutuku bukni, weik lu uamukak bobalamukce, el mapu obuka, aisa ati arebukce, uku dongobukba, uku arye amapu dibuk. Manasye el babye, sik asing keten nang pil dolamik atouk ulamuk. Tonda, “Aning winiplulume,” nyalamik nang ati, isa mikip deice arye, ninye kum kupmanto ning winilamik ning ati, ‘Sikce yata nyapnamak do?’ tenen, anang dam binuka asilelamuk. Tonda, “Aning ara, na ton peterebuka lake nyapnululume,” nyabuka morolamuk. Tonda, akunum diamik nang, sik kanye ap, yupu nyana kel kiamik nang arye, pil dolamik ning ara, elce ton, ‘Aning ton patapnile,’ tenebukce, anang ap neika ulamik. Tonda, aminyan winipnamne ning ati, akunum diamik nang ap yupu talamik kam tuba ulamne nang ati, laka nyalamik nang arye, yupu nyalamik ning ara, elce ton ayupu kekelamukce, anang ap neika ulamik. Aning-aning nirya winilamuka deice arye, Allah dam weik malye winilamukak, Allah Yahweh arye elti, ‘Aning ara, na like,’ tenelamukce, anye biti yu weik ulamuk.

⁷ Tonda, Manasye birye nyabukba, el pil don nang arye, ninye urasin atonun kipdeipnarye, si erelamik ning ara, el si patung, memebuka kintibikce arebikba, Manasye birye aning dobuka, Allah el si eren aik noutam deibukba, elce aning si erelamuk. Minop talak arye, Allah arye, Raja Daud ap, el mi Salomo ati, nyapdeiamuk. “Yerusalem weik aik dolamik ning noutam ara, akunum wipdeipse. Israel yala 12 nang arye unyak mutuku weik ton aupmal bukni, amutuku kan-kan noutam arye, akunum wipdeipse. Amutuku Yerusalem wipdeipse deiyok ara, ‘Israel nang, sikce amutuku noutam arye, na siuk pia erenamniakʼ tenen, wipdeipse. ‘Aning ara apia aupnamlarya,’ tenyamse.

⁸ Ati, narye, ‘Aning ara wininamlume, aning ara, pia kum wininamlume,’ nyapdeipse yupu ap, narye sikti, Teleb una ara, winibuka teleb unamlume,’ nyamse yupu ap, tonda ‘Asum atanggal deice arye, akwalya kwalinamlume. Anggun malye un ning kum kina ati, winibuka-winibuka pil donamlume,’ nyamsise yupu ap, Israel nang sikce, na nyapdeipse yupu nirya ati, diba tenebikceura, moubuka talibikirye, dukdongobuka, yupu uk talebuka diksukumuk uceura, anggun deipkirikdop nang ati, ‘Amutuku nirya arepnamsine,’ nyamse mutuku noutam arye, asum amutuku noutam unyak nang ati, ‘Amutuku batakuka, yuk mutuku bilulume,’ pia kum nyapnamsin bukni, amutuku noutamuk pia aunamake.” Aning nirya ara, Allah arye, sik Israel nang ati nyabuk.

⁹ Allah arye nyamuk bukni, Manasye pil dolamuk ning deice arye, Yehuda tam mutuku nang nirya babye, ‘Kume, nun deiyoknye winilul touk, nun ton winipnuyapʼ tenen, winilamik. Ati, Manasye birye, Allah dam malye weik ulamukak, ‘Aning ara, na like,’ tenelamuk. Bukni, Israel mutuku nang, Kanaan mutuku wekikura, Kanaan mutuku ninye ara, Allah arye, “Yuk mutuku binulume,” nyapdeiamuk nang nirya ara, walwal arye mitik malye ning ulamik bukni, asum arye, amutuku ulamik nang arye, dipkoprob pia malye weik winilamik.

Manasye malye winilamuk ning ati, sekik yupu

¹⁰ Malye weik ulamik ati, Allah arye Manasye ap, el mapu ati, wenen ning arebuk bukni, sikce, ‘Nun likeʼ tenen, el nyabuk yupu kekebuka, batakik. Ati ara, ayupu kum talelamik.

¹¹ Aning ati ara, Allah Yahweh arye, lo arebukba, sik Asyur mutuku yin talin nang, sik deiyok nang ati, yupu deibukba, Yehuda mutuku nang ati warikilyayik. Winibikce, Raja Manasye babye, tomobuka, tapu koubikce, el u pum tam ara, kikin potokuka, mitik ikin ning ara, cincin memebikce, aning bobuka, el u kin-kin bisik dongobuka deibikce, el nong bobuka, kat ning el si tembaka arye, tapu kitibikce, el taruk cang dana-dana tam koupdongobikce, Babel mutuku bobinuka, wenen aik pum tam dongobik.

¹² Winibikopura, ikin ning deice uk, imun kanye bobuka ulamukce, ‘Se, aning ara, na babye malye winilamse deice arye, ikin ning dopropmane,’ tenebukce, el kanye lamapdongobuka, amu tam kibukce, el deipkirikdop nang arye, si erelamik Allah dam yayukce, Allah Yahweh ati nyabuka morobuk. “Se, na ni Allah, anti moropkine. Nati, melipnilyame!” nyabuka morobuk.

¹³ Manasye birye, Allah ati morobukba, Allah Yahweh arye, el morobuk yupu kekebukce, elti, bico tenelamuk ati, Manasye birye morobuk touk, ubuka melibuk. Ara, tamubuka Yerusalem mutuku uk bobiyukce, ninye deiyoknye Raja kibuka ulamuk. Aning winibuk deice arye, Manasye birye Allah Yahweh ati, ‘Se, dipkoprop, Yahweh ara, weiknye ulule. Allah ara, eluk ulule,’ tenebuk.

¹⁴ Ura, aning nirya akunum winibukura, Manasye birye, minop talak Raja Daud birye dolamuk mutuku ara, keting panalyangan tam, bai keil poka ara, ton tabakuka lipsisikuka cang arye dobuka dopdongobuk. Atalak ara, tonok mutuku lu ara, Gihon mek pu dam arye, deiyok kipdeibukce, keting kumulban tam biyuk. Winiyamuka ani, otam deipnin balamika ani, ‘Ikan Aik Bublanʼ wekelbana ati bisik, anyapce ubuka, Ofel mutuku dam binuka deibuk. Amutuku weik asik dolamik ning, Yerusalem mutuku dana-dana tam nirya, ongopdongobuka deiamikce, domik poka ara, mitik cang awamuk bukni, elce aning lipsisikuka dobuk talak ara, cang weik kibuka dobukce, teleb kibuk. Tonda, Yehuda mutuku noutam nirya ara, ‘Yu nang arye yanuka opsicakʼ tenen, weik asik dolamik ning nirya ara, cang poka dobuka antanap dongobuka deibik. Amutuku nirya ara, mikip kilina ati, apil dolamuk. Anyaik-anyaik nirya memepdeibukce, asukum kalikna ati, yin deiyok nang ton, yuk-yuk wipdeibuk.

¹⁵ Winibukopura, yuk mutuku nang arye, ninye urasin atonun memebuka deipnarye, ‘Nun ni koproba aniʼ tenen, si erelamik ning ap, tonda yuk-yuk ning si erelamikce, Allah si eren aik noutam delilamik ning nirya ara, dobuka donokuk. Tonda, isa si erena ati, kam ning opnarye, uku dongonak, el si mesba domik ning nirya babye, tonda, Allah el aik dam kon deice domuk ning nirya ara, ulubuka batakuk. Aning-aning nirya ara bobuka, anyasik ulamik noutam arye, pera mutuku bai tam bobuka donokolbiyuk.

¹⁶ Aning nirya akunum winibuk ning ara, Allah Yahweh el si erena ati, kam ning opnarye, uku dongon ning, el si mesba, lipsisikuka dobukce, tamubuka teleb kibuka, memepdeibuk ning ara, ‘Asukum ara, Allah Yahweh ap, nun ap, teleb kibuka elanamabʼ tenen, kam ning obuka, Allah arena ati, aning bobuka, uku dongobuk. Tonda, ‘Na ni Allah, ance melipmanilama ati, telebe nyapnunʼ tenen, kanye deibuka, yuk kam ning ton obuka, amesba deice uku dongobuk. Winibukce, Yehuda tam mutuku ulamik nang nirya ati nyabuk. “Anggun nirya ara, nun Israel nang arye si erenyap Allah, el si Yahweh ara, nun deiyoknye ulula ati, el siuk pia erenamlume,” nyapdeibuk.

¹⁷ Raja Manasye birye nyabuk ati, Allah el si eren aik damuk, kam ning obuka, uku dongopting bukni, sikce mandipna kanye tuba bolamik ati, amutuku ninye ara, sikce yuk tam mutuku kon deice kintinibuka, yuk mesba deiamikak ton, kam ning obuka, Allah si erelbalamik. Aning ara, kum winipting bukni, sikce aning arelbalamik ning nirya ara, sik si erelamik Allah, el si Yahweh tonok, tenelamikce winilamik.

Raja Manasye pil dolamuk ning, sirya dakuk talak ati, sekik yupu

¹⁸ Manasye el pil dolamuk ning yuk-yuk nang nirya ara, Israel ninye talilamik Raja-Raja nang arye, sik pil dolamik ning ati, sekelilamik buku, el si ‘Buku Sejarah Raja-Raja Israelʼ nyalamik buku noutamuk sekuka deiamik. Ara, Manasye el li koproba, Allah ati morolamuk ning ap, tonda Allah arye nabi-nabi nang dam nyapneura, sikce kekebuka, Manasye dam, Allah el si deice arye laka nyalamik ning ap, aning nirya ara, abuku noutamuk sekdeiamik.

¹⁹ Aning atonun, kanye imun weik uk dilamuk talak, ‘Allah arye melibuka kwetepnamnilʼ tenen, morobuk ning ap, tonda Allah kekebukce, bico tenebuka, dipkoprob el nong kwetebuk ning ap, abuku sejarah noutam akunum sekuka deiamik. Aninguk kum bukni, tonda Raja Manasye birye, Allah si yanilamukce, malye weik winilamuk ning ap, tonda Allah ati, diba tenena kumce, el yupu moubuka kum taleamukce, malye winilamuk ning ap, tonda isa si erena ati, yuk mesba kintinip deiamuk ning ap, isa ati, kam ning obuka, arelamuk ning ap, isa si Asyer si erena ati, weik cang yo ikuka, asukum arye morolamuk ning ap, talye ning bukni, ‘Nun ni ara, aniʼ tenen, ninye urasin atonun kibuka memebuka, patung-patung deiamukce, talye ning bukni si erelamuk ning ap, aning nirya malye ning yala-yala nirya kintinilamuk ning nirya ara, minop talak winilamuk ning sekna buku, el si ‘Buku Sejarah Aminyan Talak Upnamle Ning ati Dina Nangʼ noutam sekuka deiamik. Amalye ning nirya ara, el malye winilamuk talak noutam, el kanye amu tam kum ulamukce, ila tamubuka teleb kibuka, diksukumuk kum ulamuk talak, malye winilamuk ning ati nyababe. Aning nirya babye, Allah arye nyapneura, el yupu laka nyan nang, sik nabi-nabi nang arye nyalamik ning, ‘Minop talak winilamik nang arye, winilamik ning aniʼ tenen, sejarah buku noutam arye sekuka deiamik.

²⁰ Ura, aminyan talak ara, Raja Manasye dibukba, el li yapu dipneura, weilamik touk bukni, el nong bobuka, ninye deiyok nang ulamik pia teleb aik, istana Raja aik pum tamuk binuka weibik. Winibikce, el pununa ati ara, elce deiamuknye, el si Amon, elce punubuka, ninye deiyoknye Raja kibuk.

Amon birye, Yehuda tam mutuku nirya ati, talebuka ninye deiyoknye, Raja kibuk yupu

²¹ Amon el umur keting tamun dua puluh dua (22) tahun akunum kibuk talak ara, Yehuda mutuku ninye, sik deiyoknye Raja kibuk. Winibukce, Yerusalem weik asik noutam ulamukce, Yudea tam mutuku nirya talebuka ulamuk keting tamun ara, dua tahun deice taleamukce, ulamuk.

²² Amon el babye, el li koproba Manasye birye, Allah dam malye weik ulamuk atouk, el babye winilamuk. Tonda, el li koproba Manasye birye, isa si erena ning, ninye urasin atouk memebuka deiamik ning, el si patung-patung kintinibuka, memepdeiamuk ning dam, isa siuk erelamuk touk, Amon babye atouk, aisa siuk erelamuk.

²³ Bukni, el li koproba Raja Manasye bira, malye weik ulamuk bukni, ton talak ara, namin kanye bobuka, amu tam kibukce, ila tamubuka, Allah Yahweh dam yayukce, diksukumuk ulamuk. Manasye bira, aning winyamuk bukni, Amon bira, aning kum winibuk. El kanye amu tam kum kibukce, elda pia malye weik tuba ulamuk. Amon bira, el malye ning weik arye, ton tabakuka winilamuk.

²⁴ Aning nirya winibuka ulamuka ati, el amu tam pil don deiyok nang nirya eibikce, yupu talebuka, el yupu kekena kumce batakuka, Manasye el ninye deiyok nang pia teleb aik ulamik sukum pum tam, aryuk oplobikba dibuk.

²⁵ Adeiyok nang arye, Raja Amon obik bukni, Yehuda tam mutuku ulamik nang nirya arye, tamubukabikce, sik nirya yupu talipmeka ani, ninye deiyoknye Raja Amon opmek nang nirya ara, obuka sirya dakik. Winibikopura, Amon el pununa ati, elce deiamuknye, el mi Yosia binyak bobuka, ninye deiyoknye Raja kipdeiamikba, elcuk Yudea tam taleamuk.