2 Tawarikh 32 - Eipomek

Asyur mutuku nang arye, Yerusalem mutuku nang ati, ‘Optibyeʼ tenen, piriplobik ati, sekik yupu

¹ Raja Hizkia birye, Allah ati talima lamapdongobuka ulamukce, batakna kumce, pil pia teleb ubuka akunum dolamuk. Winilamuk bukni, atalak ara, Asyur mutuku taleamuknye, Raja Sanherib birye, ‘Yehuda tam mutuku nang opnun,’ tenebukce biyuk. Biyukce, ‘Anyasik-anyasik ap, anang ap, obuka sirya daknamneʼ tenen, cang keil poka domik asik, yin nang yupa weik ulamik asik dam binuka warikuk. Winibukce, el yin nang nirya ati, yupu deibukce, “Amutuku nang obuka, kum kipdeibipyeura, sik weik asik nirya ara, naryuk alubuka dopropnamne,” nyabuk.

² Sanherib birye, ‘Yerusalem mutuku nang obuka sirya daknirye, amutuku ara, narye alubuka dopropnamne,’ tenebuk ning ara, Raja Hizkia birye, akunum eibuka bikuk.

^3-4 Aning nirya akunum eibuk anya arye, Raja Hizkia ap, el amu tam pil dona deiyok nang ap, tonda el kalikna ati, yin talin nang, sik yupa yuk-yuk ati, deiyok kiamik nang ap, sik nirya bulubuka, yupu talipmekce nyabik. “Kume, amutuku asik donyaba, bai tam mek nirya ara, tirikdongopnamabe. Ara, Asyur mutuku deiyok nang, Yerusalem mutuku olana ati, yace talak ara, sikce amutuku yanuka, mek ton kum kwebuka dinamake,” tenebikce nyabik. Nyabikce, sik amutuku ulamik nang weik tonun bulubikce, amutuku mek pu dolonak ap, mek kwen ap nirya ara, tirikdongobik.

⁵ Raja Hizkia birye, el taleamuk mutuku ati, ‘Mikip kipdeipnun,’ tenebukce, cang weik keil poka domik sukumuk, tonap moubuka dobuk. Tonda, akeil poka deice tam ara, ‘Olyanamsiyak nang eipnamapʼ tenen, ninye kalikna aik ati ton weik cang poka dobika alip tam ara, cang aik ton dobuka kintinibuk. Tonda, cang weik keil poka awamuk bukni, aning mitik tonun bai tam ton, keil poka bitinye ning ton dopdongobuk. Aning winibuk buk, Yerusalem mutuku bukni, minop talak Raja Daud aik ati domikce, poka domik ning ara, keting panalyangan tam, tuku palibuka deibikce, ninye kalikna ati, tuba tonap ton tamubuka mikip kibuka dobuk. Tonda, Raja elcuk el mapu tonok, “Winipnamlume,” nyabukba, ninye lukuka on yo tace lelina ning, el si perisai ap, yuk ninye on ning yala-yala nirya ap, dobuka kintinibik.

⁶ Winibukopura, amutuku ulamik nang nirya ati, ‘Sik yupa yuk-yuk deiyok kibuka talipnamakʼ tenen, yin deiyok nang ton wipdeibuk. Winibukopura, Raja arye sik nirya ati, amutuku asik dolamik wekelyangan bisik, weik bublan tam ara, “Anyaik noutam weik lo uamukakuk, bulubuka yamunyakarye, na dam wekelyamunce, na yupu kekepnamlume,” nyabukba, sik nirya bulubuka yana wekik. Wekikopura, Raja Hizkia birye sikti, nyabuk.

⁷ “Anggunda tunim abuka umunce, mikip kipdanamlume. ‘Seʼ tenen, ilil una pia kum aryuk, mikip asa umunce, kalikinamlume. Diba, Asyur mutuku talibuknye Raja ap, el yin talin nang ap, amutuku dam yanganamaka ara, yupa pia weike. Bukni, anang nirya ati ara, ilil una kume. Nun melisululnye el mikip ara, mikip weik ulul bukni, elti, melilul mikip ara, mitik mikip uk ulula anya arye, sikti, ilil una kume,” nyabuk.

⁸ Nyabukopura, ayupu ton nyabuk. “Aning ara, talye ati kum nyapsine. Raja Sanherib elda ninye mikip deice aryuk, yanganmal bukni, nunda nun ni Allah Yahweh, el mikip weik deice unamabe. Aning ati ara, Allah Yahweh arye nunti, kalekuka melipsilirye, el mikip deice aryuk melibuka, sik Asyur mutuku yin nang nirya, obuka sirya daknamale,” nyabuk. Yehuda tam mutuku nirya taleamuknye Raja Hizkia birye, ayupu nyabukba, el taleamuk nang nirya kekebikce, sik nirya ara, ‘E, dip nyapmasileʼ tenebikce, ilil una kumce, malye tenebik.

⁹ Ura, sik nirya daunmeka ani, ouku weikto mabik talak ara, Raja Sanherib el deiyok kina ara, ‘Amutuku nang opnamapʼ tenen, Lakis mutuku uk unmekce, warikmek. Atalak arye, Raja Sanherib, el yin nang kan-kan arye, yin nang ati, sik deiyok nang ton wibuka dopdeibukba, sikce Yerusalem mutuku ulamik nang dam yupu nyalyayik. Ara, Raja Sanherib birye, “Sikda, Yehuda tam talibuknye, Raja Hizkia ap, Yehuda tam mutuku noutam unyak nang nirya ati, ayupu nyalbinululume,” nyapdeibukba, laka nyalbiyik. Sikce nyabik yupu ara ani.

¹⁰ “Nara Raja Sanherib, Asyur mutuku talipsinye birye, anggun Yerusalem mutuku ululum nang nirya ati, asipdenusine. Yata deiyok ati, anggunda ilil kum upsukba, mandipna kanye weik bolulum do? Anggun Yerusalem mutuku dana-dana tam nirya ara, antanap dongobuka, wekuka kintinipmapce, anggun ona ati warikdongopmap bukni, yata deiyok ati, anggunda asukumuk mandipna kanye bopmalum do?” nyabuka asipdeyuk.

¹¹ Nyabukce, ayupu ton dukgobuka nyabuk. “Anggun deiyoknye Raja Hizkia birye anggunti, ‘Kume anggun ilil una kume. Sik Asyur mutuku arye olyanganmasiyak talak ara, nun si erenyap Allah, el si Yahweh arye, kalekuka melinamsile. Allah aryuk lyepnamsila anya arye, Asyur mutuku nang arye kum opnamsiyake,’ nyapsukba, talye kanye bobuka ululum do? Anggunce el anyapsuk yupu ara, pia diba kum tenenamlume. Elce anggunti, tilila yupu nyapsuke. Allah elce, anggunti bataksiliba, anggun kwaning ap, mek ap, kum dinamlume. Adeice arye dipnamaluma ati nyapmasine,” nyabuk.

¹² Nyabukce, ayupu ton dukgobuka nyabuk. “Tonda, Raja Hizkia birye, anggun si erelulum Allah, el si eren aik, yuk-yuk dolamlum ning nirya ara, ulubuka batakukce, elce, ‘Kume kam ning obuka, Allah si erena ati, aning dobuka, uku dongonak ati domikak nirya ara, uluplobuk. Winipsukopura, elce anggun Yehuda yala nang ap, Yerusalem mutuku ululum nang ap nirya ati, ‘Allah si erena ap, Allah si erebuka kina ap ati, kam ning obuka boyamunce, uku dongolyanganamlumak ara, tonokak,’ nyabuk. Amesba ara, tonok sukumuk kintinibuka deipsuknye birye nyapsuke,” Raja Sanherib birye nyabuk.

¹³ Aning ton nyabuk. “Narye winilamse ning ara, anggunda kum biklumce do? Tonda, na uk kum bukni, na apu yapu nang babye, nunce yuk mutuku ulamik nang dam binuka, obuka sirya dakupu nang ara, kum kekelamlum arye do? Sik yuk mutuku nang nirya arye, talebuka si erelamik ning babye, nun Asyur mutuku nang arye, anang obuburye, ikin ning weik, sik nong deice delilamupu ning ara, kum lyepdanmanto ulamik. Sik ton oplobupak arye, sik ulamik mutuku ton, alubuka doprobupu ning ara, sik aninye arye, si erelamik ning arye, sik mikip kum ati, sikce nunti, yupu kum sekamsik.

¹⁴ Anggun ton tenipdelulume! Dan tam ninye ton, sik si erelamik ning arye, nun Asyur mutuku nang ati yupu seksikce, obisipsikba, amutuku ton kum malye kibupak arye, alubuka kum doprobupu do? Kume, na apu yapu nang arye, dana-dana tam mutuku unyak ninye nirya ara, talye lukparabuka oplobikce, sik mutuku nirya alubuka doprobik. Amutuku ninye si erelamik ning arye, sikti, kum lyeprobikba, narye amutuku nang nirya obisipsirye, ikin ning weik, sik deice delilamse. Sikce si erelamik ning arye, kum lyepropmanto ubika ati, aning ati ara, yata deiyok ati, anggun Israel nang arye, ‘Nun si erenyapnye Allah arye, Asyur mutuku nang obuka lyepropsetue,’ tenelulum do! Aning ara, kum winipmanto tenepne.

¹⁵ Ati, anggun deiyoknye Raja Hizkia ati batakmunyeba, elce tilila yupu anggun dam pia nyanmasil ning ara, diba kum tenenamlume. Elce anggunti, walwal nang atonun kilisulula ati, elce, ‘Winipnamabe,’ nyanmasil yupu ara, kekena meme! Hizkia birye, anggun dam nyasilye yupu ara, diba kum tenenamlume. Anggun ton moubuka biknamlume. Dan mutuku unyak nang, sik si erelamik ning arye, nun Asyur mutuku nang ati, mikip kibuka ton obuka sirya daksik do? Tonda, dan tam nang arye, sik tam nang lyena ati, yanuka na apu yapu nang ap, na ap ati, obuka sirya daksik do? Kume, yuk-yuk mutuku nirya alubuka doprobuburye, sik yuk mutuku ulamik nang nirya, obuka sirya dakupu. Winibuburye, sik ulamik mutuku ap, sik talilamik ning nirya ap ara, alubuka doprobupu. Ati yuk-yuk mutuku nang nirya ara, kum lyepdanmanto ulamika ati, narye dipkoprob nyapsine. Anggun Israel nang babye, anggun ap, anggunce si erelulumnye ap arye, anggun tam nang ati, kum yanuka lyeptume.” Raja Sanherib birye, Sik israel nang ati nyabuk.

¹⁶ Asyur mutuku taleamuknye, Raja Sanherib birye nyapdeipmuk yupu ati, yanuka nyabik nang ara, sikce ton tabakuka, talye-talye yupu weik tonun ton, yanuka nyabik. Ara, Allah Yahweh ap, Raja Hizkia ati, malye yupu weik nyabikce, sik si yanibik. Yanibikce, yanuka nyabik yupu ara, Allah Yahweh ap, elce doprobuknye, el amu tam ulamukce, Israel nang taleamuknye, Raja kiamuknye Hizkia biti, yanibikce, malye yupu weik ton tabakuka nyanmekce, akutubuka nalinmek.

¹⁷ Aninguk kum bukni, Asyur mutuku taleamuknye, Raja Sanherib birye surat ton sekeipmokce dopkwetebuk. Asurat pum tam ara, nyapmok. “Kume, anggun Israel nang arye, si erelulum Allah, el si Yahweh ara, talye atibuk si erelulume,” nyabuka, malye yupu weik tonun arye, Allah Yahweh ati, el si yanibukce, nalinmok. Asurat pum tam ara, ayupu ton nyabuka sekmok. “Sik yuk-yuk mutuku ulamik nang arye, ‘Nun deiyoknye bira ani,’ nyabuka, si erelamik isa arye, amutuku nirya ulamik nang ati, kum lyepdanmanto ulamikba, narye sik obisisakarye, sik mutuku alubuka dopromse touk, anggun Israel nang, amutuku ululum nang nirya babye, dipkoprob narye anggun dam yanirye, obuka alapdopnamne. Raja Hizkia birye, ‘Na ni koprop ani,’ nyabuka, si eremlul Allah arye, elti, ap, anggun Israel nang ap ati, kum lyeproptue! Elce nati, kum yanuka opnutue,” Raja Sanherib birye nyabuka, surat sekmok.

¹⁸ Tonda, Asyur mutuku taleamuk Raja ap, elce dopropdeipmok nang arye, sik nirya yayikce, ‘Sik amutuku unyak ninye ara, kekebikirye ilil uptueʼ tenen, Ibrani yupu deice arye, weik arye erebuka nyanmek. Ara, Yerusalem mutuku dana-dana tam nirya, weik cang keil poka dopronamik deice tam, tikuka kalikmik nang ati, Ibrani yupu deice arye malye yupu nyanmek. Ara, ‘Apoka deice kalikmace nang ara, teleb kanye bonyak ning ara, batakicak arye, ilil weik uptuba, sikce malye kanye boptingʼ tenen, yanuka malye yupu nyanmek. Nyabibya deice arye, ‘Nunce amutuku ara, kanam aryuk yanuka, obuka sirya daktibirye, sik mutuku nirya alubuka dopropnamapʼ tenen, yanmek.

¹⁹ Ara, sik Asyur mutuku nang arye, Yerusalem mutuku ulamik ninye, sik si erelamik Allah ati ara, malye yupu weik nyanmek. Ara, yuk-yuk mutuku nang, sik taruk arye, ninye urasin atonun kibuka, patung memebikirye, si erenyak ning ati, “Aning ara mikip kume, talye ning uka,” nyabuka, aning si yanibuka, malye yupu weik nyalamik atonun, Israel nang arye si erelamik Allah ati, amalye yupu nyanmekce nalinmek.

²⁰ Nyabuka nyanmek ati ara, Raja Hizkia ap, Amos el mi nabi Yesaya ap, sikce amalye yupu akunum kekepdikopura, ‘Seʼ tenen, malye kanye bopdikce, ‘Se, nun ni Allah arye, nun melipsuturye, lyepropsutueʼ tenen, Allah moropdik.

²¹ Winipdika ati, sikce moropdik ning ara, Allah Yahweh akunum kekebukce, Asyur mutuku taleamuknye, Raja Sanherib, el yin talin nang ap, ayin nang sik yupa yuk-yuk ap ati, deiyok kiamik nang ap ona ati, Allah arye el im deice pil donanye malaikat tonok dopdeibukba, amalaikat yayukce, sik Asyur mutuku yin talin nang nirya ap, sik deiyok kiamik nang ap, sik yupu nyana deiyok nang ap nirya ati, yanuka oplobukce, sirya dakuk. Winibukura, Asyur mutuku Raja kiamuknye bira, ilil weik ubukce, alye weik ubukba, tamubuka el mutuku biyuk. El mutuku tamubuka biyuk talak ara, tonok sum ton, Raja Sanherib bira, el si erelamuk ning, aik bobuka deiamuk ning damuk, binuka bukukce, aning ati si erenmokbuk, el mining deiamuk mapu arye yanuka, anyaik pum tam wekuka yayikce, ninye on ati cang parang ya arye, binuka lukuka obikba, Raja Sanherib dibuk.

²² Aning nirya ara, winibuk deice arye, Allah Yahweh arye Raja Hizkia ap, Yerusalem mutuku weik asik ulamik ninye ap, sikti, yanuka lyeprobuk. Ara, ‘Asyur mutuku taleamuknye Raja Sanherib ap, elce dopdeibuk nang, sik taruk noutam arye, ‘Naʼ tenen, nang lyepdeipnuneʼ tenen, aning winibuk. Tonda, ‘Sik olan ninye dam arye, aninguk winipnirye lyepdeipnunʼ tenen, winibuk. Tonda, ‘Wininyopura, sik aninye ara, dakeiam asa namin arye, diksukum telebuk unamake. Yuk mutuku nang arye, sik anang ati, kum olyanganamakʼ tenen, melibuka kaliklamukba, teleb asa ulamik.

²³ Winibuk talak ara, dana-dana tam ulamik nang yupa weik, Yerusalem mutuku yangalamikce, Allah Yahweh el si erena ati, teleb aren ning arelyangana ap, tonda Yehuda tam taleamuknye Raja Hizkia biti, dekna don ning, dekna weik ning, boyangana ap winilamik. Winilamikce, atalak arye dipdongobuka, otalak nirya ara, sik dana-dana tam nang nirya arye, Raja Hizkia biti, ‘Elda telebe,’ tenelamikce, si erelamik.

Raja Hizkia, el uk talina deiyok koubuk ning ap, tonda elce, ‘Nara bona weik talinanye ununeʼ tenen, kanye erepdayuk ning ap ati, sekik yupu

²⁴ Atalak Raja Hizkia bira, nakina pia weik deiyok koubukce, uk weik taleamukba, dipmanto ubukce, Raja Hizkia elce, ‘Allah arye kwetepnutueʼ tenen, Allah ati morobuk. Morobukura, Allah arye, ‘Anye kwetepnunʼ tenen, el uk taleamuk ning kwetelina ati, ‘Biknule,’ tenebukce, pitin kipdeibuk ning ton arebuk.

²⁵ Bukni, atalak noutam ara, Hizkia el kanye erena deice arye, Allah ati, “Se, ance bico tenepniminye deice arye, an kanye aryuk, kam bukeipmanilama ati, telebe,” nyabuka, kum nyabuk. Ati ara, Allah arye el Hizkia ap, tonda Yehuda tam mutuku noutam ulamik nang ap, Yerusalem weik asik noutam ulamik nang ati, yu ubukba wabukce, sik nong deice ikin ning deibuk.

²⁶ Allah arye wabukce, ikin ning areamuk deice arye, Hizkia ap, Yerusalem mutuku ulamik nang ap, sik nirya arye, aning ara moubuka bikikce, ‘Se, nunda dipkoprob malye ulampu ati, aning ara, ton kum wininamabe,’ tenebikce, kanye eren ning batakik. Winibikopura, sik kanye lamapdongobuka, namin arye diksukum telebuk ulamik. Winibika ati, Raja Hizkia birye, tuba taleamuk talak nirya ara, Allah arye wenena ati ikin ning ara, ton ap sik dam kum areamukba, sik dam ton kum yangalamuk.

Raja Hizkia mikip weik arye taleamukce, el bona babye, weik kipnin balamuk ati, sekik yupu

²⁷ Raja Hizkia elda, bona talinanye ulamuk ati, yuk nang nirya arye elti, kanye deibuka si erelamik. Atalak ara, Raja el bona delina aik dobukce, abona nirya ara, yuk-yuk delina ati memepdeibuk. Aning ara ani. Ara, dekna weik kat ning emas ap, perak ap, urasin teleb keil ap, tonda nintong teleb nyan ning ap, ‘Din ning to nyapnamleʼ tenen, tabakuka deililamik ning ap, tonda yin nang, sik nong lelina ning, el si perisai ap, tonda yuk yala mambul ning nirya ap, delina ati, aik yuk-yuk ton dobuka kintinibukce, anyaik noutamuk, aning nirya ara dobuka, asukumuk delilamuk.

²⁸ Tonda, Raja Hizkia birye aik yuk ning ton dobukabukce, sik amutuku ulamik nang arye koulamik ning, nong libuka delina aik kintinibuk. Akoun ning ara ani. Ara, gandum duk ap, anggur duk teikuka, mek kipnabuk dipnaba, kanye wangalamak anggur mek ap, minyak zaitun ap nirya ara, ‘Dokola deipnunʼ tenen, aning bobuka, anyaik yuk-yuk domuk touk delilamuk. Tonda, sapi basam ap, kambing basam ap, ayam maka ap, weik weilamuk ati, sik aik pum tam una ati, anyaik ton weik arye dobuka kintinibuk.

²⁹ Allah arye, Raja Hizkia ati, areamuk kam ning ara, sapi basam ap, domba ap, kambing ap, maka yala-yala nirya ap, pia weik ubuka deice arye, amutuku kum bukni, yuk mutuku asik dolamikak babye, aning atouk kibuka, aik dolamukce, kintinibuk.

³⁰ Ura yuk talak, Raja Hizkia birye Gihon mek puak arye, moubuka memebukce, mek bana ati, kintinilamak ning memebukba durubuka, amek eitam arye bobikyukba, minop talak Raja Daud ulamuk mutuku, Yerusalem mutuku weik asik noutam binuka dongobuk. Ara, Yerusalem mutuku bukni, keting komulban tam deibuk. Hizkia birye pil dolamuk ning nirya ara, telebuk kibuka dobukba, aning nirya telebuk ulamuk.

³¹ Bukni, Babel mutuku taleamuk deiyoknye birye, el amu tam nang wibuka dopdeibukba, Hizkia el uk dilamukba, dipmanto ulamuk ning ati, ‘Allah arye kam bukdeiamuk ning ara, bikilin ning arebuk ning ati, asipnamapʼ tenen, yayik. Anang arye, asina ati yayik talak ara, Allah arye Hizkia ati, ‘Elce nati dipkoprob diba tenenulul do? Dipkoprop yupu nyapnamle do, kum do? Elce, ‘Na mikip aryuk teleb unune,’ nyapnamle do? ‘Allah kwetepnuka deice arye, teleb unune,’ nyapnamle do? ‘El talima pum tam ara, yatato tenelulce nyapnamle do?’ tenena ati ara, Allah arye tia ati, Raja Hizkia ati kum wenebukce, ‘Dauplye,’ tenebuk.

Raja Hizkia birye taleamuk talak, akunum sirya dakuk ati, sekik yupu

³² Raja Hizkia birye Israel nang taleamukce, ton tam pil dolamuk ning ap, elce Allah ati, ‘Na ni tonok pil dopnamne,’ tenebuka, pil dolamuk ning ap ara, Amos el mi nabi Yesaya ati nyapdeibuk yupu ton, sekuk buku noutam tuba aubuk. Tonda, Yehuda mutuku tam ap, Israel ninye ulamik tam ap, sikti, taleamik deiyok nang, Raja-Raja arye ulamik ning seklamik buku ara, el si, ‘Buku Sejarah Raja-Raja Israelʼ, sekik. Ara, sik ulamik ning nukna ati, sekuka delilamik buku noutam sekeibik. Aning nirya bikilina ati, asukumuk dipdenamlume.

³³ Ura, aminyan talak ara, Raja Hizkia dibukba, el nong dobuka weina ara, Israel nang taleamik ninye deiyok nang weilamik sukum bukni, minop talak Israel mutuku taleamuk deiyoknye Raja Daud ap, elce deiamukba, dadeipdanin yangalamik nang weilamikakuk, el babye amutuku kon tam binuka weibik. Raja Hizkia dibukura, atalak ara, sik Yerusalem mutuku ulamik nang ap, Yehuda tam mutuku ulamik ninye arye, el Raja Hizkia ati, “Teleb aryuk dadipnalyame,” nyabuka, weik arye si erebik. Winibikba, el akunum dibuk talak ara, Hizkia elce deiamuknye, Manasye birye el li koproba pununa ati, Raja kibukce, amutuku taleamuk.