2 Tawarikh 31 - Eipomek

Raja Hizkia birye, Allah el si eren aik pil dona ati, “Wininamlume,” nyabuk yupu

¹ Kaplin Kwalina pil akunum winibikce, adin ning akunum kwalibuka dibik talak ara, anang nirya ara, Yehuda tam mutuku, sik yuk-yuk ulamik touk tamubuka biyik. Winibikopura, ninye urasin atonun ubuka memepdeiamikce, “Nun ni koproba melipsilyame,” nyabuka, talye ning bukni, isa si erelamik ning nirya ara, ulubuka batakik. Tonda Asyera isa kil, el urasin atonun ubuka, memepdeiamikce, si erelamik ning nirya ara, dalubuka batakik. Winibikopura, isa si erena ati mesba-mesba memebuka, kintinip deiamikak nirya ara, uluplobikce, sice kibuka batakik. Ara, Yehuda tam mutuku noutam nirya bukni, tonda yuk asik ap, tonda Benyamin yala nang ulamik mutuku ap, Efraim yala nang ulamik mutuku ap, Manasye yala nang ulamik mutuku ap ara, sik anang nirya, sik tam mutuku babye, anirya atonun winibik. Winibikce, tamubuka anang nirya ara, sik ulamik mutuku uk, yuk-yuk tamubuka biyik.

² Winibikopura, Raja Hizkia birye, Allah el si eren aik pum tam pil dona deiyok nang, sik imam-imam nang ap, tonda, sik pil melin nang, yuk Lewi yala nang ap, sik yuk-yuk bukni, sik yupa yuk-yuk pil dolamik touk bokdeibuk. Atonun ton, sik imam-imam nang babye, pil dolamik touk, sik yupa yuk-yuk bokdeibuk. Winibuka deice arye, sik imam nang ap, Lewi yala nang ap, sik yupa yuk-yuk tamubuka wibukce, sik pil don nang ati arebuk. Sik pil talebuka donamik ning ara ani. Ara, ‘Allah arye nun malye winin ning kilipnamsilʼ tenen, kam ning obuka, uku dongon ning ap, tonda ‘Allah ap, nun ap, dukdongobuka teleb unamapʼ tenen ati, Allah aren pil don nang ap, Allah el yupu keken talak pil don ning ap, bokuka arebuk. Tonda, Allah el si eren aik bublan dam arye, ‘Allah ati si erebuka kinamakʼ tenen, Allah ati si erebuka kin mot nyan ning ap, Allah ati, “Anda pia teleb ulyame,” nyabuka, el si eren yupu nyan ning ap, bokuka arebuk. Ara, Allah el si eren aik pum tam, tonda el aik bai tam, yuk-yuk pil don nang ap nirya ara, kintinip deibukce, “Winipnamlume, wininamlume,” nyabuka, anang ati, sik pil nirya, yuk-yuk bokuka arebuk.

³ Raja Hizkia bira, ‘Allah arye nun malye winin ning kilipnamsilʼ tenen, domba ato ning obuka, uku dapnarye, Allah si eren ati arelyangan talak ara, el weilamuk domba ato ning dobukapnarye, asum-asum nirya beren tam babye, sintam babye, batakna kumce, yuk-yuk arelyangalamuk. Tonda aning atonun, Allah arye, “Asum ara mem sum anya arye, talye pil dona kumce, dikdik sebuka, na siuk erepnamnulume,” nyapdeiamuk sum, Sabat sum deice arelamik ning ati, tonda, winiryuk wala kipne talak ap arelamik ning ati, Raja Hizkia birye arelyangalamuk. Tonda, min talak Allah arye, “Wininamlume, apil donamlume,” nyapdeiamukba, Musa birye sekeiamuk buku noutam nyapdeiamuk atonun, yuk deiyok talak ap, weik sum ap, pil don ning nirya babye, Raja Hizkia birye, atonun ubuka arelyangalamuk.

⁴ Aninguk kum bukni, Raja Hizkia birye, Yerusalem mutuku ulamik nang nirya ati nyabuk, “Allah si eren aik pil talebuka donamak nang, sik imam nang ap, sik pil melin nang, Lewi yala nang ap, sik dolona ati, yuk aren ning ton boyanuka arelyanganamlume. Winipmunyeba, sik adeiyok nang arye, Allah el si eren aik pum ara, diksukum pil talebuka donamake. Tonda, winipmunya deice arye, sik anang arye, yuk talye ning tenena kumce, amambul piluk tenebikirye, teleb ubuka apil talebuka donamake. Aning ara, Allah Yahweh arye, ‘Wininamlume,’ nyapdeibukura, ‘Musa birye sekamuk buku noutam aubuk ninguk atonun, dukdongobuka wininamake,’ nyapdeiamuk ninguk winilamik.

⁵ Ura, Raja Hizkia birye, “Wininamlume,” nyabuka, amutuku nang ati yupu akunum nyapdeibukopura, Allah ati aren ning nirya ara, Israel nang, sikce Allah el si eren aik dam boyanaba, imam nang arye anyaik pum noutamuk delilamik. Aboyangalamik ning ara, sik wa wibuka koulamik ning, nong minop upni ning nirya ara, pia teleb ninguk wibuka boyangalamik. Aning ara ani. Terigu duk ap, anggur duk teikukabikce, kanye wangalamak anggur mek ap, minyak zaitun ap, mong el mek ap, arelyangalamik. Tonda, yuk-yuk yala ning wa wilamikce, koubuka lilamik ning nirya noutam arye, minyuma ning takubarye persen (10%) ton bokuka kintinipnarye, aning nirya ap, Allah si erena ati, boyanuka arelamik.

⁶ Yehuda mutuku noutam ulamik nang bukni, weik asik dolamik noutam ulamik Israel yala nang ap, Yehuda yala nang ap nirya ara, sik weilamik domba basam ap, sapi basam ap, ton bobukapnarye, sik ni koproba Allah, el si Yahweh ati arelamik ning ara, sik ning koproba uk boknarye, boyanuka arelyangalamik. Tonda, yuk aren ning babye, weik tonun arerilyangalamikba, sik aning delilamikak ara, weik tonun welebuka pia weik balamuk. Anye arelamik ning nirya ara, sik ni koproba Allah atibuk arelamik.

⁷ Awinilamik ning ara, mitik tonun kume. Sikce deiyok koubuka, aning arelyangalamik talak ara, winilye wala deice, deiyok koubuka arelyangalamna ani, wala tekbarye deice akunum kipneura, bataklamik.

⁸ Arelyangalamik ning ara, pia weik kibukba, Raja Hizkia ap, el amu tam pil dona deiyok nang ap, sik nirya arye eibuka bikikce, Allah ati, “Telebe,” nyabuka, el si erebik. Tonda, Allah el mapu, Israel mutuku ulamik nang nirya ati, ‘Allah arye Israel nang ati, teleb kipdeipnamleʼ tenen, teleb yupu nyapdeibik.

⁹ Allah el si erena ati arerelyangalamikba, aning yala-yala nirya, pia weik uamuk ning eibikce, Raja Hizkia birye, Allah el si eren aik pum tam, pil dona deiyok nang, sik imam nang ap, sik pil melin nang, sik Lewi yala nang bukni, yuk nang ati asipdeyuk. Elce, “Yata deiyok ati, Allah ati aren ning ara, pia weik tuba aupmal do?” nyabuka asipdeyuk.

¹⁰ Asipdeyukbuk, ninye si Zedok birye deiamukba, deipdanin yangalamikce deiamiknye, el si Asarya, elda sik imam nang weik deiyoknye ulamuk anya arye, elce nyabuk. “Kume, amutuku unyak nang arye, Allah el si Yahweh, el si eren aik dam, teleb aren ning arelyanganyak talak ara, nun din ning ara, pia weik tonun usulule. Weik tonun ton tuba tabakuka aresiliba, atuba usulule. Aning nirya deiyok ara, ani. Ara, Allah arye el ‘Naʼ tenen nang, sik Israel nang, sikti, weik tonun meliplirye, tabakuka areliba, sikce arepsikiba, dolonyabe,” nyabuk.

¹¹ Nyabukura, Raja Hizkia birye, Allah el si eren aik pum tam pil dona deiyok nang, sik imam-imam nang ap, sik pil melina ati Lewi yala nang ap ati, “Winipnamlume,” nyabukba, anang arye arin ning delin aik ton kintinibuka dobik. Ara, Allah Yahweh, el si eren aik pum tam arye, adin ning delin aik dobik.

¹² Akunum dobuka kintinibikura, anyaik pil dona ati melin nang, sik Lewi yala nang arye, amutuku nang arye arelyangalamik ning ap, tonda sik ‘Naʼ tenen ning, wilibuka dana tam bokuka arelamik ning ap, sik min yuma ning noutam arye bokuka, takubarye persen (10%) bokuka, Allah ati arelamik ning ap nirya ara, anyaik noutamuk delilamik. Apil kum batalamik, teleb ubuka pil dolamik. Anyaik delilamik din ning ati, kalikinanye bira, Lewi yala nang arye deiamiknye, el si Konanya, elce kaliklamuk. Tonda, el amutuku tam melibuka kaliklamuknye bira, el weit koproba, el si ara Simei ton wipdeiamikba, sik bitinye nang arye, apil kaliklamdik.

¹³ Tonda, sik abitinye nang arye deiyok kiamdikba, Lewi yala nanguk bukni, sik amu tam yuk nang, 10 nang ton ap, tabakuka pil dolamik. Sik anang si ara ani. Ara, Yehiel ap, Asasya ap, Nahat ap, Asael ap, Yerimot ap, Yosabad ap, Eliel ap, Yismakya ap, Mahat ap, tonda Benyanya ap, sik winibuka nang apil dolamik. Apil dolamik ning ara, Raja Hizkia ap, Allah Yahweh el si eren aik kalikna deiyoknye, imam nang, sik weik deiyoknye Asarya ap, sikce, “Winipnamlume,” nyapdeipdik touk, apil talebuka pil dolamik.

¹⁴ Lewi yalanye tonok, el si Yimna, el mi Kore bira, Allah si eren aik bublan keting panalyangan tam botcamik ning ara, elce kalikna deiyoknye kiamuk. Ati ara, sikce, “Israel nang arye, sik kanye aryuk, ‘Allah arepnuyapʼ tenen, Allah Yahweh ati, boyanuka arelamik ning nirya ara, dopropnarye, bobinopura, Allah el si eren aik pum tam pil dona deiyok nang, sik imam-imam nang ap, sik pil melin nang, Lewi yala bukni yuk nang ati, bokuka arenamlume. Ara, Israel nang arye, ‘Aning nirya ara, Allah el ninguk ululeʼ tenen, kintinibuka arenamak ning ara, ancuk bokuka delinamlyame,” nyabuk touk winilamuk.

¹⁵ Yuk sukum asik dobuka ulamik mutuku babye, imam nang, sik unak nirya ati ara, Kore biryuk deiyok kiamuk bukni, yuk nang ton el melina ati ara, Lewi yala nanguk ton wiamik. Anang sik si ara ani. Ara, Eden ap, Minyamin ap, Yesua ap, Semaya ap, Amarya ap, tonda Sekhanya ap, sik anang arye, batakna kumce, pia melibuka kaliklamik. Winilamikba, sik boyanuka arelamik din ning nirya ara, sik anang aryuk bokuka, Lewi yala nang arye, wisi nang babye, wel nang babye, sik pil areamikba, talebuka dolamik atouk ubuka, wipnarye yuk-yuk bokuka arelamik.

¹⁶ Tonda, Israel nang arye deiamikak, dadeipdanin yangalamikce, ulamik nang, ninye si seklamik buku noutam akunum sekamik nang ara, sikti, ton bokuka areamik. Ara, talye nang kum bukni, ‘Allah Yahweh, el si eren aik pum tam pil donamakʼ tenen, akunum wiamik nang ara, sik umur keting tamun tiga puluh (30) tahun arye, eitam kiamne nang ati ara, adin ning bokuka arelamik. Anang ara, Allah el si eren aik noutam wekuka, ton nang pil donmana ani, bataknopura, ton sum ara, ton nang punubuka pil dolamik. Aning ara, asum-asum nirya winina uk ulamik. Sik anang apil dona ati ara, minop talak arye, “Ayupa ara, apil talebuka donamlume. Ayupa ara, apiluk talebuka donamlume,” nyabuka, pil deiyok areamik touk ubuka, taleamikce dolamik.

¹⁷ Tonda, adin ning bokuka arena deiyok nang arye, sik imam nang arye deipdanin, yanamik nang yuk-yuk, ninye si seken buku noutam seklamik touk ubuka, aimam nang ap, sik mapu silip ap ati, bokuka arelamik. Tonda aning atonun ton, sik Lewi yala nang, keting tamun duapuluh tahun (20) eitam kiamne nang, apil talebuka dolamik nang ati, ton bokuka arelamik. Ara, minop talak arye, “Ayupa ara, apil talebuka donamlume. Ayupa ara, apiluk talebuka donamlume,” nyabuka, pil deiyok areamik touk kibuka, taleamikce dolamik nang babye ati, aning bokuka arelamik.

¹⁸ Tonda, sik anang ap, sik kilapu ap, sik mapu ap, tonda sik kayapu neika ulamik nang nirya ara, si sekikce, adin ning bokuka arelamik. Ara minop talak arye, ‘Sik aninye arye atalak nirya ara, adiparyuk memebuka unyakce, Allah el piluk talebuka donamakʼ tenen, ninye si seken buku noutam arye sekuka deibik nang nirya dololamik. Deiyok ara, anang nirya ara, ‘Kume, nun adiparyuk, Allah el piluk talebuka pia donamabʼ tenen, aninguk tenibuka, apiluk talebuka ulamik anya arye, atalak ara, adin ning ton bokuka arelamikak, anang arye dololamik.

¹⁹ Ura, Harun birye deibukba, dadeipdanin yanamikce, imam pil talebuka dolamikce, ulamik mutuku asik noutamuk, tonda amutuku asik dobuka ulamikak bukni, mitik tonun bai tam daulamik nang babye wipdeiamikba, sikce adin ning ton bokuka arelamikba dololamik. Ara, sik imam nang ap, sik Lewi yala nang ap, sikti, din arelamik ning boknarye, yuk-yuk bokuka delilamik. Ara, minop talak arye, ‘Sik aninye arye atalak nirya ara, adiparyuk kintinibuka unyakce, Allah el piluk talebuka donamakʼ tenen, ninye si seken buku noutam arye sekuka deiamik nang ati nyababe. Sik Lewi yala nang noutam si sekuka deiamik nang atibuk, adin ning bokuka arelamik.

²⁰ Asukum arye deice tam sekupe ning nirya ara, Raja Hizkia birye, Yehuda tam mutuku nang taleamuk talak ara, pia dipkoprob piluk dolamuk. Tonda, elce malye una kumce, diksukum piluk dolamuk. Winilamuka deice arye, Allah arye elti, kanye deiamuk.

²¹ Raja Hizkia, elce winilamuk ning nirya ara, nonguk ulamukba, pia teleb ubuka winilamuk. Deiyok ara, ani. Ara, Raja Hizkia birye, ‘Allah el si eren aik ati pil donamak ning nirya ap, tonda, Allah arye, “Aning-aning nirya talebuka unamlume,” nyapdeiamuk ning ap nirya ara, pia moubuka talepnirye, Allah el tibuk diba tenibuka, talima kanye nirya dobuka, Allah el deice uk kanye delinamane,’ tenebukce, diksukum piluk talebuka dolamuk. Ati, Allah arye elti, kanye delilamuk.