2 Tawarikh 30 - Eipomek

Kaplina Kwalya kintinilina ati, sekik yupu

^1-5 Kaplina Kwalya kwalilamik talak ara, keting tamun deiyok koun talak, wala tonoknye tiklye talak, tanggal 14 deice aryuk, sik Israel nang nirya arye, Kaplina Kwalina kwalilamik. Bukni, nabi Hizkia kuramu talak ara, ton kum kwalibik. Deiyok ara, apil dona deiyok nang ati, sik imam-imam nang ara, teleb kubuka kum kintinibik. Ara, imam nang ara, ‘Allah el si eren aik wekelbinamap ati, nun ap, anyaik ap ara, pia teleb upnamleʼ tenen, apil dona mitik tonunuk kum teleb kipdeibikce, kum kintinibika ati, Allah el si eren aik pil babye, akwalya kwalina pil babye nirya ara, sikce kum dopmanto kibik. Tonda, Israel nang nirya babye, Yerusalem mutuku min kum bulubuka yayika ati, akwalya kwalin pil dopmanto kum kibik. Ati, Raja Hizkia ap, el amu tam pil don nang ap, tonda Yerusalem mutuku ulamik nang ap, sik nirya bulubuka yupu talibikce, “Aketing tamun bukni, wala bitinye tiklye talakuk, Yerusalem mutuku yamunce, nun nirya arye, Kaplina Kwalya kwalibuka neika dipnamabe,” nyabik. Sik nyabik yupu ara, sik amutuku ulamik nang nirya kekebikce, kanye deibik. Winibika ati, Raja arye surat sekuka, elce taleamuk tam, Yehuda mutuku noutam ulamik nang ap, Israel nang ap, Efraim yala nang ap, Manasye yala nang ap, tonda Dan yala nang bukni, outam dabu tam arye dipdongobuka, binamika ani, arah selatan ulamik nang ap, iknapye tam ara, Bersyeba mutuku ulamik nang ap, tonda sik Israel yala nang nirya bukni, Allah el aik dam, Yerusalem mutuku yakceba, Kaplina Kwalya kwalibibirye, Israel nang arye, ‘Nun ni Allah, el si Yahweh, elti, kipnamapʼ tenen, sekuka deibik. Ara, Allah arye, Musa el deice, “Aning-aning nirya ara, wininamlume,” nyapdeiamuk touk, wininamak atia. Tonda, yata wiribuka keting tamun deice arye, atonun ning nirya ara, pia kum winilamika ati, ‘Aning nirya ara, wini talak winipnamapʼ tenen, ayupu nyabuk.

⁶ Raja Hizkia birye nyapdeibukba, el amu tam pil don nang arye, surat akunum sekuka kintinip deibikceura, ‘Asurat bobinamakʼ tenen, ninye wipdeibikba, “Sikce asekeibab surat bobuka, Yehuda mutuku unyak nang ap, Israel mutuku unyak nang nirya ap, sik unyakak nirya bobuka, laka nyalbilulume,” nyabik. Asurat noutam sekeibuk yupu ara ani. Israel nango! Asyur mutuku nang arye, anggunti malye kebuka, pera mutuku bobinuka taleamsikba, Allah arye akunum lyepropsukba, apera mutuku arye batakuka, yanganmalum nang nirya ara, wini talak anggun apu yapu, Abraham ap, Isak ap, Yakub ap, sik nirya arye, si erelamik Allah Yahweh, el damuk tamubuka yamunyeba, elce anggunti melipnamsile.

⁷ Anggun apu yapu nang, malye ulamik touk winina kume. Tonda, yuk Israel yala nang arye anggun ni Allah Yahweh arye, ‘'Winipnamlulume, aning ara, pia kum winamlume,” nyapdeiamuk yupu, moubuka kum talibuka ulamik. Sik malye ulamik touk, anggun babye winina kume. Allah arye anang wenena ati, weik kanye imun ning, sik deice deibukba, ikin weik ulamikba, yuk nang nirya eibikce, ‘Se aning ara, pia ikin weik unyakeʼ tenen, mambul kanye tenelamikce, lukulana uk ulamik. Anggun wini talak ululum nang babye, aning akunum eiplum ati, anggun babye winina pia meme.

⁸ Anggunda, anang arye kanye moubuka tenina nirya kum arye, ‘Allah arye nyasilye ning ara, anggun apu yapu arye, ‘Nun likeʼ tenen, el yupu kekena kumce, sik kisok ara, keil arye kat ulamle touk, ulamik ning ara, anggun babye winina meme. Bukni, Allah arye nyabuk ning moubuka talipmunyakarye, Allah Yahweh, el amu tam teleb kibuka unamlulume. Ati anggun nirya ara, anggun ni Allah Yahweh, el si eren aik ati, ‘Anyaik ara, ‘Naʼ tenen aik. Anyaik ara, nanguk ulule,’ nyabuka, akunum kintinibuka deiamukak, Yerusalem mutuku tamubuka tuba-tuba pia yanganamlulume. Tonda, Allah yupu kekebuka unmunce, elce nyapsuk touk, teleb upmunce, el siuk erenamlulume. Winimunyeura, Allah arye anggunti, yu weik akunum tenesilye ning ara, bataknamsile. Tonda, kanye deipnamsile.

⁹ Anggun tamubuka, Allah Yahweh el dam yatumce, elce, “Wininamlume,” nyasilye touk, umunyeura, teleb uptume. Winiptum toura, anggun kayapu nang ap, anggun mapu ap nirya ara, anggun mal olan nang arye tapu koubukabikce, tomobuka wenen aik dongobikak, unyak nang nirya ara, abobinuka deibik nang, sik talima Allah arye pil doptuba, sikce tapu koubik nang ati, bico uptuba, tamubuka lopdeipsitingba, sik mutuku tamubuka asukumuk yanganamake. Anggun ni Allah el si Yahweh ara, ninye ati bico teneplirye, nun melina ati, teleb kilina deiyoknye ulule. Anggunce Allah el dam yatumura, elce anggun kum bataksutue. Dipkoprop dopropsilirye, melinamsile.” Raja Hizkia birye nyapdeibukba, ayupu nirya ara, surat deice arye sekik.

¹⁰ Atalak ara, asurat bobana ati, wipdeipmek nang ara, aning bobuka, anyasik-anyasik dolamikak nirya bobiyikce, laka nyabik. Ara, Efraim yala nang tam mutuku ap, tonda Manasye yala nang tam mutuku ap, nirya laka nyalbiyik. Tonda, Zebulon yala nang tam mutuku wililamikak, dabu tam ulamik nang babye, binuka nyabikura, ayupu kekebikce, amutuku ulamik nang arye, “Kume, anyapmasilam ning ara, talye yupu uka,” nyabuka, malya kibuka nalilamikce, akutubuka batakik.

¹¹ Ton tam nang arye winilamik bukni, Asyer yala nang ap, Manasye yala nang ap, Zebulon yala nang ap, ton tam nang ap ara, ‘Se, dipkoprob ninguk nyapmasiakʼ tenen, talima namin kibuka, ‘Yerusalem mutuku binamapʼ tenen, wibuka kintinibik.

¹² Aning atonun ton, Yehuda tam ulamik nang ara, Allah arye sik talima pum tam pil dobukba, sik nirya ara, tonok kanye uk bobikce, ‘Dipkoprob Allah Yahweh el tenelirye, nyapsilye ninguk moubuka talibibirye unamabeʼ tenen, kintinibik. Utenebikce, Raja Heskia ap, el amu tam pil don nang ap, sikce nyapmik yupu uk, ara Allah arye nyabuk ninguk moubuka kekebik.

Kaplina Kwalya kwalibik yupu

¹³ Aketing tamun bukni, wala bitinye ning akunum kibuk talak ara, ninye yupa pia weik, dana-dana tam arye bulubuka, Yerusalem mutuku ak yayikce, ‘Nena Kum Roti kwaning dina ati, kwalya kwalipnuyabe,’ tenebikce, kwalya kwalina sum kibukba, neika kwalibuka dibik.

¹⁴ Atalak noutam ara, isa si erena ati, kam ning obuka, uku dongona ati kintinibuka deiamik ning, el si mesba-mesba ap, tonda isa morona ati, kin-kin tong teleb nyan ning bobuka, uku dalyangalamikak ton, kwinibuka batakik. Ara, Yerusalem weik asik noutam wa uk ning nirya ara, ulubuka batakik. Winilamikce, amesba-amesba Yerusalem mutuku dobuka deiamik ning nirya ara, dobuka Kidron mutuku, lu sukumak donokik.

¹⁵ Winibikce, daulamika ani, abitinye wala noutamuk bukni, tanggal empat belas ara, sik Kaplina Kwalya kwalina ati, domba basam ton obuka boyayik. Imam nang ap, sik pil dona ati melin nang, Lewi yala nang ap ara, sik babye malye winin ning tuba winipmuk ning ara, sik alye weik ubuk. Winibukba, sik anang ara, ‘Allah el piluk donamap ati, pia teleb mingne nang upnuyabeʼ tenen, teleb kipdabirye, kam ning dobuka, Allah el si eren aik dam, aopmik kam ning bobinuka, uku dongolyayik.

¹⁶ Sik anang ara, Allah si eren aik wekel biyikura, Allah arye nyapdeibukba, Musa birye, ‘Aning-aning nirya ara, wininamlume,’ nyabuka sekeiamuk ning uamuk touk, sik imam nang yuk-yuk binuka, ‘Allah si erena pil dopnuyapʼ tenen, tikmek. Sik Israel nang arye, aning bobuka binmekce, domba ato ning obuka, ining ara Lewi yala nang arye dobuka, imam-imam nang arebik. Arebikba, sik imam nang arye, aining ara, mesba deice purupdonokik.

¹⁷ Ura, asum bulubuka wekmek Israel nang nirya ara, sik anoutam arye, bokuka ton tam nang ara, Allah arye, ‘Na dam yakana ati ara, winipnamlulume,’ nyabuk touk kibuka, teleb kum kipdeipdanmika ati, sik anang arye, Kaplina Kwalya kwalina ati, domba basam boyanmik ning ara, ‘Allah Yahweh, el ninguk arepnamabʼ tenen, sikcuk adomba basam kum opmanto unmek. Ati ara, sik Lewi yala nang aryuk, anang sik domba basam boyanmek ning ara, abasam melibuka obukabikce, Allah ati arenmek. Deiyok ara, sik kayapu nang, sik bidamnye teleb kum kipdeipmek nang arye, apil atonun ara, kum dopmanto unmek atia.

¹⁸ Anyuk kum bukni, tonda, Efraim yala nang ap, Manasye yala nang ap, Isakar yala nang ap, Zebulon yala nang ap, sik ayala nang wilibuka ton yanmik nang kan-kan, weik tam ara, Allah el dam yangana ati, teleb un ning ara, sik min kum mingne kipdeipdanamikcuk yanmika ati, sik ayala nang nirya ara, Kaplina Kwalya ati, domba basam obuka dina ati boyanmek ning ara, min arye winilamik touk, kum winipmekce, talye luba kibuka, yana dibika ati, Raja Hizkia birye, sik malye upmek ning ati, Allah morobuka nyabuk. “Se, nun ni Allah Yahweh, anda pia teleb ulyamnye ati, nun kayapu nang arye, malye winibik ning nirya, namin kibuka, kum kipdeipsutume.

¹⁹ Ara, talye nang kum bukni, sikce kanye talima nirya delinyakce, Nun ni Allah, nun apu yapu arye si erelamkiknye, Allah Yahweh ance, “Na si eren aik dam yangana ati ara, mengne kina ati, winiplulume, winiplulume. Aning winina ara, kum bataknalume,” nyabuka, nyasilyam ning ara, ‘Aninguk winipmamabe,’ tenenyak ning ara, bikmince, namin kipmince, kum daneiplyame. Bukni, nun ni Allah, anang ara, sik bidamnye teleb kilina ati pil ara, teleb min kum winipmakirye, kum kintinipmacebuk, kanye pum tam aryuk tenebuka yanmakirye, Kaplina Kwalina ning, talye luba kibuka dipmake. Ati, ance sik malye kibik ning ara, namin kipmince, kum daneiplyame,” nyabuka, Hizkia birye morobuk.

²⁰ Raja Hizkia birye, Allah ati, ayupu nyabuka morobukura, Allah kekebukce, sik ayala nang nirya ara, sik malye winipmek ning namin kibuka lyepdobukce, anang ati tamubuka teleb kipdeibuk. Sik deice ikin ning deibuka kum wenebukce, anang ati tamubuka teleb kipdeibuk.

²¹ Like tekbarye sum nirya ara, Nena Kum Roti Kwaning din sum kibukba, Yerusalem mutuku bulubuka yangana uk ulamikba, Israel yala nang ara, lik una kum arye, pin-pin kanye bobuka, kil-kil deice aryuk, Kaplina Kwalya kwalibuka dilamikce ulamik. Asum-asum noutam nirya ara, sik Lewi yala nang ap, imam nang ap, sikce dipkoprob Allah Yahweh, el si eren mot nyalamikce, el si erelamik. Tonda, Allah Yahweh, el si erena ati kintinibuka deiamik mot nyan ning deice arye, el si alat-alat musik kecapi ap, simbal ap, terompet ap, alelim nyan ning deice arye, mot ton nyanmekce, Allah ati si erenmek.

²² Sik Lewi yala nang ara, Allah el si erena ap, Kaplina Kwalya kintinin ning ap, atalak nirya, aning kekebuka, pil dona ara, kel weik bikamik ati, sikce deiyok koubuka, Allah el si erelamik. Winilamika ati ara, Raja Hizkia birye, kanye weik deibukce, sikti, “Telebe,” nyabuka, talima kwadina yupu nyapdeibukba, kekebik. Akunum tekbarye deice, sik deiyok nang arye areamik touk, anang nirya arye, weik kwalya kwalibuka dilamik. Ara, Kaplina Kwalya sum kipniba, asum si erena ati ulamik. Tonda, sik apu yapu nang arye, si erelamik Allah Yahweh ati, kam ning obuka arelamikce, ‘El ap, nun ap, teleb kibuka neika unamapʼ tenen, “Telebe,” nyabuka, si erelamik.

²³ Winibuka daulamika ani, tekbarye sum akunum ubukba, sik anang nirya arye, ‘Kume, Kaplina Kwalya winibap touk, tonap like tekbarye deice arye tuba winipnamabe,’ tenebikce nyabik. Nyabikce, sik anang pia kanye deibikce, tonap dukdongobuka, tekbarye sum ton kibukura, Kaplina Kwalya ton kwalibuka dinmeka ani, sirya dakik.

²⁴ AKaplina Kwalya kwalilamik talak arye, sik kaplin kwalina ati, Raja Hizkia birye, yim sapi basam yupa pia weik seribu (1.000) ekor ap, domba basam ap, kambing basam ap, yupa weik, tujuh ribu (7.000) ekor ap, bulubuka deibukce, kintinibuk. Tonda, Raja Hizkia el amu tam pil don nang arye, yim sapi basam yupa weik, seribu (1.000) ekor ap, domba basam ap, kambing basam ap, yupa weik, sepuluh ribu (10.000) ekor bulubuka kintinibik. Akintinibik ning nirya ara, amutuku nang obuka dipnarye, Allah si erenamik ati bulupdeibik. Atalak ara, imam pil don nang, yupa pia weik arye, ‘Allah dam yakana ati, tonda el piluk donamapʼ tenen, sik nong mek likuka, teleb ubuka kipdeipdayikce, kintinibik.

²⁵ Yehuda mutuku tam ulamik nang ap, imam nang ap, Lewi yala nang ap, tonda utam dabu tam arye yanamek Israel tam ulamik nang ap, tonda ninye asik nang bukni, Israel mutuku ap, Yehuda mutuku ap, yanuka ulamik nang ap, sik nirya arye, pia kanye deibik.

²⁶ Atalak noutam ara, weik asik si ara, Yerusalem mutuku noutam arye, kanye weik lon pil dolamik. Deiyok ara, Daud el mi Salomo birye taleamuk talak arye, dipdongobuka atalak noutam nirya ara, atonun kaplin kwalya kwalin ning ton, Yerusalem mutuku noutamak, pia kum winilamik bukni, Raja Hizkia ulamuk talak aryuk, akalya kalilamik.

²⁷ Sik imam nang ap, sik pil don ati melin nang, Lewi yala nang ap, sikce Allah ati, “Se, nun ni Allah, ance amutuku unyak nang nirya ara, teleb kipdeiplyame,” nyabuka morobik. Nyabuka morobikura, pia teleb sukum, im deice pia teleb lek pia teleb ululnye Allah arye, sik anang patabuk ati, morobik ning ara, akunum kekebuka melibuk.